Woossiyoogeenne Wotti Denttidi Qoppiyoogee Mishettidi Haggaaziyaageetussi Koshshiyaaba
1. Yesuusi ba waanna oosuwaa aggennaadan maaddidabay aybee?
1 Issi galla omarssi Yesuusi harggida asaa pattiiddinne xalahetakka asaappe kessiiddi takkiis. Wonttetta gallassi erissiyo ashkkarati a demmidi, “Asai ubbai nena koyees” yaagidi, haꞌꞌikka maalaalissiya oosuwaa oottanaadan minttettidosona. SHin Yesuusi mishiraachuwaa sabbakiyo ba waanna oosuwaa oottiyoogaa aggibeenna. I, “Hegaa heeran de7iya hara katamata hinddite; taani hegankka qaalaa yootanau bessees; aissi giikko, taani yiidoogee hegaassa” yaagiis. Yesuusi ba waanna oosuwan xeelaa wottanaadan maaddidabay aybee? Maallado wonttimaattan denddidi woossiisinne wotti denttidi qoppiis. (Mar. 1:32-39) Nuunikka mishettidi haggaazana mala woosaynne wotti denttidi qoppiyoogee waati maaddana danddayii?
2. Nuuni ubbatoo mishettidi haggaazanau maaddana mala ay wotti denttidi qoppana danddayiyoo?
2 Wotti Denttidi Qoppiyoy Aybee? Asay ‘heemmiya asi baynna dorssadan hirggiyoogaanne eta maaddiyaabi baynnaagaa’ Yesuusi akeekiis. (Maa. 9:36) Nuunikka hegaadan, mishiraachoy asau ay keena koshshiyaakko wotti denttidi qoppana danddayoos. Wodee keehi eesoyiyaaba gidiyoogaa qoppana danddayoos. (1 Qor. 7:29) Nuuni Yihoowa oosuwaaninne a eeshshatun, Yihoowa Marakka gidiyo maataaninne nu moottan deꞌiyaageeti erenna, nuuni Xoossaa Qaalaappe tamaarido, alꞌꞌo gidida ayyaanaaban wotti denttidi qoppana danddayoos.—Maz. 77:11-13; Isi. 43:10-12; Maa. 13:52.
3. Nuuni awude wotti denttidi qoppana danddayiyoo?
3 Awude Wotti Denttidi Qoppanee? Issoti issoti Yesuusi oottidoogaadan, hegau injje wode gidida wonttimaattan denddoosona. Harati qassi xiskkanaappe kase omarssan wotti denttidi qoppiyoogee loꞌꞌo gidiyoogaa akeekidosona. (Doo. 24:63) Nuuyyo oosoy darikkokka, wotti denttidi qoppanau wodiyaa demmana danddayoos. Issoti issoti issisaa biiddi wotti denttidi qoppoosona. Harati qofay shaahettennan wotti denttidi qoppanau laaxaa shemppuwaa wodiyaa goꞌettoosona. Daroti guutta wodiyau gidikkonne, haggaazuwan shaahettanaappe kase wotti denttidi qoppiyoogee keehippe mishettidi xalan sabbakanau maaddiyoogaa akeekidosona.
4. Nuuni wotti denttidi qoppana koshshidoy aybissee?
4 Woossiyoogeenne wotti denttidi qoppiyoogee nuuni Yihoowayyo oottanau wozanappe koyanaadan, ayyaanaaban nu xeelaa loytti wottanaadaaninne sabbakanau murttido murttiyan sinttau suganaadan minttettees. Xoossau Waanna Oosanchay, Yesuusi wotti denttidi qoppiyoogan goꞌettiis; hegee nunakka goꞌꞌana.