Godaa Kahuwaa SHoobiyaa Woraqataa Hosppune 2n Asau Immiyoogaa Doommoos
1. Godaa Kahuwaa bonchanau shoobiyaa woraqataa asau immanay awudee, qassi layttan layttan ha zamachaa kiyiyoogau goꞌꞌay aybee?
1 Hosppune 2ppe 17 gakkanaassi layttaa giddon keehi dumma gididabau, giishin Kiristtoosa Hayquwaa Hassayiyo Baalau asaayyo shoobiyaa woraqataa immana. Hagaappe kase, koshshay deꞌiyo daroti ha zamachan layttan layttan shoobbin yiidosona. Leemisuwau, Godaa Kahuwaa bonchiyo gallassi issi maccaasiyaa macara biiruwaa silkkiyaa dawalada hagaadan gaasu: “Taani biron soo gelays, shin penggiyaa dooyiyo wode shoobiyaa woraqatay saꞌan deꞌees. Taani baanau koyays; shin shiiqoy aappun saatiyaanakko erikke.” He shoobiyaa woraqatan he qofay awan deꞌiyaakko ishay iyyo yootiis. He maccaasiyaa haasayaa wurssettan, “Hachi omarssi he sohuwaa taani baana!” yaagaasu.
2. SHoobiyaa woraqataa asau immiyo wode woygana danddayiyoo?
2 Hegaa Waatidi Oottanee? Nu moottaa oottidi wurssanau deꞌiya wodee guutta gidiyo gishshau, haasayaa qanttiyoogee loꞌꞌo. Hagaadan gaana danddayoos: “Saro aymalee? Alame yuushuwan layttan layttan bonchettiya keehi dumma gidida baalaa Wogaa gallassi, Hosppune 17n intte soo asay nunaara bonchanaadan ha shoobiyaa woraqataa immanau koyeettees. [SHoobiyaa woraqataa keettaawau imma.] He gallassay Yesuusa hayquwaa bonchiyo gallassa. Kiristtoosa wozoy nuna goꞌꞌiyo ogiyaa qonccissiya, Geeshsha Maxaafaappe shiiqiya haasayaa miishsha qanxxennan ezggana danddayeeta. Nu heeran he shiiquwaa awan, qassi aappun saatiyan shiiqanaakko ha shoobiyaa woraqatay qonccissees.”
3. Nuuyyo danddayettida keenan daro asaa shoobbana danddayiyoy ayba ogiyaanee?
3 Gubaaꞌiyaa moottay aaho gidikko, asi son baynna keettan eti demmana danddayiyoonne hara asi beꞌennasan shoobiyaa woraqataa wottidi baanaadan cimati inttessi yootana danddayoosona. Zaarettidi oychiyoogeeta, dabbota, inttenaara oottiyaageeta, inttenaara tamaariyaageetanne intte eriyo hara asata shoobbana bessees. Qeeraa gallassinne Woggaa gallassi shoobiyaa woraqataa asau immiyo wode, injjetiyo wode ubban maxeetetakka immite. Hosppuniyaa aginan kaafiya aqinye gididi, ha ufayssiya zamachan kaseegaappe daruwaa oottana danddayeetii?
4. Koshshay deꞌiyoogeeti Kiristtoosa Hayquwaa Hassayiyo Baalaa bonchanaadan nuuni koyiyoy aybissee?
4 Koshshay deꞌiyoonne shiiquwaa yiyaageetussi hegee loꞌꞌo markkatetta gidana! Yihooway wozuwaa giigissiyoogan siiqido gita siiquwaabaa eti siyana. (Yoh. 3:16) Xoossaa Kawotettay asaa naata waatidi goꞌꞌanaakko eti tamaarana. (Isi. 65:21-23) Eti Geeshsha Maxaafaa xannaꞌanau koyikko, mokkiyaageetuyyo yootanaadankka shoobettana. Wozana suure gidida daro asati ha zamachan nuuni yootiyoobaa siyidi, Kiristtoosa Hayquwaa Hassayiyo Baalaa nunaara bonchanaadan Yihoowakko woossoos!