Mammottoppite
1. Timirtte keettan markkattanau ay koshshii, aybissi?
1 Haraati tana toochana giidi yayyiyoogan timirtte keettan markkattanau mammotti ereetii? Timirtte keettan markkattanau xala gidana koshshees; ubba qassi dungguuxa gidikko keehi xalana koshshiyoogee erettidaagaa. Yaatin, hegau inttena aybi maaddana danddayii?
2. Timirtte keettan markkattiyoogaara gayttidaagan, akeekancha gidiyoogaa waati bessana danddayettii?
2 Akeekancha Gidite: Timirtte keettaa bessiya ogiyan intte haggaazo moottadan xeellana danddayiyaaba gidikkokka, sooppe so biidi haggaaziyo wode oottiyoogaadan, ubba asaakka ayyaanaabaa haasayissana koshshiyay inttena giidi qoppana bessenna. Awude haasayana bessiyaakko kuuyiyo wode akeekancha gidite. (Era. 3:1, 7) Intte tamaariyo wode tobbiyobay woy intteyyo imettiya so oosoy intte ammanuwaabaa qonccissanau hanotay injjetanaadan oottana danddayees. Woykko inttenaara tamaariya issi naꞌay, intte issi issibaa oottennay aybissakko oychana danddayees. Issi issi Kiristtaaneti, Yihoowa Markka gidiyoogaa timirttiyaa doommiyo wode bantta asttamaaretussi yootoosona; qassi nu ammanuwaabaa qonccissiya xuufeta immoosona. Haraati qassi, banttanaara tamaariya naati issi issi oyshata denttanaadan qoppidi, xuufeta deskkiyaa bolli wottoosona.
3. Timirtte keettan markkattanau waatidi giigettana danddayeetii?
3 Giigettite: Intte giigettiyaaba gidikko, xala gidana danddayeeta. (1 PHe. 3:15) Hegaa gishshau, denddana danddayiya dumma dumma oyshata, qassi hegaa waatidi zaarana danddayiyaakko kasetidi qoppite. (Lee. 15:28) Danddayettiyaaba gidikko, koshshiyo wode hegaappe xeellana mala, Geeshsha Maxaafaa, Akeekissiyoogaa giya maxaafaanne Yelagati Oychiyo Oyshaa giya maxaafaa, qassi meretaabaa yootiya issi issi xuufeta timirtte keettaa ekki biite. So asaa goynuwaa wode hegaa meezetiyo wodiyaa bazzanaadan inttena yelidaageetuyyo yootite.
4. Timirtte keettan intte markkattiyoogaa aggana bessennay aybissee?
4 Suure Xeelaa Oyqqite: Tumaabaa intte yootiyo wode ubban inttenaara tamaariyaageeti baceessana giidi qoppoppite. Issooti issooti intte xalatettaa gishshau inttena nashshananne, ubba intte giyoobaa siyana danddayoosona. SHin intte giyoobaa ooninne siyennan ixxikko, hidootaa qanxxoppite. Intte hegaadan oottanau maliyoogee Yihoowa ufayssees. (Ibr. 13:15, 16) “Kumetta xalan yootanaadan” maaddana mala Yihoowa ubbatoo woossite. (Oos. 4:29; 2 Xim. 1:7, 8) Issi uri intte yootiyoobaa siyiyo wode intte ay keena ufayttanaakko qoppite. Ubba he uri inttenaara Yihoowau oottiyaagaa gidana danddayees!