Intteyyo Danddayettida Keena Ubban Yihoowappe Tamaariiddi Deꞌeetii?

1. Yihooway timirttiyaa waatidi xeellii?

¹ Yihooway, nu gita “asttamaaree” nuuni tamaaridaageeta gidanaadan koyees. (Isi. 30:20) I ba bayra Naꞌaa medhi simmidi, tamaarissiyoogaa doommiis. (Yoh. 8:28) Addaamee makkali simmin, Yihooway tamaarissiyoogaa aggibeenna; ubba polo gidenna asaa naata siiquwan tamaarissiis.—Isi. 48:17, 18; 2 Xim. 3:14, 15.

2. Ha wodiyan ayba timirtte prograamee polettiiddi deꞌii?

² Ha wodiyan, Yihooway awudeegaappenne aadhiya ogiyan timirttiyaa prograamiyaa kaalettiiddi deꞌees. Isiyaasi hananabaa yootidoogaadan, alamiyaa yuushuwan miilooniyan qoodettiya asay “GODAA Beeta Maqidasee keexettido” leemiso gidida deriyaakko zulees. (Isi. 2:2) Nuuni he deriyaakko zuliyoy aybissee? Xoossaa ogiyaa tamaaranaassanne Yihooway tamaarissiyoogeeta gidanaassa! (Isi. 2:3) Haggaazo laytta 2010n Yihoowa Markkati 1.6 biilooneppe dariya saatiyaa Geeshsha Maxaafaa tumaa asau markkattiyoogaaninne tamaarissiyoogan aattidosona. Hegaa bollikka, 105,000ppe dariya gubaaꞌeti alame yuushuwan saaminttan saaminttan ayyaanaabaa tamaaroosona; qassi ammanettida wozannaama ashkkaray 500ppe dariya doonan Geeshsha Maxaafan baasettida xuufeta giigissees.

3. Yihooway tamaarissiyo timirttiyaappe intte buzo xekkan goꞌettidoy ayba ogiyaanee?

³ Loyttidi Goꞌettite: Xoossay tamaarissiyooban nuuni keehi goꞌettida! Xoossau sunttay deꞌiyoogaanne i nuuyyo qoppiyaagaa gidiyoogaa tamaarida. (Maz. 83:18; 1 PHe. 5:6, 7) Nuuni deꞌuwan keehippe koshshiya, giishin Asay tuggatiyoynne hayqqiyoy aybissee? Tumu ufayssaa waatada demmana danddayiyaanaa? Deꞌuwaa halchoy aybee? giya oyshatu zaaruwaa erida. Nuuyyo ‘ubbabay injjetanaadan’ oottiya kandduwaa maaraakka Yihooway immiis.—Yaas. 1:8.

4. Xoossaa ashkkarati tamaarana danddayiyo amarida timirtteti awugeetee, nuuyyo danddayettida keena ubban Yihoowappe tamaarana koshshiyoy aybissee?

⁴ Gujjidikka, ba ashkkaratuppe daroti baayyo haggaaziyo haggaazuwaa aassanaadan maaddanau Yihooway dumma timirttee deꞌanaadan oottiis. Sinttaa 4-6 issoti issoti tamaarana danddayiyo timirttiyaa qonccissees. Hegan qonccida timirttiyaa tamaarenna mala nu hanotay diggiyaaba gidikko, nu hanotaara giigiya, Xoossay tamaarissiyo hara timirttiyan loyttidi goꞌettiyoo? Xoqqa timirttiyaa tamaaranaadan darotoo asttamaaretinne harati denttettiyo yelagati, xoqqa timirttiyaa tamaariyoogaappe ayyaanaabaa hoolliyaa kessanaadan, giishin Yihooway tamaarissiyo timirttiyaa tamaaranaadan minttettiyoo? Nuuyyo danddayettida keena ubban Yihoowappe tamaariyoogee ha wodiyan deꞌuwan ufayttanaadaaninne merinaa deꞌuwaa demmanaadan maaddees.—Maz. 119:105; Yoh. 17:3.

Yihoowa Dirijjitee Giigissido Loohissotuppe Amaridaageeta

Nabbabiyoogaanne Xaafiyoogaa Tamaariyoogaa

• Halchuwaa: Asay nabbabiyoogaanne xaafiyoogaa danddayidi Geeshsha Maxaafaa banttau nabbabanaadaananne harata tumaa tamaarissanaadana.

• Takkiyo Wodiyaa: Koshshiya hanotaadaana

• Sohuwaa: Kawotettaa Addaraashaana.

• Tamaareti: Aassiyaageeta ubbatanne koyiya harata.

• Mazggabettiyo Ogiyaa: Gubaaꞌiyaa cimati nabbabiyoogaanne xaafiyoogaa tamaarissiyoogaa heeraa hanotaadan giigissana koshshees; qassi tamaaridi goꞌettana danddayiyaageeta ubbaa eti minttettana koshshees.

Tiꞌokiraase Haggaazo Timirtte Keettaa

• Halchuwaa: Aassiyaageeti Kawotettaa mishiraachuwaa loyttidi sabbakiyaageetanne tamaarissiyaageeta gidana mala loohissanaassa.

• Takkiyo Wodiyaa: Ubbatoo deꞌees.

• Sohuwaa: Kawotettaa Addaraashaana.

• Mazggabettana Danddayiyaageeti: Aassiya ubbata. Gubaaꞌiyaa ubbatoo yiya, Geeshsha Maxaafay tamaarissiyoobaa maayiyaanne eta deꞌuwaa hanotay Kiristtaane baaso siraataara moogiyo haratikka mazggabettana danddayoosona.

• Mazggabettiyo Ogiyaa: Tiꞌokiraase Haggaazo Timirtte Keettaa bollaara xeelliyaagau yoota.

Kare Biittaa Qaalaa Timaariyoogaa

• Halchuwaa: Aassiyaageeti mishiraachuwaa hara qaalan waatidi yootanaakko tamaarissanaassa.

• Takkiyo Wodiyaa: Oyddu woy ichashu agina. He timirttee darotoo Qeera gallassi maallado issi saatiyau woy naaꞌꞌu saatiyau imettees.

• Sohuwaa: Darotoo, matan deꞌiya Kawotettaa Addaraashaana.

• Mazggabettana Danddayiyaageeti: Kare biittaa qaalan asau yootanau koyiya loꞌꞌo eeshshay deꞌiyo aassiyaageeta.

• Mazggabettiyo Ogiyaa: Koshshiya hanotaadan he timirtte keettaa giigissiyay macara biiruwaa.

Kawotettaa Addaraashaa Keexxiyoogaa

• Halchuwaa: Kawotettaa Addaraashaa keexxanaassanne bottokonanaassa. Hagee timirtte keetta gidenna; shin bantta dosan oottiyaageeti keexxiyo wode maaddanaadan dumma dumma hiillaa tamaaroosona.

• Takkiyo Wodiyaa: Bantta dosan oottiyaageetu hanotaadaana.

• Sohuwaa: Heeran Keettaa Keexxiya Komitiyau imettida soho ubban. Bantta dosan oottiyaageetuppe issoti issoti daafay gakkidoogeeta maaddanau haaho biitti baana mala shoobettana danddayoosona.

• Gidaa: Ishatinne michoti xammaqettidaageetanne gubaaꞌiyaa cimati dooridoogeeta gidana bessees. Eti keexxiyoogaa eriyaageeta woy erennaageeta gidana danddayoosona.

• Mazggabettiyo Ogiyaa: Bantta Dosan Kawotettaa Addaraashaa Oottiyaageetuyyo Giigida Qitsiyaa (S-82) gubaaꞌiyaa cimatuppe ekkidi kunttiyoogaa.

Aqinyetettaa Haggaazuwaa Timirtte Keettaa

• Halchuwaa: Aqinyeti ‘bantta oottiyoobaa kumetta hanotan polanaadan’ maaddanaassa.—2 Xim. 4:5.

• Takkiyo Wodiyaa: Naaꞌꞌu saamintta.

• Sohuwaa: Kuuyiyay macara biiruwaa; darotoo, matan deꞌiya Kawotettaa Addaraashaana.

• Gidaa: Guuxxiis giishin issi layttau kumetta wodiyaa aqinye gididi oottidaageeta.

• Mazggabettana Danddayiyo Ogiyaa: Gidaa kunttida aqinyeti he timirtte keettan tamaaranaadan mazggabettin, hegaappe woradaa bollaara geeddiyaagee eta erissees.

Beeteele Ooratti Gelidaageetu Timirtte Keettaa

• Halchuwaa: Ha timirtte keettay ooratti gelidaageeti Beeteele haggaazuwan muruta gidanaadan maaddanau giigiis.

• Takkiyo Wodiyaa: Saaminttan saaminttan issi saatiyau tamaarin tammanne usuppun saaminttan wurees.

• Sohuwaa: Beeteeleena.

• Gidaa: Beeteele keetta asaa yame woy daro wodiyau ba dosan oottidaagaa (issi laytta woy hegaappe daruwaa) gidana bessees.

• Mazggabettana Danddayiyo Ogiyaa: Beeteele keettaa asaa yame gidida, gidaa kunttiyaageeti mazggabettoosona.

Kawotettaa Haggaazuwaa Timirtte Keettaa

• Halchuwaa: Gubaaꞌiyaa cimatinne gubaaꞌiyan oottiyaageeti Xoossaa gubaaꞌiyaa heemmanaadaaninne dirijjitiyaa aawatettaa ekkanaadan loohissanaassa. (Oos. 20:28) Bollaara Heemmiyaagee kuuyidoogaadan ha timirtte keettay amarida laytta giddon polettees.

• Takkiyo Wodiyaa: Mata wodeppe haa simmin, cimati issi gallassanne baggaa, qassi gubaaꞌiyan oottiyaageeti issi gallassaa tamaaroosona.

• Sohuwaa: Darotoo matan deꞌiya Kawotettaa Addaraashaana woy Gita SHiiquwaa Addaraashaana.

• Gidaa: Cima woy gubaaꞌiyan oottiyaagaa gidana bessees.

• Mazggabettana Danddayiyo Ogiyaa: Woradaa bollaara geeddiyaagee gidaa kunttiya cimatanne gubaaꞌiyan oottiyaageeta shoobbees.

Gubaaꞌiyaa Cimatu Timirtte Keettaaa

• Halchuwaa: Cimati gubaaꞌiyaa aawatettaa kiyanaadan maaddanaassa.

• Takkiyo Wodiyaa: Ichashu gallassa.

• Sohuwaa: Kuuyiyay macara biiruwaa; darotoo matan deꞌiya Kawotettaa Addaraashaana woy Gita SHiiquwaa Addaraashaana.

• Gidaa: Cima gidana bessees.

• Mazggabettana Danddayiyo Ogiyaa: Gidaa kunttiya cimata macara biiroy shoobbees.

Woradaa Bollaara Geeddiyaageetinne Eta Maccaasati Tamaariyo Timirtte Keettaab

• Halchuwaa: “Yootiyoogaaninne tamaarissiyoogan” daafuriya, woradaa woy awuraajjaa bollaara geeddiyaageeti, bantta aawatettaa giddon deꞌiya gubaaꞌeta loyttidi haggaazanaadaaninne heemmanaadan maaddanaassa.—1 Xim. 5:17; 1 PHe. 5:2, 3.

• Takkiyo Wodiyaa: Naaꞌꞌu agina.

• Sohuwaa: Macara biiroy kuuyees.

• Gidaa: Woradaa woy awuraajjaa bollaara geeddiyaagaa gidana bessees.

• Mazggabettana Danddayiyo Ogiyaa: Gidaa kunttiya, woradaa bollaara geeddiyaageetanne eta machota macara biiroy shoobbees.

Machibeenna Ishati Loohiyo Timirtte Keettaac

• Halchuwaa: Aqo oyqqibeenna cimatanne gubaaꞌiyan oottiyaageeta gujo aawatettau giigissanaassa. Ha tamaaretuppe daroti bantta biittan aassiyaageeti koshshiyo sohuwan haggaazanaadan maddabettana danddayoosona. Etappe amaridaageeti hara biitti biidi haggaazana danddayiyoogaa macara biiruwau yootidaba gidikko, hara biittan oottanaadan maddabettana danddayoosona.

• Takkiyo Wodiyaa: Naaꞌꞌu agina.

• Sohuwaa: Macara biiroy kuuyees; darotoo Gita SHiiquwaa Addaraashaana woy Kawotettaa Addaraashaana.

• Gidaa: Bantta Kiristtaane ishata maaddanaunne Kawotettaara gayttidabay koshshiyoosan awaaninne oottanau koyiya, layttay 23ppenne 62 gidduwan deꞌiyo aqo oyqqibeenna payya gidida ishantta. (Mar. 10:29, 30) Eti cima woy gubaaꞌiyan oottiyaageeta gididi, guuxxiis giishin naaꞌꞌu layttau haggaazidaageeta gidana bessees.

• Mazggabettiyo Ogiyaa: Intte macara biiruwaa moottan ha timirtte keettay deꞌiyaaba gidikko, koyiyaageeti mazggabettanaadan woradaa shiiquwan hegaara gayttidaagan shiiqoy deꞌees. Gujo qonccissoy he shiiquwan odettees.

Aqo Oyqqida Kiristtaanetuyyo Giigida Geeshsha Maxaafaa Timirtte Keettaad

• Halchuwaa: Aqo oyqqidaageeti Yihoowanne a dirijjitiyaa loyttidi goꞌꞌaanaadan dumma ogiyan loohoosona. He tamaaretuppe daroti bantta biittan maadoy koshshiyo heeran haggaazanau maddabettoosona. Etappe amaridaageeti harasaa biidi haggaazana danddayiyoogaa macara biiruwau yootidaba gidikko, hara biittan oottanaadan maddabettana danddayoosona.

• Takkiyo Wodiyaa: Naaꞌꞌu agina.

• Sohuwaa: Koyro amarida tamaareti Amerkkan Niyoorkken, Patrssenen deꞌiya, Wochtawur Ejjukeeshinal Sentteriyan tamaariiddi deꞌoosona. Hegaappe simmin, harati macara biiroy kuuyido sohuwan tamaarana; darotoo Gita SHiiquwaa Addaraashaana woy Kawotettaa Addaraashaana.

• Gidaa: Maadoy koshshiyo sohuwan awaaninne haggaazana danddayiya payya gidida, “Hekko, tana kiitta” giyo xeelaa oyqqida, layttay 25ppenne 50ppe gidduwan deꞌiyo aqo oyqqidaageeta. (Isi. 6:8) Hegaa bollikka, eti aqo oyqqoosappenne kumetta wodiyaa haggaazuwaa doommoosappe guuxxiis giishin naaꞌꞌu laytta gididoogeeta gidana bessees.

• Mazggabettiyo Ogiyaa: Intte macara biiruwaa moottan ha timirtte keettay deꞌiyaaba gidikko, koyiyaageeti mazggabettanaadan dumma shiiquwaa gallassi hegaara gayttidaagan shiiqoy deꞌees. Gujo qonccissoy he shiiquwan odettees.

Giiliyaade Geeshsha Maxaafaa Timirtte Keettaa

• Halchuwaa: Aqinyetinne kumetta wodiyaa haggaaziya harati misoonaawe gidanaadan loohissanaassa.

• Takkiyo Wodiyaa: Ichashu agina.

• Sohuwaa: Amerkkan Niyoorkken, Patrssenen deꞌiya, Wochtawur Ejjukeeshinal Sentteriyaana.

• Gidaa: Eti misoonaawe gidanau qitsiyaa koyro kunttiyo wode eta layttay 21ppenne 38ppe gidduwan deꞌiyo xammaqettoosappe heezzu laytta gidido aqo oyqqidaageeta. Eti Inggilizettuwaa haasayiyaageeta, aqo oyqqoosappenne kumetta wodiyaa haggaazuwaa doommoosappe guuxxiis giishin naaꞌꞌu laytta gididoogeeta gidana bessees. Eti payya gidana koshshees. Kare biittan haggaaziya aqinyeti (misoonaawetuugaadan haggaaziyaageeta gujjees ), woradaa woy awuraajjaa bollaara geeddiyaageeti, Beeteele keettaa asaa yameti, qassi Gubaaꞌiyan Oottiyaageeti Loohiyo Timirtte Keettan, Aqo Oyqqibeenna Ishati Loohiyo Timirtte Keettaaninne Aqo Oyqqidaageetuyyo Giigida Geeshsha Maxaafaa Timirtte Keettan kase tamaaridaageetikka gidaa kunttiyaaba gidikko qitsiyaa kunttana danddayoosona.

• Mazggabettiyo Ogiyaa: Doorettida macara biiruwan, he timirtte keettan tamaaranau koyiyaageetuyyo awuraajjaa shiiquwan hegaara gayttida shiiqoy deꞌees. Gujo qonccissoy he shiiquwan odettees. Intte qitsiyaa kunttanau koyi uttidaashin intte heeran awuraajjaa shiiquwan he timirtte keettaara gayttidaagan shiiqoy baynnaba gidikko, gujo qofaa demmanau intte biittaa macara biiruwau xaafana danddayeeta.

Macara Biiruwaa Komitiyaa Yametuyyoonne Eta Machotuyyo Giigida Timirtte Keettaa

• Halchuwaa: Macara Biiruwaa Komite gididi oottiyaageeti, Beeteele keettaa asaaranne gubaaꞌiyaara gayttida oosuwaa akeekan kaallanaadan, qassi bantta biittan deꞌiya woradatanne awuraajjata loytti kaallanau, ubba qassi birshshiyoogaa, attamiyoogaanne xuufiyaa kiittiyoogaa, qassi dumma dumma dipparttimenttiyaa loyttidi kaallanaadan loohissanaassa.—Luq. 12:48b.

• Takkiyo Wodiyaa: Naaꞌꞌu agina.

• Sohuwaa: Amerkkan Niyoorkken, Patrsseenen deꞌiya, Wochtawur Ejjukeeshinal Sentteriyaana.

• Gidaa: Macara Biiruwaa Komitiyaa yame woy Biittaa Komitiyaa yame woy hegaa malabaa oottanau sunttettida ura.

• Mazggabettana Danddayiyo Ogiyaa: Gidaa kunttiya ishatanne eta machota Bollaara Heemmiyaagee shoobbees.

[Tohossa Qofaa]