Loꞌꞌo Asttamaariyau Keehippe Koshshiya Eeshshaa
1. Loꞌꞌo asttamaariyau keehippe koshshiya eeshshay aybee?
1 Issi uri Geeshsha Maxaafaa tamaarissiya loꞌꞌo asttamaare gidanaadan maaddiyay aybee? Timirttee? Deꞌon beꞌidobee? Meretan au deꞌiya eree? Hegau maaddiyay, Higgiyau polo gidida, qassi Yesuusi erissiyo ashkkarata shaakki erissiyaanne Yihoowa eeshshatu giddon keehippe erettidanne ufayssiyaagaa gidida eeshshaa. (Yoh. 13:35; Gal. 5:14; 1 Yoh. 4:8) He eeshshay siiquwaa. Loꞌꞌo asttamaareti siiqoosona.
2. Nuuni asaa siiqana koshshiyoy aybissee?
2 Asaa Siiqa: Gita Asttamaaree, Yesuusi asaa siiqees; qassi hegee i yootiyoobaa ezgganaadan eta denttettiis. (Luq. 5:12, 13; Yoh. 13:1; 15:13) Nuuni asau qoppiyaaba gidikko, injjetiyo wode ubban markkattoos. Yedetaanne asay koshshi baynnaagaa gidiyoogaa mala xubee nuuni guyye gaanaadan oottenna. Nuuni sabbakiyo asau wozanappe qoppoos; qassi eta qofissiyaabaa haasayissanau giigettoos. Geeshsha Maxaafaa xannaꞌissiyo uraara gayttiyo wode xalla gidennan, ubbatoo xannaꞌissanaappe kase giigettanaukka wodiyaa bazzoos.
3. Geeshsha Maxaafaa tumaa siiqiyoogee nuna haggaazuwan maaddiyoy ayba ogiyaanee?
3 Geeshsha Maxaafaa Tumaa Siiqa: Yesuusi Geeshsha Maxaafaa tumaakka siiqiis; qassi hegaa xoqqu oottidi xeelliis. (Maa. 13:52) Nuuni tumaa siiqiyaaba gidikko, wozanappe haasayoos; hegee qassi nu yootiyoobaa ezggiyaageeti ufayttanaadan denttettana danddayees. Hegaa mala siiqoy nu pacaa bolli gidennan, nuuni yootiyo goꞌꞌiya qofaa bolli xeelaa wottanaadan maaddees; yaatikko, haggaaziyo wode darin yayyokko.
4. Siiquwaa waatidi dichana danddayiyoo?
4 Siiquwaa Dicha: Asaa kaseegaappe aaruwan waatidi siiqana danddayiyoo? Yihoowaynne a Naꞌay bessido siiquwaa, qassi nu moottan deꞌiya asay ayyaanaaban azzanttiya hanotan deꞌiyoogaa wotti dentti qoppiyoogaana. (Mar. 6:34; 1 Yoh. 4:10, 11) Ubbatoo buzo xannaꞌiyoogaaninne wotti dentti qoppiyoogan Geeshsha Maxaafaa wozanappe siiqoos. Siiqoy ayyaanaa ayfiyaa macaratuppe issuwaa. (Gal. 5:22) Yaatiyo gishshau, geeshsha ayyaanaa immanaadan Yihoowa woossananne nu siiquwaa dichanaadan maaddana mala oychana danddayoos. (Luq. 11:13; 1 Yoh. 5:14) Nu timirttiyaa xekkay, nuuni tuman deꞌido wodiyan beꞌidobay woy meretan demmido eray ay gidinkka, siiqiyoogan, Geeshsha Maxaafaa tamaarissiyoogan muruta asttamaare gidana danddayoos.