Haggaazo Citan Neeni Waana Goꞌettana Danddayay?
1. Haꞌꞌikka haggaazo citan demmiyo, kase Gubaaꞌiyaa Maxaafa Xinaatiyaa wode demmiyo goꞌꞌay aybee?
1 Gubaaꞌiyaa Maxaafa Xinaatee attido gishshau, issi issibay halidabadan qoppay? Citan deꞌiya asaa qooday guutta; hanotaykka ufayssiyaagaa. Hegee issoy issuwau lagge, qassi ayyaanaabankka mino gidanau maaddiis. (Lee. 18:24) Maxaafaa xinaatiyaa kaalettiya ishay he wode nu hanotaa akeekidi nuna sohuwaara maaddees. (Lee. 27:23; 1 PHe. 5:2, 3) Nuuni haꞌꞌikka hegaa mala goꞌꞌaa haggaazo citan demmana danddayoos.
2. Ayyaanaaban keehi maaddiya ogiyan, haggaazo citan issoy issuwaara lagge gidanau kasetiyaageeta gidana danddayiyoy ayba ogiyaanee?
2 Kasetiyaagaa Gida: Haggaazo citan deꞌiya asaa qooday, kase maxaafaa xinaatiyaa citan deꞌiya asaa qoodaara issi mala. Haratuura “issippe” haggaaziyo wode issoy issuwau mata lagge gidoos. (Pili. 1:27) Intte citan deꞌiyaageetuppe woqqatuura haggaazadii? Hegaara gayttidaagan siiquwaa ‘aassana’ danddayay? (2 Qor. 6:13) Hegaa bolli, nu haggaazo citan deꞌiyaageetuppe amaridaageeta issi issitoo nu So Asaa Goynuwaa omarssan nunaara shiiqanaadan woy qumaa maanaadan shoobbana danddayoos. Issi issi gubaaꞌetun, haggaazo citati, haasayau hara gubaaꞌiyaappe yiida ishata kayan kayan qumaa shoobboosona. Bantta kayay gakkiyo wode, he citan deꞌiyaageeti haasayaa shiishshida ishay eti shoobbidosaa yaana danddayennaba gidikkokka, issippe qumaa moosonanne issoy issuwaa minttettoosona.
3. Cimati haggaazo citan deꞌiya ishata heemmana danddayiyo wodeti awugeetee?
3 Haꞌꞌi gubaaꞌiyaa shiiquwau saaminttan naaꞌꞌutoo xalla shiiqiyaaba gidikkokka, gubaaꞌiyaa cimati ishata heemmiyo wodee guuxxiis giyoogaa gidenna. Citaa xomoosiyaageeti bantta citan deꞌiya ubbata minttettoosonanne haggaazuwau loohissoosona. Intte citaa xomoosiya ishay nenaara haggaazanau hanno gakkanau wodiyaa keeribeennaba gidikko, aara haggaazanau ayssi a oychikkii? Qassi, haggaazuwaa xomoosiya ishay dumma dumma citaara aginan issi Woggaa woy Qeeraa gallassi issippe haggaazees. Guutta citati deꞌiyo gubaaꞌetun, haggaazuwaa xomoosiya ishay citata huuphiyan huuphiyan layttan naaꞌꞌutoo xomoosanau hanotaa giigissees. Haggaazuwaa xomoosiya ishay intte citaa xomoosiyo wode haggaazanau ne hanotaa giigissana danddayay?
4. (a) Haggaazuwaa kiyanaappe kase shiiqiyo shiiqoy ayba ogiyan giigii? (b) Haggaazuwau kiyanaappe kase shiiqanaadan nu keettaa immanau qoppana koshshiyoy aybissee?
4 Qeeraanne Woggaa haggaazuwaa kiyanaappe kase ubbay issippe shiiqiyoogaappe, citan citan shiiqiyoogau daro goꞌꞌay deꞌees. Amarida dumma dumma sohotun issi mala saatiyan, haggaazuwau kiyanaappe kase shiiqiyoogee aassiyaageeti he shiiquwaanne geella haggaazo moottaa baanaadan maaddees. Aassiyaageeti sohuwaara maddabettidi bantta haggaazo moottaa gamꞌꞌennan baana danddayoosona. Citaa xomoosiya ishay ba citan deꞌiyaageetu hanotaa loytti eranaukka maaddees. SHin issi issi hanotan naaꞌꞌu woy daro citati issippe shiiqiyoogee loꞌꞌo gidana danddayees. Aginan koyro Qeeraa gallassi woy Woggaa gallassi Wochiyo Keelaa Xinaatiyaappe simmin, ubba citati haggaazuwau kiyanau issippe shiiqiyaaba gidikko, shiiquwaa woosan kuuyanaappe kase citaa xomoosiyaageeti bantta citan deꞌiyaageeta guutta daqiiqa giddon maddabana koshshees.—“Ne Keettaa Immana Danddayay?” giya saaxiniyaa xeella.
5. Gubaaꞌiyaa Maxaafa Xinaatee attidaba gidikkokka, nuuni ay ammanettana danddayiyoo?
5 Gubaaꞌiyaa Maxaafa Xinaatee attidaba gidikkokka, nuuni a sheniyaa oottanaadan maaddiyaabaa Yihooway haꞌꞌikka immees. (Ibr. 13:20, 21) Yihooway naagiyo gishshau, nuuyyo aybinne paccenna. (Maz. 23:1) Haggaazo citaa baggaara daro anjjuwaa demmoos. Nuuni kasetiyaageeta gididi ‘daro zerettaa’ zerikko, “daro kattaa cakkana.”—2 Qor. 9:6.
[Sinttaa 6n deꞌiyaagaa qonccissuwaa]
Ne Keettaa Immana Danddayay?
Issi issi gubaaꞌetun deꞌiya citati Qeeraanne Woggaa gallassi haggaazuwau kiyanaappe kase shiiqiyo keettay metiyo gishshau, issippe shiiqoosona. Haggaazuwau kiyanaappe kase shiiqiyo shiiqoy gubaaꞌe giigisso gidiyo gishshau, hegau nu keettaa immiyoogee gita maataa. Neeni ne keettaa immana danddayay? Ta keettay suurenna ga qoppada guyye gooppa. Gubaaꞌiyaa cimati ne keettay deꞌiyo heeraanne harabaakka kase maxaafa xinaatiyau issi keettaa dooriyo wode qoppiyoogaadan qoppoosona. Ne keettaa immanau koyikko, ne citaa xomoosiya ishau yoota.