Hananabaa Yootidaageetu Leemisuwaa Kaallite—Yoonaasa
1. Yoonaasa loꞌꞌo eeshshati awugeetee?
1 Hananabaa yootiya Yoonaasabaa qoppiyo wode, ay hassayeetii? Issi issi asay a yayyiya woy asau qarettenna asadan xeellana danddayees. SHin i ashkke, xalanne ba goꞌꞌaa aggi bayiya asa. Nuuni Yoonaasa loꞌꞌo leemisuwaa kaallana danddayiyoy ayba ogiyaanee?—Yaaq. 5:10.
2. Nuuni Yoonaasaagaadan ashkke gidana danddayiyoy ayba ogiyaanee?
2 Ashkketettaa: Koyro Yoonaasi Xoossay kiittidosaa aggidi harasaa biis. Asooreti meqetti baynna, iita oosuwaa oottiyoogan erettiyaageeta gidiyo gishshaunne Nanawee “daro asaa suuttaa gussida” katama geetettiyo gishshau, hegee garamissiyaaba gidenna. (Naho. 3:1-3) Gidikkokka, Yihooway Yoonaasa seeriis; ikka Yihooway naaꞌꞌanttuwaa kiittido wode ashkketettan eeno giidi biis. (Lee. 24:32; Yona. 3:1-3) I koyro harasaa biidaba gidikkokka, guyyeppe Yihoowa sheniyaa poliis. (Maa. 21:28-31) Nuuyyo seeray woy waayissiya moottay imettiyaaba gidikkokka, mishiraachuwaa yootanau hegaadan murttiyoo?
3. Neeni xalana koshshiyoonne ne goꞌꞌaa aggana koshshiyo haggaazoy awugee?
3 Xalatettaanne Nu Goꞌꞌaa Aggiyoogaa: Yoonaasi ba gaasuwan markkabiyaa laaggiyaageeti wurana hanido wode, i ba shemppuwaa aattidi immiis. (Yona. 1:3, 4, 12) Guyyeppe, Nanawen ba kiitaa yootiiddi, katamaassi giddokko biis; i hegaadan oottidoy Yihoowa pirddaa awaajjanau giiga sohuwaa koyidi gidennan aggenna. Hegee, yayyiya asi gidennan, Xoossay kiittin hananabaa yootiya xala asi oottiyo ooso! (Yona. 3:3, 4) Ha wodiyan deꞌiya nuuni shin? Yedetay gakkishin xalan markkattanau Xoossaa maaduwaa koshshees. (Oos. 4:29, 31) Haggaazuwan nu wodiyaanne nuussi deꞌiyaabaa goꞌettanau nu goꞌꞌaa aggana koshshees.—Oos. 20:24.
4. Yihooway kiittin hananabaa yootiyaageetu loꞌꞌo leemisuwaa nuuni wotti denttidi qoppana koshshiyoy aybissee?
4 Yihooway kiittin hananabaa yootiyaageetuppe issuwaabaa nabbabiyo wode, he sohuwan deꞌiyaabadan qoppiyoogee maaddees. Hagaadan inttena oychite: Tana gidiyaakko waatanee? Taani aagaa mala loꞌꞌo eeshshay deꞌiyoogaa gidana danddayiyoy ayba ogiyaanee? (Ibr. 6:11, 12) Yihooway kiittin hananabaa yootiya ammanettida hara asatuppe tamaarana goꞌꞌiya harabay, Nu Kawotetta Haggaazuwan sinttappe kiyana.