Hagan Ooni Ufayttanee?
1. Nuuni Wochiyo Keelaa woy Beegottite! maxeeteta nabbabiyo wode, ay qoppana koshshii, qassi aybissi?
1 Wochiyo Keelaanne Beegottite! maxeeteti alame yuushuwan deꞌiya asaa qoppidi giigissiyoobata. Yaatiyo gishshau, he xuufetun dumma dumma huuphe yohoy kiyees. Nuuni ubba huuphe yohota nabbabiyo wode, he huuphe yohotun ooni ufayttanaakko qoppana, qassi asau immiyo wode he qofaa goꞌettanau halchana koshshees.
2. Nu maxeetiyan kiyiya, dumma dumma asaa ufayssana danddayiya huuphe yohoti awugeetee?
2 Neeninne nenaara oottiya uray hagaappe kase haasayido Geeshsha Maxaafaa qofay mata wode kiyida Wochiyo Keelan deꞌii? Ne dabbo maaddana danddayiya, so asaa deꞌuwaa xeelliyaagan kiyida huuphe yohoy deꞌii? Beegottite! maxeetiyan qonccida biitti baanau qoppiya, neeni eriyo asi deꞌii? Ha maxeetetuppe issoy, issi ooso keettan woy dirijjitiyan oottiyaageeta ufayssiya qofaa oyqqidee? Leemisuwau, cima asaa gakkiya metuwaabaa qonccissiya maxeetee, cima asa xeelliya ura ufayssana danddayees. Danuwaabaa qonccissiya huuphe yohoy deꞌiyo maxeetee higgiyaa bonchissiyaageeta ufayssana danddayees.
3. Issi maxeetiyan deꞌiya qofay oona ufayssana danddayiyaakko qoppidi asau immiyoogaa goꞌꞌaa qonccissiya temokruwaa yoota.
3 Ayfiyaa: Tohossa Afirkkan deꞌiya issi azinaynne machiyaa, “Naata Aawatettaa Ekkiyaageeta Oottidi Dichiyoogaa” giya, Xiqimita 2011 Beegottite! maxeetiyaa ekki simmidi, bantta gubaaꞌiyaa moottan deꞌiya 25 timirtte keettau silkkiyaa dawalidosona. Hegeetuppe 22ti daro maxeetiyaa ekkidi tamaaretuyyo immidosona. He biittan deꞌiya hara azinaynne machiyaa hegaadan bantta heeran deꞌiya timirtte keettatussi he maxeetiyaa immidosona. He timirtte keettatuppe issuwan deꞌiya asttamaareti saaminttan saaminttan he maxeetiyaappe tamaarissanau qofaa qachidosona. Ha azinaynne machiyaa oottidobaa woradaa xomoosiya ishau yootidosona. Yootin, i ba woradan deꞌiya gubaaꞌeti bantta moottan deꞌiya timirtte keettatuyyo he maxeetiyaa immanaadan minttettiis. Daro gubaaꞌeti he biittan deꞌiya macara biiruwaa he maxeetiyaa oychin, zaarettidi attamettiis!
4. Nuuni maxeeteta daro asau immanau koyiyoy aybissee?
4 Nu maxeeteti ha wodiyan haniyaabaanne hegee aybissi haniyaakko, qassi Geeshsha Maxaafay yootiyoobaanne Xoossaa Kawotettaabaa qonccissoosona. Ha alamiyan ‘atotettaa yootiyay’ he maxeetetu xalla. (Isi. 52:7) Yaatiyo gishshau, danddayettida keenan eta daro asau immana koyoos. Hegaadan oottanau maaddiya loꞌꞌo ogee, ‘Hagan ooni ufayttanee?’ giidi qoppiyoogaa.