Oyshaa Saaxiniyaa
◼ Xammaqettennan aassiya uri xammaqettanaadan paqqadanaappe kase gubaaꞌe shiiquwaaranne haggaazaara gayttidaagan appe koyettiyaabay aybee?
Xammaqettiyoogee issi uri kuuyiyo aybippenne aadhiya kuushsha. Yaatiyo gishshau, issi uri xammaqettanaadan paqqadanaappe kase, Xoossay appe koyiyoobaa i loytti akeekana bessees. Hegaa bollikka, i Xoossay kessido maaraadan deꞌanau murttidoogaa bessana koshshees.
Kiristtaaneti issippe shiiqiyoogaa aggennaadan azazettidosona; yaatiyo gishshau, xammaqettennan aassiya uri gubaaꞌe shiiquwaa minnidi shiiqana koshshees. (Ibr. 10:24, 25) Qassi gubaaꞌe shiiquwan ba qofaa yootees. Koyettiyaabatuppe issuwaa gidana xayikkokka, Tiꞌokiraase Haggaazo Timirtte Keettan kifiliyaa shiishshanau mazggabettana danddayees.
Qassi Kiristtaaneti mishiraachuwaa sabbakanaadaaninne harata erissiyo ashkkara oottanaadan azazettido gishshau, xammaqettennan haggaaziya uraykka xammaqettanaappe kase aggennan haggaazana koshshees. (Maa. 24:14; 28:19, 20) I xammaqettanaappe kase aappun aginaa haggaazana koshshii? I aggennan minnidi aginan aginan mishettidi haggaaziyoogaa beꞌanau amarida wodee aadhana koshshees. (Maz. 78:37) Gidikkokka, i aassiyoogaa doommoosappe xammaqettana gakkanaashin daro wodee aadhana koshshenna; guutta aginay gidana danddayees. I aappun saatiyaa irpportte oottana koshshii? Hegaa xeelliyaagan kiyida higgee baawa. Aassiyaageetu ubbaa hanotay dumma dumma gidiyoogaa cimati akeekana koshshees, qassi bessiyaagaadan qoppana koshshees.—Luq. 21:1-4.
Xammaqettiya uraa oychiya cimati (woykko guutta cimati deꞌiyo heeran gubaaꞌiyan oottiyaageeti) ubba asaa hanotay dumma dumma gidiyoogaa hassayana koshshees; qassi i xammaqettana danddayiyaakko danddayennaakko akeekan qoppana koshshees. I Yihoowa Markka gidanau wozanappe koyiyoogaa, qassi Yihoowa dirijjitiyaara hashetiyoogaanne haggaaziyo maataa nashshiyoogaa cimati erana koyoosona. I ayyaanaaban biron gasttibeennaagaa woy xammaqettidi daro wodiyaa takkidaageetuugaa keenaa erennaagaa cimati akeekoosona. Cimati i xammaqettana danddayennabadan kuuyikko, hegaa Geeshsha Maxaafaappe ayyo kehatettan yootananne ayyaanaaban maaddanau zoriyoobaa siyanaadan a maaddan koshshees.