Hananabaa Yootidaageetu Leemisuwaa Kaallite—Amoxa
1. Amoxa leemisoy nuna keehi minttettana danddayiyoy aybissee?
1 Intte loytti tamaaribeennaagaa gaasuwaaninne diccido hanotaa gaasuwan, sabbakanau danddayennabadan qoppi ereetii? Hegaadan gidikko, Amoxa leemisoy intte xalanaadan maaddana danddayees. I dorssaa heemmiyaagaanne mittaa ayfee teeriyo wode maxiyaagaa gidikkonne, issi wolqqaama kiitaa yootanaadan Yihooway a sunttiis. (Amo. 1:1; 7:14, 15) Hegaadan, ha wodiyankka Yihooway ashkke asata goꞌettees. (1 Qor. 1:27-29) Hananabaa yootiya Amoxa leemisuwaappe nu haggaazuwau maaddiya harabaa ay tamaarana danddayiyoo?
2. Haggaazuwan nuna yedetay gakkiyo wode minni eqqana danddayiyoy aybisee?
2 Yedetay Gakkiyo Wode Minni Eqqite: Huuphessa baggan tammu Israaꞌeela zaretu kawotettan maraa milatissidi medhido eeqaa goynuwaa qeese gidida Amaaxee, Amoxi hananabaa yootiyoogaa siyido wode yiillotidi, ‘Hagaappe aggada, ne biitti ba! Nuuni haymaanootee deꞌiyo asa!’ yaagiis gaana danddayettees. (Amo. 7: 12, 13) Amaaxee Amoxi yootidobaa geellayidi Kawuwaa Iyorbbaamayyo yootiis; i hegaadan yootidoy kawoy a oosuwaa teqqanaadaana. (Amo. 7:7-11) SHin Amoxi yayyibeenna. Ha wodiyan, issi issi qeeseti Yihoowa asatu bolli yedetaa gattanau haariyaageeti maaddana mala oychoosona. Gidikkokka, nuna qohanau oottiyo ay miishshinne nuna xayssana danddayennaagaa Yihoowa yootiis.—Isi. 54:17.
3. Nuuni ha wodiyan asau yootiyo naaꞌꞌu qommo kiitay aybee?
3 Xoossaa Pirddaanne Sinttaara Yaana Anjjuwaa Yootite: Amoxi tammu Israaꞌeela zaretu kawotettaa bolli Yihooway pirddanaagaa yootidaba gidikkokka, Geeshsha Maxaafan deꞌiya, a sunttan xeegettiya maxaafaa, Yihooway ba asaa omoodduwaappe zaaranaunne anjjanau gelido qaalaa qonccissiyoogan kuuyiis. (Amo. 9:13-15) Nuunikka Xoossay ‘pirddiyo gallaassaabaa’ yootoos; shin hegee nuuni yootana bessiya ‘kawotettaa wonggeliyaa mishiraachuwaa’ giddoppe issibaa xalla. (2 PHe. 3:7; Maa. 24:14) Yihooway iitata Armmageedoona olan xayssi simmin, saꞌay gannate gidana.—Maz. 37:34.
4. Nuuni Yihoowa sheniyaa polana danddayiyoogaa ammanettanaadan oottiyaabay aybee?
4 Eqettiya daroti deꞌiyo alamiyan Kawotettaa mishiraachuwaa sabbakiyoogee, nuuni Yihoowa sheniyaa polanau nu huuphiyaa geppidoogaadan deꞌenna mala paacettanaadan oottiyaaba. (Yoh. 15:19) Gidikkokka, Yihooway Amoxayyo oottidoogaadan, nuuni a sheniyaa polanaadan koshshiyaabaa immanaagaa ammanettoos.—2 Qor. 3:5.