Geeshsha Maxaafay Tamaarissiyoy Giya Maxaafan Xannaꞌana Koyennaageeta Maaddiyoogaa
1. Geeshsha Maxaafay Tamaarissiyoy giya maxaafaa koyro heeran ubba asay ufayttidi ekkii? Qonccissa.
1 Issi uri Yihoowayyo goynniyaagaa gidanau, Geeshsha Maxaafay tamaarissiyoobaa erana koshshees. Gidoppe attin, issoti issoti kaalliyoy Kiristtaane giyo haymaanootiyaa gidenna, qassi Geeshsha Maxaafaa Xoossaa Qaalaa giidi qoppokkona. Harati Xoossan mule ammanokkona, qassi Geeshsha Maxaafaa bonchokkona. Geeshsha Maxaafay Tamaarissiyoy giya maxaafaa ekkanau koyro heeran koyennaageeta maaddana danddayiya xuufeti awugeetee? Kaallidi deꞌiya qofay 20 gidiya biittatun deꞌiya aassiyaageeti yootidobaa goꞌettidi giigissidoogaa.
2. Issi uri Xoossan ammanennaagaa yootikko, nuuni ay erana koshshii, qassi aybissi?
2 Xoossan Ammanennaageeta: Issi uri Xoossan ammanennaagaa yootikko, i ammanennay aybissakko eriyoogee maaddees. Hegaadan giidoy i lodda laamiyan ammaniyo gishshataaseeshsha? I Xoossan ammanennay alamiyan deꞌiya pirdda pacaa woy haymaanootiyaa kaalliyaageeti loꞌꞌo milatiya iita gidiyoogaa gaasuwaaneeshsha? I Xoossan ammaniyoogaa diggiyo biitta aseeshsha? Geella i Xoossi baawa geennaba gidikkokka, An ammanana koshshiyoogaa mule qoppi erennan aggana danddayees. Daro ishanttinne michoti, “Neeni beniisappe hegaadan qoppay?” yaagidi oychiyoogee he uri ba qofaa yootanaadan oottiyoogaa akeekidosona. I yootiyoobaa ezggite; haasayishin kelttiyaa geloppite. He uri Xoossan ammanennay aybissakko akeekikko, ayyo woygidi zaaranaakko, qassi ay xuufiyaa immanaakko eroos.—Lee. 18:13.
3. Nuuni issi uranne i ammaniyoobaa bonchiyoogaa waatidi bessana danddayiyoo?
3 Zaariyo wode, he uri intte a qofaa eqettiyaabadan qoppanaadan oottennaadan naagettite. Amarkkaa biittan aassiya uri hagaadan giis: “Issi uri ammaniyoobaa dooriyo maataa bonchiyoogee keehippe koshshiyaaba. Palamettidi xoonanau koyiyoogaappe, asay qoppanaadan, qassi issibaa banttau kuuyanaadan oottiya oyshaa oychiyoogee loꞌꞌo.” Woradaa xomoosiya issi ishay haasayissiyo uri ba qofaa yootiyo wode ezggi simmidi darotoo, “Hagaadan hanana danddayees gaada qoppa eray?” yaagi oychidi ba qofaa yootees.
4. Budistte haymaanootiyaa kaalliyaageeta waatidi maaddana danddayiyoo?
4 Budistte haymaanootiyaa kaalliya daroti Xoossaabaa erokkona. Birttaaniyaa biittan deꞌiya aassiya issoti issoti hegaa mala asatuyyo markkattiyo wode Adussa wodiyaa saruwaanne ufayssaa—Hegaa ayba ogiyan Demmanee? (Inggilizettuwaa) giya brooshuriyaa goꞌettiyoogaa dosoosona. Haasayaa doommiyo qofaa yooti simmidi, “Ubbaappe Xoqqa Gidida Medhiday Tumuppe Deꞌii?” giya huuphe yohuwaa, qassi kaallidi, “Asaa Naati Ubbay Anjjuwaa Demmanau Kaaleto Gidiya Maxaafaa” giyaagaa tobboosona. Hegaappe simmin, Geeshsha Maxaafay Tamaarissiyoy giya maxaafaa erissidi, “Neeni Xoossan ammanennaba gidikkokka, Geeshsha Maxaafan goꞌꞌiya daro qofay deꞌiyo gishshau, a xannaꞌiyoogee maaddees” gaana danddayoosona. Amarkkan CHayna qaalan haggaaziya issi aqinyee hagaadan giis: “Nu moottan deꞌiya daroti nabbabiyoogaa dosoosona. Yaatiyo gishshau, darotoo nuuni immido xuufiyaa zaaretti oychanau baanaappe kase nabbabidi wurssoosona. SHin Geeshsha Maxaafaa xannaꞌiyoogaa giya qofaa akeekennan aggana danddayoosona. Yaatiyo gishshau, Mishiraachuwaa giya brooshuree tobbanaadan minttettiya ogiyan giigido gishshau, koyro haasayissiyo wode a immiyoogaa dosays.” Amarkkaa biittan CHayna qaalaa goꞌettiya woradaa xomoosiya issi ishay Geeshsha Maxaafay Tamaarissiyoy giya maxaafaa koyro haasayissiyo wode erissana danddayiyoogaa yootiis. Gidikkokka, Xoossaabaa yootiya shemppo 1n gidennan, Geeshsha Maxaafaabaa qonccissiya shemppo 2n xinaatiyaa doommiyoogee loꞌꞌo gidana danddayees.
5. Danddayancha gidiyoogee keehi koshshiyoy aybissee?
5 Issi uri Xoossan ammananau wodee koshshiyo gishshau, danddayancha gidiyoogee keehi koshshees. Koyro gallassi haasayidobay issi uri Medhidaagee deꞌiyoogaa ammananaadan denttettennan aggana danddayees. SHin wodiyaappe wodiyan geella hegee danddayettiyaaba gidiyoogaa akeekana, woy issi uri hegaadan giidi ammanana danddayiyoy aybissakko akeekidoogaa yootana danddayees.
6. Issi issi asay Geeshsha Maxaafay yootiyoobaa koyennan aggana danddayiyoy aybisee?
6 Geeshsha Maxaafay Yootiyobaa Koyennaageeta woy An Ammanennaageeta: Gidoppe attin, darotoo Xoossay deꞌana danddayiyoogaa eriya uri, Geeshsha Maxaafay Xoossaa Qaalaa gidiyoogaa ammanenna gishshau, Geeshsha Maxaafay tamaarissiyoobaa koyenna. Geella i Kiristtaane haymaanootiyaa kaallenna biittan deꞌana danddayees; qassi Geeshsha Maxaafay banttana Kiristtaane giyaageetu maxaafa giidi qoppana danddayees. Woykko i deꞌiyo biittan asay bana Kiristtaane giyaaba gidikkokka, eti hegaadan deꞌenna gishshau, Geeshsha Maxaafay bana maaddiyaabadan qoppennan aggana danddayees. Hegaa mala asati Geeshsha Maxaafaa dosanaadan, qassi Geeshsha Maxaafay Tamaarissiyoy giya maxaafaa xannaꞌanau koyanaadan waatidi maaddana danddayiyoo?
7. Darotoo asay Geeshsha Maxaafay yootiyoobaa siyanau koyanaadan denttettiyo loꞌꞌo ogee awugee?
7 Giriike biittan deꞌiya macara biiroy hagaadan giidi xaafiis: “Geeshsha Maxaafay yootiyoobaa koyennaageeta maaddiyo ubbaappe loꞌꞌo ogee, Geeshsha Maxaafaa dooyidi an deꞌiya qofaa eta bessiyoogaa. Geeshsha Maxaafaa qofay eti yootiyo aybippenne aaruwan asaa wozanaa denttettana danddayiyoogaa daro ishatinne michoti akeekidosona. (Ibr. 4:12) Daroti Geeshsha Maxaafaappe Xoossaa sunttaa beꞌidoogee, Geeshsha Maxaafaa loyttidi nabbabanau koyanaadan maaddiis.” Hindde biittan deꞌiya macara biiroy hagaadan giidi xaafiis: “Hayquwaabaanne deꞌuwaabaa qonccissiya tumay Hinddu haymaanootiyaa kaalliya daroti eranau koyiyooba. Issoy issuwaa yuuꞌenna alamee yaanaagaa Geeshsha Maxaafay yootiyo hidootaakka ufayttidi siyoosona.” Heeran asaa qofissiya metuwaabaa yootiyoogee Xoossaa Kawotettay he metuwaa waatidi xayssanaakko aassiyaageeti darotoo Geeshsha Maxaafaappe kessidi bessanaadan maaddees.
8. Banttana Kiristtaane giyaageeti oottiyoobaappe denddidaagan Geeshsha Maxaafaa bala ogiyan xeelliyaageetuyyo woygana danddayiyoo?
8 Banttana Kiristtaane giyaageeti oottiyoobaappe denddidaagan issi uri Geeshsha Maxaafaa bala ogiyan xeelliyaaba gidikko, eti Geeshsha Maxaafaanne i tamaarissiyoobaa geellayidoogaa he uri eranaadan oottite. Hindde biittan deꞌiya macara biiroy, “Geeshsha Maxaafay hadaran woosaa keettatussi imettibeennaagaa akeekanaadan issi issitoo nuuni asaa maaddana koshshees” yaagiis. Deꞌuwau Halchidobi Aybee? Hegaa Waata Erana Danddayay? giya brooshuriyaa shaaho 4n deꞌiya, banttana Kiristtaane giyaageeti Xoossaa Qaalaa mooriyoogaanne xayssiyoogaa qonccissiya qofaa beꞌiyo wode, Hinddu haymaanootiyaa kaalliyaageeti garamettiyoogaa issoti issoti yootidosona. Brazile biittan deꞌiya issi aqinyee asaayyo hagaadan giidi yootees: “Geeshsha Maxaafan deꞌiya qofaa aybissi loyttidi erekketii? Daro asay ay haymaanootiyaunne exatennan suure qofan hegaadan oottiiddi deꞌees. I yootiyoobaa eriyo wode intte maalaalettana danddayeeta.”
9. Issi uri koyro Geeshsha Maxaafay tamaarissiyoobaa koyennaba gidikko, nuuni hidootaa qanxxana bessennay aybissee?
9 Yihooway ubba asaa wozanaa xeellees. (1 Sam. 16:7; Lee. 21:2) I suure wozanay deꞌiyoogeeta tumu goynuwaakko ehees. (Yoh. 6:44) Hegaa mala daroti Xoossaabaa mule tamaari erokkona woy Geeshsha Maxaafaa erokkona. Nu haggaazoy eti “attanaadaaninne tumatettaa eranaadan” maaddees. (1 Xim. 2:4) Yaatiyo gishshau, issoti issoti koyro Geeshsha Maxaafay tamaarissiyoobaa eranau koyennaba gidikko, hidootaa qanxxoppite! Eta koshshaa denttettanau intte qaalan deꞌiya xuufetuppe issuwaa goꞌettite. Guyyeppe, Tumuppe Geeshsha Maxaafay Tamaarissiyoy Aybee? giya, nuuni asaa xannaꞌissanau goꞌettiyo waanna maxaafan tobbiyoogaa doommana danddayeeta.
[Sinttaa 4n deꞌiya saaxiniyaa]
Haasayissiyo uri Xoossan ammanennaagaa yootikko, hagaadan giite:
• I hegaadan giidoy aybissakko eranau, “Intte beniisappekka hegaadan qoppeetii?” yaagidi oychite.
• I Budistte haymaanootiyaa kaalliyaagaa gidikko, Adussa wodiyaa saruwaanne ufayssaa—Hegaa ayba ogiyan Demmanee? (Inggilizettuwaa) giya brooshuriyaa sinttaa 9-12 goꞌettite.
• I lodda laamiyan ammaniyaaba gidikko, kaallidi deꞌiya xuufee maaddana danddayees:
Beegottite! (Amaarattuwaa) maxeetiyan “Hagaa Giigissiday Deꞌii?” giya zaari zaari kiyiya huuphe yohuwaa
Maalaalissiya Meretay Xoossaa Bonchuwaa Qonccissees giya biiduwaa
Ufayssiya Deꞌuwaa—Waatidi Demmana Danddayettii? (Inggilizettuwaa) shaaho 4; Deꞌuwan Deꞌiyaabay Merettidee (Amaarattuwaa); qassi Deꞌuwaa Doomettaa—Oychana Koshshiyo Ichashu Oyshata (Amaarattuwaa) giya brooshureta
• Issi uri pirddaa pacaanne tuggaa gaasuwan Xoossan ammanennaba gidikko, ha xuufeti maaddana danddayoosona:
Neessi Qoppiya Medhidaagee Deꞌii? (Inggilizettuwaa) giya maxaafaa, shemppo 10
Xoossay Tumuppe Nuussi Qoppi? giya brooshuriyaa shaahuwaa 6nne Deꞌuwau Halchidobi Aybee? giya brooshuriyaa shaaho 6
• Xoossay deꞌana danddayiyoogaa haasayissiyo uri akeekiyaaba gidikko, sohuwaara Geeshsha Maxaafay Tamaarissiyoy giya maxaafaa xannaꞌiyoogaa doommite. SHemppo 2n woy a hanotaara maayettiya hara huuphe yohuwan doommiyoogee loꞌꞌo gidana danddayees.
[Sinttaa 5n deꞌiya saaxiniyaa]
Haasayissiyo uri Geeshsha Maxaafan ammanennaba gidikko, hagaadan oottite:
• Deꞌuwaa—I Ha Saꞌan Deꞌidoy Ayba Ogiyaanee? Lodda Laamiyaaneeyye Meretaanee? (Inggilizettuwaa) giya maxaafaa shemppo 17nne 18 tobbite.
• Hinddu haymaanootiyaa kaalliyaageeta haasayissiyo wode, Nuuni Xoossaayyo Siiquwaaninne Tumatettan Goynnana Koshshiyoy Aybissee? (Inggilizettuwaa) giya brooshuriyaa goꞌettite.
• Ayhuda haymaanootiyaa kaalliyaageeta haasayissiyo wode, Oli Baynna Alamee Yaanee? (Inggilizettuwaa) giya brooshuriyaa sinttaa 3-11 goꞌettite.
• Geeshsha Maxaafaa maaraa kaalliyoogee demissiyo goꞌꞌaa tobbite. Geeshsha Maxaafaa goꞌꞌaa issi ura bessanau intte goꞌettana danddayiyo xuufeti kaallidi deꞌiyaageeta:
Beegottite! “So Asau” (Amaarattuwaa) giya zaari zaari kiyiya huuphe yohuwaa
Geeshsha Maxaafaa—Ne Deꞌuwan Au Deꞌiya Wolqqaa giya biiduwaa
Xoossaappe Yiya Mishiraachuwaa! giya brooshuriyaa timirtte 9nne 11; Asa Ubbau Haniya Maxaafaa (Amaarattuwaa) giya brooshuriyaa sinttaa 22-26; qassi Ufayssiya Deꞌuwaa—Waatidi Demmana Danddayettii? (Inggilizettuwaa) giya brooshuriyaa shaaho 2
Budistte haymaanootiyaa kaalliyaageeta haasayissiyo wode, Sarotettaunne Ufayssau Efiya Ogiyaa (Inggilizettuwaa) giya brooshuriyaa sinttaa 3-7 goꞌettite.
Isilaamata haasayissiyo wode, Tumu Ammanuwaa—Ufayssiya Deꞌuwau Koshshiya Waannabaa, (Inggilizettuwaa) shaaho 3 goꞌettite.
Asay Geeshsha Maxaafaa ixxiyo heeran sabbakiyaaba gidikko, darotoo zaaretti oychana gakkanaashin, intte yootiyoobaa aybippe yootiyaakko qonccissennaagee loꞌꞌo gidana danddayees.
• Geeshsha Maxaafan odettida hiraagay waanidi polettidaakko qonccissite. Intte goꞌettana danddayiyo xuufeti kaallidi deꞌiyaageeta:
Geeshsha Maxaafaa—Tumu Taarikiyaanne Ammanettiyo Hiraagaa giya biiduwaa
Asa Ubbau Haniya Maxaafaa (Amaarattuwaa) giya brooshuriyaa sinttaa 27-29
• Dumma dumma huuphe yohuwan Geeshsha Maxaafay tamaarissiyoobaa haasayissiyo uri oychikko sohuwaara Geeshsha Maxaafay Tamaarissiyoy giya maxaafaa doommite.
[Sinttaa 6n deꞌiya saaxiniyaa]
Haasayissiyo uri “Taani Xoossan ammanikke” giikko, kaallidi deꞌiyaagaadan gaana danddayeeta:
• “Medhidaagee deꞌiyoogaa taani ammananaadan oottidabaa qanttan qonccissoo?” Yaatidi, Akeekissiyoogaa giya maxaafaa sinttaa 84-86n deꞌiya qofaa yootite woy intte nabbabidi loꞌꞌo qofaa demmido xuufiyaa au ehanau keerite.
• “SHin Xoossay deꞌiyaaba gidikko, i ay mala Xoossa gidanaadan koyeetii? Asaa asaappe shaakkennan siiqiya, suure pirddiyaanne maariya Xoossaakko shiiqanau koyiyoogaa haasayissiyo asaappe daro baggay yootees. Xoossau hegaa mala eeshshay deꞌiyoogaa Geeshsha Maxaafaappe bessite. (Geeshsha Maxaafay Tamaarissiyoy giya maxaafaa shemppo 1 mentto 6ppe doommidi deꞌiyaagaa goꞌettanaukka danddayeeta.)
Haasayissiyo uri “Taani Geeshsha Maxaafan ammanikke” giikko, kaallidi deꞌiyaagaadan gaana danddayeeta:
• “Hegaadan qoppiya daro asay deꞌees. Issoti issoti Geeshsha Maxaafay saynisiyaara maayettenna woy Geeshsha Maxaafaa maaray ha wodiyau maaddenna giidi qoppoosona. Intte Geeshsha Maxaafaa nabbabi ereetii? [Zaaranaashin takki ga. Yaatidi, Asa Ubbau Haniya Maxaafaa (Amaarattuwaa) giya brooshuriyaa sinttaa 3n deꞌiya doometta qofaa bessidi, brooshuriyaa immite.] Haymaanootiyaa kaalliyaageeti Geeshsha Maxaafay yootiyoobaa bala ogiyan tamaarissiyo gishshau, daroti a xaasayi xeelloosona. Hara galla sinttaa 4ninne 5n deꞌiya qofaa tobbanau koyays.”
• “Daro asay hegaadan gees. Geeshsha Maxaafan taani maalaalettanaadan oottiya issi qofaa bessoo? [Geeshsha Maxaafay saynisiyaara gayttidaban likke gidiyoogaa bessiya Iyyooba 26:7 woy Isiyaasa 40:22 nabbabite.] Geeshsha Maxaafay so asaa maaddiya aadhida eratetta qofaakka oyqqiis. Hegaa hara gallassi inttena bessana.”
• “Hegaa yootido gishshau, galatays. Xoossay asaa naatuyyo issi maxaafa xaafikko, he maxaafay ay qofaa oyqqana koshshees giidi qoppeetii?” Yaatidi, a qofaara maayettiyaabaa Geeshsha Maxaafaappe bessite.