Hananabaa Yootidaageetu Leemisuwaa Kaallite—Mikiyaasa
1. Mikiyaasi geella woygi oychana danddayii, i yootidobay coo hada attibeennay aybissee?
1 ‘Ha moorettida alamee wurssettan xayanay awudee?’ Hananabaa yootiya Mikiyaasi Israaꞌeelanne Yihudaa kawotettaa bolli yaana Yihoowa pirddaa awaajjiyo wode hegaa mala oyshaa oychennan aggenna. SHin i yootidobay coo hada attibeenna. Yihooway Samaariyaa xeelliyaagan yootidobay 740 K.K. Mikiyaasa wodiyan polettiis. (Mik. 1:6, 7) Guyyeppe, 607 K.K. Yerusalaamee xayiis. (Mik. 3:12) Ha wodiyan Yihooway ehaana pirddaa naagiiddi Mikiyaasa leemisuwaa waatidi kaallana danddayiyoo?
2. Nuuni Yihoowa gallassaa naagiiddi danddayancha gidiyoogaa waatidi bessanee, qassi aybissi?
2 Danddayan Naagite: Mikiyaasi, “Tana gidikko, taani ufaissan GODAA xeellashshana; tana ashshiya Xoossaa taani naagashshana” yaagidi xaafiis. (Mik. 7:7) Gidoppe attin, Mikiyaasi aynne oottennan coꞌꞌu gi uttidi wurssettay yaanaagaa naagibeenna. I Yihooway kiittin hananabaa yootiyo gishshau darobaa oottiiddi takkiis. Nuunikka Yihoowa gallassaa naagiiddi, nu “de7oi geeshshanne Xoossaa milatiyaagaa” gidiyoogaa bessiya oosuwaa oottana koshshees. (2 PHe. 3:11, 12) Yihoowa danddayay asay nagaraappe simmanau wodiyaa demmanaadan oottees. (2 PHe. 3:9) Yaatiyo gishshau, danddayancha gidiyoogan hananabaa yootidaageetu leemisuwaa kaallanaadan Geeshsha Maxaafay yootiyo zoriyaa oosuwan peeshshoos.—Yaaq. 5:10.
3. Yihooway geeshsha ayyaanaa immanaadan nuuni woossana koshshiyoy aybissee?
3 Yihooway Immiyo Wolqqan Ammanettite: Mikiyaasau imettida oosoy deexxiyaagaa gidikkokka, i he oosuwaa polanau wolqqaa immanaadan Yihoowakko xeelliis. (Mik. 3:8) Nuuni wolqqaa demmanau Xoossan ammanettanaadan Yihoowa Qaalay zoriyoy hegaassa. Ayyaanaaban banttau imettida oosuwaa polanaadan, Yihooway daafuridaageetuyyo kehatettan wolqqaa immees. (Maz. 84:5, 7; Isi. 40:28-31) Intte Xoossaayyo oottiyo wode intte deꞌuwan hegaa beꞌidetii? Maaduwaa demmanau Yihooway ba geeshsha ayyaanaa immanaadan ubbatoo akko woosseetii?—Luq. 11:13.
4. Mikiyaasa hanotay ha wodiyan nuuyyo loꞌꞌo leemiso giyoy aybissee?
4 Mikiyaasi ba deꞌuwan Xoossaa sheniyaa oottiyoogaa kaseyiis. A yuushuwan deꞌiya asay kandduwaaban moorettidaagaa gidikkokka, i ammanettidaagaa gididi deꞌanau murttiis. Hegaadan, suuretettaa naagennaadan nuna galla galla paacee gakkees. Hegaa gishshau, ‘Yihoowa nu Xoossaa sunttan meri merinau hemettanau’ kaseegaappe aaruwan murttidaageeta gidoos.—Mik. 4:5.