Sohuwaara Kaallada Maadda

Nu Weyb sayttee ooratta ogiyan giigoosappe doommidi, Geeshsha Maxaafaa xannaꞌanawu Intternneetiyan oychiya asaa qooday keehi gujjiis. Yihoowa Markkati dabaaban markkattiyo ooratta hiillan sabbakiyo wode etaara gayttida asatikka Geeshsha Maxaafaa xannaꞌanawu oychoosona. Macara biiroy Yihoowa Markkati hegaa mala asatuura sohuwaara gayttanaadan maaddees. Leemisuwawu, issi asi xannaꞌanawu koyiyoogaa jw.org sayttiyan yootikko, macara biiroy naaꞌꞌu gallassa giddon he oychida uri deꞌiyo heeran deꞌiya gubaaꞌe cimatussi erissees. SHin, Geeshsha Maxaafaa xannaꞌanawu hegaadan oychida issi issi asatuura amarida saaminttawu ooninne gayttibeennaagaa akeekida. Yaatin, xannaꞌanawu oychida uri ba qofaa laammennan deꞌishin waati maaddana danddayiyoo?—Mar. 4:14, 15.

Ne haggaazo moottan deꞌenna uri Geeshsha Maxaafaabaa tobbanawu koyiyaaba gidikko, Hayyanintta Kaallidi Maaddite (S-43) giya qitsiyaa sohuwaara kunttada, kaalliya gubaaꞌe shiiquwaa wode gubaaꞌiyaa xaafiyawu imma. Gubaaꞌiyaa xaafee qassi jw.org sayttiyan ha allaalliyawu giigida sohuwan xaafidi issi woy naaꞌꞌu gallassa giddon hegaa kiittana bessiyo gubaaꞌiyawu woy macara biiruwawu kiittana bessees. Gubaaꞌe cimati ubba wode he Weyb sayttiyaa xomoosana koshshees. Issi uraara gayttanaadan yootiya kiitay etawu gakkikko, eti sohuwaara kaallidi maaddana koshshees. Issi aassiyaagaassi hegaa mala ura oychanaadan aawatettay imettikko, hegaa harabaappe kaseyana bessees. He uri son baynnaba gidikko, ne adrashaanne issi issibaa xaafada yan wottada baana danddayaasa.