Hananabaa Yootidaageetu Leemisuwaa Kaallite—Sofonaasa
1. Sofonaasi hananabaa yootiyo wode Yihudan deꞌiya hanotay ay malee, qassi i ha wodiyan nuussi loꞌꞌo leemiso gidiyoy aybiinee?
1 Hegee hanidoy laappuntta xeetu layttaa baggaa K.K. heeraana; he wode Yihudan deꞌiya asay Baꞌaalawu goynnees. Iita Kawuwaa Amoona asi worin, a sohuwan yelaga gidida Kawoy Yoosiyaasi haariiddi deꞌees. (2 Odi. 33:21–34:1) He wode Yihooway Ba pirddaa kiitaa yootanaadan Sofonaasa denttiis. Sofonaasi Yihudaa kawotu zare gidana danddayikkokka, Yihudaa halaqatuyyo Yihooway yoota giido pirddaa kiitaa mintti yootiyoogaa aggibeenna. (Sof. 1:1; 3:1-4) Hegaadan, nuunikka Sofonaasadan xalana koshshees; qassi nu so asaara deꞌiya dabbotay nuuni Yihoowayyo goynnennaadan diggenna mala naagettana bessees. (Maa. 10:34-37) Sofonaasi yootidobay aybee, qassi hegee ayba ayfe demissidee?
2. Yihoowa hanqquwaa gallassi qosettidi attanawu nuuni ay oottana bessii?
2 Yihoowa Koya: Ba hanqquwaa gallassi asaa ashshana danddayiyay Yihoowa xalla. Sofonaasi he gallassay gakkennan asay Yihoowa koyanaadan, xillotettaa koyanaadaaninne ashkketettaa koyanaadan minttettidoy hegaassa. (Sof. 2:2, 3) Ha wodiyankka hanotay hegaa mala. Nuuni asay Yihoowa koyanaadan minttettiyoogaana xalla gidennan, Yihoowa ‘kaalliyoogaa aggidi guyye simmennaadan’ murttiyoogankka Sofonaasa leemisuwaa kaallana bessees. (Sof. 1:6) Ubba nuuni a Qaalaa loytti xannaꞌiyoogaaninne a kaaletuwaa demmanawu woossiyoogan Yihoowa koyoos. Nuuni kandduwan geeshsha gididi deꞌiyoogan xillotettaa koyoos. Ubbatoo haarettiyoogaaninne Yihoowa dirijjitiyaappe imettiya kaaletuwaa sohuwaara kaalliyoogan ashkketettaa koyoos.
3. Haggaazuwaara gayttidaagan nuuyyo loꞌꞌo qofay deꞌana bessiyoy aybissee?
3 Loꞌꞌo Ayfiyaa: Sofonaasi yootido pirddaa kiitay Yihudan deꞌiya issoti issoti loꞌꞌobaa oottanaadan denttettennan aggenna; shin naatettaappe doommidi Yihoowa koyiyoogaa doommida yelaga Yoosiyaasa loꞌꞌobawu denttettidoogee qoncce. Yoosiyaasi guyyeppe eeqa goynuwaa he biittaappe xayssanawu asaa denttettiis. (2 Odi. 34:2-5) Ha wodiyan, Kawotettaa zerettaappe issoy issoy ogiyaa doonan, shuchaa anccoy deꞌiyo biittan woy aguntta giddon wodhiyaaba gidikkokka, issoy issoy aradda biittan zerettidi ayfees. (Maa. 13:18-23) Nuuni Kawotettaa zerettaa aggennan zeriyo wode Yihooway nu daafuraa anjjanaagaa ammanettoos.—Maz. 126:6.
4. Nuuni Yihoowa naagana koshshiyoy aybissee?
4 Yihudan deꞌiya issoti issoti Yihooway ubbabaakka coꞌꞌu giidi xeelliyaabadan qoppidosona. SHin Yihooway he wode ba gita gallassay matidoogaa yootiis. (Sof. 1:12, 14) Bashshaappe attanaageeti a baqatidi attiyoosa oottiyaageetu xalla. (Sof. 3:12, 17) Nuuni Yihoowa naagiyo wode, nu gita Xoossaayyo goynniyaageetuura issippe oottiyoogan ufayttiyaageeta gidoos.—Sof. 3:8, 9.