Kawotettaabaa Erissido Xeetu Layttaa!
1. Xeeta gidiya layttappe kase, Yihoowa asay ay oottanaadan odettidee?
1 “Kawoy kawotiis! Intte abaa yootiyaageeta. Yaatiyo gishshawu, Kawuwaanne a Kawotettaa erissite, erissite, erissite.” Ishaa Razerforddi issi xeeta gidiya layttappe kase hegaadan yootido minttettiyaabay, Yihoowa asay Xoossaa Kawotettaa mishiraachuwaa ubbasan yootanaadan denttettiis. Nuunikka hegaadan oottida! Beni Kiristtaanetuugaadan, nuunikka Kawotettaa mishiraachuwaa “sa7an de7iya mereta ubbaa matan” yootida. (Qol. 1:23) Aadhida xeetu layttan, Xoossaa Kawotettaabaa erissanawu ay ay oottidoo? He Kawotettay eqqoosappe 100 layttay kumana haniyo ha wodiyan nuuni aggennan hegaa waati erissana danddayiyoo?
2. Nu xuufee Xoossaa Kawotettaabaa waati erissidee?
2 Aadhida Wodiyaa: Keehi daro layttawu nu xuufee Xoossaa Kawotettaabaa erissiiddi takkiis. Nu waanna maxeetiyaa huuphe yohoy 1939ppe doommidi, Yihoowa Kawotettaa Erissiya Wochiyo Keelaa yaagees. Ha maxeetee darotoo he Kawotettaabaanne he Kawotettay poliyoobaa yootees. Asaa naata woppissiyay Xoossaa Kawotettaa xalla gidiyo gishshawu, Beegottite! maxeeteekka hegaabaa loytti yootees. Ha wodiyan kumetta alamiyan hara ay xuufiyaappekka aaruwan dumma dumma doonan birshshettiyaynne asawu imettiyay ha naaꞌꞌu maxeeteta gidiyoogee bessiyaaba!—Ajj. 14:6.
3. Xoossaa Kawotettaabaa erissanawu nuuni goꞌettido issi issi ogeti awugeetee?
3 Yihoowa asay Xoossaa Kawotettaabaa dumma dumma ogiyan erissiis. Beni wode, duuqettidabaa kaamiyan sissiyoogan, eraadooniyan haasayiyoogaaninne hegaa mala hara ogetun Kawotettaabaa erissida. Ha hiillati Kawotettaabaa yootiyaageeti guutta gidido he wodiyan daro asawu mishiraachuwaa yootanawu maaddidosona. (Maz. 19:4) Mata wodiyaappe haa simmin qassi, nu oosoy teqettido biittan deꞌiya asaa gujjin, miilooniyan qoodettiya asaa Kawotettaabaa erissanawu jw.org sayttiyan darobay kiyees.
4. Nuuni goꞌettido hara dumma hiillay aybee?
4 Yihoowa asay Kawotettaa mishiraachuwaa ubba asawu yootanawu hara dumma hiillankka goꞌettiis. Leemisuwawu, sooppe soo biidi haggaaziyoogaa bolli, 1995 heeraappe doommidi asay allaxxiyo heeran, kaamee eqqiyoosaaninne zalꞌꞌe heeran sabbakida. Qassi mata wodiyaappe haa simmin, kumetta saꞌan asay dariyo gita katamatun dabaaban markkattiyoogaa doommida. Hegaa bollikka, daro gubaaꞌeti bantta haggaazo moottan asay dariyo heeran xuufeta xarapheezaaninne gaariyan wottidi dabaaban markkattoosona. SHin nuuni Kawotettaabaa asawu yootiyo waanna ogee sooppe soo biidi markkattiyoogaa gidiyoogee qoncce.—Oos. 20:21.
5. Ooratta haggaazo layttan nuuni ayba ogiyan haggaazana danddayiyoo?
5 Sinttanaabaa: Ooratta haggaazo layttay Masqqala aginan doommiyo wode, daroti aqinye gididi haggaaziyoogaa doommana. Neenikka hegeetuppe issuwaa gidaneeshsha? Gidana danddayennaba gidikko, ne hanotaa giigissada issi issitoo kaafiya aqinye gidana danddayay? Neeni aqinye gidanawu danddayin aggin, Xoossaa Kawotettaabaa erissanawu oottiyoobaa gishshawu Yihooway nena anjjanaagee erettidaagaa.—Mil. 3:10.
6. Xiqimita 2014y dumma agina gidiyoy aybisee?
6 Xoossaa Kawotettay eqqoosappe Xiqimita 2014n 100 laytta kumees. He aginan, asawu immiyo Wochiyo Keelay Xoossaa Kawotettaabaa qonccissiyaagaa gidiyoogee bessiyaaba. He Wochiyo Keelaa neessi danddayettida keenan daro asaayyo immanawu ayssi baaxetikkii? Sinttanaabaa hidootan naagiiddi, nuuni yootiyoobaa siyiya ubbawu aggennan ‘Xoossaa Kawotettaabaa yootiyaageeta’ gidoos.—Oos. 8:12.