Haggaazuwan Kaseegaappe Qara Gidiyoogaa—Asassi Qoppiyoogaa Bessiyoogaa

Hegee Keehi Koshshiyoy Aybissee? Yesuusi asaa naata baagaadan xeelliis, qassi i etassi qoppiyoogaa siiquwan bessiis. Leemisuwawu, Yesuusi issi wode issi duude gidida asawu qarettiyoogaa bessiis, hegaa gishshawu a pattiis, barkka he bitaniyaa asaa giddoppe kessidi hegaa oottiis. (Mar. 7:31-35) I a ashkkaratu abbe paca gidiyoogaa akeekiyoogan etassi qoppiyoogaa bessiis, qassi eti akeekana danddayiyoobi guutta gidiyoogaa qoppiis. (Yoh. 16:12) Yesuusi saluwaa simmidikka asa naatussi qoppiyoogaa bessiis. (2 Xim. 4:17) Nuuni Kiristtaane gidiyo gishshawu a leemisuwaa kaallanawu koyoos. (1 PHe. 2:21; 1 Yoh. 3:16, 18) Hegaa bollikka, nuuni haasayissiyo urassi qoppiyoogaa bessiyaaba gidikko, qassi a hanotay ay malakko, i koyiyoobay aybakkonne bana qofissiyaabay aybakko eranawu maliyaaba gidikko, haggaazuwan loꞌꞌo ayfiyaa demmana danddayoos. He uri nuuni kiitaa gattiyaageeta woy maxeetiyaa asawu immiyaageeta gidennan, ayyo qoppiyaageeta gidiyoogaa akeekikko, nuuni yootiyoobaa siyanawu koyanaagee erettidaagaa.

Waatana Danddayiyoo?

• Loyttada giigetta. Unꞌꞌettennan haasaya, moocu ga qassi pashkki gaada haasayissa.

• Akeekancha gida. He uraa hanotay ayyo naati deꞌiyoogaa bessiyaabee? ataakilttiyaa tokkiyoogaa woy mehiyaa haariyoogaa dosii? i haymaanootiyaa mintti kaalliya asa gidiyoogaa bessiyaabi deꞌii? Hegaa mala gidikko, haasayaa doommiyo qofaa he hanotaara maayiya ogiyan laammana danddayaasa.

• Ba qofaa yootanaadan oycha, qassi yootishin loyttada ezgga. Neeni a ezggiyoogaa bessiya ogiyan tishshi oottada xeella. Ba qofaa yootido gishshawu galata, qassi i yootiyoobaappe neeni nashshiyoobi deꞌikko hegaa ayyo yoota. Palamettoppa.

• Haasayiyoobaanne haasayiyo ogiyaa hanotaadan laamma. Issi issitoo, he uraa qofissiyaabaa tobbiyoogee loꞌꞌo. Nu trakttetun, brooshuretuuninne maxeetetun dumma dumma allaalliyaara gayttida daro qofay deꞌiyo gishshawu, hegee deexxiyaaba gidenna. Neeni akko biidoy injjetenna wodiyaana, leemisuwawu, i oosuwaa oottishin gidikko, a hanotaa akeekada ne qofaa qanttan yoota.

Ha Aginan Hagaa Oottanawu Mala:

• Haggaazuwan nuuni demmiyo asawu qoppiyoogaa woy nuuni haasayanawu qoppidobaa gidennan eta qofissidabaa tobbiyoogaa so asaa goynuwaa wode woy haggaaziyo wode meezeta.

• Haggaazuwawu kiyanaappe kase shiiqiyo shiiquwaa kaalettiya ishay issi issitoo, asassi qoppiyoogaa waati bessana danddayiyaakko qonccissana woy hegaa qonccissiya ootti-besuwaa bessana danddayees.