Nu Weyb Sayttiyaa Haggaazuwan Goꞌettite—“Geeshsha Maxaafaa Oyshaa Zaaruwaa”
Amaaratto jw.org sayttiyan “Geeshsha Maxaafaa Timirttiyaa” giyaagaa garssan “Geeshsha Maxaafaa Oyshaa Zaaruwaa” giyaagee deꞌees. Nuuni hegan kiyiya, daro asay oychiyo oyshata eriyaaba gidikko, keettaaway oychiyoobaa zaaruwaa nu Weyb sayttiyaappe yootana woy bessana danddayoos. Ha oyshata haggaazuwan asaara haasayaa doommanawukka goꞌettana danddayoos. Ha oyshatuppe issuwaa denttidi hegaa xeelliyaagan oychana, a qofaa siyananne Geeshsha Maxaafay hegawu immiyo zaaruwaa jw.org sayttiyaappe yootana danddayoos. Yaatidi, nuuni he qofaa awuppe demmidaakko yootana woy bessana danddayoos. Woy keettaaway ba oyshaa zaaruwaa nu Weyb sayttiyaappe nabbabanaadan oottana danddayoos. Woradaa xomoosiya issi ishaa machiyaa, haasayissiyo uraa, “Nu bolli metuwaa ehiyay Xoossayshsha yaagidi daro asay qoppees. Hegaa zaaruwaa 51 sekondde giddon erana koyay?” yaagada oychiyoogan loꞌꞌo ayfiyaa demmaasu. A hegaadan oycha simmada, hegaa zaaroy cenggurssan giigidaagaa moobayle malaban duuqqidoogaa sissawusu. A Geeshsha Maxaafay Tamaarissiyoy giyo maxaafaappe shemppo 11 erissada kuuyawusu.