Qooqeti Yihoowabaa Eranaadan Maaddite
1. Qooqetuyyo qarettiyoogaa Yesuusi waati bessidee?
1 Yesuusi hayqqanaappe guutta gallassaa kasetidi, Yarkko katamaappe i kiyiyo wode naaꞌꞌu qooqe woosanchati bantta qaalaa xoqqu oottidi, ‘Godawu, nuna maararkkii’ yaagidosona. Yesuusi bana gakkana wolqqaama metuwaa qoppiiddi deꞌikkonne, eqqidi, eta baakko xeesidi pattiis. (Maa. 20:29-34) Nuuni Yesuusaagaadan qooqetuyyo waani qarettana danddayiyoo?
2. Qooqe uraara gayttiyo wode nuuni waati markkattana danddayiyoo?
2 Wozanappe Maaddite: Intte qooqe uraara gayttiyo wode, aara erettidi a maaddite. Hegaa mala asata harati darotoo cimmiyo gishshawu, i koyro sirana danddayees. Gidoppe attin, intte wozanappe qarettiyoogeenne qoppiyoogee i hirggennaadan oottana danddayees. Qooqetu hanotay dumma dumma gidiyoogaa hassayite; qassi hegee a aybin maaddana danddayiyaakko akeekanaadan inttena maaddees. Maaddi simmidi, intte asaa Geeshsha Maxaafaa tamaarissiyoogaa ayyo yootana danddayeeta. Mazamure 146:8 woy Isiyaasa 35:5, 6nne hegaa mala xiqisiyaa ayyo nabbabanawu koyiyoogaa yootite. I Bireeliyaa nabbabana danddayikko, Geeshsha Maxaafaabaa loytti eranawu maaddiya Bireeliyan giigida xuufeta koyiyaakkonne a oychite. Qassi cenggurssan giigidabaa jw.org sayttiyaappe i demmanaadan maaddana danddayeeta. A komppiyuteriyan xuufiyaa iskriniyaappe nabbabiya iskrin rider giyo prograamee deꞌikko, jw.org sayttiyan kiyida huuphe yohotanne RTF (Rich Tekist Format) giyo formatiyan duuqqana danddayiyo xuufeta i koyana danddayees.—“Qooqe Ura Maaddiyo Wode . . . ” giya saaxiniyaa xeella.
3. Nu moottan qooqeta waati koyana danddayiyoo?
3 Qooqeta Koyite: Daro qooqeti eti erenna, eta soo biya uraara haasayanawu ufayttenna gishshawu, nuuni sooppe soo biidi haggaaziyo wode qooqe asa darotoo demmokko. Hegaa gishshawu, hegaa mala asata ‘xomoosidi’ woykko koyidi mishiraachuwaa yootanawu wozanappe baaxetana koshshees. (Maa. 10:11) Inttenaara oottiya woy tamaariya qooqe uri deꞌii? Aara haasayaa kasetidi doommite. Intte haggaazo moottan qooqeti tamaariyo timirtte keettay deꞌikko, nu xuufiyaappe Bireeliyan giigida amaridaagaa timirtte keettaa laybireeriyawu immite. Qooqe uri deꞌiyo keetta asa ereetii? Qooqeta maaddiya woykko etawu deꞌiyo keettaanne koshshiya harabaa giigissiya dirijjitee intte moottan deꞌii? Yihoowa Markkati qooqeta maaddanawu keehi koyiyoogaanne intte Bireeliyan giigida xuufiyaa woy cenggurssan giigidabaa ehaanawu koyiyoogaa so asawu, imattaa mokkiyaagawu, woy halaafiyawu yootite. Xoossay mata wode qooqeta merinawu pattanaagaa Geeshsha Maxaafay yootiyoobaa ayyo bessite. Qassi Bireeliyan giigida Geeshsha Maxaafan goꞌettida issi qooqe uraabaa yootiya “Wizawut It, Ay Wud Fiil Lost,” giyo biiduwaa jw.org sayttiyaappe bessana danddayeeta. Intte biido gaasuwaa hegaadan yootiyoogee qooqe uraara gayttanaadan oottana danddayees.
4. Janeti hanotaappe ay tamaariyoo?
4 Janeto giyo qooqe michiyaa qooqeti deꞌiyo dirijjitiyaa baasu. A yan deꞌiya issi maccaaseera haasayiyoogaa doommaasu. Janeta iyyo, “Yesuusi qooqetu ubbaassi oottanabaa bessanawu qooqeta pattiis” yaagaasu. Eti naaꞌꞌay Ajjuutaa 21:3, 4n deꞌiya qofaa tobbidosona, qassi Janeta he hidootay Xoossaa Kawotettan waani polettanaakko yootaasu. Maccaasiyaa coꞌꞌu ga simmada yaagaasu: “Qooqetuura gayttidaagan he qofaa yootin taani siya erikke. Xeelliya daro asay qooqeti eti woy eta mayzzati oottidobaa gaasuwan qooqidosona giidi qoppees.” Maccaasiyaa Geeshsha Maxaafay Tamaarissiyoy giyo maxaafaa Intternneetiyan waata demmanaakko Janeta imeeliyan kiittaasu, qassi eti issippe haꞌꞌi saaminttan naaꞌꞌutoo Geeshsha Maxaafaa xannaꞌoosona.
5. Nuuni Yesuusaagaadan qooqeta pattana danddayennaba gidikkokka, qooqetussi nuuni qarettiyoogee ayba anjjuwaa demissii?
5 Nuuni Yesuusaagaadan qooqeta pattana danddayennaagee tuma; shin qooqeta gujjin, ha saꞌaa xoossay eta qofaa jallissido ubbay Xoossaa Qaalaa tumaa akeekanaadan maaddana danddayoos. (2 Qor. 4:4) Yesuusi Yarkko katamaa matan naaꞌꞌu qooqeta pattidoy i etawu ‘qarettido’ gishshaassa. (Maa. 20:34) Nuuni qooqetuyyo hegaadan qarettikko, qooqeta merinawu pattana Yihoowabaa issoti issoti eranaadan maaddiyoogan ufayttana danddayoos.