Nuuni Tamaarissanawu Goꞌettiyo Miishshata
1. Kiristtaaneti kushe hiillancha mala gidiyoy aybiinee?
1 Kushe hiillanchay dumma dumma miishshata goꞌettees. I amarida miishshata dummabaa oottanawu issi issitoo goꞌettees; qassi waanna ooso miishshata ubbatoo goꞌettees. Gooba hiillanchati waanna ooso miishshata ubbatoo oyqqoosona; qassi hegeeta goꞌettiyoogankka eti keehi qara. Geeshsha Maxaafay ubba Kiristtaaneti minnidi haggaazanaadaaninne ‘yeellatenna oosancha gidanaadan’ minttetees. (2 Xim. 2:15) Nuuni ubbatoo oyqqana bessiyo waanna miishshay aybee? Xoossaa Qaalaa; hegee nuuni ‘asay Yesuusa kaallanaadan oottanawu’ goꞌettiyo waanna miishsha. (Maa. 28:19, 20) Hegaa gishshawu, nuuni ‘tumatettaa qaalaa suuretettan yootiyoogan’ qara gidanawu baaxetana bessees. Qassi ubba Kiristtaaneti waati hiillan goꞌettanaakko tamaarana bessiyoonne asaa tumaa tamaarissanawu ubbatoo goꞌettana koshshiyo hara miishshati deꞌoosona.—Lee. 22:29.
2. Nuuni tamaarissanawu goꞌettiyo waanna miishshati awugeetee?
2 Nuuni Tamaarissanawu Goꞌettiyo Waanna Miishshata: Nuuni tamaarissanawu goꞌettana koshshiyo miishshay Geeshsha Maxaafaappe haray aybee? Nuuni Geeshsha Maxaafaa tumaa tamaarissanawu goꞌettiyo waanna miishshay Tumuppe Geeshsha Maxaafay Tamaarissiyoy Aybee? giyo maxaafaa. Qassi ha maxaafaa issi xinaatiyaa xannaꞌissidi wurssikko, i ubba wode Geeshsha Maxaafaa maaraa ba deꞌuwan oosuwan peeshshanaadan ‘Xoossaa Siiquwan Deꞌa’ giyo maxaafaa xannaꞌissoos. Hegaa gishshawu, nuuni ha naaꞌꞌu miishshata goꞌettiyoogan qara gidana bessees. Qassi amarida brooshuretakka xannaꞌissanawu goꞌettana bessees. Xoossaappe Yiya Mishiraachuwaa! giyo brooshuree xinaatiyaa doomissanawu maaddiya waanna miishshatuppe issuwaa. Nu haggaazo moottan deꞌiya asay nabbabanawu metootiyaaba woy eti haasayo doonan daro xuufee baynnaba woykko mule baynnaba gidikko, Xoossay Yootiyoobaa Siya woy Xoossay Yootiyoobaa Siya Yaatada Merinau Deꞌa yaagiyo brooshureta goꞌettana danddayoos. Xinaateti Yihoowa dirijjitiyaa loytti eranaadan maaddiyo waanna miishshay Ha Wodiyan Yihoowa SHeniyaa Poliyaageeti Oonee? giyo brooshuriyaa. Biidoy nuuni asay Yesuusa kaallanaadan maaddanawu keehi goꞌꞌees; hegeetuppe amaridaageeti, Geeshsha Maxaafaa Xannaꞌana Koshshiyoy Aybissee?, Kawotettaa Addaraashan Oosettiyaabay Aybee?, qassi Xoossaayyo Sunttay Deꞌii? giyoogeeta; nuuni hageeta waati loytti goꞌettanaakkokka tamaarana koshshees.
3. Nu Kawotetta Haggaazuwaa maxeetiyan sinttappe kiyana qofay nuuni waatanaadan maaddanee?
3 Nu Kawotetta Haggaazuwaa maxeetiyan sinttappe kiyana qofay nuuni tamaarissanawu goꞌettiyo daro miishshata goꞌettiyoogan qara gidanaadan maaddana. Nuuni ha miishshata loytti goꞌettanawu baaxetiyo wode, “Ne huuphiyaanne ne timirttiyaa naaga. Neeni hegaa oottikko nenanne neeni giyoogaa siyiyaageeta ashshiyo gishshau, aggennan ootta” yaagiya zoriyaa oosuwan peeshshoos.—1 Xim. 4:16.