Haggaazuwan Kaseegaappe Qara Gidiyoogaa—Geeshsha Maxaafay Tamaarissiyoy Giyo Maxaafaa Asawu Immiyoogaa

Hegee Keehi Koshshiyoy Aybissee? Geeshsha Maxaafay Tamaarissiyoy giyo maxaafay nuuni haggaazuwan waannayidi goꞌettiyo miishsha. Gidikkokka, hegaa goꞌettidi issi ura xannaꞌissanaappe kase, he maxaafaa ayyo immana bessees. Hegaa gishshawu, nuuni ubbay Geeshsha Maxaafay Tamaarissiyoy giyo maxaafaa asawu immiyo wode akeekancha gidanawu baaxetana bessees. (Lee. 22:29) He maxaafaa asawu immiyo daro ogee deꞌees; qassi aassiyaageeti hegaappe banttawu injjetiyaagaa goꞌettana danddayoosona.

Waatana Danddayiyoo?

He maxaafan deꞌiya issi shemppuwaappe zaaro demmiyo, keettaaway eranawu keehi koyiyo issi oyshaa oycha. Issi shemppuwaa doomettan deꞌiya oyshaakka oychana danddayaasa. Keettaaway giyoobaa siya simmada, he qofaara maayiya xiqisiyaa nabbabada he qofaa qonccissiya issi menttuwaa maxaafaappe bessa; geella hegaa qanttan tobbana danddayeeta.
He maxaafaa asawu immana danddayiyo hara ogee qassi, koyro heeran deꞌiya, keettaaway eranawu keehi koyiyo oyshata oychada, Geeshsha Maxaafay hegawu immiyo zaaroy he maxaafan awan deꞌiyaakko bessiyoogaa. Leemisuwawu, mata wode gakkida daafabaa oda simmada daro asay sintta 3n deꞌiya oyshatu zaaruwaa eranawu koyiyoogaa qonccissana danddayaasa. Woykko sinttanaabaa ufayssiyaabaa hidootanaadan maaddiyaabaa asawu odaydda deꞌiyoogaa qonccissana danddayaasa. Yaatada, sinttaa 4-5n deꞌiya misiliyaa bessada, “Hagan qonccida hidootaappe polettin beꞌanawu neeni keehi koyiyoy awugee?” yaagada oycha. Woy qassi gita oyshatu zaaruwaa asay demmanaadan maaddaydda deꞌiyoogaa yootana danddayaasa. Yaatada, sintta 6 tohossan deꞌiya oyshata bessada, keettaaway he oyshatuppe awugaa zaaruwaa eranawu koyiyaakko oycha.
Geeshsha Maxaafaa xannaꞌissanawu koyiyoogaa keettaawawu yootanakka danddayaasa. Hagaadan gaana danddayaasa: “Geeshsha Maxaafaa xannaꞌanawu maaddiya ha xuufiyaa asaa bessiiddi deꞌoos. Hagaappe kase ha xuufiyaa beꞌa eray? [Zaaranaashin takki ga.] Ha xuufiyaa goꞌettada ne Geeshsha Maxaafaa waata xannaꞌana danddayiyaakko guuttaa daqiiqa giddon nena bessana.”

Ha Aginan Hagaa Oottanawu Mala:

So asaa goynuwaa wode meezeta.
Haggaaziyo wode, neeni gaanawu koyidobaa nenaara haggaaziya uraara haasaya. (Lee. 27:17) Neeni asaa haasayaa doomissanawu giigettido qofay loꞌꞌo ayfe demissana xayikko, ne qofaa laamma.