Hananabaa Yootidaageetu Leemisuwaa Kaallite—Imbbaaqooma
1. Nuuyyookka Imbbaaqoomaagaadan siyettana danddayiyoy aybissee?
1 Ha wodiyan nu bolli gakkiya metoy dari dari biyo wode, nuunikka Imbbaaqoomaagaadan qoppana danddayoos; i, “Ha naaquwaa tana aissi bessai? Mooruwaa xeellaidda neeni aissi co77u gaada danddayai?” yaagidi Yihoowa oychiis. (Imb. 1:3; 2 Xim. 3:1, 13) Yihoowa pirddaa gallassaa naagiyo wode, Imbbaaqoomi giidobaanne i ammanettidi oottidobaa wotti dentti qoppiyoogee keehi maaddees.—2 PHe. 3:7.
2. Neeni ammanettada deꞌiyoogaa ha wodiyan waata bessana danddayay?
2 Ammanettada Deꞌa: Imbbaaqoomi babaa xallaa qoppidi hidootaa qanxxiyoogaappe, ayyaanaabaa mishettidi oottiisinne tishshi giidi deꞌiis. (Imb. 2:1) Yihooway ba qaxarido gallassan oottana giidobaa polanaagaa, qassi “xilloi ba ammanuwan” attanaagaa yootidi Imbbaaqooma minttettiis. (Imb. 2:2-4) Wodiyaa wurssettay wurana haniyo, ha wodiyan deꞌiya nuuyyo hegaa eriyoogee ay maaddii? Keehi koshshiyaabay wodiyaa wurssettay awude yaanaakko eriyoogaa gidennan, hegee yaanaagaa ammaniyoogaa. Ammanoy nuuni ubbatoo naagi uttanaadaaninne haggaazuwaa hara ubbabaappe kaseyanaadan maaddees.—Ibr. 10:38, 39.
3. Ubbatoo ufayttidi Yihoowawu oottanawu baaxetana bessiyoy aybissee?
3 Yihoowan Ufaytta: Maagooga biittaa Googi Yihoowa asaa qohiyo wode, nu ammanuwaa paacciyaabay hanana. (Hiz. 38:2, 10-12) Wurssettan xooniyaageetakka gidin, olay keehi wayssees. Geella kattay qaxuwatana danddayees. Aqoy xayananne deꞌoykka keehi iitana danddayees. Hegaa mala metoy gakkiyo wode, nuuni waananee? Imbbaaqoomi metoy gakkana giidi naagido gishshawu, aybi hanikkonne ubbatoo ufayttidi Yihoowawu oottanawu murttiis. (Imb. 3:16-19) “GODAA ufaissai” nuunikka sinttappe gakkana waayiya genccanaadan maaddees. —Nah. 8:10; Ibr. 12:2.
4. Ha wodiyan gidin sinttappe nuna ufayssiyaabay aybee?
4 Matan yaana Yihooway a pirdda gallassan ashshanaageeti deꞌuwaa demissiya Xoossaa ogiyaa tamaarana. (Imb. 2:14) Hayquwaappe denddiyaageetikka Yihoowabaa tamaarana. Ha wodiyan, demmiyo asa ubbawu Yihoowaabaanne a gita oosuwaabaa yootiyaageeta gidoos!—Maz. 34:1; 71:17.