KIRISTTAANETI DEꞌIYO DEꞌUWAA

Sabbakiyoogeenne Tamaarissiyoogee Erissiyo Ashkkara Oottanawu Keehi Koshshiyaaba

Yesuusi bana kaalliyaageeti biidi asaa erissiyo ashkkara oottanaadan azaziis. (Maa 28:19) Hegawu sabbakiyoogee qassi tamaarissiyoogee koshshees. Nuuni ubbay issi issitoo, ‘Erissiyo ashkkara oottanawu keehi maaddiya ha oosota kaseegaappe aaruwan waata loytta oottana danddayiyaanaa?’ giidi oychchana koshshees.

SABBAKIYOOGAA

Asay nuukko yaanaashin naagiyoogaappe, ‘ufaittidi’ siyiya asaa demmanawu nuuni koyana bessees. (Maa 10:11) Nuuni haggaaziyo wode, nunaara ‘gayttiya asa’ ubbawu mishiraachchuwaa yootanawu baaxetiyoo? (Oos 17:17) Lidiya erissiyo ashkkara gididoy Kiitettida PHawuloosi minnidi sabbakido gishshataassa.—Oos 16:13-15.

Sameeli Hizqqeelawu maxeetiyaa immees; Solomoninne Meera Hizqqeelassinne Abigaalissi markkattoosona — “Maallado guuran gidinkka omarssan, ne zerettaa zeriyoogaa aggoppa” (Era 11:6)

AGGENNAN UBBATOO SABBAKIYOOGAA—HAGGAAZUWAA KIYENNAN, QASSI SOOPPE SOO GIYO BIIDUWAA BEꞌITE; YAATIDI, KAALLIDI DEꞌIYA OYSHATA ZAARITE:

Sameeli tumaa zerettaa ubbatoo zeranawu koyiyoogaa waati bessidee?
Metiyaabay deꞌishinkka nuuni dumma dumma ogiyan sabbakan koshshiyoy aybissee?
Ubba gallassi Kawotettaa mishiraachchuwaa oossi oossi yootana danddayay?

TAMAARISSIYOOGAA

Asaa erissiyo ashkkara oottanawu, xuufeta immiyoogaa xallay gidenna. Eti ayyaanaaban diccanaadan maaddanawu, zaarettidi oychchananne Geeshsha Maxaafa xannaꞌissana koshshees. (1Qor 3:6-9) SHin nuuni issi uraa tamaarissanawu keehi baaxetiidikka muruta ayfe demmana xayikko shin? (Maa 13:19-22) Nuuni eta wozanay ‘aradda biittaa’ mala gidido asaa koyiyoogaa aggana koshshenna.—Maa 13:23; Oos 13:48.

Solomoninne Meera Hizqqeelanne Abigaalo xannaˈissoosona; Hizqqeelinne Abigaala dabaaban markkattoosona — “Taani puutiyaa tokkaas; Aphiloosi haattaa ushshiis; shin Xoossai puutiyaa dichchees” (1Qor 3:6)

AGGENNAN UBBATOO SABBAKIYOOGAA—DABAABAN, QASSI ERISSIYO ASHKKARA OOTTIYOOGAA GIYO BIIDUWAA BEꞌITE; YAATIDI, KAALLIDI DEꞌIYA OYSHATA ZAARITE:

Solomoninne Meera Hizqqeelanne Abigaali wozanan tumaa zerettay diccanaadan waati maaddidonaa?
Dabaaban markkattiyoogaa gujjin, ubba qommo ogiyan haggaaziyo wode nu halchchoy ayba gidana koshshii?
Harata tumaa waati loytti tamaarissana danddayiyoo?