“PHauloosi . . . Xoossaa Galatidi, Wozanan Minettiis”

Roomen deꞌiya gubaaꞌee PHawuloosi eta xomoosanawu yiiddi deꞌiyoogaa siyidi 64 kilo meetire gidiya ogiyaa hemettidi A mokkanaadan amarida ishantta kiittiis. Eti bantta goꞌꞌaa aggidi siiqidoogan PHawuloosawu aybi siyettidee? “PHauloosi eta be7ido wode Xoossaa galatidi, wozanan minettiis.” (Oos 28:15) PHawuloosi ba xomoosiyo gubaaꞌeta minttettiyoogan erettiya asa gidikkonne, I qashettido wode awu minttettoy koshshiis.—2Qor 13:10.

Ha wodiyan woradaa xomoosiyaageeti gubaaꞌiyaappe gubaaꞌiyaa biidi ishanttanne michchontta minttettoosona. Xoossawu oottiya haratuugaadan etikka issi issitoo daafuroosona, hirggoosonanne hidootaa qanxxoosona. Woradaa xomoosiya ishaynne A machchiyaa intte gubaaꞌiyaa xomoosanawu haroode yiyo wode, ‘issoy issuwaara minettiyoogan’ eti xalanaadan maaddanawu ay oottana danddayay?—Roo 1:11, 12.

• 

  Haggaazuwawu shiiqiyo shiiquwaa etaara shiiqa. Dummabaa oottiyo he saaminttan, aassiyaageeti bantta goꞌꞌaa aggidi hegan goꞌettiyoogee woradaa xomoosiya ishaa minttettees. (1Tas 1:2, 3; 2:20) He xomoosiyo aginan kaafiya aqinye gidana danddayiyaakkonne qoppa. Neeni he ishaara woy A machcheera sabbakana woy etappe issuwaara ne xinaatiyaa xannaꞌissana danddayay? Mati aassiyoogaa doommidaageetanne haggaazuwan gooba gidennabadan qoppiyaageeta gujjin, aassiya dumma dumma ishatuuranne michchotuura haggaaziyoogan eti ufayttoosona.

• 

  Eta imattatettan mokka. Eti shemppiyoosaa giigissana woy qumaa shoobbana danddayay? Yaatiyoogee woradaa xomoosiya ishaanne A machchiyo siiqiyoogaa bessiyaaba. Eti banttawu keehi darobay giiganaadan koyokkona.—Luq 10:38-42.

• 

  I zoriyoobaa siyada oosuwan peeshsha. Yihoowawu kaseegaappe loytti oottanawu waatana koshshiyaakko akeekanaadan woradaa xomoosiyaagee nuna siiquwan maaddees. Issi issitoo I seerana danddayees. (1Qor 5:1-5) Nuuni eeno giidi azazettiyoogee A ufayssees.—Ibr 13:17.

• 

  Galatiyoogaa yoota. Woradaa Xomoosiyaageenne A machchiyaa -oottiyoobay nena keehi maaddidoogaa yoota. Neeni gayttiyo wode woy masttooshaa xaafada woy karddiyaa kiittada hegaadan oottana danddayaasa.—Qol 3:15.