Beettenna Xoossaa Eeshshata Akeekeetii?

Cora meray deꞌiyo ciishshaanne xoolintteti kumido saluwaa beꞌiyo wode, woykko soossuwaa gunttaa ezggiyo wode Medhdhidaagaa oosuwaa akeekeetii? Nu yuushuwan deꞌiya meretay beettenna Yihoowa eeshshata qonccissidi bessees. (Roo 1:20) Nu beꞌiyoobata takki giidi qoppiyoogan, Xoossa wolqqaa, siiquwaa, aadhdhida eratettaa, suure pirddaanne A kehatettaa akeekoos.—Maz 104:24.

Intte hachchi hachchi beꞌiyo Yihoowa meretatuppe issoti issoti aybee? Intte kataman deꞌiyaaba gidikkokka, kafotanne zaafeta beꞌennan aggekketa. Yihooway medhdhidobata akeekiyo wode, hirggaappe guuttaa shemppoos, keehi koshshiyaabaa xallaa qoppoos, qassi Yihooway merinawu nuussi koshshiyaabaa kunttana danddayiyoogaa kaseegaappe aaruwan ammanoos. (Maa 6:25-32) Intteyyo naati deꞌikko, intte naati laggetiyaabi baynna Yihoowa eeshshata akeekanaadan maaddite. Nuuni nu heeran deꞌiya meretata keehi nashshikko, Medhdhidaagaakko kaseegaappe aaruwan shiiqoos.—Maz 8:3, 4.

MERETAN QONCCIDA MAALAALISSIYAABATI XOOSSAA BONCHCHUWAA BESSOOSONA—POOꞌUWAANNE MERAA GIYA BIIDUWAA BEꞌITE; YAATIDI KAALLIDI DEꞌIYA OYSHATA ZAARITE:

• Qalamiyaa bessiyaabati nuuni merata beꞌanaadan waati maaddiyoonaa?

• Zuulla mala meray beettanaadan oottiyaabay aybee?

• Nuuni dumma dumma merata saluwan beꞌiyoy aybissee?

• Intte heeran deꞌiya meretatun maalaalissiya ayba merata beꞌidetii?

• Nu heeran deꞌiya meretata nuuni tishshi ootti xeellana koshshiyoy aybissee?