Haggaazuwan Kaseegaappe Qara Gidiyoogaa—Kaameeran Woy Intterkoomiyan Markkattiyoogaa

HEGEE KEEHI KOSHSHIYOY AYBISSEE? Daro biittatun, tekinolojee diccido gishshawunne danobay darido gishshawu, asay bantta keettaa qohiyaabaappe naaganawu kaameeraanne intterkoomiyaa goꞌettiyoogee meeze gididaba. Nuuni beꞌana danddayeenna, shin nuna beꞌiya issi urawu mishiraachchuwaa yootanawu maliyoogee nuna yashshana danddayees. Kaallidi deꞌiya hassayissoti nuuni kaameeran woy intterkoomiyan markkattiyo wode kaseegaappe aaruwan xala gidanaadan nuna maaddana. Silkkiyaa goꞌettidi markkattiyo wodekka ha maaray maaddana danddayees.

WAATANA DANDDAYIYOO?

• Loꞌꞌobaa qoppa. Kaameeray woy intterkoomee deꞌiyo daro keettaawati nunaara haasayanawu eeno gaana danddayoosona

• Issi issi kaamerati neeni dawaliyoogaa doommanaappe kase nena duuqqiyoogaa, qassi keettaway neeni A kariyaa matosaara nena beꞌana woy ne haasayiyoobaa siyana danddayiyoogaa hassaya

• Keettaway nena haasayisikko, A xeellaydda haasayiyoogaadan kaameeran woy intterkoomiyan haasaya. Pashkki gaada haasaya. I kare kiyiyaakko ne yootanawu qoppidobaara issi malabaa yoota. Kaameeray deꞌikko, akko keehi shiiqoppa. Keettaway nena haasayissana xayikko, kiitaa wottoppa

• Haasayiyoogaa intte wurssi simmikkokka, keettaaway nena beꞌiyoogaa woy ne haasayiyoobaa siyiyoogaa hassaya