KIRISTTAANETI DEꞌIYO DEꞌUWA

Haymaanootee Baynnaageeti Banttana Medhdhidaagaa Eranaadan Maaddite

Haymaanootee baynnaageeti tumaa waayi siyana gi qoppidi, mishiraachchuwaa etawu yootanawu mammotti ereetii? Yaatikko, Xoossi baa giyageeta gujjin, haymaanootee baynna daroti Yihoowa Markka gididoogaa hassayite. Darotoo, Xoossay deꞌiyogaa bessiya naqaashata pilgganawu etawu guutta maadoy koshshana danddayees.—Roo 1:20; 10:14.

AMMANOY BAYNNA ASATUSSI AMMANOY DEꞌANA DANDDAYIYOOGAA HASSAYITE!—HAYMAANOOTEE BAYNNAAGEETA GIYA BIIDUWA BEꞌITE, YAATIDI KAALLIDI DEꞌIYA OYSHAA ZAARITE:

Haymaanootee baynnaageetussi markkattanawu etabaa loꞌꞌobaa qoppanaadan Tomasoy yootidobay inttena waati maaddii?

Ne zaaruwa

Hegaadan waati oottana danddayiyoo?

Issi uri Xoossaa ammanennaagaa intteyyo yootikko, I hegaadan qoppido gaasuwa eranawu keha, hiillanchchanne ayyo wozanappe qoppiyageeta gidite. (2Xim 2:24) A ufayssiya huuphe yohota tobbite. Qassi Medhdhidaagaa daroti ammananaadan oottida naqaashata tobbanawu I eeno giikko, hegawu giigida xuufetanne biidota goꞌettite. Deꞌuwan Deꞌiyaabay Merettidee? giyanne Deꞌuwaa Doomettaa—Oychchana Koshshiyo Ichchashu Oyshata (Amaarattuwa) giya broshureti Tamaarissanawu Goꞌettiyo Waanna Miishshatun gujettido gishshawu hegeeta metootennan demmana danddayeeta.

Xoossaa ammanenna urawu mishiraachchuwa yootanawu koyro heeran mammottana danddayeeta. Yaatikko, meezee deꞌiyo aassiya uri inttena maaddanaadan oychchite. Qassi suure wozanaa koshshay deꞌiyo asati Xoossay deꞌiyogaa koyro heeran ammanennaba gidikkonne, nuuni eta wozanaa denttettiya ogiyan haasayissanaadan Yihooway nuna maaddanaagaa hassayite.—Oos 13:48.