Ishanttanne Michchontta Oyqqiyo Ogiyan Yihoowa Milata

1. Yihoowa xeelliyaagan Geeshsha Maxaafay yootiyo minttettiya tumay aybee?

NE MERAA gaasuwan, woykko ne bollay ordde woy leeꞌe gidiyoogaa gaasuwan asay nebaa kuuyanaadan koyay? Neeni waaya koyana. Yihooway haratussi beettiyaaban nubaa kuuyennaagaa eriyoogee keehi minttettiyaaba. Leemisuwawu, Sameeli Isseya attuma naata beꞌido wode, I Yihooway xeellidobaa xeellibeenna. Yihooway Isseya attuma naatuppe issoy Israaꞌeela kawo gidanaagaa Sameelawu yootiis. SHin kawo gidanay awugee? Sameeli Isseya bayra naꞌaa Eliꞌaaba beꞌido wode, “Tumuppe GODAI tiyoogee hagan a sinttan eqqiis” yaagiis. Eliꞌaabi kawo milatees. SHin Yihooway Sameela, “A meraa woikko a geesaa adussatettaa xeelloppa; taani a ixxaas” yaagiis. Hegaappe ay tamaariyoo? Yihooway hagaadan giis: “Asi som77uwaa xeellees; shin GODAI wozanaa xeellees.”—1 Sam. 16:1, 6, 7.

2. Yohaannisa 7:24 maaran, nuuni meraa xeelliyoogan issi uraabaa kuuyana koshshennay aybissee? Leemisuwaa yoota.

² Nuuni nagaranchcha gidiyo gishshawu, haratu meraa xeellidi etabaa darotoo sohuwaara kuuyoos. (Yohaannisa 7:24 nabbaba.) Gidoppe attin, nuuni ayfiyan beꞌiyooba xallan issi uraabaa eriyoobay guutta. Leemisuwawu, meezee deꞌiyo issi gooba dottoreekka issi hargganchchaa xeelliyoogaa xallan erana danddayiyoobay keehi guutta. I hargganchchaa payyatettaara gayttida kasebaa, awu haꞌꞌi siyettiyaabaa, woy issi issi malaatata eranawu hargganchchay yootiyoobaa loytti ezggana bessees. He dottoree hargganchchaa bolla gidduwaa beꞌanawu erajiyaa denddanaadan azazana danddayees. Yaatana xayikko, dottoree hargganchchawu hanenna xaliyaa immana danddayees. Hegaadan, nuuni nu ishanttunne michchonttu meraa xeellidi eta loytti erana danddayokko. Nuuni eti ay mala asakko akeekanawu malana bessees. Nuuni asa wozanaa xeellana danddayeenna gishshawu, harata Yihoowaagaa keena mule erokko. Gidikkonne, Yihoowa milatanawu danddayettida ubbabaa oottana danddayoos. Waatidi?

3. Geeshsha Maxaafan odettida, ha huuphe yohuwan qonccidabay nuuni Yihoowa milatanaadan waati maaddanee?

³ Yihooway baayyo goynniyaageeta waati oyqqii? I eti yootiyoobaa ezggees. I eta hanotaanne eta gakkida ubbabaa qoppees. Qassi I etawu qarettees. Yihooway Yoonaasa, Eelaasa, Aggaaronne Looxa oyqqido hanotaa nuuni xannaꞌiyo wode, nu ishanttanne michchontta oyqqiyo ogiyan Yihoowa waani milatana danddayiyaakko ane beꞌoos.

LOYTTA EZGGA

4. Nuuni Yoonaasabaa hanennabaa qoppana danddayiyoy aybissee?

⁴ Nuuni Yoonaasa hanotaa xeelliyaagan ubbabaa erenna gishshawu, I ammanettibeennanne azazettibeenna giidi qoppana danddayoos. I Nanawen pirddaa kiitaa yootanaadan Yihooway A azaziis. SHin Yoonaasi azazettiyoogaa aggidi “GODAA sinttaappe baqatidi,” harasaa biya markkabiyan geliis. (Yona. 1:1-3) Nena gidiyaakko Yoonaasi Yihoowawu azazettanaadan A haranttuwaa azazuutee? Ne waaya azazana. SHin, Yihooway azaziyo gaasoy deꞌiyoogaa akeekiis.—Yona. 3:1, 2. 

5. Yoonaasa 2:1, 2, 9n I yootidobaappe abaa ay tamaaray?

⁵ Yoonaasi I ay mala asakko ba woosan qonccissiis. (Yoonaasa 2:1, 2, 9 nabbaba.) Yoonaasi Yihoowakko darotoo woossidoogee qoncce. He woosatuppe issoy, I loꞌꞌo asa gidiyoogaa akeekanaadan nuna maaddees. I kiittidosaa aggidi baqatikkonne, I bana ziqqi oottiyoogaa, galatiyoogaanne Yihoowayyo azazettanawu wozanappe koyiyoogaa A woosay qonccissees. Yaatiyo gishshawu, Yihooway Yoonaasi balidoban xeelaa wottibeennaagee garamissenna. I A woosaa zaariis, qassi A baggaara hananabaa yootiyoogaa aggibeenna!

6. Nuuni loytti ezgganawu baaxetiyoogee keehi koshshiyoy aybissee?

⁶ Harati yootiyoobaa loytti ezgganawu, nuuni nuna ziqqi oottananne danddayanchcha gidana koshshees. Hegawu baaxetiyoogee keehi koshshiyo heezzu gaasoti deꞌoosona. Koyruwan, sohuwaara asaabaa hanennabaa darin qoppokko. Naaꞌꞌanttuwan, nuuni nu ishawu siyettiyaabaanne I issibaa oottiyo gaasuwaa akeekana danddayoos, qassi nuuni awu keehi qarettanaadan hegee maaddana. Heezzanttuwan, nuuni nu ishay haasayanaadan oottiyo wode, I ba hanotaa akeekana danddayees. Issi issitoo issi uri haasayana gakkanaashin bawu siyettiyaabaa loytti akeekenna. (Lee. 20:5) Isiyaa biittan deꞌiya issi cimay hagaadan giis: “Taani issi wode ubbabaa wurssa siyennan deꞌaydda haasayaas. Taani issi michchiyaa shiiquwan kaseegaappe loytta zarana koshshiyoogaa iyyo yootaas. A loytta nabbabennaagaanne shiiquwan zaaranawu keehi baaxetiyoogaa taani guyyeppe eraas. Cimati ubbaykka zoranaappe kase hanotaa ‘siyiyoogee’ keehi koshshiyaaba!—Lee. 18:13.

7. Yihooway Eelaasa oyqqido ogiyaappe neeni ay tamaaray?

⁷ Nu ishanttuppenne michchonttuppe amaridaageeti banttana kase gakkidabaa gaasuwan woy bantta eeshshaa gaasuwan bantta qofaa yootanawu metootoosona. Eti banttawu siyettiyaabaa metootennan nuussi yootanaadan waati oottana danddayiyoo? Eelaasi Elzzaabeelippe baqatido wode Yihooway A oyqqido ogiyaa hassaya. Eelaasi saluwan deꞌiya ba Aawawu ba qofaa yootana gakkanaashin daro gallassay aadhdhiis. Yihooway I yootiyoobaa loytti ezggiis. Yaatidi I Eelaasa minttettiisinne keehi koshshiya oosuwaa awu immiis. (1 Kaw. 19:1-18) Nu ishanttinne michchontti yayyennan bantta qofaa nuuyyo yootanawu gamꞌꞌana danddayoosona, shin etawu tumuppe siyettiyaabaa nuuni akeekana danddayiyoy eti hegaa yootiyo wode xallaana. Nuuni danddayiyoogan Yihoowa milatikko, eti nunan ammanettana danddayoosona. Eti banttawu siyettiyaabaa yootanawu koyiyo wode, nuuni eti yootiyoobaa loytti ezggana koshshees.

NE ISHANTTANNE MICHCHONTTA LOYTTA ERA

8. Doomettaabaa 16:7-13y yootiyoogaadan, Yihooway Aggaaro waati maaddidee?

⁸ Saarayi aylliyaa Aggaara Abraama machcho gida simmada eeyyabaa oottaasu. Aggaara shahaara simmada, naꞌa yelabeenna Saarayo kariyoogaa doommaasu. Aggaara bana Saaraya qaxxayido gishshawu, sooppe kiyada baqataasu. (Doo. 16:4-6) Nuuni nagaranchcha gidiyo gishshawu, Aggaara qaxxayettana bessiya otoranchcha maccaasa giidi qoppana danddayoos. SHin Aggaaro xeelliyaagan Yihooway hegaadan qoppibeenna. I ba kiitanchchaa ikko kiittiis. He kiitanchchay O demmido wode, A ba qofaa laammanaadan maaddiis, qassi O anjjiis. Aggaara Yihooway O kaalliyoogaanne I hanotaa ubbaa eriyoogaa akeekaasu. A ayyo hagaadan gaasu: “Neeni tana be7iya Xoossaa.”—Doomettaabaa 16:7-13 nabbaba.

9. Xoossay Aggaaro hegaadan oyqqidoy aybissee?

⁹ Yihooway Aggaaribaa ay akeekidee? I Aggaaro kase gakkidabaanne A genccido ubbabaa erees. (Lee. 15:3) Aggaara Ibraawe asa son deꞌiya Gibxxe biitta asa. A issi issitoo allaga asa gididabadan qoppay? A bantta soo asaanne ba biittaa laamotay? Abraamassi ippe hara machchiyaakka deꞌawusu. Amarida wodiyawu, ammanettida issi issi asati dawuttidosona. SHin hegee Yihooway koyro halchchidoba gidenna. (Maa. 19:4-6) Hegaa gishshawu, dawuttiyoogee darotoo qanaatiyaanne ixuwaa mala gita metoy son merettanaadan oottiyoogee oorattaba gidenna. Aggaara Saarayo karidoogee likke gidennaagaa Yihooway erees. SHin, I Aggaariyyo siyettiyaabaanne I hanotaa akeekido gishshawu, O kehatettan oyqqiis.

10. Nuuni nu ishanttanne michchontta waati loytti erana danddayiyoo?

¹⁰ Nuuni nu ishanttubaanne michchonttubaa akeekanawu baaxetiyoogan Yihoowa milatana danddayoos. Ne ishanttanne michchontta loytta era. SHiiquwaappe kasenne shiiquwaappe simmin etaara haasaya, etaara issippe haggaaza, qassi danddayettiyaaba gidikko, qumaa eta shoobba. Neeni hegaadan oottiyo wode, maalaalettana danddayaasa. Leemisuwawu, pashkki gaada haasayenna issi michchiyaa dungguuxa gidiyoogaa, daro miishshay deꞌiyo ishay miishsha siiqennaagaanne keha gidiyoogaa, woy shiiqoy doommiichchin ba naatuura gakkiya issi michchiyaa son eqettishin gencciyoogaa neeni akeekana danddayaasa. (Iyy. 6:29) Nuuni hara asa ‘yohon coo gelana’ koshshennaagee qoncce. (1 Xim. 5:13) SHin, nu ishanttubaanne michchonttubaa, qassi eti deꞌuwan beꞌido amaridabaa eriyoogee loꞌꞌo. Hegee nuuni etabaa loytti akeekana mala maaddana danddayees.

11. Cimati bantta ishanttanne michchontta loytti erana koshshiyoy aybissee?

¹¹ Cimati, eti heemmiyo ishanttanne michchontta loytti erana koshshees. Woradaa xomoosiyaagaa gididi haggaazida Artura giyo ishaa hanotaa qoppa. Inne hara cimay dungguuxa milatiya issi michchiyo oychchidosona. Arturi hagaadan giis: “I azinay hayqqidoy eti aqo oyqqoosappe amarida layttay aadhdhiina gidiyoogaa nuuni erida. Iyyo deꞌoy keehi deexxiyaaba gidikkonne, A ba naaꞌꞌu macca naati Yihoowa siiqanaadan tamaarissaasu, qassi eti ayyo ammanettidi oottiyaageeta gididosona. SHin he wode iyyo ayfee qooqana hanees, qassi A unꞌꞌettawusu. Gidikkonne, A Yihoowa wozanappe siiqawusunne an keehi ammanettawusu. Ha michchee loꞌꞌo hanotaappe nuuni darobaa tamaarana koshshiyoogaa akeekida.” (Pili. 2:3) Woradaa xomoosiya ha ishay Yihoowa leemisuwaa kaalliis. Yihooway baayyo ammanettidi oottiyaageetanne eta waayiyaa erees. (Kes. 3:7) Dorssata loytti eriya cimati eta keehi maaddana danddayoosona.

12. Yip Yii giyo michchiyaa ba gubaaꞌiyan deꞌiya michchiyo loytta eriyoogan waana goꞌettadee?

¹² Neeni yiillotanaadan oottiya issi ishaa woy michchiyo ne loytta eriyo wode, ayyo woy iyyo qarettana danddayaasa. Ane issi leemisuwaa qoppa. Isiyaa biittan deꞌiya Yip Yii giyo michchiyaa hagaadan gaasu: “Nu gubaaꞌiyan deꞌiya issi michchiyaa cenggurssaa keehi xoqqu oottada haasayawusu. Taani A haniyoobay loꞌꞌenna gaada qoppaas. Gidoppe attin, taani iira issippe haggaazido wode, A bantta soo asaa maaddanawu giyan kase moliyaa bayzziyoogaa akeekaas. Asay moliyaa shammanaadan A cenggurssaa keehi xoqqu oottada haasayana koshshiis.” Yip Yii gujjada hagaadan gaasu: “Taani ta ishanttunne michchonttu hanotaa akeekanawu, eta loytta erana koshshiyoogaa akeekaas.” Ne ishantta loytta eranawu baaxetana koshshees. SHin, neeni ne uluwaa aassa dooyanaadan Geeshsha Maxaafay yootiyo zoriyaa kaalliyo wode, ‘asa ubbaa’ siiqiya Yihoowa milataasa.—1 Xim. 2:3, 4; 2 Qor. 6:11-13.

QARETTA

13. Doomettaabaa 19:15, 16y yootiyoogaadan, Looxee kiyennan takkido wode, kiitanchchati ay oottidonaa, qassi aybissi?

¹³ Looxee ba deꞌuwan keehi koshshiya wodiyan Yihoowa azazuwaa azazettanawu gamꞌꞌiis. Naaꞌꞌu kiitanchchati Looxe soo yiidi I ba soo asaa Sadoomappe kessanaadan ayyo yootidosona. Aybissi? Eti hagaadan giidosona: “Nuuni ha sohuwaa xaissana haneettees.” (Doo. 19:12, 13) Wonttetta galla maallado, Looxeenne A soo asay sooppe kiyibookkona. Yaatiyo gishshawu, kiitanchchati Looxeyyo haranttuwaa yootidosona. SHin I kiyennan takkiis. Yihooway yootidobay Looxa qofissibeenna woy I azazettibeenna giidi nuuni qoppana danddayoos. SHin, Yihooway A ashshanawu maliyoogaa aggibeenna. ‘Yihooway ayyo qarettido gishshawu,’ kiitanchchati A soo asaa kushiyaa oyqqidi, katamaappe eta kessidosona.—Doomettaabaa 19:15, 16 nabbaba.

14. Yihooway Looxeyyo qarettidoy aybissa gidana danddayii?

¹⁴ Yihooway Looxeyyo qarettanaadan oottida daro gaasoti deꞌennan waayi aggana. Looxee ba sooppe eesuwan kiyibeennay, katamaappe gaxan deꞌiya asaa yaayyido gishshataassa gidennan aggenna. I hirgganaadan oottiya harabatikka deꞌoosona. Matan deꞌiya wombban shidaadan oyqqiyaabay kumido ollan kunddida naaꞌꞌu kawotubaa Looxee erennan aggenna. (Doo. 14:8-12) Looxee azinanne aawa gidiyo gishshawu, ba soo asawu hirggennan waayi aggana. Hegaa bollikka, Looxee dure gidiyo gishshawu, Sadooman ayyo keehi loꞌꞌiya keettay deꞌennan aggenna. (Doo. 13:5, 6) Hegeetuppe awugeenne Looxee Yihoowawu eesuwan azazettennaadan oottiyaaba gidenna. Gidoppe attin, Yihooway Looxe mooruwaa xeellibeenna, shin A ‘xillo asadan’ xeelliis.—2 PHe. 2:7, 8.

15. Nuuni issi uri oottiyoobaa boriyoogaa aggidi waatana koshshii?

¹⁵ Hara asi oottidoban issibaa kuuyiyoogaappe, awu aybi siyettiyaakko akeekanawu baaxeta. Awurooppan deꞌiya Beeroniko giyo michchiyaa hegaadan oottanawu baaxetaasu. A hagaadan gaasu: “Issi michchiyaa ubbatoo ufayttennaba milatawusu. A ubbatoo asakko shiiqukku. Issi issitoo, taani O haasayissanawu yayyays. SHin taani, ‘Ta hanotay iigaa mala gidiyaakko, taayyo lagge koshshees’ gaada qoppaas. Hegaa gishshawu, taani iyyo siyettiyaabaa O oychchanawu kuuyaas. Nuuni haasayishin, A ba wozanan deꞌiyaabaa yootiyoogaa doommaasu. Haꞌꞌi ibaa darobaa taani akeekaas.”

16. Nuuni qarettiyaageeta gidanawu maaddana mala woossana koshshiyoy aybissee?

¹⁶ Nu hanotaa wurssidi eriyay Yihoowa xalla. (Lee. 15:11) Yaatiyo gishshawu, I harata xeelliyoogaadan neeni xeellanawunne etawu waata qarettanaakko akeekanawu maaddana mala akko woossa. Anzhilo giyo michchiyaa loytta qarettanaadan woosay O maaddiis. Eta gubaaꞌiyan deꞌiya issi michchiyaa harati iira laggetanawu metiya asa gidaasu. Anzhila hagaadan gaasu: “He michchiyo boriyoogeenne ippe duuxxiyoogee metennaba. SHin, taani he michchiyo loytta eranaadan maaddana mala Yihoowa woossaas.” Anzhili woosaa Yihooway siyidee? A hagaadan gaasu: “Nuuni issippe haggaazi simmidi, daro saatiyawu haasayida. Taani A yootiyo wode qaretan ezggaas. Haꞌꞌi taani O keehi siiqays, qassi O minttettanawu murttaas.”

17. Nuuni ay oottanawu murttana koshshii?

¹⁷ Nu ishanttuppenne michchonttuppe amaridaageeti nuuni qarettana bessiyoogeeta, qassi harati bessennaageeta giidi nuuni qoppana koshshenna. Eta ubbaakka Yoonaasadan, Eelaasadan, Aggaaridaaninne Looxedan metoy gakkiis. Daro hanotatun, eti he metuwaa bantta bolli ehiidosona. Nuuni ubbaykka issi wode hegaadan oottida. Hegaa gishshawu, nuuni issoy issuwawu qarettanaadan maaddana mala Yihoowa oychchiyoogee bessiyaaba. (1 PHe. 3:8) Nuuni Yihoowawu azazettiyo wode, kumetta saꞌan deꞌiya nu ishanttu issippetettay minnanaadan oottoos. Yaatiyo gishshawu, nuuni nu ishanttinne michchontti yootiyoobaa ezgganawu, eta eranawunne etawu qarettanawu murttanaadan amottoos.