“Taani Inttena Ta Laggeta Gaas”

1. Intte issi urawu waanidi mata lagge gideetii?

ISSI uraara gayttidi mata lagge gidanawu koyro oottana koshshiyaabay issippe wodiyaa aattiyoogaa. Intte intte qofaanne inttena gakkidabaa issoy issuwaara haasayiyo wode lagge gideeta. Gidoppe attin, Yesuusawu mata lagge gidanawu metiyaabati deꞌoosona. Hegeetuppe amaridaageeti aybee?

2. Nuna metiya koyrobay aybee?

² Metiya koyrobay nuuni Yesuusaara gaytti erennaagaa. Koyro xeetu layttan deꞌida daro Kiristtaaneta hegaa malabay gakkiis. Gidikkokka, kiitettida PHeexiroosi hagaadan giis: “Intte a be7ana xayikkokka, siiqeeta; intte ha77i a be7ana xayikkokka, ammaneeta.” (1 PHe. 1:8, 9) Hegaa gishshawu, Yesuusaara gaytti erana xayikkonne ayyo mata lagge gidana danddayoos.

3. Nuna metiya naaꞌꞌanttobay aybee?

³ Metiya naaꞌꞌanttobay nuuni Yesuusaara haasayana danddayennaagaa. Nuuni woossiyo wode, Yihoowa woossoos. Nuuni woosaa Yesuusa sunttan woossoos, shin nuuni A haasayissokko. Yesuusi nuuni baakko woossanaadan koyenna. Aybissi? Woosay goyno gidiyo gishshawu goynnana koshshiyoy Yihoowa xalaalaassa. (Maa. 4:10) Gidikkokka, nuuni Yesuusa siiqiyoogaa qonccissana danddayoos.

4. Metiya heezzanttobay aybee, qassi ha huuphe yohuwan nuuni xannaꞌanabay aybee?

⁴ Metiya heezzanttobay Yesuusi saluwan deꞌiyoogaa; hegaa gishshawu, nuuni aara wodiyaa aattana danddayokko. SHin nuuni Yesuusa matan deꞌana xayikkokka, abaa darobaa erana danddayoos. Nuuni aara dabbotaa minttana danddayiyo oyddubata loytti beꞌana. Gidikkonne, Kiristtoosawu mata lagge gidiyoogee keehi koshshiyoy aybissakko ane koyro pilggoos.

NUUNI YESUUSA LAGGE GIDANA KOSHSHIYOY AYBISSEE?

5. Nuuni Yesuusa lagge gidana bessiyoy aybissee? (“Nuuni Yesuusa Lagge Gidiyoogee Yihoowaara Dabbotanaadan Oottees” giyaanne “Yesuusa Bessiyaagaadan Xeellite” giya saaxinetakka xeella.)

⁵ Nuuni Yihoowa dabbo gididi deꞌanawu koyikko, Yesuusa lagge gidana bessees. Aybissi? Naaꞌꞌu gaasuwaa ane qoppoos. Koyroogee, Yesuusi ba erissiyo ashkkaratussi ‘intte tana siiqiyo gishshawu, Aaway ba huuphen inttena siiqees’ giidoogaa. (Yoh. 16:27) I hagaadankka giis: “Ta baggaarappe attin, ooninne ta Aawaakko baanau danddayenna.” (Yoh. 14:6) Yesuusa lagge gidennan, Yihoowaara dabbotanawu baaxetiyoogee issi keettaa penggee baynna sohuwaara gelanawu baaxetiyoogaa mala. Yesuusi bana “dorssatuyyo pengge” giido wode, hegaara issi mala leemisuwaa goꞌettiis. (Yoh. 10:7) Naaꞌꞌanttoogee, Yesuusa eeshshay wottiyoobi baynna ogiyan A Aawaagaa mala gidiyoogaa. I ba erissiyo ashkkaratussi hagaadan giis: “Tana be7ida urai ta Aawaakka be7iis.” (Yoh. 14:9) Hegaa gishshawu, Yesuusa deꞌuwaa xannaꞌiyoogee Yihoowa eriyo keehi loꞌꞌo oge. Nuuni Yesuusabaa eriyo wode, A kaseegaappe aaruwan siiqoos. Qassi nuuni Yesuusawu mata lagge gidiyo wode, A Aawaa kaseegaappe aaruwan siiqoos.

6. Nuuni Yesuusaara dabbotana bessiyo hara gaasoy aybee? Qonccissa.

⁶ Nu woosay zaaruwaa demmanaadan nuuni Yesuusaara dabbotiyoogee koshshana danddayees. Hegawu “Yesuusa sunttan” woossiyoogaa xallay gidenna. Nu woosaa zaaranawu Yihooway Yesuusa waati goꞌettiyaakko nuuni erana bessees. Yesuusi ba erissiyo ashkkarata hagaadan giis: “Ta sunttan intte woossiyo ubbabaa taani intteyyo polana.” (Yoh. 14:13) Nu woosaa siyiyaageenne zaariyaagee Yihoowa gidikkonne, Yihooway ba kuuyidobaa Yesuusi polanaadan maataa immiis. (Maa. 28:18) Hegaa gishshawu, Xoossay nu woosaa zaaranaappe kase, Yesuusi zorido zoriyaa nuuni oosuwan peeshshidaakkonne beꞌees. Leemisuwawu, Yesuusi hagaadan giis: “Intte inttena naaqqida hara asaa naaquwaa atto giikko, saluwan de7iya intte Aawaikka intteyyo atto gaana. SHin intte inttena naaqqida hara asaa naaquwaa atto gaana xayikko, intte Aawaikka intte naaquwaa atto geenna.” (Maa. 6:14, 15) Yaatikko, Yihoowaynne Yesuusi nuna oyqqidoogaadan nuunikka harata oyqqiyoogee keehi koshshiyaaba!

7. Yesuusa wozuwaa yarshshuwaappe goꞌettiyaageeti oonee?

⁷ Yesuusawu mata lagge gidiyaageetu xallay A wozuwaa yarshshuwaappe goꞌettana. Nuuni hegaa waati eriyoo? Yesuusi “ba shemppuwaa ba laggiyaayyo aattidi” immanaagaa yootiis. (Yoh. 15:13) Yesuusi saꞌaa yaanaappe kase ammanettiyaageeta gididi deꞌida asati abaa tamaarananne A siiqana koshshees. Abrahaama, Saari, Muusenne Raꞌaabi mala attuma asatinne macca asati hayquwaappe denddikkonne, Yihoowa ashkkara gidida he asati merinaa deꞌuwaa demmanawu Yesuusawu lagge gidana koshshees.—Yoh. 17:3; Oos. 24:15; Ibr. 11:8-12, 24-26, 31.

8-9. Nuuni Yesuusa lagge gidikko ay oottana danddayiyoo, qassi Yohaannisa 15:4, 5n odettidaagaadan, hegee keehi koshshiyoy aybissee?

⁸ Nuuni Kawotettaa mishiraachchuwaa sabbakiyoogaaninne tamaarissiyoogan ufayttiiddi Yesuusaara issippe oottoos. Yesuusi saꞌan deꞌiyo wode, tamaarissiyaagaa. Qassi Yesuusi saluwaa boosappe doommidi gubaaꞌiyawu huuphe gidiyoogaadan, sabbakiyoonne tamaarissiyo oosuwaa kaalettees. Intte intteyyo danddayettida keenan daroti anne A Aawaa eranaadan maaddanawu baaxetiyoogaa I beꞌeesinne xoqqu ootti xeellees. Nuuni ha oosuwaa polana danddayiyoy Yihoowaynne Yesuusi maaddiyoogaa xallaana.—Yohaannisa 15:4, 5 nabbaba.

⁹ Nuuni Yihoowa ufayssanawu Yesuusa ubbatoo siiqana bessiyoogaa Xoossaa Qaalay loytti tamaarissees. Yaatiyo gishshawu, Yesuusa lagge gidanawu nuuni oottana danddayiyo oyddubata ane beꞌoos.

NUUNI YESUUSA LAGGE WAANI GIDANA DANDDAYIYOO?

10. Nuuni Yesuusa lagge gidanawu koyro oottana koshshiyaabay aybee?

¹⁰ (1) Yesuusa loytti erite. Geeshsha Maxaafan Maatiyoosa, Marqqoosa, Luqaasanne Yohaannisa maxaafata nabbabiyoogan nuuni hegaadan erana danddayoos. Yesuusa deꞌuwaabaa yootiya Geeshsha Maxaafaa taariketa nuuni wotti dentti qoppiyo wode, Yesuusi asaa kehatettan oyqqido gishshawu nuuni A siiqoosinne bonchchoos. Leemisuwawu, I etawu Goda gidikkonne, ba erissiyo ashkkarata aylledan oyqqibeenna. I ba qoppiyoobaanne bawu siyettiyaabaa etassi yootiis. (Yoh. 15:15) Yesuusi etaara azzaniisinne yeekkiis. (Yoh. 11:32-36) Yesuusi yootiyoobaa siyidaageeti ayyo lagge gididoogaa A morkketikka akeekidosona. (Maa. 11:19) Nuuni Yesuusi ba erissiyo ashkkarata oyqqido ogiyaa kaalliyo wode, haratuura nu dabbotay kaseegaappe loꞌꞌo gidees, kaseegaappe aaruwan ufayttoos, qassi A loytti siiqoosinne bonchchoos.

11. Nuuni Yesuusa lagge gidanawu oottana bessiyo naaꞌꞌanttobay aybee, qassi hegee keehi koshshiyoy aybissee?

¹¹ (2) Yesuusaagaadan qoppitenne oottite. Nuuni A qofaa loytti eriyo wodenne aagaadan qoppiyo wode, awu mata lagge gidoos. (1 Qor. 2:16) Nuuni Yesuusa waani milatana danddayiyoo? Ane issi leemisuwaa qoppite. Yesuusi bana ufayssiyaabaa qoppiyoogaappe aaruwan harata maaddiyoogaa qoppiis. (Maa. 20:28; Roo. 15:1-3) I hegaadan qoppido gishshawu, ba goꞌꞌaa aggi bayiisinne haratuyyo atto giis. I asay abaa haasayidoban eesuwaara yiillotibeenna. (Yoh. 1:46, 47) Qassi issi uri daro wodeppe kase mooridobaa gishshawu, I abaa iitaban qoppenna. Yesuusi hagaadan giis: “Intte issoi issuwaara siiqettikko, ta erissiyo ashkkarata gidiyoogaa asai ubbai erana.” (Yoh. 13:35) Nena hagaadan oychchiyoogee loꞌꞌo: “Taani ta ishanttuuranne michchonttuura sarotettan deꞌanawu danddayettida ubbabaa oottiyoogan Yesuusa leemisuwaa kaalliyaanaa?”

12. Nuuni Yesuusa lagge gidanawu oottana bessiyo heezzanttobay aybee, qassi hegaa waati oottana danddayiyoo?

¹² (3) Kiristtoosa ishantta maaddite. Yesuusi nuuni tiyettida ba ishanttuyyo oottiyoobaa baayyo oottiyoobadan xeellees. (Maa. 25:34-40) Nuuni tiyettidaageeta maaddiyo waanna ogee Yesuusi bana kaalliyaageeti oottanaadan azazido Kawotettaa mishiraachchuwaa sabbakiyoonne erissiyo ashkkara oottiyo oosuwaa kumetta wozanappe oottiyoogaa. (Maa. 28:19, 20; Oos. 10:42) Kumetta saꞌan ha wodiyan oosettiiddi deꞌiya sabbakuwaa oosuwaa Kiristtoosa ishantti oottana danddayiyoy eta ‘hara dorssati’ maaddiyoogaa xallaana. (Yoh. 10:16) Neeni hara dorssatuppe issuwaa gidikko, ha oosuwaa oottiyo wode ubban Kiristtoosa ishanttanne Yesuusa siiqiyoogaa bessaasa.

13. Yesuusi Luqaasa 16:9n yootido zoriyaa nuuni waati oosuwan peeshshana danddayiyoo?

¹³ Nuuni Yihoowaynne Yesuusi kaalettiyo oosuwaa maaddanawu miishshaa immiyoogankka eta dabbo gidoos. (Luqaasa 16:9 nabbaba.) Leemisuwawu, haahosan deꞌiya heeran mishiraachchuwaa sabbakiyoogaa, tumu goynuwawu keexxiyoogaanne hegaa naagiyoogaa, meretay daafabaa gattin woy haraban qohettidaageeta maaddiyoogaa mala, kumetta saꞌan oosettiya oosuwawu miishshaa immana danddayoos. Nuuni nu gubaaꞌiyaanne maadoy koshshiyo nuuni eriyoogeetakka miishshan maaddana danddayoos. (Lee. 19:17) Hageeti Kiristtoosa ishantta nuuni maaddana danddayiyo ogeta.

14. Efisoona 4:15, 16 maaran, nuuni Yesuusa lagge gidanawu oottana bessiyo oyddanttobay aybee?

¹⁴ (4) Yihoowa dirijjitee giigissidobaa hashetidi oottite. Nuna heemmanaadan sunttettidaageetuura nuuni hashetidi oottiyo wode, gubaaꞌiyawu huuphe gidida Yesuusawu mata lagge gidoos. (Efisoona 4:15, 16 nabbaba.) Leemisuwawu, SHiiquwaa Addaraashata ubbaa loytti goꞌettanawu baaxetiiddi deꞌoos. Amarida gubaaꞌeti hara gubaaꞌetuura walahettidoynne, moottatu zaway laamettidoy hegaassa. Hegaadan giigissido gishshawu daro miishshaa qoraphphida. SHin hegaappe denddidaagan, aassiya amaridaageeti ooratta hanotaa meezetana koshshiis. Ha ammanettida aassiyaageeti daro layttawu issi gubaaꞌiyan haggaazido gishshawu, yan deꞌiya ishanttuuranne michchonttuura mata lagge gidennan waayi aggana. Gidoppe attin, eti hara gubaaꞌiyan haggaazanaadan shoobettidosona. Giigissidobaa ha ammanettida erissiyo ashkkarati hashetidi oottiyoogaa Yesuusi beꞌiyo wode keehi ufayttees.

MERINAWU YESUUSA LAGGE GIDIYOOGAA

15. Nuuni sinttappe Yesuusawu kaseegaappe aaruwan waani mata lagge gidanee?

¹⁵ Geeshsha ayyanan tiyettidaageetussi Xoossaa Kawotettan Yesuusaara merinawu haariyo hidootay deꞌees. Eti A beꞌana, aara haasayananne wodiyaa aattana. (Yoh. 14:2, 3) Yesuusi saꞌaa hidootay deꞌiyoogeetakka siiqiyoogaanne etawu qoppiyoogaa bessana. Eti Yesuusa beꞌana xayikkonne, Yihoowaynne Yesuusi etawu giigissido ufayssiya deꞌuwaa demmiyo wode, awu mata lagge gidana.—Isi. 9:6, 7.

16. Nuuni Yesuusa lagge gidiyoogee nuna waati maaddii?

¹⁶ Nuuni Yesuusa lagge gidanaadan I shoobbido shoobiyaa ekkiyo wode daro anjjota demmoos. Leemisuwawu, nuuni I nuna siiqiyoogaanne maaddiyoogaa beꞌoos. Nuuni merinawu deꞌana danddayoos. Ubbaappe aaruwan, Yesuusaara dabbotiyoogee A Aawaa Yihoowaara mino dabbotay deꞌanaadan oottees; he dabbotaara laggetiyaabi baawa. Nuuni Yesuusa lagge geetettiyoogee gita maata!