Denddoy Xoossaa Siiquwaa, A Aadhdhida Eratettaanne Danddayaa Qonccissees

1. Yihooway deꞌuwaa medhdhidoy aybissee?

YIHOOWAY barkka deꞌido wodee deꞌees. SHin hegee I azzananaadan oottibeenna. Oonikka baynnan Yihooway ufayttana danddayees. SHin Xoossay harati deꞌuwan ufayttanaadan koyiis. Siiqoy denttettin Yihooway medhdhiyoogaa doommiis.—Maz. 36:9; 1 Yoh. 4:19.

2. Yihooway harabata medhdhiyo wode Yesuusassinne kiitanchchatussi aybi siyettidee?

² Koyruwan, Yihooway ba naꞌaa Yesuusa medhdhiis. Kaallidi, miilooniyan qoodettiya qoppana danddayiya ayyaana meretata gujjin, “ubbabaikka [he bayra naꞌaa baggaara] merettiis.” (Qol. 1:16) Yesuusi ba Aawaara oottiyoogan keehi ufayttiis. (Lee. 8:30) Qassi Xoossaa naata gidida kiitanchchatikka ufayttiyo gaasoy deꞌees. Yihoowaynne A Waanna Oosanchchay Yesuusi saluwaanne saꞌaa medhdhiyo wode eti beꞌidoosona. Kiitanchchati ufayttiyoogaa waati bessidonaa? Eti saꞌay merettido wode ‘ufayssan ililidoosona;’ qassi wurssettan merettida asata gujjin, Yihooway medhdhido ubbaban eti ufayttidoogee qoncce. (Iyy. 38:7; Lee. 8:31) He ubba meretati Yihoowa siiquwaanne A aadhdhida eratettaa qonccissoosona.—Maz. 104:24; Roo. 1:20.

3. Koyro Qoronttoosa 15:21, 22 yootiyoogaadan, Yesuusa wozuwaa yarshshoy nuuni ay demmanaadan oottii?

³ Yihooway I medhdhido loꞌꞌiya saꞌan asay merinawu deꞌanaadan koyiis. SHin Addaameenne Hewaana Yihoowa bolli nagaraa oottido gishshawu merinawu deꞌanawu danddayibookkona. Etinne eta zeretta ubbay wurssettan hayqqana. (Roo. 5:12) Yihooway waatanee? Sohuwaara I asaa waati ashshanaakko qonccissiis. (Doo. 3:15) Addaamenne Hewaani zerettay nagaraappenne hayquwaa aylletettaappe laꞌa kiyanaadan Yihooway wozuwaa giigissanawu halchchiis. Wurssettan, Yihooway ayyo haggaazanawu doorida asa ubbawu merinaa deꞌuwaa immana.—Yoh. 3:16; Roo. 6:23; 1 Qoronttoosa 15:21, 22 nabbaba.

4. Nuuni ha huuphe yohuwan pilggana oyshati awugeetee?

⁴ Xoossay hayqqidaageeta denttanawu qaalaa gelidoogaa xeelliyaagan nuuni oychchana danddayiyo daro oyshati deꞌoosona. Leemisuwawu, denddoy geella ayba ogiyan polettanee? Nu siiqiyo hayqqidaageeti denddiyo wode nuuni eta shaakki eranee? Denddoy nuna ufayssana ogeti aybee? Qassi dendduwaa hidootaappe Yihoowa siiquwaabaa, A aadhdhida eratettaabaanne A danddayaabaa ay tamaariyoo? Ane ha oyshata pilggoos.

DENDDOY GEELLA AYBA OGIYAN POLETTANEE?

5. Ubba asay issi kutti denddenna giidi nuuni naagana danddayiyoy aybissee?

⁵ Yihooway ba naꞌaa baggaara, miilooniyan qoodettiya hayqqidaageeta denttiyo wode, eta ubbaa issi kutti denttenna giidi naagana danddayoos. Ayssi giikko, issi kutti keehi daro asay saꞌan gujettikko, maaraa mankkaa xayana danddayees. Qassi Yihooway maari mankki baynnabaa mule oottenna. Asay sarotettan deꞌana mala issibay maaran mankkan oosettana koshshiyoogaa Yihooway erees. (1 Qor. 14:33) Asay merettanaappe kase Xoossaa Yihooway Yesuusaara oottiyo wode, asawu saꞌaa loddan loddan giigissiyoogan aadhdhida eranchchanne danddayanchcha gidiyoogaa bessiis. Armmageedoonappe attida asati hayquwaappe denddiyaageeta mokkanawu koshshiyaabaa giigissiyo wode Yesuusi SHaꞌu Layttaa Haaruwan etaara oottiyo wode, ikka aadhdhida eranchchanne danddayanchcha gidiyoogaa bessana.

6. Oosuwaa 24:15y yootiyoogaadan, Yihooway denttana asatu giddon deꞌanaageeti oonee?

⁶ Ubbaappe aaruwan, Armmageedoonappe attiyaageeti hayquwaappe denddiyaageeta Xoossaa Kawotettaabaanne Yihooway etappe koyiyoobata tamaarissana koshshees. Aybissi? Hayquwaappe denddiyaageetuppe daroti Geeshsha Maxaafay ‘worddota’ giyoogeeta gidiyo gishshataassa. (Oosuwaa 24:15 nabbaba.) Kirsttoosa wozuwaappe goꞌettana mala eti daroban laamettana bessees. Yihoowabaa aybanne erenna miilooniyan qoodettiya asaa tamaarissiyoogee ay keena gita oosokko ane qoppa. Ha wodiyan nuuni Geeshsha Maxaafaa xannaꞌissiyo ogiyaadan, he wodekka issi ura xannaꞌissanay issi asee? He oorattati gubaaꞌetun maddabettidi etappe simmin hayquwaappe denddanaageeta tamaarissanawu loohanee? Nuuni hegaa sinttappe beꞌana. SHin nuuni Kiristtoosa SHaꞌu Layttaa Haaruwaa wurssettan “sa7ai GODAA eriyoogan [kumanaagaa]” eroos. (Isi. 11:9) Kiristtoosa shaꞌu layttaa haaruwaa wode oottanawu keehi ufayssiya daro oosoy nuussi deꞌana!

7. Xoossaa asay hayquwaappe denddiyaageeta tamaarissiyo wode qarettanay aybissee?

⁷ Kiristtoosa SHaꞌu Layttaa Haaruwaa wode, Yihoowa asay ubbay A ufayssanawu laamettana bessees. Hegaa gishshawu, hayquwaappe denddiyaageeti iita qofaanne amuwaa aggidi Yihooway kessido maaraadan deꞌana mala maaddanawu, eti ubbay wozanappe qarettana. (1 PHe. 3:8) Yihoowa asati banttana ziqqi oottiyoogaanne Yihoowa ufayssanawu laamettiiddi deꞌiyoogaa hayquwaappe denddiyaageeti akeekananne etaara issippe Yihoowawu goynnanawu koyana.—Pili. 2:12.

HAYQUWAAPPE DENDDIYAAGEETA NUUNI SHAAKKI ERANA DANDDAYIYOO?

8. Hayquwaappe denddiya nu so asaa yaratanne nu laggeta nuuni shaakki erana giidi naagana danddayiyoy aybissee?

⁸ Hayquwaappe denddiyaageeta nuuni shaakki erana giidi naagana danddayiyo daro gaasoy deꞌees. Leemisuwawu, Yihooway asaa beni hayquwaappe denttido ogiyaappe, asay hayqqanaappe guuttaa kasetiya wodiyaagaa mala gidanaadan, he wodeegaadan haasayaanaadaaninne qoppanaadan oottidi Yihooway eta zaarettidi medhdhana giidi naagana danddayoos. Yesuusi hayquwaa xiskkuwaara qassi dendduwaa xiskkuwaappe beegottissiyoogaara geeddarssidoogaa hassaya. (Maa. 9:18, 24; Yoh. 11:11-13) Issi ura meray, A haasayaynne I hassayiyoobay I xiskkuwaappe denddiyo wodekka xiskkanaappe kase wodiyaagaara issi mala. Alꞌꞌaazara leemisuwaa beꞌa. I hayqqoosappe oyddu gallassa gidido gishshawu musiis. Gidikkonne, Yesuusi hayquwaappe A denttido wode, A michchontti sohuwaara A shaakkidi eridosona; qassi Alꞌꞌaazari eta hassayidoogee qoncce.—Yoh. 11:38-44; 12:1, 2.

9. Hayqqidaageeti denddiyo wode eta qofaynne eta bollay wottiyoobi baynnaagaa gidennay aybissee?

⁹ Gannatiyan ooninne “Taani harggais” geennaagaa Yihooway qaalaa geliis. (Isi. 33:24; Roo. 6:7) Yaatiyo gishshawu, hayquwaappe denddiyaageeti payya gididi denddana. SHin eti sohuwaara wottiyoobi baynna asa gidokkona. Yaaniyaakko, eta so asaynne eta laggeti eta waayi shaakki erana. Kiristtoosa SHaꞌu Layttaa Haaruwaa wode ubba asay loddan loddan wottiyoobi baynna asa gidanaba milatees. SHaꞌu layttaa haaruwaa wurssettan Yesuusi Kawotettaa ba Aawaassi immana. Asaa wottiyoobi baynnaageeta oottiyoogaa gujjin, Yihooway oottanawu koyiyo ubbabaa Kawotettay he wode polana.—1 Qor. 15:24-28; Ajj. 20:1-3.

DENDDOY NUNA UFAYSSANA OGETI AYBEE?

10. Denddoy neessi aybi siyettanaadan oottanee?

¹⁰ Ne siiqiyoogeetuura zaarettada gayttiyoogee ay mala gidanaakko qoppa. Neeni ufayttada miiccaneeyye yeekkanee? Neeni keehi ufayttido gishshawu Yihoowawu sabaa mazamuriyaa yexxanee? Denddoy deꞌanaadan oottida nuussi qoppiya Aawaanne siiqiya A Naꞌaa nuuni wozanappe siiqanaagaa ammanettoos.

11. Yesuusi yootido, Yohaannisa 5:28, 29n deꞌiya qofaadan, Xoossawu azazettiyaageeti waananee?

¹¹ Hayquwaappe denddiyaageeti Xoossawu azazettanawu giidi kase eeshshaa laammiyoogee eta ay keena ufayssanaakko qoppa. Hegaadan laamettidaageeti Gannatiyan merinawu deꞌana. SHin laamettanawu koyenna asati Gannatiyaa sarotettaa mooriiddi yan deꞌanaadan Yihooway oottenna.—Isi. 65:20; Yohaannisa 5:28, 29 nabbaba.

12. Saꞌan deꞌiya ubbaa Yihooway ayba ogiyan anjjanee?

¹² Leemiso 10:22y, “GODAA anjjoi dure kessees; i he duretettan meto walakkenna” giyoogee tuma gidiyoogaa Xoossaa Kawotettaa haaruwan ubba asay akeekana. Yihoowa ayyaanay maaddin, Xoossaa asay yaa gujji gujji Kiristtoosa milatananne wottiyoobi baynna asa gidana. (Yoh. 13:15-17; Efi. 4:23, 24) Qassi galla galla eta bollay yaa gujji gujji minnananne eti loꞌꞌo asa gidana. He wodee keehi ufayssiya wode gidana! (Iyy. 33:25) SHin, dendduwaabaa wotta dentta qoppiyoogee nena ha wodiyan waati maaddana danddayii?

YIHOOWA SIIQUWAA NASHSHA

13. Mazamure 139:1-4y Yihooway nuna loytti eriyoogaa waati bessi, qassi denddoy hegaa waati qonccissanee?

¹³ Nuuni qommoora beꞌidoogaadan, Yihooway hayqqidaageeta denttiyo wode, eti kaseegaadan hassayanaadaaninne kaseegaa mala asa gidanaadan oottana. Hegee woygiyoogaakko qoppa. Yihooway nena keehi siiqiyo gishshawu neeni qoppiyo, yootiyo, oottiyoonne neeyyo siyettiya ubbabaa I akeekeesinne hassayees. Yaatiyo gishshawu, I nena denttikko, aynne metootennan ne qofaa, ne xeelaanne ne eeshshaa zaarettidi neessi immana danddayees. Yihooway nuna ubbaa huuphiyan huuphiyan loytti eriyoogaa Kawuwaa Daawiti eriis. (Mazamure 139:1-4 nabbaba.) Yihooway nuna loytti eriyoogaa nuuni akeekiyo wode nuuyyo aybi siyettii?

14. Yihooway nuna loytti eriyoogaa qoppiyo wode nuuyyo aybi siyettii?

¹⁴ Yihooway nuna loytti eriyoogaa nuuni wotti dentti qoppiyo wode hirggana koshshenna. Aybissi? Yihooway nuuyyo keehi qarettiyoogaa hassaya. I nuna ubbaa alꞌꞌobadan xeellees. Nu deꞌuwan nuna gakkida ubbabaa Yihooway hassayees. Hegee keehi minttettiyaaba! Nuuni nurkka deꞌiyaabadan mule qoppana koshshenna. Yihooway ubbatoo nunaara deꞌeesinne nuna maaddanawu koyees.—2 Odi. 16:9.

YIHOOWA AADHDHIDA ERATETTAA NASHSHA

15. Denddoy Yihoowa aadhdhida eratettaa waati qonccissii?

¹⁵ Asay hayquwaa yayyiyo wode, eta morkketi eta woranawu yashissidi eti oottana koyennabaa wolqqan ootissoosona. Seexaanay hariyo asati hara asay he yashshaappe denddidaagan ba laggeta kaddanaadan woy likke gidennaagaa eriyoobaa oottanaadan giddoosona. SHin, nuuni hegaadan oottanaadan wolqqanttana danddayokkona. Nu morkketi nuna worikko, Yihooway nuna denttanaagaa eroos. (Ajj. 2:10) Eti oottiyo aybinne nuuni Yihoowawu haggaaziyoogaa agganaadan oottana danddayennaagaa ammanettoos. (Roo. 8:35-39) Yihooway dendduwaa hidootaa nuussi immiyoogan, keehi aadhdhida eranchchaa gidiyoogaa bessiis. Hegaappe denddidaagan, Seexaanaara hashetiyaageeti yootiyoobaa nuuni oottennan aggikko eti nuna woranawu yashissiyo wode, nuuni yayyokko. Qassi hegee nuuni kaseegaappe aaruwan xalidi Yihoowawu ammanettidi deꞌanaadan oottees.

16. Neeni nena oychchana koshshiyo oyshati awugeetee, qassi neeni Yihoowan ay keena ammanettiyaakko eranawu zaaroti nena waati maaddana danddayiyoonaa?

¹⁶ Yihoowa morkketi nena woranawu yashissikko, Yihooway nena hayquwaappe denttanaagaa ammanettay? Neeni he wode Yihoowan ammanettanaagaa waata erana danddayay? Issi ogee nena hagaadan oychchiyoogaa: ‘Taani galla galla kuuyiyo guuttabati ta Yihoowan ammanettiyoogaa bessiyoonaa?’ (Luq. 16:10) Hara oyshay qassi, ‘Taani Kawotettaa kaseyikko aquwawu peeshshawu tawu koshshiyaabaa Yihooway kunttanawu qaalaa gelidobaa ta ammanettiyoogaa, ta wodiyaanne ta miishshaa goꞌettiyo ogee bessii?’ giyaagaa gidana danddayees. (Maa. 6:31-33) Ha oyshata ee gaada zaarikko, Yihoowan ammanettiyoogaa bessadasa; qassi sinttappe nena gakkana ay paaciyawukka giigettidaagaa gidana.—Lee. 3:5, 6.

YIHOOWA A DANDDAYAA GISHSHAWU GALATA

17. (a) Denddoy Yihoowa danddayaa waati bessii? (b) Nuuni Yihoowa A danddayaa gishshawu galatiyoogaa waati bessana danddayiyoo?

¹⁷ Ha iita alamiyaa awude xayssanaakko Yihooway kuuyiis. (Maa. 24:36) I danddayennan aggidi keerido wodiyaappe kasetidi xayssenna. I hayqqidaageeta denttanawu laamotikkonne, danddayanchcha. (Iyy. 14:14, 15) Eta denttanawu bessiya wodee gakkanaashin I naagees. (Yoh. 5:28) A danddayaa gishshawu nuuni Yihoowa galatiyo loꞌꞌo gaasoy deꞌees. Ane hagaa qoppa: Yihooway danddayido gishshawu nuna gujjin daro asay ‘nagaraappe simmiyo’ wodiyaa demmiis. (2 PHe. 3:9) Yihooway daro asay merinaa deꞌuwaa demmanaadan koyees. Nuuni A danddayaa gishshawu galatiyoogaa simi yaatikko bessoos. Waatidi? “Merinaa deꞌuwaa demmanawu suure wozanaa koshshay deꞌiyoogeeta” koyiyoogan nuussi danddayettida ubbabaa oottiyoogaananne eti Yihoowa siiqanaadaaninne awu haggaazanaadan maaddiyoogaana. (Oos. 13:48, NW) Yaatikko, Yihoowa danddayan nuuni goꞌettidoogaadan etikka goꞌettana.

18. Nuuni harata danddayana koshshiyoy aybissee?

¹⁸ Yihooway nuuni wottiyoobi baynna asa gidanaadan I naagiyo shaꞌu layttaa wurssettay gakkanaashin danddayan naagana. He wode gakkanaashin, Yihooway nu nagaraa atto gaana. Hegaa gishshawu, nuuni A leemisuwaa kaallidi, haratu loꞌꞌo eeshshatu xallaa qoppananne eta danddayana bessees. I azinay keehi unꞌꞌettiyoogaa doommidonne shiiquwaa shiiqiyoogaa aggido issi michchee hanotaa qoppa. A hagaadan gaasu: “Hegee tawu keehi metiyaaba. Nu deꞌoy qoppennan laamettiis; qassi nuuni oottana koyido ubbabaa oottana danddayibookko.” SHin he siiqiya machchiyaa ba azinaa danddayiyoogaa aggabeykku. A Yihoowan ammanettaasu; qassi hidootaa qanxxabeykku. Yihoowaagaadan, A ba azinaa loꞌꞌo eeshshatu xallaa qoppaasu. A, “Ta keettaawawu keehi loꞌꞌo eeshati deꞌoosona; qassi I unꞌꞌettiyoogaa loddan loddan agganawu bawu danddayettida ubbabaa oottees” yaagaasu. Metiyaabaa xoonanawu baaxetiiddi deꞌiya nu soo asaa woy gubaaꞌiyan deꞌiyaageeta nuuni danddayiyoogee keehi koshshiyaaba!

19. Nuuni ay oottanawu murttana koshshii?

¹⁹ Saꞌay koyro merettido wode Yesuusinne kiitanchchati keehi ufayttidosona. Gidoppe attin, Yihoowa siiqiyaanne awu haggaaziya wottiyoobi baynna asatun biittay kumiyo wode eti ay keena ufayttanaakko qoppa. Saluwaa biyaageeti asay eta oosuwaappe goꞌettiyoogaa beꞌiyo wode ay keena ufayttanaakko qoppa. (Ajj. 4:4, 9-11; 5:9, 10) Qassi waayiyaa gaasuwan afuxxiyoogee attidi ufayssan afuxxiyo wodiyan, sahoy, azzanoynne hayqoy merinawu xayiyo wodiyan deꞌana deꞌuwaa qoppa. (Ajj. 21:4) He wode gakkanaashin, siiqiya, aadhdhida eranchchaanne danddayanchchaa, ne Aawaa leemisuwaa kaallanawu murtta. Neeni yaatikko, nena ay metoy gakkikkonne ufayttada deꞌana. (Yaaq. 1:2-4) Hayqqidaageeta denttanawu Yihooway qaalaa gelido gishshawu keehi galatoos!—Oos. 24:15.