Yihooway Ba Dirijjitiyaa Kaalettees

1. Xammaqettida Kiristtaaneti ubbatoo ay oottana koshshii?

NEENI xammaqettadii? Yaatikko, neeni xammaqettido wode, Yihoowan ammaniyoogaanne A dirijjitiyaarab hashetada haggaazanawu koyiyoogaa haratu sinttan bessadasa. Yihoowan neeni ammaniyoogaa ubbatoo minttana koshshiyoogee qoncce. Qassi ha wodiyan Yihoowa dirijjitee Yihooway koyiyoobaa oottiiddi deꞌiyoogaa ubbatoo ammana.

2-3. Ha wodiyan Yihooway ba dirijjitiyaa kaalettiyo ogeti awugeetee? Leemisota yoota.

² Ha wodiyan, Yihooway ba eeshshaa, ba halchchuwaanne I kessido maarata qonccissiya ogiyan ba dirijjitiyaa kaalettees. A dirijjitiyan nuuni akeekana danddayiyo A eeshshatuppe heezzata ane beꞌoos.

³ Koyroogee, “Xoossai asa som77o xeellenna.” (Oos. 10:34, 35) Yihooway “asaa ubbaa wozanau” ba Naꞌaa immanaadan siiqoy A denttettiis. (1 Xim. 2:6; Yoh. 3:16) Siyanawu koyiya asa ubbawu mishiraachchoy sabbakettanaadan Yihooway ba asaa goꞌettees. Yaatiyoogan, wozuwaappe goꞌettanawu, hegeekka attanawu koyiyaageeta ubbaa I maaddees. Naaꞌꞌnttoogee, Yihooway maaraanne sarotettaa Xoossaa. (1 Qor. 14:33, 40) Hegaa gishshawu, awu goynniyaageeti maaraaninne sarotettan awu haggaazanaadan I koyees giidi qoppiyoogee bessiyaaba. Heezzanttoogee, nu gita “asttamaaree” Yihoowa. (Isi. 30:20, 21) Yihoowa dirijjitee gubaaꞌiyaaninne haggaazuwan A Qaalaa, Geeshshaa Maxaafaa harata tamaarissanawu minni oottiyoy hegaassa. Beni Kiristtaane gubaaꞌiyan deꞌiyaageeti ha heezzu Yihoowa eeshshata waati kaallidonaa? Ha wodiyan deꞌiya Yihoowa asay ha heezzu A eeshshata waati kaalliyoonaa? Qassi ha wodiyan neeni Yihoowa dirijjitiyaara hashetada oottiyo wode geeshsha ayyaanay nena waati maaddana danddayii?

XOOSSAY ASA ASAPPE SHAAKKENNA

4. Oosuwaa 1:8y yootiyoogaadan, Yesuusi bana kaalliyaageeti ay oottanaadan azazidee, qassi hegawu eta maaddanabay aybee?

⁴ Koyro xeetu layttan. Yesuusi sabbakido mishiraachoy asa ubbawu hidootaa immiis. (Luq. 4:43) Yesuusi bana kaalliyaageeti I doommido oosuwaa ‘saꞌaa gaxaa gakkanaashin’ markkattanaadan azaziis. (Oosuwaa 1:8 nabbaba.) Eti he oosuwaa bantta wolqqan oottana danddayennaagee qoncce. Yesuusi etawu qaalaa gelido ‘minttettiya’ woy maaddiya geeshsha ayyaanay etawu koshshees.—Yoh. 14:26; Zak. 4:6.

5-6. Yesuusa kaalliyaageeta geeshsha ayyaanay ay ogetun maaddidee?

⁵ Yesuusa kaalliyaageeti PHenxxaqosxxe gallassi 33 M.Ln, geeshsha ayyaanaa ekkidosona. Ayyaanay maaddin eti sohuwaara sabbakiyoogaa doommidosona; yaatin guutta wodiyan shaꞌan qoodettiyaageeti mishiraachchuwaa ammanidosona. (Oos. 2:41; 4:4) Yedetay gakkido wode, erissiyo ashkkarati yayyiyoogaappe Xoossay eta maaddanaadan oychchidosona. Eti, “Nuuni ne ashkkarati, ne qaalaa kumetta xalan yootanaadan, nuna danddayissa” giidi woossidosona. Yaatin eta ubban geeshsha ayyaanay kumin, “Xoossaa qaalaa xalan yootidosona.”—Oos. 4:18-20, 29, 31.

⁶ Yesuusi erissiyo ashkkarata hara metotikka gakkidosona. Leemisuwawu, he wode deꞌiya Geeshsha Maxaafay guutta. Ha wodiyan nuussi deꞌiyoogaadan Geeshsha Maxaafaa qonccissiya xuufeti erissiyo ashkkaratussi baawa. Qassi erissiyo ashkkarati dumma dumma qaalaa haasayiya asatussi sabbakidosona. He metoti ubbay deꞌishinkka, minnidi oottiya erissiyo ashkkarati oottana danddayettennaba milatiya oosuwaa oottidosona. Eti 30 gidiya layttatun mishiraachchuwaa ‘saꞌan deꞌiya mereta ubbawu’ sabbakidosona.—Qol. 1:6, 23.

7. Xeetu layttappe kase, Yihoowa ashkkarati I etappe koyiyoobaa waati eridonaa, qassi eti ay oottidonaa?

⁷ Ha wodiyan. Yihooway ba asaa kaaletteesinne A sheniyaa oottanaadan etawu wolqqaa immees. Geeshsha ayyaanaa maaduwan xaafettida Geeshsha Maxaafaa baggaara Yihooway ba asaa darotoo kaalettees. Yesuusa haggaazuwaabaanne I doomissido oosuwaa A kaalliyaageeti aggennan oottidoogaa Geeshsha Maxaafay yootees. (Maa. 28:19, 20) Isiine 1881, Wochiyo Keelay hagaadan gees: “Nuuni xeesettidoy woy tiyettidoy bonchchuwaanne duretettaa demmanawu gidennan, nuussi deꞌiya ubbabaa goꞌettidi mishiraachchuwaa sabbakanaassa.” Oosoy Imettidoogeeta (Inggilizettuwaa) giyo 1919n attamettida bukleetee hagaadan gees: “Oottana koshshiya daro oosoy deꞌees; shin hegee Godaa ooso; qassi hegaa oottanaadan I nuussi wolqqaa immana.” Beni Kiristtaanetudan, he ishantti geeshsha ayyaanay eti asa ubbawu sabbakanaadan maaddanaagaa ammanettidi minnidi xalatettan oottidosona. Ha wodiyan geeshsha ayyaanay nunakka maaddanaagaa ammanettoos.

8-9. Yihoowa dirijjitee sabbakiyo oosuwaa aassanawu goꞌettido hiillay aybee?

⁸ Yihoowa dirijjitee mishiraachchuwaa aassanawu maaddiya daro miishshata goꞌettiis. He miishshatuppe amaridaageeti, attamettida xuufiyaa, “Meretaa Pooto Diraamaa,” fonografiyaa, cenggurssaa xoqqissiyaabay deꞌiyo kaamiyaa, eraadooniyaa qassi ha wodiyan Intternneetiyaanne kompputeriyaa. Xoossaa dirijjitee birshshiyo oosuwaa awudeegaappenne aaruwan oottiiddi deꞌees! Aybissi? Asa ubbay bantta qaalan mishiraachchuwaa siyana koshshiyo gishshataassa. Yihooway asa asappe shaakkenna; I “Sa7an de7iya asa ubbaayyo, zare ubbaayyo, qommo ubbaayyo, dumma dumma biittaa qaala [ubbaayyo]” mishiraachchoy sabbakettanaagaa kasetidi yootiis. (Ajj. 14:6, 7) Asa ubbay Kawotettaa mishiraachchuwaa siyanaadan I koyees.

⁹ Gelennaadan naagetti uttida pooqiyan deꞌiyo gishshawu, geella nuuni biidi etawu sabbakana danddayenna asatubaa shin? He asatuppe darotuyyo sabbakanawu dumma dumma ogiyan dabaaban markkattiyoogaa doommanaadan Yihooway ba dirijjitiyaa maaddiis. Leemisuwawu, 2001n, Bolla Gididi Heemmiyaagee Paransaaye biittan xuufeta wottiyo gaaretanne hegaa mala harabata goꞌettanaadan paqqadiis; qassi guyyeppe hara biittatunkka paqqadiis. Yaatiyoogan loꞌꞌo ayfee beettiis. Qassi 2011n Amarkkan, asay dariyo Niwu York Siti giyo kataman ooratta hiillay doomettiis. Doomettido koyro layttan, 102,129 maxaafatinne 68,911 maxeeteti asawu imettidosona. Qassi 4,701 asay Geeshsha Maxaafaa xannaꞌanawu oychchiis! Geeshsha ayyaanay he oosuwaa maaddidoogee erettidaagaa. Hegaa gishshawu Bolla Gididi Heemmiyaagee kumetta alamiyan xuufiyaa wottiyoobata goꞌettidi haggaazanaadan paqqadiis.

10. Sabbakiyoogaaninne tamaarissiyoogan gooba gidanawu ay oottana danddayiyoo?

¹⁰ Neeni oottana danddayiyoobaa. SHiiqotun Yihooway immiyo loohissuwaa loytta goꞌetta. Ne haggaazo citaara ubbatoo haggaaza. Ne citan deꞌiya ishanttinne michchontti neeni sabbakiyoogaaninne tamaarissiyoogan gooba gidanaadan maaddana danddayoosona; qassi eta loꞌꞌo leemisoy nena mintettana danddayees. Metiyaabay deꞌishinkka sabbakiyoogaa aggoppa. Ha xinaatee ekettido waanna xiqisee nuna hassayissiyoogaadan, nuuni Xoossaa sheniyaa oottana danddayiyoy nu minotettan gidennan, geeshsha ayyaanay immiyo wolqqaana. (Zak. 4:6) Nuuni Yihoowa oosuwaa oottiyo gishshawu, I nuussi koshshiya wolqqaa immanaagaa ammanettana danddayoos.

YIHOOWAY MAARAANNE SAROTETTAA XOOSSAA

11. Koyro xeetu layttan bolla gididi heemmiyaagee Xoossaa asaa giddon maaray deꞌanaadan issippetettan waati oottidee?

¹¹ Koyro xeetu layttan. Yerusalaamen deꞌiya bolla gididi heemmiyaagee Xoossaa asaa giddon maaraynne sarotettay deꞌanaadan issippetettan oottiis. (Oos. 2:42) Leemisuwawu, 49 M.L., heeran Yihoowawu haggaazanawu ubba asay qaxxarettana koshshiyaakko koshshennaakko daro Kiristtaanetu giddon dummatettay merettiis. Hegaa gishshawu bolla gididi heemmiyaagee geeshsha ayyaanay kaalettin he allaalliyaabaa tobbiis. Gubaaꞌee he allaalliyan shaahettidi deꞌikko, eti loytti sabbakana danddayokkona. Eti Ayhuda asa gidikkonne, kiitettidaageetinne cimati Ayhudatu wogan woy he timirttiyaa mintti tamaarissiyaageetun cimettibookkona. SHin eti suurebaa kuuyanawu Xoossaa Qaalaa pilggidosona, qassi geeshsha ayyaanaa maaduwaa oychchidosona. (Oos. 15:1, 2, 5-20, 28, 29) Ayba ayfiyaa demmidonaa? Eti kuuyidobaa Yihooway anjjin gubaaꞌee sarotettaaninne issippetettan deꞌiis; qassi eti mishiraachchuwaa aggennan sabbakidosona.—Oos. 15:30, 31; 16:4, 5.

12. Ha wodiyan Yihoowa dirijjitee maaraaninne sarotettan deꞌiyoogaa bessiyaabay aybee?

¹² Ha wodiyan. Yihoowa asay maaraaninne sarotettan deꞌanaadan Yihoowa dirijjitee maaddiis. Hidaare 15, 1895n, Xiyoone Wochiyo Keelaanne Kiristtoosa Qonccettaa Awaajjiyaagaa giyo maxeetiyan 1 Qoronttoosa 14:40⁠ppe ekettida “Wogaaninne Maaran Hano” giya huuphe yohoy deꞌees. He huuphe yohuwan hagaadan gees: “Kiitettida PHawuloosi maaraa xeelliyaagan beni gubaaꞌiyawu darobaa xaafiis. . . . ‘Xaafettida ubbabai nuna tamaarissanau’ xaafettido gishshawu nuuni hegaa azazettiyoogee keehi koshshiyaaba.” (Roo. 15:4) Koyro xeetu layttan deꞌida Kiristtaanetudan, ha wodiyan Yihoowa dirijjitee maaraanne sarotettaa ubbatoo naagidi deꞌanawu minni oottees. Leemisuwawu, neeni Wochiyo Keelaa Xinaatiyaa hara gubaaꞌiyan, ubba qassi hara biittan shiiqikko, he xinaatee waani xannaꞌettiyaakko qassi huuphe yohoy awugaakko akeekana. Sohuwaara ne gubaaꞌiyan deꞌiyaabadan neeyyo siyettana! Hegaa mala issippetettay deꞌanaadan oottiyay Xoossaa ayyaana xalla!—Sof. 3:9.

13. Yaaqooba 3:17y, woygiya oyshata nuuni nuna oychchanaadan denttettii?

¹³ Neeni oottana danddayiyoobaa. Yihooway ba asay, ‘issippe gatti qachchiya sarotettan, geeshsha ayyaanay immiyo issippetettaa naaganaadan’ koyees. (Efi. 4:1-3) Yaatiyo gishshawu nena hagaadan oychcha: ‘Taani gubaaꞌiyaa issippetettaanne sarotettaa minttiyaaba oottiyaanaa? Aawatettay deꞌiyoogeetussi taani azazettiyaanaa? Gubaaꞌiyan taassi aawatettay deꞌikko, harati tana ammanettiyoonaa? Taani saatiyaa naagiyaanaa, harata maaddiyaanaa qassi minnida haggaaziyaanaa?’ (Yaaqooba 3:17 nabbaba.) Neeni giigissana danddayiyo amaridabay deꞌiyoogaa akeekikko, geeshsha ayyaanaa demmanawu woossa. Geeshsha ayyaanay ne eeshshaanne ne oottiyoobaa kaseegaappe aaruwan loyttanaadan neeni eeno giyo wode, ishanttinne michchontti nena loytti siiqana; qassi neeni gubaaꞌiyawu oottiyoobaa eti galatana.

YIHOOWAY NUNA TAMAARISSEESINNE NUUSSI KOSHSHIYAABAA IMMEES

14. Qolasiyaasa 1:9, 10y yootiyoogaadan, koyro xeetu layttan Yihooway ba asaa waati tamaarissidee?

¹⁴ Koyro xeetu layttan. Yihooway ba asaa tamaarissiyoogaa dosees. (Maz. 32:8) Yihooway eti ba siiqiyo naatudan A eranaadan, siiqanaadaaninne merinawu deꞌanaadan koyees. I tamaarissiyo timirttee baynnaakko ha ubbabay hanana danddayenna. (Yoh. 17:3) Yihooway ba asaa tamaarissanawu koyro xeetu layttan deꞌida Kiristtaane gubaaꞌiyaa goꞌettiis. (Qolasiyaasa 1:9, 10 nabbaba.) Yesuusi qaalaa gelido ‘minttettiya’ woy maaddiya geeshsha ayyaanay erissiyo ashkkaratakka maaddiis. (Yoh. 14:16) Erissiyo ashkkarati Xoossaa Qaalaa akeekanaadaaninne Yesuusi yootidonne oottido ubbabay guyyeppe Wonggeliyan xaafettidaagaa nabbabidi hassayanaadan geeshsha ayyaanay eta maaddiis. He eray koyro xeetu layttan deꞌida Kiristtaanetu ammanuwaa, qassi eti Xoossaa siiqiyo siiquwaa, A Naꞌaa siiqiyo siiquwaanne eti issoy issuwaara siiqettiyo siiquwaa minttiis.

15. Yihooway Isiyaasa 2:2, 3n gelido ba qaalaa ayba ogiyan polishin beꞌadii?

¹⁵ Ha wodiyan. Yihooway “wurssetta gallassatun,” ubba biittaa asay A ogiyaabaa tamaaridi leemiso hanotan ba deriyaakko zulanaagaa kasetidi yootiis. (Isiyaasa 2:2, 3 nabbaba.) Ha hiraagay ha wodiyan polettishin beꞌoos. Tumu goynoy worddo goyno ubbaappe keehi aadhdhiyoogaa nuuni akeekana danddayoos. Qassi Yihooway ba asawu gidi palahiya ayyaanaabaa qumaa immees! (Isi. 25:6) Yihooway ‘ammanettida wozannaama ashkkaraa’ goꞌettidi dumma dumma ogiyan ayyaanaaban darobaa nuussi immees. Leemisuwawu, xuufeta nabbabana, haasayata siyananne biidota beꞌana danddayoos. (Maa. 24:45) Iyyooba lagge Eelihu “[Xoossaa] mala asttamaaree oonee?” giidoogaadan, nuuyyookka siyettees.—Iyy. 36:22.

16. Yihooway tamaarissiyoobaappe goꞌettanawu ay oottana danddayay?

¹⁶ Neeni oottana danddayiyoobaa. Neeni Xoossaa Qaalaappe nabbabidobaanne xannaꞌidobaa ne deꞌuwan oosuwan peeshshanaadan Xoossaa ayyaanay nena maaddana. “Abeet GODAU, taani ne tuman hemettana mala, tana ne ogiyaa tamaarissa. Taani ne sunttaayyo yayyana mala, taayyo issi wozanaa imma” giidi woossida mazamuraawiyaagaadan neenikka woossa. (Maz. 86:11) Qassi, Geeshsha Maxaafaanne Yihoowa dirijjite giigissiyo hara xuufeta ubbatoo nabbabanne xannaꞌa. Ne halchchoy era xalla demmanawu gidennaagee qoncce. Neeni he tumaa mintta ammananawunne hegaa ne deꞌuwan oosuwan peeshshanawu koyaasa. Neeni hegaadan oottanaadan Yihoowa ayyaanay nena maaddana. Qassi neeni ne ishanttanne michchontta minttettanawu koyaasa. (Ibr. 10:24, 25) Aybissi? Eti neeyyo ayyaanaaban so asa gidiyo gishshataassa. Neeni shiiqotun minttettiya zaaruwaa zaaranawu, qassi kifilee neeyyo imettiyo wode neessi danddayettida ubbabaa oottanawu Xoossaa ayyaanay nena maaddanaadan woossa. Yaatiyoogan Yihoowawunne A Naꞌawu alꞌꞌo gidida “dorssata” siiqiyoogaa bessaasa.—Yoh. 21:15-17.

17. Neeni ammanettada Yihoowa dirijjitiyaa maaddiyoogaa ayba ogetun bessana danddayay?

¹⁷ Matan, Xoossaa ayyaanay kaalettiyo dirijjite xallay saꞌan attana. Hegaa gishshawu, Yihoowa dirijjitiyaara minnada ootta. Nenaara gayttiya asa ubbawu mishiraachchuwaa yootiyoogan Xoossaagaadan ubba asaa siiqiyoogaa bessa. Gubaaꞌiyan maaraynne sarotettay minnanaadan oottiyoogan Yihoowa milata. Qassi Yihooway immiyo ayyaanaaban gididi palahiya ubbabaa goꞌettiyoogan Gita Asttamaaree yootiyoobaa siya. Seexaanaa alamee xayiyo wode, neeni yayyakka. Neeni xala gidada Yihoowa dirijjitiyawu ammanettidi oottiyaageetuura hashetana.