Hidootaa Qanxxennan Aggana Danddayiyo Ogiyaa

1. Hidootaa qanxxiyoogee nuna waati qohana danddayii?

NUNA metoy galla galla gakkees, qassi hegaa genccanawu nuussi danddayettida ubbabaa oottoos. SHin nuuni hidootaa qanxxiyo wode nuna gakkiya metuwaa gencciyoogee keehi metees. Hegaa gishshawu, hidootaa qanxxiyoogee nuuni nuna pattennabadan xeellanaadaaninne ufayttennaadan oottana danddayiyoogaa hassayana koshshees. Leemiso 24:10y, “Neeni metuwaa gallassi laafikko, ne wolqqai guutta” yaagees. Yaatiyo gishshawu, nuuni hidootaa qanxxiyo wode nuussi wolqqay xayana, qassi nu metuwaa gencciyoogee kaseegaappe aaruwan metana danddayees.

2. Nuuni hidootaa qanxxanaadan oottana danddayiyaabati aybee, qassi nuuni ha huuphe yohuwan ay beꞌanee?

² Nuuni daroban hegeekka amaridaageeti nu gaasuwan, amaridaageeti harati gattiyooban hidootaa qanxxana danddayoos. Hegeetuppe amaridaageeti nu oottiyo balaa, nu shugo gididobaa woy nu sahuwaa. Woy Yihoowa haggaazuwan nu koyido aawatettaa ekkibeenna gishshawu woy nu yootiyoobaa daro asay siyenna moottan sabbakiyo gishshawu hidootaa qanxxana danddayoos. Ha huuphe yohuwan nuuni hidootaa qanxxennaadan nu oottana danddayiyo issi issibata beꞌana.

NU NAGARAYNNE NUUNI SHUGO GIDIDOBAY EHIYOOBAA GENCCIYO WODE

3. Nubaa iitabaa qoppiyo wodenne balaa oottiyo wode nuna aybi maaddana danddayii?

³ Nubaa iitabaa qoppiyoogeenne balabaa oottiyoogee metennaba. Hegaa gishshawu, nu oottiyo balabaa gaasuwan Yihooway nuna Gannatiyaa gelissanawu koyenna giidi qoppana danddayoos. Hegaadan qoppiyoogee keehi qohees. Nu balaa xeelliyaagan nuussi aybi siyettana koshshii? Geeshsha Maxaafay Yesuusappe attin asay ubbay “nagaraa” oottidoogaa yootees. (Roo. 3:23) SHin Yihooway nu balan xeelaa wottenna woy wottiyoobi baynnaageeta gidanaadan naagenna. I nuna maaddanawu koyiya siiqiya Aawaa. Qassi I danddayanchcha. Suurebaa oottiyoogeenne nubaa iitabaa qoppennan aggiyoogee nuna metiyoogaa Yihooway erees; qassi I nuna maaddanawu giigi uttiis.—Roo. 7:18, 19.

4-5. Koyro Yohaannisa 3:19, 20y yootiyoogaadan, hidootaa qanxxennaadan naaꞌꞌu michchontta maaddidabay aybee?

⁴ Diboorinne Maariyib hanotaa qoppa. Diboora naatettan deꞌiyo wode so asay O meqetti baynna ogiyan oyqqidoogee A babaa iitabaa qoppanaadan oottiis. Eti O darotoo galatokkona. Yaaniyo gishshawu, A asa gamma gakkido wode babaa iitabaa qoppaasu. A guutta balaakka baliyo wode, aybanne oottana danddayennabadan iyyo siyettees. Maariyissikka hegaa mala metoy deꞌees. I dabboti O meqetti baynna ogiyan oyqqidosona. Hegaappe denddidaagan pattennabadan iyyo siyettees. A xammaqetta simmadakka, Yihoowa Markka gidana bessennabadan qoppaasu!

⁵ Gidikkonne, he naaꞌꞌu michchontti Yihoowawu haggaaziyoogaa aggibookkona. Aybissi? Eti Yihoowakko woossidonne banttawu siyettidabaa ayyo yootido gishshataassa. (Maz. 55:22) Nu bolli gakkida iitabay nuuni nubaa iitabaa qoppanaadan oottana danddayiyoogaa saluwan deꞌiya siiqiya nu Aaway eriyoogaa eti akeekidosona. SHin, nuussi loꞌꞌo eeshshay aybinne baawa giidi nu qoppikkonne, Yihooway nuussi deꞌiya loꞌꞌo eeshshaa beꞌees.—1 Yohaannisa 3:19, 20 nabbaba.

6. Issi uri kase oottido balaa zaarettidi oottikko waatana koshshii?

⁶ Issi uri balabaa oottiyoogaa agganawu keehi baaxetana danddayees. SHin, I he balaa zaarettidi oottana danddayees; qassi hegee hidootaa qanxxanaadan oottees. Nuuni nagaraa oottiyo wode, nuussi darotoo iitabay siyettees. (2 Qor. 7:10) Gidikkonne, nuuni oottido balabaa xeelliyaagan nuussi iitabay siyettido gishshawu, ‘Taani pattikke. Yihooway tawu mule atto geenna’ giidi qoppana bessenna. He qofay likke gidenna; qassi hegee Yihoowawu haggaaziyoogaa agganaadan oottana danddayees. Nuuni hidootaa qanxxiyo wode nu wolqqay guutta gidanaagaa Leemiso 24:10n nabbabidoogaa hassaya. SHin, he balaa xeelliyaagan Yihoowakko woossananne I nuussi atto gaanaadan oychchana danddayoos. (Isi. 1:18) Yihooway neeni wozanappe zilꞌꞌettidoogaanne laamettanawu baaxetiyoogaa beꞌiyo wode, I neessi atto gaana. Qassi cimati maaddanaadan oychcha. Neeni ayyaanaaban zaarettada minnanaadan eti nena danddayan maaddana.—Yaaq. 5:14, 15.

7. Suurebaa oottiyoogee nuna metikko hidootaa qanxxana koshshennay aybissee?

⁷ Bantta shugo miyyiyaara baaxetiyaageeta xeelliyaagan Paransaayen deꞌiya issi cimay hagaadan giis: “Yihoowa sinttan geeshsha uri mule balabaa oottennaagaa gidennan, ba oottidoban zilꞌꞌettiyaagaanne ubbatoo ba nagaraappe simmiyaagaa.” (Roo. 7:21-25) Hegaa gishshawu, neeni shugo gididobaara baaxetaydda deꞌikko, taani pattenna asa gaada qoppoppa. Nuuni ubbay balabaa oottiyo gishshawu wozuwaa baggaara Yihooway immiyo aaro kehatettay nu ubbaayyo koshshees.—Efi. 1:7; 1 Yoh. 4:10.

8. Nuuni hidootaa qanxxiyo wode, maaduwaa oona oychchana danddayiyoo?

⁸ Gubaaꞌiyan deꞌiya nu ishanttinne michchontti nuna minttettana! Nuuni haasayana koshshiyo wode eti nu yootiyoobaa siyananne nuna minttettana danddayoosona. (Lee. 12:25; 1 Tas. 5:14) Hidootaa qanxxido gishshawu tuggatida Nayjeeriyaa biittan deꞌiya Joy giyo michchiyaa hagaadan gaasu: “Ishanttu maabaray baynnaakko taani awu gelanee? Ishanttuppenne michchonttuppe taani demmido minttettoy Yihooway ta woosaa zaaridoogaa bessiyaaba. Hidootaa qanxxida harata waata minttettanaakkokka taani etappe tamaaraas.” Gidikkonne, nuussi minttettoy koshshiyo wode nu ishshanttinne michchontti ubbatoo erennan aggana danddayiyoogaa hassayana koshshees. Yaatiyo gishshawu, kayma gidida nu mala Kiristtaanetukko biidi nuussi koshshiya maaduwaabaa qoncciyan yootana koshshees.

NUUNI SAHETTIYO WODE

9. Mazamure 41:3⁠ynne 94:19y nuna waati minttettii?

⁹ Yihooway maaddanaadan oychcha. Nuuyyo ufayssiyaabay siyettenna wode, ubba qassi daro wodiyawu sahettikko, loꞌꞌobaa qoppiyoogee metana danddayees. Ha wodiyan, Yihooway nuna maalaaliya ogiyan pattenna; shin I nuna minttettees qassi genccanaadan nuussi koshshiya wolqqaa immees. (Mazamure 41:3; 94:19 nabbaba.) Leemisuwawu, I nu ishanttinne michchontti so giddon amarida oosuwaa oottiyoogan woy suuqiyaappe issi issibaa shammiyoogan eti nuna maaddanaadan denttettana danddayees. I nu ishantti nuunaara woossanaadan oottana danddayees. Woy ooratta alamiyan sahoynne tuggay xayin wottiyoobi baynna deꞌuwaa deꞌiyo ufayssiya hidootaa mala Xoossaa Qaalan deꞌiya minttettiya qofaa hassayanaadan I nuna maaddana danddayees.—Roo. 15:4.

10. Esani daafabay gakki simmin hidootaa qanxxiyoogaa aggidoy aybissee?

¹⁰ Nayjeeriyaa biittan deꞌiya Esani daafabay gakkido gishshawu qaaxxana danddayenna. Esana dottoree I zaarettidi mule hemettana danddayennaagaa ayyo yootiis. Esani, “Ta wozanay meqqiis, qassi taani hidootaa qanxxaas” yaagiis. Yaatin I hidootaa qanxxiyoogaa aggidee? Ee aggiis! A maaddidabay aybee? I hagaadan giis: “Ta machchiyaanne taani Yihoowakko woossiyoogaanne A Qaalaa xannaꞌiyoogaa mule aggibookko. Xoossay ehiyo ooratta alamiyan deꞌana deꞌuwaa gujjin, nuussi deꞌiya loꞌꞌobaa gishshawu A galatanawukka murttida.”

11. Sindda keehi sahettiyo wode waana ufayttana danddayadee?

¹¹ Mekisiiko biittan deꞌiya Sinddo giyooro worana danddayiya harggee oyqqidoogaa dottoree iyyo yootiis. A genccanawu ay oottadee? A akkamettiyo wode galla galla markkattanawu halchchaasu. A hagaadan gaasu: “Hegee taani shuhettoogaa, tana gakkida wolqqaama seelaa woy tawu siyettiya sahuwaa qoppiyoogaappe harabaa qoppanaadan maaddiis. Taani hagaadan oottana: Dottoretuura woy narssetuura haasayiyo wode, eta soo asaabaa oychchana. Yaatada, eti ha deexxiya oosuwaa ayssi dooridaakko oychchana. Hegaappe simmin, eta wozanaa denttettana danddayiya huuphe yoohoy awugaakkonne akeekanawu meetootikke. Etappe daroti hargganchchati banttana, ‘Aymalee loꞌꞌoo?’ giidi oychchennagaa yootidosona. Taani etassi qoppada oychchido gishshawu daroti tana galatidosona. Ubba qassi issoti issoti bantta adaraashaa woy silkkiyaa payduwaa tawu immidosona. Ha deexxiya wodiyaa genccanaadan Yihooway tana maaddanaagaa erays. SHin taani keehi ufayttanaadan I oottidoogan maalaalettaas!”—Lee. 15:15.

12-13. Sahettiya woy cimida amaridaageeti haratuyyo waati sabbakana danddayidonaa, qassi hegee ayba ayfiyaa demissidee?

¹² Sahettiyaageeti woy cimidaageeti koyidoogaa keenaa sabbakana danddayenna gishshawu hidootaa qanxxana danddayoosona. Gidikkonne, daroti sabbakiyo injjiyaa koyoosona. Amarkkan Lorel giyo michchiyaa shemppanaadan maaddiya maashiniyaa giddon 37 layttaa zinꞌꞌada takkaasu! A kansseriyaa harggaawusu, darotoo shuhettaasu, qassi gogaa harggee O sakkees. SHin, ha keehi wolqqamaa metoy sabbakiyoogaa O diggibeenna. A ba soo yiida naarssetuussinne haratussi markkataasu. A ayba ayfiyaa demmadee? A baa giishin 17 asay Yihoowabaa eranaadan maaddaasu!c

¹³ Paransaayen deꞌiya Reshara giyo issi cimay, bantta sooppe kiyana danddayennaageetuyyo woy cimata hemmiyo sohuwan deꞌiyaageetuyyo maaddiyaabaa yootiis. “Eti nu maxaafatuppenne nu xuufetuppe amaridaageeta asay beꞌiyoosan wottanaadan minttettays. Asay hegaara kanttiyo wode, xuufeta beꞌananne hegaabaa oychchana. Sooppe soo biidi haggaazana danddayenna nu alꞌꞌo ishanttanne michchontta hegee minttettana danddayees.” Qassi bantta sooppe kiyana danddayennaageeti dabddaabbiyaaninne silkkiyan markkattana danddayoosona.

NU KOYIDO AAWATETTAA DEMMENNA WODE

14. Kawuwaa Daawiti nuuyyo aybin loꞌꞌo leemiso gidii?

¹⁴ Yihoowa haggaazuwan nu koyiyo aawatettaa demmennaadan oottana danddayiya daro gaasoy deꞌees. Leemisuwawu, cimatettaa woy sahuwaa woy hara hanotaa gidana danddayees. Nu hanotaykka hegaa mala gidikko, Kawuwaa Daawita hanotaappe tamaarana danddayoos. Daawiti Xoossaa beeta maqidasiyaa keexxanawu keehi koyikkonne, hegaa keexxanaadan Yihooway hara ura dooriis. Hegaa keexxanaadan doorettidaagawu Daawiti daro worqqaanne biraa immiyoogan loytti maaddiis. Daawiti tumuppe nuuyyo loꞌꞌo leemiso!—2 Sam. 7:12, 13; 1 Odi. 29:1, 3-5.

15. Huge hidootaa qanxxiyoogaa waati aggidee?

¹⁵ Paransaayen deꞌiya Huge giyo ishay harggiyaa gaasuwan cima gididi oottiyoogaa aggiis; qassi son guutta oosotakka oottana danddayenna. I hagaadan giis: “Koyro heeran, pattennabadan tana xeellaasinne keehi hidootaa qanxxaas. SHin hegaappe simmin, taani oottana danddayennaban azzaniyoogaa aggiyoogee keehi koshshiyaaba gidiyoogaa akeekaas. Yaatiyoogan, Yihoowawu haggaaziyoogan taani oottana danddayiyooban ufayttaas. Taani hidootaa qanxxennan agganawu murttaas. Daafurida Geedoonaagaadaaninne aara deꞌiya heezzu xeetu asatuugaadan, taanikka baaxetiyoogaa aggikke!”—Daan. 8:4.

16. Kiitaanchchati oottidobaappe nuuni ay tamaarana danddayiyoo?

¹⁶ Ammanettida kiitaanchchati nuuyyo loꞌꞌo leemiso. Leemisuwawu, issi wode Yihooway iita Kawuwaa Akaaba waati balettanaakko kiitaanchchati bantta qofaa yootanaadan eta oychchiis. Amarida kiitaanchchati bantta qofaa yootidosona. SHin Xoossay issi kiitaanchchaa dooridi A qofay hananaagaa awu yootiis. (1 Kaw. 22:19-22) Ammanettida hara kiitanchchati hidootaa qanxxidi, ‘Taani ta wodiyaa xuuggidoynne ta qofaa yootidoy aybissee,’ giidi geellaa qoppidonaa? Akkay. Kiitaanchchati tumuppe banttana ziqqi oottiyaageeta, qassi bonchcho ubbaa Yihooway ekkanaadan koyoosona.—Daan. 13:16-18; Ajj. 19:10.

17. Nuuyyo Yihoowa haggaazuwan issi aawatettay baynna gishshawu iitabay siyettikko, waatana koshshii?

¹⁷ Nuuni Yihoowa Markka gidiyoogeenne A Kawotettabaa sabbakiyoogee gita maataa gidiyoogaa hassaya. Nuuni aawatettaa demmana danddayoos, woy aawatettay nuuppe halana danddayees; shin nuna Xoossaa sinttana alꞌꞌo oottiyay hegaa gidenna. Nuuni nuna ziqqi oottikko, Yihoowayyo, qassi nu ishanttuyyoonne nu michchonttuyyo alꞌꞌo gidana. Yaatiyo gishshawu, nena ziqqi oottada deꞌanaadan Yihooway maaddana mala woossa. Etabay Geeshsha Maxaafan odettido banttana ziqqi oottiyoogan loꞌꞌo leemiso gidiya Yihoowa ashkkaratu ubbatubaa qoppa. Neeni danddayiyo oge ubban ne ishanttussi ne dosan ootta.—Maz. 138:6; 1 PHe. 5:5.

ASAY MISHIRAACHCHUWAA SIYANAWU KOYENNA WODE

18-19. Asay mishiraachchuwaa siyanawu koyenna wodekka, haggaazuwan waana ufayttana danddayay?

¹⁸ Asay mishiraachchuwaa siyanawu koyenna gishshawu woy daro asaa son demmabeenna gishshawu issi isstoo hidootaa qanxxadii? Hegaa mala hanotatun, ufayttiiddi deꞌanawu woy kaseegaappe aaruwan ufayttanawu ay oottana danddayiyoo? “Haggaazuwan Kaseegaappe Aaruwan Ufayttana Danddayiyo Ogeta” giya saaxiniyan maaddiya amarida zoree deꞌees. Qassi haggaazuwaa bessiyaagaadan xeelliyoogee keehi koshshiyaaba. Hegaa giyoogee woygiyoogee?

¹⁹ Nu sabbakiyo waanna gaasoy Xoossaa sunttay erettanaadan oottiyoogaanne A Kawotettaabaa asayyo yootiyoogaa gidiyoogaa hassaya. Yesuusi guutta asati bana kaallanaagaa geeshshidi yootiis. (Maa. 7:13, 14) Nuuni haggaaziyo wode, Yihoowaara, Yesuusaaranne kiitanchchatuura oottiyo maataa demmoos. (Maa. 28:19, 20; 1 Qor. 3:9; Ajj. 14:6, 7) Yihooway bawu haggaazanawu koyiya asata baakko ehees. (Yoh. 6:44) Yaatiyo gishshawu, issi uri nu yootiyoobaa haꞌꞌi siyanawu koyennaba gidikko, haroode nu A haasayissiyo wode I siyana danddayees.

20. Hidootaa qanxxennan aggiyoogaa xeelliyaagan Ermmaasa 20:8, 9y nuna ay tamaarissii?

²⁰ Hananabaa yootiya Ermmaasaappe darobaa tamaarana danddayoos. I siyanawu koyenna asay deꞌiyo moottan sabbakanaadan kiitettiis. Asay A ‘gallassa kumettaa’ cayiissinne qilliicciis. (Ermmaasa 20:8, 9 nabbaba.) Issi wode, I keehi hidootaa qanxxidi sabbakiyoogaa agganawu koyiis. SHin I aggibeenna. Aybissi? Ermmaasa giddon ‘Yihoowa Qaalay’ eexxiya tama mala gidiis; yaatin I coꞌꞌu gaana danddayibeenna! Nuuni Geeshsha Maxaafaa galla galla xannaꞌiyaabanne hegaa wotti dentti qoppiyaaba gidikko, nuunikka Ermmaasa mala gidana danddayoos. Hegaa gishshawu, nuuni haggaazuwan kaseegaappe aaruwan ufayttana, qassi daro asay nu yootiyoobaa siyana danddayees.—Erm. 15:16.

21. Hidootaa qanxxiyoogaa aggaanawu ay oottana danddayay?

²¹ Qommoora ibaa denttido Diboora, “Hidootaa qanxxiyoogee Seexaanay nuna yashissanawu goꞌettiyo wolqqaama miishsha” yaagaasu. SHin, Xoossaa Yihooway Seexaanaappenne I goꞌettiyo ay miishshaappekka keehi darees. Yaatiyo gishshawu, neeni dumma dumma gaasuwan hidootaa qanxxiyo wode, Yihooway maaddanaadan mintta woossa. Ne nagaraa gaasuwan gakkiyaabaa, qassi ne shugo gididobaa genccanaadan I nena maaddana. Neeni sahettiyo wode genccanaadan I nena maaddana. Yihoowa haggaazuwan aawatettaa bessiyaagaadan xeellanaadan I nena ubbatoo maaddana. Qassi haggaazuwaa xeelliyaagan neeni loꞌꞌobaa qoppanaadan I nena maaddana. Hegaa bollikka, nena qofissiya ubbabaa saluwan deꞌiya ne Aawawu yoota. A maaduwan, hidootaa qanxxiyoogaa aggana danddayaasa.