“Xoossaakko shiiqite; ikka inttekko shiiqana.”—Yaaqooba 4:8
Xoossay Nu Woosaa Siyii?
Neeni woossiyo wode, Xoossay ta woosaa siyiishsha gaada qoppa eray? Yaatikko, hegaadan qoppiyay ne xalla gidakka. Daroti issi metuwaa xeelliyaagan Xoossaakko woossiyaaba gidikkonne, he metoy qaarettibeenna. Hegaa giyoogee Xoossay nu woosaa siyenna giyoogee? CHii! Nuuni suure ogiyan Xoossaakko woossiyo wode, I siyiyoogaa Geeshsha Maxaafay yootees. Geeshsha Maxaafay yootiyoobaa ane beꞌoos.
XOOSSAY NE WOOSAA SIYEES.
“Abeet woosaa siyiyaagoo, asai ubbai neekko yaana.”—Mazamure 65:2.
Issi issi asay tumuppe woosaa siyiyaagee deꞌiyoogaa ammanennaba gidikkonne, woossiyoogee loꞌꞌobay siyettanaadan oottees giidi qoppiyo gishshawu woossoosona. Gidoppe attin, woossiyoogee nuussi loꞌꞌobay siyettanaadan oottiyaaba xalla gidennan, nuna gakkiya metuwaa genccanaadan maaddees. Geeshsha Maxaafay, “[Yihooway]a bana xeesiya ubbau, tuman bana xeesiya ubbau matan de7ees. . . . I eta waasuwaa [siyees]” yaagees.—Mazamure 145:18, 19.
Yaatiyo gishshawu, Xoossaa Yihooway baayyo goynniyaageetu woosaa siyiyoogaa nuuni ammanettana danddayoos. I siiquwan hagaadan gees: “Intte tana xeegana; taakko yaananne tana woossana; taanikka intteyyo siyana.”—Ermmaasa 29:12.
XOOSSAY NEENI AKKO WOOSSANAADAN KOYEES.
“Ubba wode Xoossaa woossite.”—Roome 12:12.
Geeshsha Maxaafay, “ubba gallassi salettennan woossana mala” qassi ‘ubba wode Xoossaa woossanaadan’ nuna minttettees. Xoossaa Yihooway nuuni akko woossanaadan koyiyoogee qoncce.—Luqaasa 18:1; Efisoona 6:18.
Xoossay nuuni akko woossanaadan koyiyoy aybissee? Hagaa qoppa: Issi aaway A guutta naꞌay maaduwaa A oychchiyo wode ufayttees. Issi aaway ba naꞌawu koshshiyaabaa woy awu siyettiyaabaa eriyoogee qoncce; shin maaddanaadan naꞌay A oychchiyoogaa siyiyoogee naꞌay an ammanettiyoogaanne aara ulottiyoogaa bessees. Hegaadankka, nuuni Xoossaa Yihoowakko woossiyo wode, an ammanettiyoogaanne assi mata dabbo gidanawu koyiyoogaa bessoos.—Leemiso 15:8; Yaaqooba 4:8.
XOOSSAY NEESSI TUMUPPE QOPPEES.
“I intteyyo qoppiyo gishshau, inttena hirggissiya ubbabaa a bolli olite.”—Koyro PHeexiroosa 5:7.
Xoossay nuna siiqiyoonne nuussi qoppiyo gishshawu, nuuni akko woossanaadan koyees. I nu metuwaanne nuna hirggissiya ubbabaa erees; qassi I nuna maaddanawu koyees.
Kawuwaa Daawiti ba deꞌo laytta ubban, maaduwaa demmanawu Xoossaa Yihoowakko woossiisinne ba qofaanne bawu siyettiyaabaa awu yootiis. (Mazamure 23:1-6) Daawita xeelliyaagan Xoossawu aybi siyettidee? Xoossay Daawita siiqiisinne I woossido daro woosata siyiis. (Oosuwaa 13:22) Hegaadankka, Xoossay nuuyyo qoppiyo gishshawu, nu woosaa siyees.
‘YIHOOWAY TA CENGGURSSAA SIYIDO GISHSHAWU TAANI A SIIQAYS’
Ha qaalata Geeshsha Maxaafaa shaaho gidida mazamure maxaafaa xaafidaageetuppe issoy xaafiis. I Xoossay A woosaa siyidoogaa, qassi hegee A keehi maaddidoogaa eriis. I kaseegaappe aaruwan Xoossaakko matattidabadan awu siyettiis; qassi I bana hirggissiyaabaanne unꞌꞌissiyaabaa genccanawu wolqqaa demmiis.—Mazamure 116:1-9.
Xoossay nu woosaa siyiyoogaa nuuni ammanettikko, aggennan akko woossana. Huuphessa Isppeenen deꞌiya Pedra gakkidabaa beꞌa. Ayyo 19 laytta naꞌay kaamiyaa daafan hayqqiis. Pedroy keehi kayyottidi bawu siyettiya ubbabaa Xoossaayyo yootiis; qassi minttettuwaanne maaduwaa demmanawu darotoo woossiis. Yaatin aybi hanidee? Pedroy hagaadan giis: “Nu mala Kiristtaanetu baggaara ta keettaayyiyoonne tana minttettiyoogaaninne maaddiyoogan Yihooway ta woosaa zaariis.”
Darotoo, nu woosaa zaaroy nuna siiqiya laggetuppe demmiyo minttettuwaanne maaduwaa gidana danddayees
Pedroy naꞌay hayquwaappe denddibeennaba gidikkonne, woosay Pedranne A soo asaa keehi maaddiis. A keettaayiyaa Maariya Karmeena hagaadan gaasu: “Kayyottiyoogaa genccanaadan woosay tana maaddiis. Taani woossiyo wode saruwaanne woppaa demmiyo gishshawu, Xoossaa Yihooway tawu siyettiyaabaa akeekiyoogaa erays.”
Geeshsha Maxaafaynne daro asay bantta deꞌuwan issi issibay gakkin beꞌidobay Xoossay woosaa siyiyoogaa loytti qonccissees. Gidikkonne, Xoossay woosa ubbaa zaarennaagee tuma. Xoossay issi issi woosaa zaariyoynne harata zaarennay aybissee?
a Yihoowa giyoogee Xoossawu buzo sunttaa.—Mazamure 83:18, NW.