Ufayssiya Deꞌuwaa Deꞌanawu Xoqqa Timirtteenne Miishshay Maaddana Danddayii?

Xoqqa timirttiyaa tamaariyoogeenne duretiyoogee ufayssiya deꞌuwaa demissiyaabadan daroti qoppoosona. Issi uri yuniversttiyan tamaariyoogee oosuwan, so giddooninne deretettan gooba gidanaadan maaddana danddayees giidi ammanoosona. Xoqqa timirttiyaa tamaariyoogee daro miishshaa demissiya oosuwaa oyqqanawu maaddiyaabadan, qassi daro miishshay deꞌiyoogeeti ufayttiyaabadan eti qoppoosona.

DAROTI XOQQA TIMIRTTEE UFAYSSAA DEMISSEES GIIDI QOPPOOSONA

CHaynan deꞌiya ZHan CHen giyo bitanee yootidobaa akeeka. I hagaadan giis: “Taani hiyyeesatettaappe kiyanawunne ufayttanawu yuniversttiyan tamaarada anjjettananne daro miishshaa demissiya oosuwaa oyqqana koshshees gaada qoppaas.”

Daroti ufayssiya deꞌuwaa deꞌanawu keehi erettida yuniversttiyan, geella hara biitti biidi tamaaranawu koyoosona. Asay issisaappe harasaa biyoogee koronaa harggiya gaasuwan digettana gakkanaashin hegee meeze gididaba. Isiyaa biittan deꞌiya tamaaretuppe baggappe dariyaageeti hara biittan tamaariyoogaa, issi dirijjitee 10 layttappe kase yootiis.

Yelidaageeti hara biittan deꞌiya yuniversttiyan bantta naata tamaarissanawu keehi baaxetoosona. Taywaanen deꞌiya issi yelagay hagaadan giis: “Tana yelidaageeti dure gidana xayikkonne, nuna oyddu naatakka Amarkkan deꞌiya kolloojjiyan tamaaranaadan yeddidosona.” A yelidaageetinne hara daroti hegaa mala timirtte keettatun bantta naata tamaarissanawu acuwan gelidosona.

XOQQA TIMIRTTEE UFAYSSAA DEMISSII?

He macca naatuppe issinniyaa bilahe kompputeriyaa sinttan uttada keehi daafuridabanne unꞌꞌettidaba milatawusu. — Xoqqa timirttiyaa tamaaranawunne duretanawu baaxetida daroti guyyeppe zilꞌꞌettidosona

Ufayssiya deꞌuwaa deꞌanawu timirttee amarida ogetun maaddana danddayikkonne, tamaariyaageeti qoppidoogaadan ubbatoo maaddenna. Leemisuwawu, eti tamaaranawu unddenna layttaayyo baaxetidabanne daro miishshaa talꞌꞌidaba gidikkonne, eti koyido oosuwaa demmana danddayibookkona. Rachel Muy giyo maccaasiyaa Bizines Taymis giyo gaazeexan hagaadan gaasu: “Yuniversttiyaappe anjjettiya keehi daroti oosuwaa demmana danddayibookkona.” Taywaanen deꞌiya Jenjja giyo daro tamaarida bitanee hagaadan giis: “Daroti bantta tamaaridoogaa mala oosuwaa demmibookkona.”

Bantta tamaaridoogaa mala oosuwaa demmidaageetikka, eta deꞌoy eti qoppidoogaadan hanibeennaagaa akeekidosona. Taylandden deꞌiya Nirin giyo bitanee, Awurooppan deꞌiya yuniversttiyaappe anjjettidi ba tamaaridoban oosuwaa demmiis. I hagaadan giis: “Taani qoppidoogaadan, digiriyan anjjettidoogee daro miishshaa demissiya oosuwaa oyqqanaadan tana maaddiis. SHin taani daro miishshaa demmanawu, keehi baaxetananne daro saatiyaa oottana koshshiis. Guyyeppe, nu ooso keettay tananne hara daro oosanchchata oosuwaappe kessiis. Ufayssiya deꞌuwaa demmanawu ooso oyqqiyoogaa xallay maaddennaagaa taani akeekaas.”

Daro miishshay deꞌiyoogeeti woy ufayttiyaaba milatiyaageetikka, sahettoosonanne miishshaabawu hirggoosona; qassi eta son sarotettay baawa. Jaappaanen deꞌiya Kasitosha giyo bitanee hagaadan giis: “Taani dure gidikkonne, harati tana qanaatiyoonne keehi qohiyo gishshawu ufayttikke.” Veetinaamen deꞌiya Leema hagaadan gaasu: “Daro miishshaa shiishshiyoogee ufayttanawu maaddees giidi daro asay qoppiyo gishshawu duretanawu baaxetees; shin eti keehi hirggoosona, sahettoosonanne unꞌꞌettoosona.”

XOQQA TIMIRTTEENNE DURETIYOOGAA XALLAY UFAYTTANAWU MAADDENNAY AYBISSEE?

Issi uri baassi woy ba so asawu koshshiyaabaa kunttanawu, timirttiyaa tamaariyoogeenne miishshay koshshiyoogee qoncce. SHin, hegaa xallay ufayssiya deꞌuwaa deꞌanawu maaddenna. Aybissi? Xoossaa Qaalay yootiyoobaa akeeka.

XOQQA TIMIRTTIYAA TAMAARIYOOGEE UBBATOO UFAYSSAA DEMISSENNA.

“Eesotiya wottanchchati ubba wode xoonokkona; . . . woikko cinccati ubba wode duretokkona; woikko tamaarida asati ubba wode sabettokkona. SHin ubbaikka [“wodee oottiyoobaaninne qoppennan gayttiyaaban,” NW] hanees.”—ERANCHCHAA 9:11.

Issi uri xoqqa timirttiyaa tamaarikkonne, I oottana danddayenna darobati deꞌiyo gishshawu, ufayttennan aggana danddayees. Issi uri daro tamaaridaagaa gidikkonne, I deꞌiyo biittan miishshaara woy polotikaara gayttida metoti, woy asay coo ixxiyoogee I ufayttennaadan oottana danddayees.

DURETETTAY MERINAWU DEꞌIYAABA GIDENNA.

“Duretanau daafuroppa; hegaa mala keesiyaa agganau cincca gida. Hegaa mala duretettai neeni xeellishin xayana; qefiyaa kessidi argganttaagaadan, saluwaa paallana.”—LEEMISO 23:4, 5.

Miishshay amarida ogiyan maaddana danddayikkonne, hegee merinawu deꞌiyaaba gidenna. Neeyyo deꞌiya miishsha ubbay sohuwaara xayana danddayees. Biittaa qaattaa, xaragaanne beetaa mala meretay gattiyo daafabati issi urawu deꞌiya aquwaa woy keettaa xayssana danddayoosona.

DURETIYOOGEE DAROTOO METUWAA KAALETTEES.

“Duree ba duretettaassi ubba wode un77ettidi qoppiyo gishshau, xiskkuwaa xayidi de7ees.”—ERANCHCHAA 5:12.

Hong Kongen deꞌiya Frenkilina hegaa malabay gakkiis. I xoqqa timirttiyaa tamaaridi daro miishshaa demissiya oosuwaa oyqqiis. Yaatidi I alaafe gidi simmidi, hagaadan giis: “Unꞌꞌettiyoogee ta payyatettaa qohiyoogaa doommiis. Taani keehi hirggiyo gishshawu xiskkana danddayabeykke.” Guyyeppe I laamettanaadan maaddiyaabaa akeekiis. I gujjidikka hagaadan giis: “Taani ha oosuwaa oottiyoy aybissee gaada tana oychchiyoogaa doommaas; qassi hegee deꞌuwawu halchchidobi aybakko loytta qoppanaadan tana maaddiis.”

“Duretanau daafuroppa.”—LEEMISO 23:4

Xoqqa timirttiyaa tamaariyoogaappenne duretiyoogaappe aaruwan, deꞌuwawu keehi koshshiyaabay deꞌiyoogaa Frenkilinaagaadan daroti akeekidosona. Etappe amaridaageeti, aquwaabaa xallan xeelaa wottiyoogaappe loꞌꞌo asa gidiyoogaaninne haratussi kehiyoogan ufayssaa demmidosona. Hegaadan oottiyoogee ufayssiya deꞌuwaa deꞌanawu maaddii? Kaalliya huuphe yohoy he oyshaa zaaruwaa qonccissees.