Ufayssiya Deꞌuwaa Deꞌanawu Ammanttiya Kaaletuwaa Awuppe Demmana Danddayiyoo?

Kasetiya huuphe yohotun beꞌidoogaadan, qaaday, xoqqa timirttee, duretettaynne loꞌꞌo asa gidiyoogaa xallay ufayssiya deꞌuwaa demmanawu maaddees giidi asay qoppiyo gishshawu hegaadan oottanawu baaxetiis. SHin hegaa malabatun ufayssaa demmanawu maliyoogee erenna sohuwa baanawu likke gidenna karttaa goꞌettiyoogaa mala. Hegaa giyoogee ufayssaa demmanawu ammanttiya kaaletoy baawa giyoogee? Akkay!

OOPPENNE AADHDHIYAAGAAPPE DEMMIYO KAALETUWAA

Nuuni issibaa kuuyiyo wode, nuuppe bariyan woy eran aadhdhiya uraa darotoo zoriyaa oychchoos. Hegaadankka, nuuppe bariyaaninne eran keehi aadhdhiyaagaappe, ufayssiya deꞌuwawu ammanttiya kaaletuwaa demmana danddayoos. Nuuni he zoriyaa 3,500 gidiya layttaappe kase xaafettida Geeshsha Maxaafaappe nabbabana danddayoos.

Neeni Geeshsha Maxaafan ammanettana danddayiyoy aybissee? Geeshsha Maxaafaa Xaafissidaagee saluwan saꞌan deꞌiya ooppenne bariyaaninne eran aadhdhiyaagaa gidiyo gishshataassa. Geeshsha Maxaafay A ‘Merinaasappe Deꞌiyaagaa’ woy “merinaappe merinaa gakkanaayyookka” deꞌiyaagaa giidi qonccissees. (Daaneela 7:9; Mazamure 90:2) Qassi I ‘salota medhdhida, biittaakka giigissida’ tumu Xoossaa. (Isiyaasa 45:18) I ba sunttay Yihoowa gidiyoogaa nuussi yootiis.—Mazamure 83:18.

Geeshsha Maxaafay, issi zaree woy wogay haraappe aadhdhees giidi yootenna. Gaasoykka, Geeshsha Maxaafaa xaafissidaagee asa ubbaa medhdhidaagaa gidiyo gishshataassa. An deꞌiya zoree ubba wodekka maaddees; qassi kumetta saꞌan deꞌiya asa ubbaa goꞌꞌees. Geeshsha Maxaafay hara ay maxaafaappenne aaruwan daro qaalatun birshshettidanne keehi daro heeran deꞌiya asawu gakkida maxaafa.a Hegaa gishshawu, ubbasan deꞌiya asaykka A nabbabananne appe kaaletuwaa demmana danddayees. Hegee Geeshsha Maxaafay yootiyoobaara maayettiyaaba:

“Xoossai asa som77o xeellenna; shin dere ubban baassi yayyiyaagaanne xillo ooso oottiyaagaa [nashshees.]”—OOSUWAA 10:34, 35.

Bantta naata siiqiyaanne etawu kaaletuwaa immiya yelidaageetugaadan, siiqiya nu Aawaa Yihooway ba Qaalaa Geeshsha Maxaafaa baggaara nuussi maaddiya kaaletuwaa yootees. (2 Ximootiyoosa 3:16) I nuna medhdhidaagaanne nuuni ufayttanaadan oottiyaabata eriyaagaa gidiyo gishshawu, A Qaalan ammanettana danddayoos.

AMMANTTIYA KAALETUWAA

Sinttanaabaa xeelliyaagan Geeshsha Maxaafay immiyo kaaletuwan ammanana danddayoos; gaasoykka Geeshsha Maxaafay ha wodiyan alamiyan haniyaabatanne asaa eeshshaa xeelliyaagan 2,000 gidiya layttaappe kase geeshshidi yootiis.

HANIYAABATA

“Deree deriyaa bolli, kawotettai kawotettaa bolli denddana. Biittai wolqqappe qaaxxiyoogee, daro sohuwan koshai, wurssiya harggee yaana.”—LUQAASA 21:10, 11.

ASAA EESHSHAA

“Wurssetta gallassi waissiya wodee yaanaagaa akeeka. Aissi giikko, asati banttana siiqiyaageeta, miishshaa siiqiyaageeta, ceeqettiyaageeta, ayyiyaageeta, cayiyaageeta, banttana yelidaageetuyyo azazettennaageeta, galatennaageeta, geeshshatetti bainnaageeta, siiqoi bainnaageeta, sigettennaageeta, zigirssanchchata, banttana naagennaageeta, kehennaageeta, lo77obaa dosennaageeta, kashi erikke giyaageeta, eesotiyaageeta, otoruwan sugettiyaageeta, qassi Xoossaappe aattidi, ufaittiyoobaa dosiyaageeta gidana.”—2 XIMOOTIYOOSA 3:1-4.

Geeshsha Maxaafay hegaa keena adussa wodiyaappe kase ha wodiyan haniyaabaa bali baynnan qonccissidoogaa beꞌiyo wode neeyyo aybi siyettii? Hong Kongen deꞌiya Leweni yootidobaa neenikka maayettiyoogee qoncce. I hagaadan giis: “Geeshsha Maxaafan deꞌiya hiraagati adussa wodiyaappe kase xaafettidosona. Asa gidiyaakko hegaadan bali baynnan hiraagana danddayenna. Geeshsha Maxaafay nuuppe keehi aadhdhiya eranchchay yootidoba gidana bessees.”

Geeshsha Maxaafan xeetan qoodettiya polettida hiraagati deꞌoosona.b Hegee Geeshsha Maxaafay tumukka Xoossaa Qaala gidiyoogaa boxooxissees. Yihooway hagaadan giis: “Taani Xoossaa; ta mali ooninne baawa. . . . Wurssettan hananabaa doomettan, . . . awaajjais.” (Isiyaasa 46:9, 10) Hegaa gishshawu, Geeshsha Maxaafay sinttanaabaa xeelliyaagan yootiyoobaa ammanettana danddayoos.

HAꞌꞌIKKA MERINAWUKKA GOꞌꞌIYA KAALETUWAA

Geeshsha Maxaafan deꞌiya kaaletuwaa kaalliyoogee nena goꞌꞌees. Amarida leemisota beꞌa.

MIISHSHAANNE OOSUWAA XEELLIYAAGAN MAADDIYA ZORIYAA

“Daafuraaninne carkkuwaa oiqqanau yedettiyoogaa mala jaaman daafuridi demmiyo naa77u kushebaappe, woppan demmiyo issi kushebai darees.”—ERANCHCHAA 4:6.

UFAYSSIYA SO ASAA DEꞌUWAA

“Intte huuphiyan huuphiyan intte maccaasaa intte huuphedan siiqanau bessees; maccaasa ubbaikka bantta azinaa azinaa bonchchanau bessees.”—EFISOONA 5:33.

HARA ASAARA WAANI SARO DAANEE?

“Hanqquwaa agga; yiilluwaappe teqetta. Yiillotoppa; aissi giikko, hegee metuwan yeggees.”—MAZAMURE 37:8.

Geeshsha Maxaafay yootiyoobaa neeni azazettikko, haꞌꞌikka sinttanawukka ufayssiya deꞌuwaa deꞌana. Geeshsha Maxaafan Xoossay qaalaa gelido kaallidi deꞌiyaageetu mala ufayssiya hidootati deꞌoosona

ASAY SAROTETTAN DAANA

“Eti sarotettaaninne duretettaani ufaittidi daana.”—MAZAMURE 37:11.

ASA UBBAWU DEꞌIYO KEETTAYNNE MIYO KATTAY DAANA

“He wodetun asati keettata keexxidi, etan de7ana; woiniyaa turatakka tokkidi, eta aifiyaa maana.”—ISIYAASA 65:21.

OONINNE HARGGENNA WOY HAYQQENNA

“Haiqoinne kayyoi woi waasoinne sahoi de7enna.”—AJJUUTAA 21:4.

Hegaa mala deꞌuwaa demmanawu neeni ay oottana koshshii? Kaalliya huuphe yohuwaa beꞌa.

a Geeshsha Maxaafay birshshettidonne asawu gakkido hanotaabaa gujjada eranawu, www. jw.org saytiyan Amaarattuwan, GEESHSHA MAXAAFAA TIMIRTTETA > TAARIKIYAANNE GEESHSHA MAXAAFAA giyaagaa xeella.

b Gujjada eranawu Yihoowa Markkati attamido, Geeshsha Maxaafay Xoossaa Qaaleeyye Asa Qaalee? (Amaarattuwaa) giya maxaafaa shemppo 9 xeella. Ha maxaafaa www.jw.org saytiyan Intternneetiyan demmana danddayaasa. LAYBREERIYA > MAXAAFATANNE BROOSHURETA giyaagaa xeella.