Woppu Ga; Qassi Yihoowan Ammanetta LAYTTA XIQISEE 2021GEE:

1. Kawuwaa Daawitaagaadan nuuppe issoti issoti woygi oychchana danddayiyoonaa?

NUUNI ubbay woppu gaanawunne sarotettan deꞌanawu koyoos. Nuuppe ooninne hirgganawu koyenna. SHin issi issitoo nuuni keehi hirggana danddayoos. Yihoowa ashkkaratuppe issoti issoti Kawo Daawiti, “Taani ta qofaara baaxetiyoogee aude gakkanaassee? Ubba gallassi azzanoi ta wozanan de7anaagee aude gakkanaassee?” giidi Yihoowa oychchidoogaadan oychchiyoy hegaassa gidana danddayees.—Maz. 13:2.

2. Ha huuphe yohuwan ay beꞌanee?

² Issi issitoo nuuni ubbay hirggikkonne darin hirggennaadan oottana danddayiyoobati deꞌoosona. Ha huuphe yohuwan, nuuni hirgganaadan oottana danddayiyaabatuppe amaridabata koyruwan beꞌana. Nuna metoy gakkiyo wode woppu gaanawu nu oottana danddayiyo usuppunbata kaallidi beꞌana.

NUUNI HIRGGANAADAN OOTTANA DANDDAYIYAABATA

3. Nuuni hirgganaadan oottana danddayiyaabati aybee, qassi hegeeta teqqana danddayiyoo?

³ Nuuni hirgganaadan oottiyaabati daro. Qassi hegeetuppe issoti issoti hanennaadan teqqana danddayokko. Leemisuwawu, qumaa, maayuwaa woy keettaa waagay layttan layttan gujjennaadan teqqana danddayokko; woy nunaara oottiyaageeti woykko tamaariyaageeti nuuni ammanettennaageeta gidanaadan woy pokkobaa oottanaadan maliyoogaa agganaadan oottana danddayokko. Qassi nu heeran asay danobaa oottennaadan teqqana danddayokko. Alamiyan daro asay Geeshsha Maxaafay yootiyo maaraadan kuuyenna gishshawu nuna he metoti gakkoosona. Qassi amarida asay “ha sa7aa de7uwau” keehi hirggiyo gishshawu Yihoowawu haggaaziyoogaa agganaagaa ha alamiyaa xoossaa gidida Seexaanay erees. (Maa. 13:22; 1 Yoh. 5:19) Hegaa gishshawu ha alamee asay keehi hirgganaadan oottiya metuwan kumidoogee nuna garamissenna!

4. Nuuni nu metuwaabaa keehi hirggikko waanana danddayii?

⁴ Nuuni nu metuwaabaa keehi hirggiyo wode harabaa aybanne qoppana danddayokko. Leemisuwawu, nuussi koshshiyaabaa shammana danddayiya miishshi baawa woy sahettananne oosuwaa oottana danddayennan aggana woy oosuwaappe yedetettana giidi hirggana danddayoos. Xoossaa higgiyaa kanttanaadan paacettiyo wode nuuni ammanettennan aggana giidikka hirggana danddayoos. Mata wode Seexaanay haariyo asati Xoossaa asaa qohana, hegaa gishshawu qohoy nuna gakkiyo wode nuuni waatanaakko hirggana danddayoos. Nuuni, ‘Hegeeta xeelliyaagan taani hirggiyoogee balee?’ giidi qoppana danddayoos.

5. Yesuusi “hirggoppite” giido wode woyganawu koyidee?

⁵ Yesuusi bana kaalliyaageetussi “hirggoppite” giidi yootidoogaa nuuni eroos. (Maa. 6:25) Yesuusi hegaadan giidoogee nuuni aybawunne hirggana koshshenna giyoogee? Akkay! Beni wode deꞌida ammanettida Yihoowa ashkkaratuppe amaridaageeti hirggidoogaa hassaya. SHin Yihooway etan ufayttiis.b (1 Kaw. 19:4; Maz. 6:3) Yesuusi tumuppe nuna minttettees. Nuussi koshshiyaabawu keehi hirggidi nu deꞌuwan aybippenne aaruwan Yihoowawu haggaaziyoogaa agganaadan I koyenna. Nuuni hirggiyo wode ay oottana danddayiyoo?—“Neeni Oottana Bessiyaabata” giya saaxiniyaa xeella.

NUUNI WOPPU GAANAADAN OOTTIYA USUPPUNBATA

6. Piliphphisiyuusa 4:6, 7y yootiyoogaadan, woppu gaanaadan nuna aybi maaddana danddayii?

⁶ (1) Aggennan woossa. Neeni issi metuwaa xeelliyaagan hirggiyo wode, Yihooway nena maaddanaadan woossa. (1 PHe. 5:7) Yihooway “asa eratettaa ubbaappe aadhdhiya Xoossaa [sarotettaa]” neessi immiyoogan ne woossa zaarees. (Piliphphisiyuusa 4:6, 7 nabbaba.) Yihooway ba geeshsha ayyaanaa baggaara neessi sarotettaa immana.—Gal. 5:22.

7. Xoossaakko woossiyo wode nuuni hassayana koshshiyaabay aybee?

⁷ Neeni Yihoowakko woossiyo wode, neessi siyettiya ubbabaa ayyo yoota. Ne metoy aybakko assi yoota; qassi hegaa xeelliyaagan neessi siyettiyaabaa awu qonccissa. He metuwaa xoonana danddayiyo ogee deꞌikko, hegaa eranawu aadhdhida eratettaa demmanawunne hegaa oottana mala wolqqaa demmanawu oychcha. He metuwaa xoonanawu neeni aynne oottana danddayennaba gidikko, darin hirggennaadan Yihooway nena maaddanaadan oychcha. Neeyyo siyettiya ubbabaa woosan yootiyo wode Yihooway ne woosaa waati zaaridaakko neeni guyyeppe loytti akeekana. Ne woosawu sohuwaara zaaruwaa demmana xayikkokka, woossiyoogaa aggoppa. Yihooway neessi siyettiyaabaa neeni wurssada awu yootiyoogaa xalla gidennan, hegaabaa aggennan woossanaadankka I koyees.—Luq. 11:8-10.

8. Nu woosan gujjana koshshiyaabay aybee?

⁸ Woosaa baggaara nena hirggissidabaa Yihooway tookkanaadan oottiyo wode, galataakka gujja. Nuna gakkida metoy daro gidikkokka, nuussi deꞌiya loꞌꞌobaa ubbaa qoppiyoogee maaddees. SHin, neessi siyettiyaabaa Yihoowawu waata yootanaakko erettennaba gidikko, neeni waatana koshshii? Ne gaana danddayiyoobay ‘Hayyanaa tana maadda!’ giyoogaa xalla gidikkonne, Yihooway ne woosaa zaaranaagaa hassaya.—2 Odi. 18:31; Roo. 8:26.

9. Nuuni yayyiyo wode ay oottana koshshii?

⁹ (2) Ne eran gidennan, Yihoowa aadhdhida eratettan ammanetta. Hananabaa yootiya Isiyaasa wode, Yihudaa asati Asooreti banttana qohana giidi yayyidosona. Yihudaa asati Asooreti banttana xoonanaadan koyibookkona; hegaa gishshawu Gibxxeti banttana maaddanaadan oychchidosona. (Isi. 30:1, 2) Gibxxetun eti ammanettiyoogee eta bolli bashshaa kaalettanaagaa Yihooway yootiis. (Isi. 30:7, 12, 13) Eti woppaa waati demmana danddayiyaakko hananabaa yootiya Isiyaasa baggaara Yihooway ba asawu yootiis. Isiyaasi, “Co77u giyoogeenne [Yihoowan] ammanettiyoogee intteyyo wolqqa gidana” yaagiis.—Isi. 30:15b.

10. Nuuni Yihoowan ammanettiyoogaa bessana danddayiyo amarida hanotati awugeetee?

¹⁰ Nuuni Yihoowan ammanettiyoogaa bessana danddayiyoy awudee? Amarida leemisota qoppa. Daro miishshaa demissana danddayiya oosuwaa oottanaadan shoobettidabadan qoppa; shin hegee daro gujjo saatiyaa oottanaadan koyananne haꞌꞌi neessi danddayettida keenan oottaydda deꞌiyoogaadan Yihoowawu haggaazennaadan diggana. Woy issi uri ooso sohuwan nena siiqidoogaa neessi yootidabadan qoppa; shin he uri xammaqettida Xoossaa ashkkara gidenna. Woykko so asaa yaraappe issoy neeni Yihoowawu haggaaziyoogaa aggennaba gidikko, nena bohanaagaa yootikko, waatuutee? Ha ubba hanotatun, issibaa kuuyanawu neeni metootana; shin he hanotatun neessi koshshiya kaaletuwaa Yihooway immana. (Maa. 6:33; 10:37; 1 Qor. 7:39) SHin denddiya oyshay, Neeni Yihoowan ammanettananne A kaaletuwawu azazettanee? giyaagaa.

11. Yedetay gakkiyo wode woppu giidi deꞌanawu nuuni xannaꞌana danddayiyo Geeshsha Maxaafaa taariketi awugeetee?

¹¹ (3) Loꞌꞌonne iita leemiso gididaageetuppe tamaara. Woppu giidi deꞌiyoogeenne Yihoowan ammanettiyoogee keehi koshshiyoogaa bessiya daro taariketa Geeshsha Maxaafay yootees. Neeni he taariketa xannaꞌiyo wode, Xoossaa ashkkarata wolqqaama yedetay gakkido wode eti woppu giidi deꞌanaadan aybi maaddidaakko qoppa. Leemisuwawu, Ayhudatu xoqqa pirdda keettay kiitettidaageeti sabbakennaadan azazido wode, eti yayyibookkona. Eti xalatettan, “Nuuni asau azazettanaappe Xoossau azazettanau bessees” yaagidosona. (Oos. 5:29) Kiitettidaageeti shocetti simmidikka yayyibookkona. Aybissi? Yihooway eta maaddidoogaa eti eriyo gishshataassa. I etan ufayttiis. Yaatiyo gishshawu, eti mishiraachchuwaa yootiyoogaa aggibookkona. (Oos. 5:40-42) Hegaadankka, erissiyo ashkkara Isxxifaanoosa asay worana haniyo wode, I woppu giidi deꞌiis; qassi A somꞌꞌoy “kiitanchchaa som77uwaa [milatiis].” (Oos. 6:12-15) Aybissi? Yihooway banan ufayttidoogaa I ammanettido gishshataassa.

12. Koyro PHeexiroosa 3:14⁠ynne 4:14y yootiyoogaadan, nuna yedetay gakkiyo wode nuuni ufayttana danddayiyoy aybissee?

¹² Kiitettidaageeti Yihooway etaara deꞌiyoogaa bessiya qoncce naqaasha. Maalaalissiyaabaa oottanaadan Yihooway etawu wolqqaa immiis. (Oos. 5:12-16; 6:8) Ha wodiyan, maalaalissiyaabaa oottanaadan Yihooway nuussi wolqqaa immana. Xillotettaa gishshawu, nuna yedetay gakkiyo wode, Yihooway nunan ufayttiyoogaanne A ayyaanay nunaara deꞌiyoogaa I ba Qaalaa baggaara nuussi yootees. (1 PHeexiroosa 3:14; 4:14 nabbaba.) Sinttappe nuna yedetay gakkiyo wode, ay oottanaakko hirggana koshshenna. Yihooway nuna maaddananne ashshana danddayiyoogaa mintti ammananawu kaseegaappe aaruwan nuussi danddayettida ubbabaa oottana koshshees. Yesuusi erissiyo ashkkaratu beniigeetudan, nuunikka Yesuusi yootidoban ammanettana koshshees: “Intte morkketuppe ooninne inttenaara eqettanaunne palamettanau danddayenna haasayaa minotettaanne aadhdhida eratettaa taani inttessi immana.” Yesuusi, “Danddayan intte intte shemppuwaa ashshana” giidi nuussi qaalaa geliis. (Luq. 21:12-19) Qassi Yihooway bawu ammanettidi hayqqida ba ashkkaratubaa ubbabaa hassayiyo gishshawu eta mule dogenna. I eta eriyo gishshawu hayquwaappe denttana.

13. Woppu giidi deꞌibeennaageetunne Yihoowan ammanettibeennaageetu hanotaa xannaꞌiyoogan waani goꞌettana danddayiyoo?

¹³ Woppu giidi deꞌibeennaageetunne Yihoowan ammanettibeennaageetu hanotaappekka tamaarana danddayoos. Iitabaa oottidaageetubaa xannaꞌiyoogee nuunikka etaagaa mala mooruwaa oottennaadan maaddana. Leemisuwawu, Asi Yihudaa Kawo gidido wode daro olanchchati A olanawu yin, I Yihoowan ammanettiis; qassi I xoonanaadan oottiyoogan Yihooway A anjjiis. (2 Odi. 14:9-12) Guyyeppe, Israaꞌeela biittaa Kawoy Baaꞌishi keehi guutta olanchchata ekkidi aara olettanawu yiis. SHin he wode, I kaseegaadan Yihooway bana ashshanaagaa ammanettibeenna. I Sooriyaa biittaa asay bana maaddanaadan etawu miishshaa immiis. (2 Odi. 16:1-3) Qassi keehi sahettidi hayqqanawu matido wodekka, I maaduwaa demmanawu Yihoowan ammanettibeenna.—2 Odi. 16:12.

14. Asi mooridobaappe nuuni tamaariyoobay aybee?

¹⁴ Asi doometta heeran metoy bana gakkido wode Yihooway maaddanaadan oychchiis. SHin I guyyeppe maaduwawu Xoossan ammanettibeenna. I ba metuwaa barkka giigissanawu maliis. Asi Israaꞌeelata woraajjanawu Sooriyaa kawuwaa maaduwaa oychchiyoogee loꞌꞌo giidi qoppiis. Gidikkonne, Yihudaa biittan sarotettay daro takkibeenna. Yihooway hananabaa yootiyaagaa baggaara, “Neeni Sooriyaa kawuwan ammanettada, GODAN, ne Xoossan, ammanettabeenna gishshau, Sooriyaa kawuwaa olanchchati ne kushiyaappe kessi ekkidosona” giidi Asayyo yootiis. (2 Odi. 16:7) Nuuni Yihoowa Qaalaa baggaara kaaletuwaa A oychchennan, nu metuwaa nurkka giigissana giidi qoppennaadan naagettana koshshees. Nuuni issibaa sohuwaara kuuyana koshshiyo wodekka, woppu giidi Yihoowan ammanettana koshshees; qassi nuuni likkebaa kuuyanaadan I nuna maaddana.

15. Nuuni Geeshsha Maxaafaa nabbabiyo wode waatana danddayiyoo?

¹⁵ (4) Geeshsha Maxaafaa xiqiseta hassaya. Woppu giyoogeenne Yihoowan ammanettiyoogee keehi koshshiyaaba gidiyoogaa qonccissiya xiqiseta neeni demmiyo wode, hegeeta hassayanawu mala. Neeni he xiqiseta hassayanawu, cenggurssaa xoqqu ootta nabbabiyoogee woy xaafa oyqqiyoogeenne ubbatoo eta nabbabiyoogee maaddana danddayees. Yaasu nabbabidobaa oosuwan peeshshana mala Higgiyaa maxaafaa ubbatoo saasukkidi nabbabanaadan Yihooway ayyo yootiis. I Higgiyaappe nabbabidobay yayyennan, xala gididi Xoossaa asaa kaaletanawukka A maaddana. (Yaas. 1:8, 9) Darotoo neeni hirgganaadan woy yayyanaadan oottiya hanotati merettiyo wode woppu gaanaadan maaddiya daro xiqiseti Xoossaa Qaalan deꞌoosona.—Maz. 27:1-3; Lee. 3:25, 26.

16. Nuuni woppu gaanaadaaninne Yihoowan ammanettanaadan maaddanawu I gubaaꞌiyaa waati goꞌettii?

¹⁶ (5) Xoossaa asaara wodiyaa aatta. Nuuni woppu gaanaadaaninne Yihoowan ammanettanaadan maaddanawu I nu ishanttanne michchontta goꞌettees. Nuuni nu shiiqotun, shiiqiya haasayatuppe, ezggiyaageeti yootiyo qofaappenne ishanttuuranne michchonttuura minttettiyaabaa haasayiyoogaappe goꞌettoos. (Ibr. 10:24, 25) Nuuyyo siyettiyaabaa gubaaꞌiyan deꞌiya ammanettida laggetussi yootiyo wode keehi minettanakka danddayoos. Nu laggee haasayiyo “shonggaara de7iya haasayai” nuuni darin hirggennaadan maaddana danddayees.—Lee. 12:25.

17. Ibraawe 6:19y yootiyoogaadan, Kawotettaa hidootay metiya wodiyan nuuni woppu giidi deꞌanaadan waati maaddana danddayii?

¹⁷ (6) Ne hidootaa ubbatoo mintta oyqqa. Kawotettaa hidootay “nu shemppuwaayyo markkabiyaa oiqqiya qaaxxenna birata mala,” hegee metiya wodiyan woppu giidi deꞌanaadan nuna maaddees. (Ibraawe 6:19 nabbaba.) Yihooway sinttanawu gelido qaalaa qoppa. He wode ooninne issibawukka hirggenna. (Isi. 65:17) Sarotettay deꞌiyo ooratta alamiyan deꞌiyaabadan qoppa; yan hirggissiya hanotati deꞌokkona. (Mik. 4:4) Ooratta alamiyaabaa neeni haratuyyo yootiyo wode ne hidootaykka minnana. Sabbakiyoogaaninne erissiyo ashkkara oottiyo oosuwan neessi danddayettida ubbabaa ootta. Neeni yaatikko, “ufaissan naagi uttido kumetta tumatettaa wurssettai gakkanaassi” mintta oyqqana danddayaasa.—Ibr. 6:11.

18. Sinttappe ayba metoti gakkana giidi naagana danddayiyoo, qassi he metota waati xoonana danddayiyoo?

¹⁸ Nuuni deꞌiyoy wurssetta wodiyan gidiyo gishshawu, hirgganaadan oottiya daro metoti nuna gakkoosona. Laytta xiqisee 2021gee he metota nuuni genccanaadaaninne nu wolqqan gidennan, Yihoowan ammanettiyoogan woppu giidi deꞌanaadan maaddees. ‘Woppu giyoogeenne ammanettiyoogee intteyyo wolqqa gidana’ giya ha laytta xiqisiyaa oosuwan peeshshiyoogan Yihooway gelido qaalan ammanettiyaageeta gidoos.—Isi. 30:15.