Noocu Giidoogee Demissido Loꞌꞌobaa!

NAAꞌꞌU yelaga macca asati Pilippinsen Bagiꞌo giyo kataman issippe hemettoosona. Eti dabaaban markkattiyaageeti xuufiyaa wottiyo gaariyaa beꞌikkokka, yaa shiiqibookkona. Gaariyaa matan eqqida michchiyaa Helena etakko xeellaydda keehi noocu gaasu. He macca asati ogiyaa oyqqidi bi bayikkonne, Helena pashkki gaada noocu giidoogaa dosidosona.

Guyyeppe, he macca asati otobisiyan bantta soo simmiiddi, jw.org giya gita malaatay xaafettido SHiiquwaa Addaraashaa beꞌidosona. He pitaleta xuufiyaa wottiyo gaariyaa bolli beꞌidoogaa eti hassayidosona. Eti otobisiyaappe wodhdhidi SHiiquwaa Addaraashaa biidosona. He SHiiquwaa Addaraashan awude awude shiiqoy deꞌiyaakko eti yan beꞌidosona.

He macca asati kaalliya issi shiiquwaa shiiqidosona. Eti SHiiquwaa Addaraashaa geliyo wode Heleno beꞌidi garamettidosona! A he keehi noocu giida maccaasiyo gidiyoogaa eti sohuwaara hassayidosona. Helena, “Eti ayssi taakko yiyaakko erabeenna gishshawu taani guuttaa hirggaas” yaagaasu. SHin he macca asati Heleno gaariyaa matan beꞌidoogaa iyyo yootidosona.

He yelaga macca asati shiiquwaa dosidosona, qassi ishanttinne michchontti eta moozoyibookkona. Eti shiiqoy wuri simmin harati addaraashaa geeshshiyoogaa beꞌidi, maaddanawu oychchidosona. He macca asatuppe issinniyaa haꞌꞌi Pilippinsen deꞌukku, shin hankkoriyaa shiiquwaa shiiqiyoogaanne Geeshsha Maxaafaa xannaꞌiyoogaa doommaasu—hegee noocu giidoogee demissido loꞌꞌoba!