“Haꞌꞌi Taani Haggaazuwaa Keehi Dosays!”

UFAYTTIYOOGAA AGGAAS

Taani Yihoowa siiqiyo siiqoy panttatettaa layttan irxxidoogee azzanttiyaaba. Tanaara tamaariyaageeti zawi baynna laꞌatettan deꞌiyaaba milatiyo gishshawu, tawukka hegaa mala laꞌatettay deꞌanaadan koyaas. Tana yelidaageetu higgiyaanne Kiristtaaneti kaalliyo maaraa toohodan xeellaas, qassi Yihoowawu goynniyoogee tawu wolqqaa wurssiya ooso milatiis. Yihooway deꞌiyoogaa taani sirennaba gidikkonne, aara dabbotidabadan tawu siyettenna.

Taani sabbakiyoogaa aggana xayikkonne, guuttaa guuttaa sabbakays. Taani haggaazuwaa kiyiyo wode mule giigettenna gishshawu, asaa haasayissiyoogaa doommanawunne haasayissaydda takkanawu daro metootays. Yaatiyo gishshawu, haggaazuwan ayfe demmabeykke, qassi ufayttikke; hegee qassi ta qofaa mooriis. Hagaadan gaada tana oychchaas: ‘Issi uri saaminttan saaminttaaninne aginan aginan waanidi hagaa oottana danddayii?’

Tawu 17 laytta gidin, laꞌa kiyanawu keehi koyaas. Yaatiyo gishshawu, tawu deꞌiyaabaa borssan yeggada, sooppe kiyada Awusttiraaliyaa baas. Taani etappe shaahettada biyoogee ta aawaanne aayyiyo keehi azzanttiis. Eti hirggikkonne, ayyaanaaban ba meeziyaa aggukku giidi qoppidosona.

Awusttiraaliyan ayyaanaaban yaa shuggaas. SHiiquwaa issi issitoo shiiqays. Issi omarssi shiiqidi, kaalliyaagan taagaadan durssawunne ushshawu durssa keetti biya yelagatuura zuppetaas. He wodiyaa qoppiyo wode, taani tumankka alamiyankka deꞌidoogaa akeekays, shin naaꞌꞌankka ufayttabeykke.

QOPPENNAN KEEHI MAADDIYAABAA TAMAARAAS

Naaꞌꞌa gidiya layttappe guyyiyan issi michcheera gayttaas; taani waanaydda deꞌiyaakko qoppanaadan A erennan maaddaasu. He wode taani azina gelibeenna ichchashu michchonttuura issi keettan deꞌays, qassi nuuni woradaa xomoosiya ishaanne A machchiyo, Tamaaro issi saaminttawu nu son imattatettan mokkida. Tamaara I azinay gubaaꞌiyaa allaalliyaa xeelliyo wode, nunaara haasayayddanne miiccaydda takkawusu. Taani hegaa keehi dosaas. A oonanne pashkki gaada haasayissiya ashkke asa. Ayyaanaaban I mala mino asi kaassaa eriya asa gidiyoogee tana maalaaliis.

Tamaara keehi yeemottada haggaazawusu. A tumaanne haggaazuwaa siiqiyo siiqoy haratakka denttettees. A ba kumetta wolqqan ufayttaydda Yihoowawu oottawusu; shin taani Yihoowawu guuttabaa oottiyo gishshawu ufayttikke. I loꞌꞌo qofaynne tumu ufayssay tana keehi maaddiis. A loꞌꞌo leemiso gididoogee Geeshsha Maxaafay yootiyo ha tumaa ta qoppanaadan oottiis: Yihooway nuuni ubbay “ufaissan,” qassi ‘ufayttidi yexxiiddi’ ayyo haggaazanaadan koyees.—Maz. 100:2.

HAGGAAZUWAA ZAARETTADA DOSAAS

Taani Tamaaridan ufayttanawu koyikkonne, issi issiban keehi laamettana koshshiis. Heezzu laytta gidiya wodiyaa takkikkonne, guyyeppe amaridabaa oottaas. Haggaazuwawu giigettiyoogaa doommaas, qassi issi issitoo kaafiya aqinye gidaas. Taani yayyiyoogaa agganaadan hegee maaddiis. Haggaazuwan Geeshsha Maxaafaa loytta goꞌettiyo wode, wozanappe ufayttaas. Daro takkennan, aginan aginan kaafiya aqinye gidada haggaazaas.

Tuman minni eqqidanne Yihoowawu haggaaziyoogan ufayttiya yelagatuuranne cimatuura laggetiyoogaa doommaas. Taani nashshiyoobaa zaarettada yigga xeellanaadaaninne ayyaanaaban loꞌꞌobaa meeze oottanaadan eti loꞌꞌo leemiso gididoogee tana maaddiis. Haggaazuwan keehi ufayttiyoogaa doommaas, yaatada guyyeppe ubba wode aqinye gidaas. Daro layttappe guyyiyan keehi ufayttaasinne gubaaꞌiyan woppaa demmaas.

UBBATOO TANAARA HAGGAAZIYA AQINYE LAGGE DEMMAAS

Yihoowa siiqiyaanne haggaazuwaa dosiya kehanne suure asa gidida Alekisaara issi layttappe guyyiyan taani erettaas. He wode I gubaaꞌiyawu oottiyaagaa, qassi usuppun layttawu aqinye gididi haggaaziis. Alekisi aassiyaageeti keehi koshshiyoosaa Maalaawe biidikka amarida wodiyawu haggaaziis. Yan I misoonaawetuura takkiis; eti ayyo loꞌꞌo leemiso gididosona, qassi Kawotettabaa oottiyoogaa awudenne sinttayanaadan A minttettidosona.

Taani 2003n Alekisa gelaas; qassi he wodeppe doommidi nuuni issippe ubba wode haggaazuwan takkida. Nuuni daro loꞌꞌobaa tamaarida, qassi Yihooway nuna keehi daro ogetun anjjiis.

YIHOOWAY NUNA HARABANKKA ANJJIIS

Nuuni Indoneezhiyaa haruurotuppe issuwaa gidida Timor-Lestte giyo biittan misoonaawe gididi haggaazanaadan 2009n shoobettida. He wode nuuni keehi garamettida, ufayttidanne yayyida. Usuppun aginappe guyyiyan, waanna katamaa Dili biida.

He ooratta sohuwan nu deꞌoy kaseegaappe keehi laamettiis. Nuuni ooratta wogaa, doonaa, qumaanne duussaa maaraa meezetana koshshiis. Hiyyeesa, guuttaa tamaarida woy mule tamaaribeennanne huqqunettida asaa gakkiyaabaa haggaazuwan darotoo beꞌoos. Qassi olaynne kobabay qofaaninne asatettan qohido daro asaa beꞌoos.a

Haggaazoy keehi ufayssees! Leemisuwawu, layttay 13 gidido Mariyob giyo azzanida naꞌeera taani issi wode gayttaas. I aayyiyaa amarida layttappe kase hayqqaasu, qassi A ba aawaara issi issitoo gayttawusu. Mariya ba keena naatu darotuugaadan deꞌuwan kaaleto demmabeykku. A bawu siyettiyaabaa yeekkaydda tawu issi wode yootidoogaa hassayays. SHin he wode taani I doonaa loytta haasayenna gishshawu, A woygiyaakko erabeykke. O minttettanawu Yihooway tana maaddanaadan woossaas, yaatada minttettiya xiqiseta iyyo nabbabaas. Hegaappe simmin, Maree qofay, A maayiyo maayoynne alleeqettiyo hanotay, qassi I deꞌoy amarida layttaa giddon laamettishin beꞌaas. A xammaqettada haꞌꞌi harata Geeshsha Maxaafaa xannaꞌissawusu. Ha wodiyan Mariya bana siiqiya, ayyaanaaban gita keettaa asaa giddon deꞌiyoogaa akeekawusu.

Yihooway Timor-Lestten oosuwaa anjjiiddi deꞌees. Aassiyaageetuppe daroti xammaqettidoy aadhdhida tammu layttatu giddoona gidikkonne, daroti aqinye, gubaaꞌiyawu oottiyaageeta woy cimata gididi haggaazoosona. Harati xuufiyaa birshshiyo biiruwan ayyaanaabaa qumaa he biittaa doonan giigissiyo oosuwan maaddoosona. Eti shiiquwan mazamuriyaa yexxiyoogaa, noocu giyoogaanne ayyaanaaban dicciyoogaa beꞌiyoogee tana keehi ufayssees.

HAGAAPPE AARUWAN UFAYSSIYA DEꞌO QOPPANAKKA DANDDAYIKKE

Nuuni Timor-Lestten haggaaziyo wode deꞌoy Awusttiraaliyaagaappe keehi dummatees, shin hagaappe aaruwan ufayssiya deꞌo qoppana danddayikke. Cora asay, qassi heeraa giyaappe shamettida melida moleenne ataakilttee keehi caanettido minibaasiyan issi issitoo boos. Issi issi galla kuttoti woxerettishin, baanattiya wuygiyan uttidi hombbiya guutta keettan harata Geeshsha Maxaafaa xannaꞌissoos. SHin hegaadan metishinkka, taani darotoo, ‘Hagee ufayssiyaaba!’ gaada qoppays.

Kasebaa qoppiyo wode, taayyo Yihoowaara dabbotay shuggidaashinkka, ta aawaynne aayyiyaa tana Yihoowa ogiyaa tamaarissido gishshawunne maaddido gishshawu keehi ufayttays. Leemiso 22:6y yootiyoobay ta deꞌuwan polettiis. Ta aawaynne aayyiyaa tanaaninne Alekisan keehi ufayttidosona; nuuni Yihoowayyo oottiyoogaa beꞌiyoogee eta keehi ufayssees. Nuuni 2016ppe doommidi Awusttiraaliyaa macara biiruwaa moottan woradaa oosuwaa oottiiddi deꞌoos.

Sabbakiyo oosuwaa taani issi wode coo meezedan oottidoogee qoppanawu metiyaaba. Haꞌꞌi taani haggaazuwaa keehi dosays! Deꞌuwan aybi gakkikkonne, tumu ufayssaa demissiyay Yihoowayyo wozanappe haggaaziyoogaa gidiyoogaa taani akeekaas. Alekisaara issippe Yihoowawu haggaazido aadhdhida 18 layttatuugaa keenaa ta deꞌuwan ufaytta erikke. Daawiti Yihoowayyo yootidobay tuma gidiyoogaa haꞌꞌi akeekaas. I hagaadan giis: “Neekko baqati qosetti attiya ubbai ufaittona; eti ubbaton ufaissan yexxona. . . . Ne sunttaa siiqiya ubbati nenan keehi ufaittona.”—Maz. 5:11.