“Taani Haratuppe Darobaa Tamaaraas!”

He yashshiya hanotay ta deꞌuwaa laammido gishshawu, taani Xoossaa eranawu baaxetiyoogaa doommaas. SHin he sakkana xuman kaallidi hanidabaa yootanaappe kase, ane naatettan tana gakkidabaanne Xoossaabaa tamaaranaadan denttettidabaa yootays.

TAANI TA AAWAAPPE TAMAARIDOBAA

Taani huuphessa Paranssaayen, maadiniya bookkiyo Guwesnayn giyo kataman 1937n yelettaas. Ta aaway shuchchaa xiixinttaa bookkees, qassi minni oottiyoogee keehi koshshiyaba gidiyoogaa tana tamaarissiis. Ta aaway taani naaquwaa ixxanaadankka tana tamaarissiis. I maadiniya bookkiyaageetuppe daroti naaqettiyoogaanne daafabaa gattana danddayiya hanotan oottiyoogaa beꞌidi eta maaddanawu koyiis. Hegaa gishshawu, I maadiniya oosanchchatu maataa bonchchissanawu baaxetiya dirijjitiyaa yame gidiis. Heeran deꞌiya qeeseti cimmiyaageeta gidiyoogankka I keehi yiillotees. Etappe daroti ishalidi deꞌoosona, shin maadiniya bookkiya hiyyeesati kattaanne miishshaa banttawu immanaadan oychchoosona. Ta aaway qeesetu hanotaa keehi shenetiyo gishshawu tana haymaanootiyaabaa aybanne tamaarissibeenna. Ubba qassi, Xoossaabaa mule haasayi erokko.

Taanikka gitaa gidiyo wode naaquwaa ixxiyoogaa doommaas. He naaquwaappe issoy hara biittaappe yiidi Paranssaayen deꞌiyaageeta coo ixxiyoogaa. Taani betetu naatuura tohuwaa kuwaasiyaa kaaꞌays; qassi etaara laggetiyoogee tana ufayssees. Hegaa bollikka, ta aayyiyaa Paranssaaye asa gidukku, A Poolandde asa. Zariyan dumma dumma gidida asati issippe saruwan deꞌanaadaaninne maara oyqettanaadan taani koyaas.

TAANI DEꞌUWAA HALCHCHUWAABAA KASEEGAAPPE AARUWAN QOPPIYOGAA DOOMMAAS

Taani 1957n wotaaddara gidanaadan kawotettay koyiis. Taani koyro yootido sakkana xuman Aljjeeriyaa dereta biidoy hegaassa. Taani “Xoossoo! Hay, Xoossoo!” gaada waassa simmiyo wode ta sinttan deꞌiyay morkke wotaaddara gidenna, harddiiday deꞌees! Taani keehi woppu gaas! He hanotaynne qassi olay ba huuphen, taani deꞌuwaa halchchuwaabaa kaseegaappe aaruwan qoppanaadan oottiis. Nuuni merettidoy aybissee? Xoossay nuussi qoppii? Nuuni sarotettan merinawu deꞌaneeshsha?

Guyyeppe, tana yelidaageeta oychchanawu wotaaddara keettappe soo yiido wode, Yihoowa markkatuppe issuwaara gayttaas. I taassi Kaatoliketi Paranssaaye doonan birshshido, La Saynte Baybl, giyo Geeshsha Maxaafaa immiis; guyye Aljjeeriyaa ba simmada hegaa nabbabiyoogaa doommaas. Ajjuutaa 21:3, 4n deꞌiya qofay ta wozanaa denttettiis. Hagaadan gees: “Xoossaa keettai asaara de7ees; . . . Xoossai eta aifiyaappe afutta ubbaa quccana. Hagaappe sinttanau haiqoinne kayyoi woi waasoinne sahoi de7enna.” Hagaa malabaa taani kase mule nabbaba erikke. ‘Hagee tuma gidanddeeshsha?’ gaada tana oychchaas. He wode, taani Xoossaabaanne Geeshsha Maxaafaabaa aybanne erikke.

Taani wotaaddara gidada oottiyoogaa 1959n wurssa simmada, tana Geeshsha Maxaafaappe darobaa tamaarissida Firanssuwa giyo issi Yihoowa Markkaara gayttaas. Leemisuwawu, Xoossaassi Yihoowa giyo buzo sunttay deꞌiyoogaa I tana Geeshsha Maxaafaappe bessiis. (Maz. 83:18, NW) Qassi, Yihooway ha saꞌan suure pirddaa ehaanaagaa, biittaa gannate kessanaagaanne Ajjuutaa 21:3, 4n deꞌiya qaalaa polanaagaa Firanssoy qonccissiis.

He timirtteti akeekanawu metennaba, qassi ta wozanaa denttettidosona. SHin taani qeesetu bolli keehi yiillotaas, qassi Geeshsha Maxaafan baynnabaa tamaarissiyo gishshawu eta boranawu koyaas! Qassi taani ta aawaagaadan qoppiyoogaa haꞌꞌikka aggabeenna gishshawu naaquwaa eqettanawu baaxetays. Taani issibaa sohuwaara oottanawu koyaas!

Firanssoynne Yihoowa Markka gidida hara ta ooratta laggeti taani hanqqettiyoogaa agganaadan maaddidosona. Nuuni Kiristtaaneti haratu bolli pirddana bessennaagaanne Xoossaa Kawotettaa mishiraachchuwaa yootiyoogan eta maaddana bessiyoogaa eti taassi qonccissidosona. Hegee Yesuusi oottido oosonne A kaalliyaageetikka oottanaadan immido ooso. (Maa. 24:14; Luq. 4:43) Asaa ammanoy ayba gidinkka taani eta kehatettaaninne hiillan haasayissana koshshiyoogaakka tamaaraas. Geeshsha Maxaafay hagaadan gees: “Godaa ashkkarai ubbaayyo kehiyaagaa . . . gidanau besseesippe attin, ooyettanau bessenna.”—2 Xim. 2:24.

Taani koshshiyaagaadan laamettada 1959n issi woradaa shiiquwan xammaqettada Yihoowa Markka gidaas. He sohuwan Anjjeelo giyo issi yelaga michcheera gayttaas, qassi O dosaas. Taani A deꞌiyo gubaaꞌiyaa biyoogaa doommaas, qassi nuuni 1960n aqo oyqqida. A tumuppe keehi loꞌꞌo macca asa, gooba machcho, qassi taassi Yihooway immido alꞌꞌo imota.—Lee. 19:14.

TAANI WOZANNAAMANNE KAYMA ATTUMA ASATUPPE DAROBAA TAMAARAAS

Daro layttatu giddon, wozannaamanne kayma ishanttuppe taani keehi koshshiya darobaa tamaaraas. Hegeetuppe koyroy hagaa: Wayssiya oosuwaa suure polanawu nuuni nuna ziqqi oottiyaageetanne Leemiso 15:22n deꞌiya, “Daro zoriyaageeti de7iyoosan halchchidobai polettees” yaagiya aadhdhida eratettay deꞌiyo zoriya oosuwan peeshshiyaageeta gidana bessees.

Xoossaa ayyaanay denttettin xaafettida he qaalati ay keena tumakkonne, 1964n taani akeekiyoogaa doommaas. He laytti taani gubaaꞌeta xomoosada ishantta minttettanawunne eti kaseppe aaruwan Yihoowakko shiiqanaadan maaddanawu woradaa xomoosiyaagaa gidada oottiyoogaa doommaas. Gidoppe attin, he wode taassi layttay 27 gidiyo gishshawu daro meezetabeykke. Hegaappe denddidaagan taani balabaa oottays. SHin he balatuppe tamaaranawu baaxetaas. Hegaappekka aaruwan, ‘zorana’ danddayiya kayma ishanttuppe taani keehi maaddiya darobaa tamaaraas.

Taani woradaa xomoosiyoogaa doommido wode hanidabaa hassayays. Taani Paarisen issi gubaaꞌiyaa xomoosa simmin, ayyaanaaban kayma gidida issi ishay tana haasayissanawu oychchiis. Taani “ero” gaas.

I hagaadan oychchiis, “Luyisaa, dottoree soo biidi oona akkamii?”

“Harggidaageeta,” gaada taani zaaraas.

I hagaadan giis: “Hegee tuma. SHin neeni gubaaꞌiyaa heemmiyaagaa mala Yihoowaara loꞌꞌo dabbotay deꞌiyoogeetuura daro wodiyaa wurssiyoogaa taani akeekaas. Hidootaa qanxxida, ooratta, woy dungguuxa gidida daro ishanttinne michchontti nu gubaaꞌiyan deꞌoosona. Neeni etaara wodiyaa aattiyaakko, ubba qassi eta soo baada etaara kattaa miyaakko, hegee eta keehi minttettana.”

He alꞌꞌo ishay immido loꞌꞌo zoriyawu keehi galataas. I Yihoowa dorssata siiqiyo siiqoy ta wozanaa denttettiis. Hegaa gishshawu, taani balaa oottidoogaa ammananawu metootikkonne, I giidobaa sohuwaara oosuwan peeshshiyoogaa doommaas. Hegaa mala ishantta immido gishshawu Yihoowa galatays.

Paarisen, Kolombbese giyoosan, 1969ninne 1973n giigida, daro biittaappe yiidaageeti shiiqiyo naaꞌꞌu gita shiiqotun Qumaa Giigissiya Kifiliyaa xomoosiyaagaa gidada oottaas. Nuuni 1973n shiiqido gita shiiquwan 60,000 gidiya asawu ichchashu gallassawu qumaa giigissana koshshiis! Hegaa nuuni waati oottana danddayiyaakko taani erabeykke. SHin haꞌꞌikka, maaddidabay haratu zoriya siyanaadan yootiya Leemiso 15:22n deꞌiya zoriya. Taani meezee deꞌiyo ishantti maaddanaadan oychchaas. Eta giddon axaareti, darkko ataakilttiyaa tokkiyaageeti, qumaa kattiyaageetinne shamaa eriyaageeti deꞌoosona. Nuuni issippe he deexo oosuwaa polanawu danddayida.

Taaninne ta machchiya, 1973n Paransaaye Beeteelen haggaazanawu shoobettida. Yan taassi koyro imettida oosoykka keehi deexxiyaagaa. Taani 1970ppe 1993 gakkanawu nu oosoy muleera digettido, Afirkkan Kaameruune giyo biittan deꞌiya ishanttussi xuufiyaa yeddiyo ogiyaa koyana bessees. Taani hegaa oottanawu danddayiyaakkonne erabeykke. Geella hegaa akeekido gishshawu, he wode Paranssayen deꞌiya oosuwaa xomoosiya ishay tana hagaadan giidi minttettiis: “Kaameruunen deꞌiya nu ishanttussi ayyaanaabaa qumay keehi koshshees. Eta mizoos!” Qassi nuuni eta mizida.

Taani Kaameruunen deꞌiya cimatuura gayttanawu Kaameruune biittaara zawatiya biittata darotoo baas. He ishantti xalanne cincca. Kaameruunen deꞌiya ishantti xuufiyaa ubbatoo demmana mala he ishantti taani xuufiyaa kiittiyo ogeta demmanaadan maaddidosona. Nuuni oottido baaxiyaa Yihooway anjjiis. He biittan deꞌiya Yihoowa asay 20 laytta gidiya wodiyawu, Wochchiyo Keelaanne he wode Nu Kawotetta Haggaazuwaa geetettiya aginan aginan attamettiya xuufiyaa issuwaanne halennan demmidosona.

TA SIIQO MACHCHEEPPE DAROBAA TAMAARAAS

Nuuni issoy issuwaa loytti eriyoogaa doommido wodiyaappe doommada, Ajjeelissi Yihoowaara mino dabbotettay deꞌiyoogaa taani akeekaas. Nuuni aqo oyqqi simmin kaseegaappe aaruwan hegaa akeekana danddayaas. Leemisuwawu, nu bullachchaa gallassi omarssi, nuuyyo danddayettida keenan Yihoowassi haggaazanawu deꞌiya nu koshshaa xeelliyaagan woossanaadan tana oychchaasu. Yihooway he woosaa zaariis.

Anjjeela taani kaseegaappe aaruwan Yihoowan ammanettanaadankka maaddaasu. Leemisuwawu, 1973n nuuni Beeteelen haggaazanawu shoobettido wode, taani woradaa oosuwaa dosiyo gishshawu mammottaas. SHin Anjjeela nuuni nu deꞌuwaa Yihoowawu sheedhdhido gishshawu, A dirijjitee nuuni oottanaadan oychchiyo ubbabaa oottana koshshiyoogaa tana hassayissaasu. (Ibr. 13:17) Taani A giidobaa maayettaas! Yaaniyo gishshawu Beeteele biida. Nuuni issippe deꞌido adussa wodiyan, ta keettaayee wozannaamatettay, kiphataynne ayyaanaabawu issi deꞌiya xeelay nu aqo deꞌuwaa minttiis, qassi loꞌꞌobaa kuuyanawu nuna maaddiis.

Haꞌꞌi nuuni cimido wodiyankka, Anjjeela loytta kaafiya machcho gidiyoogaa aggabeykku. Leemisuwawu, dariya baggi Inggilizettuwan tamaariyo, tiꞌokiraase timirtte keettatun tamaaranawu, Anjjeelanne taani he doonaa loytti eranawu minnidi oottiyoogaa doommida. Hegaa gishshawu, he wode nuuyyo layttay 75 heera gidikkonne, nuuni Inggilizetto gubaaꞌiyan shiiqiyoogaa doommida. Paransaaye Macara Biiruwaa Konttiyaa yara gidada oottiyo aawatettaa gaasuwan, hara doonaa xannꞌanawu wodiyaa demmanaagee wayssiyaaba. SHin, Anjjeelanne taani issoy issuwaa maaddida. Ha wodiyan nuuyyo layttay 80nne giyoogaa gidinkka, gubaaꞌe shiiqotussi Inggilizettuwaaninne Paranssaayettuwan giigettiyoogaa aggibookko. Nuuyyo danddayettida keenan ubbatoo nu gubaaꞌiyaara shiiqanawunne haggaazanawu baaxetoos. Yihooway nuuni Inggilizettuwaa tamaaranawu baaxetido baaxiyaa anjjiis.

Issi gita anjjuwaa 2017n demmida. Anjjeelanne taani, Niwu Yorken, Patersenen deꞌiya Wachtawer Timirtte Kifiliyan, Macara Biiruwaa Konttiyaa Yaratinne Eta Machoti Tamaariyo Timirtte Keettan tamaariyo maataa demmida.

Yihooway tumuppe gita asttamaare. (Isi. 30:20) Hegaa gishshawu, nuuni ubbay, cimidaageetinne naati ubbaappe aadhdhiya loꞌꞌo timirttiyaa demmiyoogee maalaalissiyaaba gidenna! (Zaa. 4:5-8) Tumukka, Yihooway, qassi kayma ishanttinne michchontti yootiyoobaa ezggiya yelagati ayyaanaaban diccidi ubbabay injjetido gastta asa gidiyoogaa taani akeekaas. Leemiso 9:9y hagaadan gees: “Aadhdhida eranchcha uraa tamaarissa; yaatikko, i kaseegaappekka aadhdhida eranchcha gidana. Xillo uraakka tamaarissa; yaatikko i eraa gujjana.”

Issitoo issitoo, taani 60 gidiya layttappe kase Aljjeeriyaa deretun aattido he yashshiya sakkana xuma qammaabaa qoppays. He qammi, taani hagaa mala ufayssiya deꞌo demmanaagaa erabeykke. Taani haratuppe darobaa tamaaraas! Yihooway taassi tumuppe keehi maalaalissiya, ufayssiya deꞌuwaanne Anjjeelo immiis. Hegaa gishshawu, nuuni saluwan deꞌiya nu Aawaappenne A dosiya aadhdhida eranchchanne kayma ishanttuppenne michchonttuppe tamaariyoogaa mule aggennaadan murttida.