Gencciyoogan Yihoowa Milata

1-2. Isiyaasa 65:16, 17n Yihooway yootidobay nuuni hidootaa qanxxennaadan nuna waati minttettii?

“HIDOOTAA Qanxxoppa!” giya ufayssiya huuphe yohuwan 2017n killiliyaa shiiquwaa shiiqida. Nuna gakkiya metota nu waani genccana danddayiyaakko he shiiquwan qoncciis. Nuuni he shiiquwaa shiiqoosappe oyddu layttay aadhdhikkonne, ha iita alamiyan haꞌꞌikka genccana koshshees.

² Mata wode nena ayba metoy gakkidee? Intte soo asaappe woy ne laggetuppe issi uri hayqqidee? Caddi oyqqiya harggee nena sakkii? Neeni cimidoogaa gaasuwan neessi deꞌoy deexoo? Meretay gattiyo daafabaa, makkalaa woy yedetaa gaasuwan qohettadii? Woy qassi ubbasaa gakkiya koronaa harggiyaa mala harggiyan qohettadii? Ha meto ubbay attin, nuuni eta dogiyo wodiyaanne zaarettidi hegaa malabay mule deꞌenna wodiyaa yeemuwan naagoos!—Isiyaasa 65:16, 17 nabbaba.

3. Nuuni haꞌꞌi ay oottana bessii, qassi aybissi?

³ Ha iita alamiyan deꞌoy metiyo gishshawu, keehi deexobaa nuuni genccana koshshennan waayi aggana. (Maa. 24:21) Yaatiyo gishshawu, loytti genccanawu nuuni ubbatoo tamaarana koshshees. Aybissi? Yesuusi genccan woy “danddayan intte intte shemppuwaa ashshana” giido gishshataassa. (Luq. 21:19) Nuugaa mala metuwaa harati waati gencciyaakko nuuni yuushshi qoppikko, loytti gencciyaageeta gidana.

4. Gencciyoogan Yihooway keehi loꞌꞌo leemiso nuuni giyoy aybissee?

⁴ Gencciyoogan keehi loꞌꞌo leemiso gidiyaagee oonee? Xoossaa Yihoowa. He zaaruwan neeni maalaalettennan waayi aggana. Hegaabaa neeni hanno gakkanawu loytta qoppennan aggakka. Ha iita alamiyaa Dabloosi haariyo gishshawu, alamiyan metoy kumiis. Ha metota awudenne xayssanawu Yihoowawu wolqqay deꞌiyaaba gidikkonne, I hegaa sinttappe oottanawu naagees. (Roo. 9:22) Qassi ha iita alamiyaa xayssiyo wodee gakkanaashin nu Xoossay ubbatoo genccees. Yihooway gencciyo uddufunbbata ane beꞌoos.

YIHOOWAY AYBAA GENCCII?

5. Xoossaa sunttay bonchchettibeennay ayba ogiyaanee, hegaa xeelliyaagan neeyyo aybi siyettii?

⁵ Yihooway ba sunttaa asay boriyo wode genccees. Yihooway ba sunttaa dosiyo gishshawu, ooninne hegaa bonchchanaadan koyees. Geeshsha Maxaafay hagaadan gees: “Taani [“Yihoowa,” NW]; hegee ta sunttaa. Ta bonchchuwaa taani harau immikke; ta galataakka masettidi giigida misiletussi immikke.” (Isi. 42:8) SHin aadhdhida 6,000 layttawu, A sunttay bonchchettibeenna. (Maz. 74:10, 18, 23) Hegee doommidoy Addaameenne Hewaana ufayttanawu Xoossay etawu koshshiyaabaa diggiis giidi Dabloosi (“sunttaa mooriyaagee”) Edene ataakiltte sohuwan mootido wode. (Doo. 3:1-5) He wodeppe doommidi, Yihooway asawu tumuppe koshshiyaabaa diggiis giidi Dabloosi wordduwan mootiis. Yesuusa A Aawaa sunttay bonchchettibeennaagee qofissiis. Hegaappe denddidaagan, I bana kaalliyaageeti hagaadan woossanaadan tamaarissiis: “Saluwan de7iya nu Aawau, ne geeshsha sunttai anjjetto.”—Maa. 6:9.

6. Yihooway saluwaanne saꞌaa haariyo maatay bawu deꞌiyoogee qonccanaadan oottanaappe kase daro wodee aadhdhanaadan oottidoy aybissee?

⁶ Xoossaanne A haaruwaa daroti eqettiyoogaa. Saluwaanne saꞌaa haariyo maatay deꞌiyoy Yihoowa xalaala, qassi I haariyo ogee keehi loꞌꞌo. (Ajj. 4:11) SHin Dabloosi kiitanchchatanne asaa cimmanawu maliis, qassi eti Xoossawu haariyo maatay baawa giidi qoppanaadan oottiis. Haariyo maatay Yihoowawu deꞌiyoogeenne A haaroy aybippenne aadhdhiyaagaa gidiyoogee qonccanawu wodiyaa koshshees. Asay Medhdhidaagee yootiyoobaa siyennan barkka bana haarana danddayennaagaa akeekana mala eti daro layttawu haaranaadan Xoossay oottiis. (Erm. 10:23) Xoossay danddayanchcha gidiyo gishshawu, saluwaanne saꞌaa haariyo maatay Xoossawu deꞌiyoogaa ooninne sirenna. Yihoowa haaroy aybippenne aadhdhiyoogaanne saꞌan tumu sarotettaanne woppaa ehaanay A Kawotetta xalla gidiyoogaa ubbay erana.

7. Yihoowa bolli makkalidaageeti oonee, qassi I eta waatanee?

⁷ A naatuppe amaridaageeti makkaliyoogaa. Yihooway kiitanchchatanne asaa naata wottiyoobi baynnaageeta oottidi medhdhiis. SHin guyyeppe Seexaanay Yihoowa bolli makkaliis, yaatidi wottiyoobi baynna asa gidida Addaameenne Hewaanakka Yihoowa bolli makkalanaadan oottiis. Hara kiitanchchatinne asaa naatikka makkalidosona. (Yih. 6) Guyyeppe, Xoossay doorido Israaꞌeela dereekka azazettennan ixxiis, yaatidi eeqa xoossatuyyo goynniyoogaa doommiis. (Isi. 63:8, 10) Eti Yihoowawu ammanettibookkona. SHin, I gencciis, qassi makkalanchchata ubbaa xayssiyo wodee gakkanaashin gencciyoogaa aggenna. Hegaappe simmin, Yihoowaynne ayyo ammanettidaageeti ha alamiyan deꞌiya iitabaa genccana koshshenna gishshawu ufayttana!

8-9. Yihoowa xeelliyaagan odettiya worddoti aybee? Yaatin hegaa xeelliyaagan nuuni waatana danddayiyoo?

⁸ Dabloosa wordduwaa. Iyyoobinne hara ammanettida Yihoowa ashkkarati ubbay bantta goꞌꞌaa xallawu Xoossawu goynnoosona giidi Seexaanay mootiis. (Iyy. 1:8-11; 2:3-5) Dabloosi ha wodiyaa gakkanaashin asaa mootiyoogaa aggibeenna. (Ajj. 12:10) Nuuni Yihoowa siiqiyo gishshawu awu ammanettidi deꞌiyoogaaninne nuna gakkiya metuwaa gencciyoogan Seexaanay worddanchcha gidiyoogee qonccanaadan oottana danddayoos. Yihooway Iyyooba anjjiis, qassi nuuni genccikko I nunakka anjjana.—Yaaq. 5:11.

⁹ Yihooway meqettaa iitanne asay waayettanaadan oottees giidi Seexaanay yootanawu worddo haymaanootiyaa kaalettiyaageeta goꞌettees. Ubba qassi amaridaageeti, naati hayqqiyo wode, saluwan Xoossawu hara kiitanchchati koshshido gishshawu I eta efiis yaagoosona. Hegee Xoossaa keehi kariyoogaa bessiyaaba! SHin Yihooway siiqiya Xoossaa gidiyoogaa nuuni eroos. Nuna wolqqaama harggee sakkiyo wode woy nu siiqiyoogeeti hayqqiyo wode, nuuni Xoossan mule gaasoyokko. Qassi, issi galla ubbabaa I giigissanaagaa ammanoos. Xoossaa Yihooway siiqiyaagaa gidiyoogaa nu yootiyoobaa siyiya ubbawu yootana danddayoos. Yaatiyo wode Yihooway bana boriyaageetuyyo zaarees.—Lee. 27:11.

10. Mazamure 22:23, 24y Yihoowabaa ay yootii?

¹⁰ I siiqiyo ashkkarati waayettiyoogaa. Yihooway qarettiya Xoossaa. Nuuni yedetaa, harggiyaa woy nagaranchcha gidiyoogaa gaasuwan waayettiyoogaa I beꞌiyo wode, keehi azzanees. (Mazamure 22:23, 24 nabbaba.) Yihooway nu waayiyaa akeekees, I hegaa xayssanawu koyees, qassi xayssana. (Kessaabaa 3:7, 8⁠raanne Isiyaasa 63:9⁠ra gatta xeella.) ‘Xoossay nu ayfiyaappe afutta ubbaa qucciyo wodeenne hagaappe sinttanawu hayqoynne kayyoy woy waasoynne sahoy deꞌenna’ wodee yaana.—Ajj. 21:4.

11. Hayqqida ba ashkkarata xeelliyaagan Yihoowawu aybi siyettii?

¹¹ A dabboti hayqqiyoogaa. Ammanettidi hayqqida attumaageetanne maccaageeta xeelliyaagan Yihoowawu aybi siyettii? I eta zaarettidi beꞌanawu keehi laamotees! (Iyy. 14:15) Yihooway ba dabbuwaa Abrahaama beꞌanawu ay keena laamotiyaakko qoppa. (Yaaq. 2:23) Woy qassi Yihooway “sinttan eqqidi” haasayissido Muuseera zaarettidi haasayanawu ay keena laamotiyaakko qoppa. (Kes. 33:11) Qassi Daawitinne hara mazamuraaweti sabbanawu ufayssiya mazamuriyaa yexxiyoogaa siyanawu I yeemuwan naagees! (Maz. 104:33) Xoossaa dabbo gidida he asati hayqqidaba gidikkonne, Yihooway eta dogibeenna. (Isi. 49:15) I etabaa ubbabaa hassayees. Geeshsha Maxaafay “eti ubbay A xeelan paxa deꞌiyoogaa” yootees. (Luq. 20:38, NW; tohossa qofaa) Issi gallassi, I eta hayquwaappe denttana, qassi eti wozanappe woossiyoogaa zaarettidi siyananne eta goynuwaa ekkana. Ne siiqiyo uri hayqqidaba gidikko, ha qofay nena minttettana danddayees.

12. Ha wurssetta gallassatun Yihooway keehi azzananaadan oottiyaabati aybee?

¹² Iita asati harata qohiyoogaa. Edenen doommida makkalay giiganaappe kase yaa iiti iiti baanaagaa Yihooway erees. Yihooway ha wodiyan alamiyan deꞌiya iitatettaa, naaquwaanne makkalaa ixxees. Aaya aawu baynna naatunne amꞌꞌetu mala naagiyaabi baynnaageetussi, leemisuwawu, daafuranchchatuyyoonne banttana qohuwaappe teqqana danddayennaageetuyyo ubbatoo I keehi qoppees. (Zak. 7:9, 10) Yihooway ammanettida ba ashkkarata asay naaqqiyoogaanne qachchiyoogaa beꞌiyo wode keehi unꞌꞌettees. I banaara gencciya inttena ubbaa siiqiyoogaa ammanettana danddayeeta.

13. Xoossaa xeelan asay ay keena yeellayiyaabaa oottii, qassi hegaa I waatanee?

¹³ Asay kaseegaappe aaruwan pokkobaa oottiyoogaa. Asay Xoossaa leemisuwan merettidaba gidikkonne, Seexaanay eti pokkobaa oottanaadan denttettiyoogaa dosees. Nohe wode ‘saꞌaa bollan deꞌiya asaa iitatettay daridoogaa’ Xoossaa Yihooway beꞌido wode, “asaa ha sa7aa bollan medhdhidoogau azzaniis; ba wozanan keehippe seelettiis.” (Doo. 6:5, 6, 11) He wodeppe haa simmin alamiyaa hanotay giigidee? Aybanne giigibeenna! Mattuman dummatiyaageetinne issi mala gididaageeti pokkobaa oottiyoogaa gujjin, daro qommo pokkobay keehi daridoogan Dabloosi keehi ufayttees! (Efi. 4:18, 19) Yihoowawu goynniyaageeti wolqqaama nagaraa oottiyo wode Seexaanay keehi ufayttees. Yihooway laamettennan ixxida kandduwan iita gidida asa ubbaa danddayiyoogaa aggiyo wode xayssiyoogan I pokkobaa ixxiyoogaa bessana.

14. Asay saꞌaanne mehiyaa doꞌaa waatiiddi deꞌii?

¹⁴ Xoossay medhdhido saꞌaa asay mooriyoogaa. Asay “haariyo maataa hara asa qohanau go7ettiyoogaa” xalla gidennan, Yihooway eti naaganaadan etawu immido saꞌaanne mehiyaa doꞌaa bessenna ogiyan oyqqoosona. (Era. 8:9; Doo. 1:28) Asay oottiyoobaa gaasuwan mehiyaa doꞌaa qommotuppe issi miiloone gidiyaagee kaalliya amarida layttatun xayana danddayiyoogaa saynisiyaa eranchchati amaridaageeti yootoosona. Meretay moorettiyoogaa eti yootiyoogee garamissenna! Yihooway ‘saꞌaa xayssiyaageeta xayssanawunne’ saꞌaa gannate oottanawu qaalaa gelidoogee ufayssiyaaba.—Ajj. 11:18; Isi. 35:1.

YIHOOWA GENCCAAPPE AY TAMAARIYOO?

15-16. Yihoowaagaadan genccanaadan nuna aybi denttettana koshshii? Leemisuwaa yoota.

¹⁵ Saluwan deꞌiya nu Aaway shaꞌan qoodettiya layttawu genccido unꞌꞌettanaadan oottiya meto ubbaa qoppa. (“Yihooway Aybaa Genccii?” giya saaxiniyaa xeella.) Ha iita alamiyaa Yihooway awudenne xayssana danddayees. SHin A danddayay nuna keehi maaddiis! Ha leemisuwaa qoppa. Issi bitaniyawunne A machcheeyyo biron yelettibeenna eta naꞌawu bollay sila gidiyoogeenne I yeletti simmin awu deꞌoy keehi deexo gidanaagee, qassi naatettan I hayqqanaagee odettiis gaada qoppa. SHin he naꞌaa xeellanaagee yelidaageetuyyo keehi deexo gidikkonne, eti naꞌay yelettiyo wode ufayttoosona. Yelidaageeti bantta naꞌaa siiqiyo gishshawu, ayyo deꞌoy loꞌꞌo gidanaadan maaddanawu eti ayba metonne genccana.

¹⁶ Hegaadankka, Addaameenne Hewaani zareti ubbay yelettiyo wode nagaranchcha. Gidikkonne, Yihooway eta siiqeesinne etawu koshshiyaabaa kunttees. (1 Yoh. 4:19) Leemisuwan odettida yelidaageetuppe dumma ogiyan, Yihooway ba naati waayettanaadan oottiyaabaa xayssana danddayees. I asay waayettanaadan oottiya ubbabaa xayssana wodiyaa keeri wottiis. (Maa. 24:36) He wodee gakkanaashin genccanaadan nunakka Yihoowa siiqoy denttettana koshshees.

17. Yesuusabaa yootiya Ibraawe 12:2, 3n deꞌiya qofay aggennan genccanaadan nuna minttettiyoy aybissee?

¹⁷ Gencciyoogan Yihooway keehi loꞌꞌo leemiso. Gencciyoogan Yesuusi ba Aawaa leemisuwaa kaalliis. Yesuusi saꞌan deꞌiyo wode, nu gishshawu iita haasayaa, cashshaanne mittaa bolli barchchetidi hayqqiyoogaa gencciis. (Ibraawe 12:2, 3 nabbaba.) Gencciyoogan Yihooway leemiso gididoogee genccanaadan Yesuusa minttidoogee qoncce. Hegee nunakka minttana danddayees.

18. Yihooway keehi genccidoogaa gaasuwan hanidabaa nuuni akeekanaadan 2 PHeexiroosa 3:9y nuna waati maaddii?

¹⁸ Naaꞌꞌantto PHeexiroosa 3:9 nabbaba. Ha iita alamiyaa xayssanawu loꞌꞌo wodiyaa Yihooway erees. A danddayaa gaasuwan, daro asay A eriis, qassi miilooniyan qoodettiya keehi cora asay haꞌꞌi awu goynnees. Eti yelettidi A siiqiyoogaa tamaarananne banttana ayyo sheedhdhana gakkanaashin Yihooway daro wodiyawu genccido gishshawu ubbay ufayttoosona. Yihooway genccanawu kuuyidoogee likke gidiyoogee, wurssettay gakkanawu genccida miilooniyan qoodettiya asaa I woytiyo wode loytti qonccana!

19. Nuuni waatanawu murttana koshshii, qassi ayba woytuwaa demmanee?

¹⁹ Ufayttiiddi gencciyo ogiyaa nuuni Yihoowappe tamaaroos. Seexaanaa gaasuwan gakkiya azzanttiyaabaynne waaye ubbay deꞌishinkka, Yihooway ubbatoo “ufayttiya Xoossa.” (1 Xim. 1:11, NW) Yihooway ba sunttaa geeshshiyo, I ubbabaa haariyo ogee suure gidiyoogaa qonccissiyo, iitatetta ubbaanne haꞌꞌi nuna gakkiya meto ubbaa xayssiyo wodiyaa danddayan naagikko, nuunikka ubbatoo ufayttana danddayoos. Saluwan deꞌiya nu Aawaykka gencciyoogaa eriyoogan nuuni genccanawunne minettanawu murttidaageeta gidoos. Yaatikko, ha qofay nu ubbaa bolli polettana: “Waayiyan gencciya urai anjjettidaagaa; aissi giikko, he waayiyaa xoonidoogaappe guyyiyan, Xoossai bana siiqiyaageetuyyo immana giido de7uwaa akiliiliyaa i ekkana.”—Yaaq. 1:12.