“Aadhdhida Eranchchai Odiyoobaa Siya”

1. Nuuyyo zoree ayba ogiyan imettana danddayii, qassi nu ubbawu zoree koshshiyoy aybissee?

NUUSSI ubbawu issi issitoo zoree koshshees. Nuuni bonchchiyo uraa issi issitoo zoriyaa oychchana danddayoos. Haroode qassi, nuussi qoppiya issi ishay nuuni zilꞌꞌettanaadan oottiya ‘moorobaa oottana’ haniyoogaa nuuyyo yootana danddayees. (Gal. 6:1) Woy qassi nuuni gita mooruwaa moori simmin issi uri nuna suurissiyo wode, nuuyyo zoree imettana danddayees. Nuuyyo zoree ayba ogiyan imettikkonne nuuni zoriyaa siyana bessees. Yaatiyoogee nuuyyo loꞌꞌo, qassi nu deꞌuwaa ashshana danddayees!—Lee. 6:23.

2. Leemiso 12:15 maaran, nuuni zoriyaa siyana koshshiyoy aybissee?

² Nuuni ‘aadhdhida eranchchay odiyoobaa siyanaadan’ ha huuphe yohuwawu denddo gidida xiqisee nuna minttettees. (Lee. 22:17) Ubbabaa eriya asi baa; eran woy meeziyan nuuppe aadhdhiya uri awudenne deꞌees. (Leemiso 12:15 nabbaba.) Hegaa gishshawu nuuni zoriyaa siyoogee nuna ziqqi oottiyoogaa bessiyaaba. Hegee nuuni danddayennabay deꞌiyoogaa eriyoogaa qonccissiyaaba; qassi nu halchchuwaa polanawu nuuyyo maadoy koshshiyoogaa akeekoos. Aadhdhida eranchchaa Kawoy Solomoni ayyaanay denttettin hagaadan giis: “Daro zoriyaageeti de7iyoosan halchchidobai polettees.”—Lee. 15:22.

3. Nuuni zoriyaa ayba ogetun demmana danddayiyoo?

³ Nuuyyo zoree issi uraappe sittan imettana danddayees. Nuuni oottana koshshiyaabaa issi cimay woy hara kayma ishay nuuyyo yootana danddayees. Nuna siiqiya uray Geeshsha Maxaafaappe zorikko, nuuni I yootiyoobaa siyiyoogaaninne he zoriyaa oosuwan peeshshiyoogan nashshiyoogaa bessana koshshees. SHin zoriyaa hara ogiyankka demmana danddayoos. Ayba ogiyan? Nuuni Geeshsha Maxaafaa woy nu xuufetuppe issuwaa nabbabiyoogee, nu oottiyoobaa takki giidi qoppanaadaaninne hegaa giigissanaadan nuna denttettana danddayees.—Ibr. 4:12.

4. Eranchchaa 7:9y yootiyoogaadan, zoree nuuyyo imettiyo wode nuuni waatana koshshennee?

⁴ Nuuyyo issi uraappe sittan imettiya zoriyaa siyiyoogeenne oosuwan peeshshiyoogee metiyaaba gidana danddayees. Ubba qassi nuuni yiillotana danddayoos. Aybissi? Nuuni nagaranchcha gidiyoogaa erikkonne, nuuni oottido moorobaa issi uri sittan nuuyyo yootiyo wode zoriyaa ekkiyoogee metiyaaba gidana danddayees. (Eranchchaa 7:9 nabbaba.) Nuuni gaasoyana danddayoos. Nuuni nuna zorida uraa sirana danddayoos woy I zoriyaa immido ogee nuna yiilloyana danddayees. Nuuni nuna zorida uraa hagaadan giidi borana danddayoos: ‘I tana zorana koshshenna! Ikka moorobaa oottees!’ Qassi nuuni imettida zoriyaa dosana xayikko, nuuni hegaa xaasayana woy nuuni siyanawu koyiyoobaa yootana giidi qoppiyo hara ura zoriyaa oychchana danddayoos.

5. Nuuni ha huuphe yohuwan ay beꞌanee?

⁵ Ha huuphe yohuwan, Geeshsha Maxaafan etabay odettido zoriyaa siyennan ixxidaageetubaanne zoriyaa siyidaageetubaa nuuni pilggana. Zoriyaa siyanaadaaninne an goꞌettanaadan nuna aybi maaddanaakkokka beꞌana.

ETI ZORIYAA SIYENNAN IXXIDOSONA

6. Kawuwaa Robiꞌaamayyo zoree imettin I oottidobaappe nuuni ay tamaariyoo?

⁶ Robiꞌaama hanotaa qoppa. I Israaꞌeela kawo gidido wode, A asay A oychchanawu yiis. Eti A aaway Solomoni eta bolli caanido deexobaa I kawushshanaadan oychchidosona. Robiꞌaami loꞌꞌobaa oottiis. I asaayyo woygidi zarana koshshiyaakko Israaꞌeela cimata zoretaa bessiis. He cimati neeni asay oychchidobaa oottikko, eti neeyyo ubbatoo haarettana giidi kawuwaa zoridosona. (1 Kaw. 12:3-7) Robiꞌaami he zoriyan ufayttidaba milatenna, hegaa gishshawu banaara diccida yelagata zoretaa bessiis. He asatuyyo layttay 40 heera gidiyo gishshawu, eti deꞌuwan amaridabaa beꞌidaageeta gidennan waayi aggana. (2 Odi. 12:13) SHin he wode eti Robiꞌaama iitabaa zoridosona. I asaayyo toohuwaa yaa deexettanaadan eti zoridosona. (1 Kaw. 12:8-11) Robiꞌaamayyo naaꞌꞌu dumma dumma zoree imettiis. Hegaa gishshawu I Yihoowa woossananne awugaa zoriyaa kaallana koshshiyaakko oychchana danddayees. SHin I loꞌꞌo giidi qoppido zoriyaa kaallanawunne yelagati yootidobaa oottanawu dooriis. Hegaa gaasuwan Robiꞌaaminne Israaꞌeela asay keehi qohettiis. Issi issitoo nuussi imettiya zoree nuuni siyanawu koyiyoogaa mala gidennan aggana danddayees. SHin he zoree Xoossaa Qaalaappe imettikko, nuuni siyana koshshees.

7. Kawuwaa Ooziyaana hanotaappe nuuni ay tamaariyoo?

⁷ Kawuwaa Ooziyaani zoriyaa siyennan ixxiis. Yihoowa beeta maqidasiyan qeesetu xalaalay gelanaadan paqqadettiya sohuwaa I geliis, qassi I ixaana cuwayanawu maliis. Yihoowa qeeseti assi hagaadan giidosona: “Ooziyaanaa, neeni GODAAYYO ixaanaa cuwayanau bessakka. Ixaanaa cuwayiyoogee bessiyoi, . . . qeesetu xalaalaassa.” Ooziyaani waatidee? I bana ziqqi oottidi zoriyaa siyidi beeta maqidasiyaappe sohuwaara kiyiyaakko, Yihooway ayyo atto gaana danddayees. SHin, “Ooziyaani . . . hanqqettiis.” I he zoriyaa siyennan ixxidoy aybissee? I kawo gidiyo gishshawu ba koyido ubbabaa oottana danddayays giidi qoppennan waayi aggana. SHin Yihooway hegan ufayttibeenna. Ooziyaani baassi paqqadettibeennabaa oottidoogaa gaasuwan, goga hargge A oyqqiis, qassi I “haiqqana gakkanaashinkka he harggiyaara de7iis.” (2 Odi. 26:16-21) Nuussi deꞌiya maatay ayba gidikkonne, Geeshsha Maxaafaappe imettiya zoriyaa nuuni siyennan ixxikko Yihooway nuna nashshiyoogaa agganaagaa Ooziyaana hanotaappe tamaaroos.

ETI ZORIYAA SIYIDOSONA

8. Iyyoobi zoree imettin waatidee?

⁸ Nuuni qommoora beꞌidoogeetuppe dumma hanotan, zoriyaa siyido gishshawu anjjettida loꞌꞌo leemiso gidiyaageetubaa Geeshsha Maxaafay yootees. Iyyooba hanotaa qoppa. I Xoossaa siiqiyaanne A ufayssanawu koyiya asa gidikkonne, nagaranchcha. Wolqqaama paacee gakkido wode, I bala gidida amaridabaa haasayiis. Hegaa gaasuwan, Eelihunne Yihooway A sittan zoridosona. Yaatin Iyyoobi waatidee? I bana ziqqi oottidi he zoriyaa siyiis. I hagaadan giis: “Tumuppe taani taayyo gelibeennabaa haasayaas; . . . taani haasayidobai tana yeellayiis. Yaatin, taani bidinttaaninne baanan uttada paaxais.” Iyyoobi bana ziqqi oottido gishshawu Yihooway A anjjiis.—Iyy. 42:3-6, 12-17.

9. Zoriyaa ekkiyoogan Muusee loꞌꞌo leemiso gidiyoy aybissee?

⁹ Gita mooruwaa moori simmin imettida zoriyaa ekkiyoogan Muuse loꞌꞌo leemiso. Issi wode, I keehi hanqqettidi Yihoowa bonchchibeenna. Hegaa gaasuwan Muusee Hidootaa Biitti gelennan attiis. (Qoo. 20:1-13) Muusee hegan azzanidoogaa yootido wode, Yihooway ayyo hagaadan giis: “Ha yohuwaa denttada naa77antto taayyo haasayoppa.” (Zaa. 3:23-27) Muusee hegan hanqqettibeenna. I Yihooway kuuyidoban maayettido gishshawu, Israaꞌeela kaalettanaadan Yihooway A goꞌettiyoogaa aggibeenna. (Zaa. 4:1) Iyyoobinne Muusee zoriyaa siyidosona, qassi eti nuuni kaallana bessiya loꞌꞌo leemiso. Iyyoobi ba qofaa laammiis; I gaaso shiishshibeenna. Muusee I xoqqu ootti xeelliyo maatay appe hali simminkka ammanettidi deꞌiyoogan I Yihoowa zoriyaa ekkidoogaa bessiis.

10. (a) Nuuni zoriyaa siyiyoogan demmiyo goꞌꞌaa xeelliyaagan Leemiso 4:10-13y ay qonccissii? (b) Zoree imettido wode amaridaageeti ayba loꞌꞌo eeshshata bessidonaa?

¹⁰ Iyyoobanne Muuse mala ammanettida asatu leemisuwaa kaalliyo wode nuuni goꞌettoos. (Leemiso 4:10-13 nabbaba.) Nu ishanttuppenne michchonttuppe daroti eta leemisuwaa kaallidosonanne zoriyaa ekkidosona. Kongon deꞌiya Emaanuwel giyo ishay bawu imettida zoriyaa xeelliyaagan yootidoba akeeka: “Ta gubaaꞌiyan deꞌiya kayma ishantti taani Yihoowaara dabbotido dabbotay moorettana haniyoogaa akeekidosona, yaatidi eti tana maaddanawu malidosona. Taani eti yootido zoriyaa oosuwan peeshshidoogee, daro metuwan gelennaadan tana maaddiis.”b Kanaadan deꞌiya Meegan giyo aqinyaa zoriyaa xeelliyaagan hagaadan gaasu: “Zoree taani ubbatoo siyana koyiyoobaa gidana xayikkonne, hegee taani siyana koshshiyaaba.” Qassi Kiroweshiyan deꞌiya Marko giyo ishay hagaadan giis: “Taani ta maataappe wodhdhaas, shin he wodiyaabaa taani qoppiyo wode, taassi imetida zoree taani Yihoowaara dabbotido dabbotaa zaaretta minttanaadan tana maaddidoogaa akeekaas.”

11. Zoriyaa siyiyoogaa xeelliyaagan Ishaa Karl Kilayini ay yootidee?

¹¹ Zoriyaa siyiyoogan goꞌettida leemiso gidiya hara uri Bolla Gididi Heemmiyaagaa yara gididi haggaazida Ishaa Karl Kilayina. Ishaa Kilayini bawu mata lagge gidida Josef Razerfordi A wolqqaama zoriyaa zorido wodiyaabaa ba deꞌuwan hanidaban yootiis. Ishaa Kilayini bayyo imettida zoriyan koyro azzanidoogaa yootiis. I hagaadan giis: “Haroode [Ishaa Razerfordi] tanaara gayttidi noocu giiddi, ‘Saro Karla!’ yaagiis. SHin taani lancca uttido gishshawu, zuuzummaydda sarotaas. I tana hagaadan giis: ‘Karlaa, naagetta! Dabloosi nena oyqqanawu maliiddi deꞌees!’ Yeellatada, Ishaa Razerfordaa, ‘Taani ne bolli lanccabeykke’ yaagaas. Taani A bolli lanccidoogaa erido gishshawu, I zaarettidi hagaadan giis: ‘SHin neeni naagetta. Dabloosi nena kaalliiddi deꞌees.’ I likkebaa yootiis. Issi ishay haasayidoban ubba qassi aawatettay deꞌiyo uri yootiyo issiban nuuni lancciyaaba gidikko, Dabloosa piriyan gelana danddayoos.”c (Efi. 4:25-27) Ishaa Razerfordi zorido zoriyaa Ishaa Kilayini siyiis, qassi eti mata laggee gididi deꞌidosona.

ZORIYAA SIYANAADAN NUNA AYBI MAADDANA DANDDAYII?

12. Nuna ziqqi oottiyoogee zoriyaa siyanaadan nuna waati maaddana danddayii? (Mazamure 141:5)

¹² Zoriyaa siyanaadan nuna aybi maaddana danddayii? Nuuni nagaranchcha gidiyoogaanne issi issitoo eeyyabaa oottana danddayiyoogaa hassayiyoogan nuna ziqqi oottana koshshees. Nuuni qommoora beꞌidoogaadan, Iyyoobi kase balabaa qoppiis. Guyyeppe I ba qofaa laammido gishshawu Yihooway A anjjiis. Aybissi? Iyyoobi bana ziqqi oottido gishshataassa. Eelihu appe yelaga gidikkonne, Eelihu immido zoriyaa siyiyoogan I bana ziqqi oottiya asa gidiyoogaa bessiis. (Iyy. 32:6, 7) Hegaadankka, nuuni nuussi zoree koshshenna giidi qoppiyo wode woy zoriyaa immiyaagee nuuppe yelagiyo wodekka he zoriyaa oosuwan peeshshanaadan nuna ziqqi oottiyoogee maaddees. Kanaadan deꞌiya issi cimay hagaadan giis: “Nuna ooninne zorana xayikko ayyaanaaban diccanawu nuuni keehi metootoos.” Nuuni ubbay ayyaana ayfiyaa kaseppe aaruwan ayfiyaageetanne mishiraachchuwaa sabbakiyoogaaninne tamaarissiyoogan qara gidana koshshees.—Mazamure 141:5 nabbaba.

13. Nuuni zoree imettiyo wode waati xeellana koshshii?

¹³ Neessi imettiya zoriyaa Xoossay nena siiqiyoogaa bessiyaabadan xeella. Yihooway nuussi keehi loꞌꞌobaa qoppees. (Lee. 4:20-22) I ba Qaalaa baggaara, Geeshsha Maxaafaa qofay deꞌiyo xuufiyaa baggaara, woy kayma Kiristtaaniyaa baggaara nuna zoriyo wode, nuna siiqiyoogaa bessees. Ibraawe 12:9, 10y yootiyoogaadan, “Xoossai . . . nuna maaddanau qaxxayees.”

14. Zoree imettiyo wode nuuni xeelaa wottana koshshiyoy aybiinee?

¹⁴ Zoree imettido ogiyaa gidennan, zoriyaa qoppa. Nuuni issi issitoo zoree nuussi likke ogiyan imettibeenna giidi qoppana danddayoos. Zoriyaageeti siyanawu ufayssiya ogiyan zoranawu baaxetana koshshees.d (Gal. 6:1) SHin zoree imettiyoy nuussa gidikko, zorida uri nuna loꞌꞌo ogiyan zoribeenna giidi nuuni qoppikkokka zoriyan xeelaa wottana koshshees. Nuna hagaadan oychchana danddayoos: ‘Zoree imettido ogiyaa taani dosana xayikkonne, odettidabay tumee? Taani zoriyaa immida ura balaa aggabayada he zoriyan goꞌettana danddayiyaanaa?’ Nuuyyo imettiya zoree ayba gidikkonne, zoriyan goꞌettiyo ogiyaa koyiyoogee loꞌꞌoba.—Lee. 15:31.

ZORIYAA OYCHCHADA HEGAN GOꞌETTA

15. Nuuni zoriyaa oychchana koshshiyoy aybissee?

¹⁵ Geeshsha Maxaafay zoriyaa oychchanaadan nuna minttettees. Leemiso 13:10y hagaadan gees: “Zoriyaa ekkiyaageeti aadhdhida eranchcha.” Hegee tuma. Hara uri banttana zoranaashin naagiyoogaa aggidi zoriyaa oychchiyaageeti oychchennaageetuppe aaruwan loꞌꞌobaa kuuyoosona. Yaatiyo gishshawu zoriyaa oychchiyaageeta gidoos.

16. Nuuni zoriyaa ayba hanotatun oychchana danddayiyoo?

¹⁶ Nuuni nu mala Kiristtaaneta zoriyaa oychchana danddayiyoy awudee? Amarida hanotata qoppa. (1) Issi michchiyaa meeze deꞌiyo aassiyaara banaara xannaꞌissanaadan oychchawusu, qassi A waanada qara asttamaare gidana danddayiyaakko guyyeppe zoriyaa oychchawusu. (2) Aqo oyqqabeenna issi michchiyaa, maayuwaa shammanawu koyido gishshawu, maayuwaa dooriyoogaara gayttidaagan A kayma michchiyaa ba qofaa yootanaadan oychchawusu. (3) Issi ishay bawu imettida koyro dere haasayaa haasayanaadan maddabettiis. I haasayaa haasayiyo meeze deꞌiyo uri ba haasayaa loytti siyanaadaaninne, giigissana danddayiyoobaa bawu yootanaadan oychchees. Daro layttawu haasayaa haasayida ishaykka haasayaa haasayiyoogan gooba gidida uraa zoriyaa oychchidi baassi imettida zoriyaa oosuwan peeshshana danddayees.

17. Nuuni zoriyan waani goꞌettana danddayiyoo?

¹⁷ Kaalliya saaminttatun woy aginatun, sittan woy hara ogiyan nu ubbawu zoree imettana. Zoree hegaadan imettiyo wode, nuuni qommoora beꞌidobata hassaya. Ubbatoo nena ziqqi ootta. Zoree imettido ogiyaa gidennan, zoriyaa qoppa. Qassi neeyyo imettida zoriyaa oosuwan peeshsha. Aadhdhida eranchcha gididi yelettida uri baawa. SHin nuuni ‘zoriyaa siyidi timirttiyaa ekkikko’ nu ‘aadhdhida eranchcha gidanaagaa’ Xoossaa Qaalay yootees.—Lee. 19:20.