Eray?

Haraphphiyaa buubaanne mara haraphphiyaa yarshshanaadan Yihooway paqqadidoogee loꞌꞌo gididoy aybissee?

MUUSE Higgee, haraphphiyaa buubaanne mara haraphphiyaa Yihoowawu yarshshiyoogaa paqqadees. Yarshshuwaabaa yootiya higgiyan ha naaꞌꞌu kafoti ubbatoo issippe qonccidosona; qassi issuwaa gishshaa hara goꞌettana danddayettees. (Wog. 1:14; 12:8; 14:30) Hegee goꞌꞌiyaaba gididoy aybissee? Haraphphiyaa buuba issi issitoo demmana danddayettennaagee hegawu issi gaaso. Aybissi?

Haraphphiyaa buubati hombbiya aginatuppe simmin Israaꞌeela biittaa ubbaappe harasaa boosona. Layttan layttan Xiqimita aginan, eti tohossa heeraappe hombbiyaa biittatukko boosona, yaatidi hombbiyaa wodiyan Israaꞌeela biittaakko simmoosona. (Sii. 2:11, 12; Erm. 8:7) Hegaa gishshawu, beni Israaꞌeelati haraphphiyaa buubata balgguwan yarshshanawu metootoosona.

Hara baggaara qassi, mara haraphpheti darotoo harasaa beenna gishshawu, laytta kumetta Israaꞌeela biittan deꞌoosona. Qassi mara haraphpheti son haarana danddayiyoobata. (Yohaannisa 2:14, 16​ra gatta xeella.) Baybil Plantis End Animalis giyo maxaafay yootiyoogaadan, “Yihudaa biittan deꞌiya qeeri katamatuninne gita katamatun ubban son dicciya mara haraphpheti deꞌoosona. Keetti deꞌiyo asay ubbay haraphpheti deꞌana danddayiyo keettaa woy godaa bolli xooꞌiyaa giigissana danddayees.”—Isiyaasa 60:8​ra gatta xeella.

Hegaa gishshawu, Yihooway Israaꞌeelati laytta kumetta demmana danddayiyo kafota yarshshanaadan paqqaddiyoogan siiqiyaagaanne aadhdhida eranchcha gidiyoogaa bessiis.