Nabbabiyaageetu Oyshaa

Naaꞌꞌantto Sameela 21:7-9y Daawiti ‘Mafibosheeta ashshidoogaa’ woy ayyo qarettidoogaa yooti simmidi hayqqanaadan Mafibosheeta aattidi immidoogaa yootiyoy aybissee?

Ha taarikiyaa eesuwan nabbabiya amaridaageeti hegaadan oychchana danddayoosona. SHin he xiqisetun Mafibosheeta giyo sunttan xeesettida naaꞌꞌu dumma dumma asati deꞌoosona; qassi nuuni he taarikiyaa pilggiyoogan tamaarana danddayoos.

Israaꞌeela Kawuwaa Saaꞌoolawu laappun attuma naatinne naaꞌꞌu macca naati deꞌoosona. Saaꞌoolawu bayra naꞌay Yonaataana. Guyyeppe kawuwaa Saaꞌooli, Rixifo geetettiya kaadumateppe Mafibosheeta giyo naꞌaa yeliis. Yonaataanawukka Mafibosheeta giyo naꞌay deꞌiyoogee maalaalissiyaaba. Yaatiyo gishshawu, Kawuwaa Saaꞌoola naꞌaykka A naꞌaa naꞌaykka Mafibosheeta geetettidi xeesettoosona.

Kawuwaa Saaꞌooli Israaꞌeelatuura issippe deꞌiya Gabaaꞌoona asata ixxido gishshawu eta muleera xayssanawu issi wode maliis. He wode amarida Gabaaꞌoona asati hayqqidoogee qoncce. Hegee balaba. Aybissi? Yaasu wode, Israaꞌeela halaqati Gabaaꞌoona asatuura sarotettaa maachchaa maacettido gishshataassa.—Yaas. 9:3-27.

He maachchay Kawuwaa Saaꞌoola wodekka oottees. Kawoy he maachchaa naagennan aggidi Gabaaꞌoona asata xayssanawu maliis. Hegee ‘Saaꞌoolinne A asati suuttaa gussidoogawu oyshettanadan’ oottiis. (2 Sam. 21:1) Wurssettan, Daawiti kawotiis. Paxa attida Gabaaꞌoona asati banttana gakkida gita naaquwaa assi yootidosona. Saaꞌooli oottido gita nagaray atto geetettanaadaaninne Yihooway biittaa anjjanaadan waatana koshshiyaakko Daawiti eta oychchiis. Gabaaꞌoona asati miishshaa oychchibookkona; shin eti ‘paxa attennaadan maqettida’ bitaniyaa laappun attuma naati banttassi imettanaadan oychchidosona. (Qoo. 35:30, 31) Eti oychchidobaa Daawiti poliis.—2 Sam. 21:2-6.

He wode, Saaꞌoolinne Yonaataani olan hayqqichchidosona, shin, Yonaataana naꞌay Mafibosheeti paxa deꞌees. Naatettan A daafabay gakkidoogaa gaasuwan I sila gidiyo gishshawu A aawaa aaway Gabaaꞌoona asata qohiyo wode hashetibeenna. Daawiti Yonaataanaara dabbotaa maachchaa maacettiis, hegee Yonaataana naꞌaa Mafibosheeta gujjin, Yonaataana zareta maaddees. (1 Sam. 18:1; 20:42) Taarikee hagaadan gees: “GODAA sinttan caaqqido caaquwaa gishshau, Saa7oola na7aa Yonaataana na7aa Mafibosheeta kawoi [Daawiti] ashshiis.”—2 Sam. 21:7.

Gidikkonne, Gabaaꞌoona asati oychchidobaa Daawiti poliis. I Saaꞌoola attuma naata naaꞌꞌata, issuwaa sunttay Mafibosheeta, qassi Saaꞌoola naꞌee naata ichchashata aattidi immiis. (2 Sam. 21:8, 9) Daawiti oottidobay suuttaa gussidoogaa acuwaappe biittay laꞌa kiyanaadan oottiis.

Ha hanotay taarike xalla gidenna, nuuni appe tamaarana danddayoos. Xoossaa higgee yootiyoobay qoncce. Hagaadan gees: ‘Aawati oottido nagaraa gishshawu naata woranawu bessenna.’ (Zaa. 24:16) Saaꞌoola naati naaꞌꞌatinne A naꞌee naati ichchashati iitabaa oottana xayiyaakko, Yihooway eti hayqqanaadan oottenna. He higge gujjidi hagaadan gees: “Asai ubbai ba oottido nagaran nagaran haiqqanau bessees.” Saaꞌoola zaretuppe hayqqida laappunati Saaꞌooli Gabaaꞌoona asata buttidi xayssanawu malido wode iitabaa oottennan waayi aggana. Yaatiyo gishshawu, he laappun naati oottido iita oosoy eta bolli gakkiis.

Issi uri kaaletuwaadan oottaas giidi qoppiyoogan woy haasayiyoogan ba oottido balabawu gaaso shiishshana danddayennaagaa ha taarikee qonccissees. Leemiso maxaafay hagaadan gees: “Ne gediyaassi ogiyaa salallissa; suure oge xalaalan hemetta.”—Lee. 4:24-27; Efi. 5:15.