Nabbabiyaageetu Oyshaa

Tamme 2020, Wochchiyo Keelan “Ne Sunttay Geeyo” giya huuphe yohoy Yihoowa sunttaaranne I ubbabaa haariyo maataara gayttidaagan nu ammaniyoobay laamettidoogaa waati qonccissidee?

He huuphe yohuwan asaassinne kiitanchchatussi ubbawu issi keehi gita allaallee deꞌiyoogaa tamaarida. Hegeekka, Yihoowa gita sunttay geeyiyoogaa. Yihooway haariyo ogee ubbaappe aadhdhiyaagaa gidiyoogee woy gidennaagee Yihoowa sunttay geeyiyoogaara gayttiyaaba. Hegaadankka, issi uri Xoossawu ammanettidi deꞌiyoogee woy deꞌennaagee keehi koshshiya allaalle gidida Yihoowa sunttay geeyiyoogaara gayttiyaaba.

Yihoowa sunttaaranne A sunttay geeyiyoogaara gayttida gita allaalliyaa nuuni haꞌꞌi pilggana koshshidoy aybissee? Ane heezzu gaasota beꞌoos.

Koyruwan, Edene gannatiyan Seexaanay Yihoowa sunttaa mooriis. Seexaanay Hewaano oychchido oyshay Yihooway keha gidenna, qassi Addaamessinne Hewaanissi immido kaaletoy bessiyaaba gidenna giidi yootiyoogaa mala. Seexaanay Yihooway giidobaappe phalqqettiyaabaa yootidoogee Xoossay worddanchcha giyoogaa mala. Yaatiyoogan I Yihoowa sunttaa mooriis. I Dabloosa gidiis, hegaa giyoogee “sunttaa mooriyaagaa” giyoogaa. (Yoh. 8:44) Hewaana Seexaanaa wordduwaa ammanido gishshawu Xoossawu azazettabeykku, hegee A Xoossawu haarettanawu koyennaagaa qonccissees. (Doo. 3:1-6) Seexaanay Yihoowa xeelliyaagan hanno gakkanawu worddobaa yootees. He wordduwaa ammaniyaageeti Yihoowawu azazettennan aggana danddayoosona. Hegaa gishshawu, Yihoowa geeshsha sunttay moorettiyoogaa Xoossaa asay gita naaqodan xeellees. Ha alamiyan metoynne iitatettay keehi daranaadan oottida waanna gaasoy hegaa.

Naaꞌꞌanttuwan, mereta ubbay goꞌettanaadan Yihooway ba sunttay geeyanaadan oottana. Yihooway hegaa keehi xoqqu ootti xeellees. I “ta gita sunttaa geeshshatettaa taani bessana” giidoy hegaassa. (Hiz. 36:23) Qassi ammanettida Yihoowa ashkkarati ubbay woossiyo woosan kaseyana koshshiyaabaa Yesuusi qonccissido wode hagaadan giis: “Ne sunttay geeyo.” (Maa. 6:9, NW) Yihoowa sunttaa bonchchiyoogee keehi koshshiyaaba gidiyoogaa Geeshsha Maxaafay zaari zaari yootees. Ane amarida leemisota beꞌa: “‘Bonchchoi a sunttaassa’ giidi GODAABAA yootite.” (1 Odi. 16:29; Maz. 96:8) “‘Xoossaa sunttai bonchchetto!’ giidi yexxite.” (Maz. 66:2) “Taani . . . ne sunttaa merinau bonchchana.” (Maz. 86:12) Yesuusi Yerusalaamen beetamaqidasiyan deꞌiiddi, “Ta Aawau, ne sunttaa bonchcha” giido wode Yihooway saluwaappe haasayiis. Yihooway zaariiddi hagaadan giis: “Taani ta sunttaa bonchchaas; qassikka gujjada bonchchana.”—Yoh. 12:28.a

Heezzanttuwan, Yihoowa halchchoy ubbatoo A sunttaara gayttees. Ane hagaa qoppa: Kiristtoosa SHaꞌu Layttaa Haaruwaa wurssetta paaciyaappe simmin aybi hananee? He wode kiitanchchatinne asa ubbay Yihoowa sunttaa waati xeellanee? He oyshaa zaaruwaa demmanawu nuna maaddana mala hegaara gayttida naaꞌꞌubata ane beꞌoos; hegeetikka asay ammanettiyoogaanne ubbabaa haariyo maataa. Ammanettidaageeta gidiyoogaa bessida asata bantta suuretettaa naagidi deꞌiyoogaara gayttidaagan ubbatoo paacee gakkanee? CHii gakkenna. Eti wottiyoobi baynnaageetanne loytti paacettidaageeta gidana. Qassi merinaa deꞌuwaa demmana. Hegaa bollikka, Yihooway haariyo ogee ubbaappe aadhdhiyaakkonne bessiyoogee keehippe koshshiyaaba gidiyoogee attees. He wode, saluwan deꞌiyaageetinne saꞌan deꞌiyaageeti Yihoowawu haarettiyoogan issuwaa gidana. Yaatin Yihoowa sunttaara gayttidabay shin?

He wode, asa ubbay Yihoowaabaa tumaa erananne A sunttay muleera geeyana. Gidikkonne, Yihoowa sunttaara gayttidabay saluwaaninne saꞌan deꞌiya A ashkkaratussi he wodekka gita allaalle gidana. Aybissi? Eti ubbatoo Yihooway oottiyo maalaalissiyaabaa beꞌiyo gishshataassa. Yesuusi ubbabaa haariyo maataa bana ziqqi oottidi Yihoowawu immiyo gishshawu, Yihooway “ubbaassi ubbabaa hanana.” (1 Qor. 15:28, NW) Hegaappe simmin, saꞌan deꞌiya asay “Xoossaa naati ailletettaappe kiyido bonchcho kessaa shaakkana.” (Roo. 8:21) Qassi Yihooway saluwaaninne saꞌan deꞌiya ba naati issi keetta asa gidanaadan halchchido ba halchchuwaa polana.—Efi. 1:10.

Ha ubbabay hani simmin, saluwaaninne saꞌan deꞌiya Yihoowa keettaa asay waananee? Nuuni Yihoowa sunttaa sabbanawu wozanappe koyanaagee qoncce. Mazamuraawee Daawiti ayyaanay kaalettin hagaadan giis: “Xoossaassi galatai gido. A bonchcho sunttai merinaayyo galatetto.” (Maz. 72:18, 19) Nuuni merinawu yaatanaadan oottiya oorattabaanne ufayssiyaabaa ubbatoo demmana.

Yihoowa sunttay abaa ubbabaa qonccissees. Nuuni Yihoowa sunttaabaa qoppiyo wode A siiquwaabaa hassayoos. (1 Yoh. 4:8) Yihooway nuna medhdhido wodenne wozuwaa yarshshuwaa giigissido wode nuuyyo bessido siiquwaa ubbatoo hassayoos. Qassi siiqoy denttettin Yihooway xillotettan haariyoogaa ubbatoo hassayoos. Yihooway nuna ay keena siiqiyaakko nuuni ubbatoo akeekana. Hegee nuuni merinawu nu Aawaakko loytti shiiqanaadaaninne A bonchcho sunttawu sabaa mazamuriyaa yexxanaadan oottana.—Maz. 73:28.