Likkebaanne Balabaa: Nuna Ubbaa Qofissiya Oyshaa

Neeni kase ba erenna heeri baanawu koyidaba gidikko awugaadan oottuutee?

1. 1. Baana koshshees gaada qoppido ogiyara coo biyogaa.

2. 2. Harati ogiya eroosona ga qoppada eta kaalliyogaa.

3. 3. Karttaa beꞌiyogaa woy ogiya eriya laggiya oychchiyogaa mala ammanttiya kaaletuwa koyiyogaa.

Nuuni koyroogaa woy naaꞌꞌanttoogaa dooriyaba gidikko, issi heeri baana danddayoos; gidoppe attin hegee nuuni koyidosa gidennan aggana danddayees. Shin heezzanttoogaa dooriyaba gidikko, nuuni koyidosaa gakkanaagaa ammanettana danddayoos.

Nu deꞌoy oge biyogaa mala; hegeekka ufayssiya deꞌuwakko efees giidi nuuni hidootiyoba. Nuuni issibaa kuuyiyo wode kaaletuwa demmanawu biyosay, he deꞌuwakko gakkanaadan woy gakkennaadan oottana danddayees.

Nuuni kuuyiyo darobati nu deꞌuwan hegaa keeni koshshiyageeta gidokkona, shin amaridaageeti keehi koshshiyageeta. He keehi koshshiya kuushshati, nuuni likkebaanne balabaa xeelliyagan ammaniyobay aybakko qonccissoosona. Hegeeti nunanne nuuni siiqiyogeeta daro wodiyawu qohana woy maaddana danddayoosona. He kuushshati kaallidi deꞌiyabatuura gayttidaageeta:

• Mattumaa gaytettaanne aqo deꞌuwa

• Ammanettiyogaa, oosuwanne miishshaa

• Naata dichchiyo ogiya

• Harata oyqqiyo ogiya

Hegeetuura gayttidaagan neeni kuuyiyobay sinttappe ne deꞌoynne ne so asaa deꞌoy ufayssiyagaa gidanaadan oottanaakkonne waata erana danddayay?

Nuna ubbaa huuphiyan huuphiyan qofissiya oyshay hagaa: Likkebaanne balabaa xeelliyagan loꞌꞌobaa kuuyanawu tana aybi maaddana danddayii?

Likkebaanne balabaa xeelliyagan Geeshsha Maxaafay yootiyobaa neeni ammanettana danddayiyoy aybissakko, qassi I yootiyobay nena waati maaddana danddayiyakko ha maxeetee qonccissees.