Olaynne Asay Kobattiyogee Waani Xayanee?

XOOSSAY ASA KAWOTETTATA MULEERA XAYSSANA

Xoossay asa kawotettata, Geeshsha Maxaafay Armmageedoonaa giyo olan xayssana. (Ajjuutaa 16:16) He wode, ‘saꞌaa kawoti ubbay’ “Ubbaappe Wolqqaama Xoossaa gita gallassan” olaayyo issippe shiiqana. (Ajjuutaa 16:14) Armmageedooni, ola ubbaa xayssana Xoossaa olaa.

Xoossay asa kawotettata xayssidi, saluwappe haarana mule xayenna ba Kawotettaa, woy aysuwa essana. (Daaneela 2:44) Xoossay he Kawotettaa Kawo gidanaadan ba Naꞌaa, Yesuus Kiristtoosa dooriis. (Isiyaasa 9:6, 7; Maatiyosa 28:18) He aysoy, Yesuusi bana kaalliyageeti woossanaadan tamaarissido Kawotettaa.b (Maatiyosa 6:9, 10) Asa ubbay Yesuusi Haariyagaa gidido, kumetta saꞌan deꞌiya issi kawotettaa baggaara issippetettan deꞌana.

Asa kawotuppe dumma hanotan, Yesuusi baayyo maadettanawu ba maataa goꞌettenna. I suurebaa oottiyagaanne zaggennaagaa gidiyo gishshawu, yaraa, biittaa woy zariya gaasuwan naaqettanaakkonne giidi ooninne hirggenna. (Isiyaasa 11:3, 4) Qassi, asay ba maataa naagissanawu olettana koshshenna. Aybissi? Yesuusi ubba asawu huuphiyan huuphiyan koshshiyabaa kunttana. “A xeesiya hiyyeesata, naaqettidaageetanne maaddiyaabi bainnaageeta i ashshees. . . . Eta naaquwaappenne makkalaappe i wozees.”—Mazamure 72:12-14.

Xoossaa Kawotettay ola miishshata ubbaa saꞌaappe muleera xayssana. (Mikiyaasa 4:3) Qassi, olettiyogaa agganawu koyenna, woy haratu sarotettaa balbbuqiya iita asatakka xayssana. (Mazamure 37:9, 10) Attumay, maccaynne naati ubbay saꞌan awa heeran deꞌikkokka, issibawunne yayyokkona.—Hizqqeela 34:28.

Xoossaa Kawotettay saꞌaa haariyo wode, ubba asay giiga deꞌuwa deꞌana. He Kawotettay hiyyeesatettaa, namisaanne keettaa xayuwa mala asay olettanawu gaaso gidiyabata xayssana. Ubba asay gidiyagaa keena, bollawu maaddiya qumaa demmana, qassi injje sohuwan deꞌana.—Mazamure 72:16; Isiyaasa 65:21-23.

Xoossaa Kawotettaa haaruwan, olay kaalettido iitaba ubbay xayana. He iitabay bollaa masunttaa xalla gidennan, olaa wode haniya hanttaarabata hassayidi qofan keehi unꞌꞌettiyogaakka gujjees. Haray atto, hayqqidaageetikka saꞌan deꞌanawu hayquwappe denddana. (Isiyaasa 25:8; 26:19; 35:5, 6) So asay zaarettidi issippe deꞌana, qassi olaa wode hanida hassayettiya hanttaaraba ubbay ‘xayiya ceegaba’ gidana.—Ajjuutaa 21:4.

XOOSSAY NAGARAA XAYSSANA

Xoossaa Kawotettay kumetta saꞌaa haariyo wode, asay ubbay A xalaalay tumu Xoossa gidida, ‘siiquwanne sarotettaa Xoossaa’ Yihoowayyoc goynnana. (2 Qoronttoosa 13:11) Asay sarotettan issippe waani deꞌanaakko tamaarana. (Isiyaasa 2:3, 4; 11:9) Tamaariyobaa oosuwan peeshshiya ubbay nagaray kaalettiyobaappe laꞌa kiyana.—Roome 8:20, 21.

XOOSSAY SEEXAANAANNE DAYDANTTATA XAYSSANA

Xoossaa Kawotettay asay olettanaadan denttettiya Seexaanaanne daydanttata xayssana. (Ajjuutaa 20:1-3, 10) Eti oottiyo iitabay xayi simmin, ‘sarotettay darana.’—Mazamure 72:7.

Xoossay olaanne asay kobattiyogaa xayssanawu gelido qaalay polettanaagaa ammanettana danddayaasa. Olaa xayssanawu ayyo wolqqaykka koshshaykka deꞌees.

• Olaanne makkalaa xayssiyo hayyoynne wolqqay Xoossaayyo deꞌees. (Iyyooba 9:4) I polana danddayenna aybinne baa.—Iyyooba 42:2.

• Xoossay asay waayettiyogaa beꞌanawu koyenna. (Isiyaasa 63:9) Qassi, “hanttaarabaa siiqiyaageeta i keehippe ixxees.”—Mazamure 11:5.

• Xoossay ba gelido qaalaa ubbatookka naagees; I worddotenna.—Isiyaasa 55:10, 11; Tiitu 1:2.