XANNAꞌIYO HUUPHE YOHUWA 10
MAZAMURE 31 Xoossaara Hemetta!
Yihoowagaadaaninne Yesuusaagaadan Qoppiyogaa Tamaara
“Kiristtoosi ba ashuwan nuuyyo waayettido gishshau, inttekka he qofaa ola miishshadan oiqqidi, intte intteyyo minnite.”—1 PHE. 4:1.
TAMAARANABAA
Kiitettida Pheexiroosi Yesuusadan qoppiyogaa waati tamaaridaakko, qassi nuunikka hegaadan waati oottana danddayiyakko beꞌana.
1-2. Yihoowa siiqiyogee aybiira gaytti, qassi Yesuusi hegaa waati bessidee?
“NEENI ne Xoossaa Yihoowa ne kumetta wozanaaninne ne kumetta shemppuwan, qassi ne kumetta qofaaninne ne kumetta wolqqan siiqana bessees.” (Mar. 12:30) Yesuusi Muuse Higgiyan odettida ubbaappe aadhdhiya azazoy hagaa gidiyogaa yootiis. Nuuni Yihoowa siiqiyo siiqoy nu wozanaara hegeekka, nu koyiyobaaranne nuuyyo siyettiyabaara gayttidaba gidiyogaa hassaya. Hegaa bollikka, hegee nu kumetta shemppuwan awu aqiyogaara, qassi nu abbiyara hegeekka nu wolqqaara gayttidaba. Shin, Yihoowa siiqiyogee nu qofaara hegeekka, nu qoppiyo ogiyarakka gayttidaba. Nuuni Yihoowa qofaa muleera akeekana danddayennaagee tuma. Shin nuuni Yesuusa qofaa xannaꞌiyogan Xoossaa qofaa akeekana danddayoos; ayssi giikko, Yesuusi ba Aawaagaadan qoppees.—1 Qor. 2:16.
2 Yesuusi ba kumetta qofan Yihoowa siiqiis. Yesuusi Xoossay I oottanaadan koyidobaa eriis; qassi hegee I keehi waayettanaadan oottiyaba gidikkokka I yaatanawu murttiis. Yesuusi ba Aawaa sheniya poliyogan xeelaa wottido gishshawu, ba halchchuwa polennaadan aybinne diggana mala eeno gibeenna.
3. Kiitettida Pheexiroosi Yesuusappe tamaaridobay aybee, qassi Pheexiroosi ba mala Kiristtaaneti waatanaadan minttettidee? (1 PHeexiroosa 4:1)
3 Pheexiroosinne kiitettida harati Yesuusaara daro wodiya aattiyonne A qofaa tamaariyo loꞌꞌo injjiya demmidosona. Pheexiroosi ayyaanay kaalettin xaafido koyro dabddabbiyan Kiristtaaneti Kiristtoosa qofaa ola miishshadan oyqqanaadan minttettiis. (1 PHeexiroosa 4:1 nabbaba.) Pheexiroosi, ‘ola miishshadan oyqqite’ giido wode wotaaddaratuura gayttida qaalaa goꞌettiis. Hegaa gishshawu, Kiristtaaneti Yesuusaagaadan qoppiyageeta gidikko, iita amuwanne Seexaanay haariyo ha alamiya eqettana danddayoosona.—2 Qor. 10:3-5; Efi. 6:12.
4. Ha huuphe yohuwan nuuni ay beꞌanee?
4 Nuuni Yesuusi qoppiyo ogiyanne aagaadan qoppanawu waatana danddayiyakko pilggana. Nuuni (1) ubbay issi qofan deꞌanaadan maaddiya Yihoowa qofaa qoppiyageeta, (2) nuna ziqqi oottiyageeta, qassi (3) woosaa baggaara Yihoowan ammanettiyogan suurebaa qoppiyageeta waani gidana danddayiyakko beꞌana.
YIHOOWAGAADAN QOPPA
5. Pheexiroosi issi wode Yihoowagaadan qoppibeennay ayba ogiyanee?
5 Pheexiroosi Yihoowagaadan qoppibeenna wodiya beꞌa. Yesuusi Yerusalaame baanaagaa, haymaanootiya kaalettiyageeti yan A oyqqanaagaa, I waayettanaagaanne hayqqanaagaa kiitettidaageetussi yootiis. (Mat. 16:21) Yesuusi Xoossaa asaa ashshiya, yaana geetettida Mase gidiyogaa Pheexiroosi erees. Hegaa gishshawu, Yihooway Yesuusi hayqqanaadan paqqadees giidi Pheexiroosi ammananawu keehi metootennan aggenna. (Mat. 16:16) Yaaniyo gishshawu Pheexiroosi Yesuusa baakko zaaridi: “Godawu, neessi qoppa; hegee ne bolli mule gakkenna” yaagiis. (Mat. 16:22) Pheexiroosi he allaalliya xeelliyagan Yihoowagaadan qoppibeenna gishshawu, Yesuusaara issi malabaa qoppibeenna.
6. Yesuusi Yihoowagaadan qoppiyogaa waati bessidee?
6 Yesuusi saluwan deꞌiya ba Aawaagaadan qoppiis. Yesuusi Pheexiroosawu hagaadan giis: “Seexaanay, taappe guyye aadhdha! Neeni asa qofappe attin, Xoossaagaa qoppenna gishshawu tawu xube gidaasa.” (Mat. 16:23) Pheexiroosi qoppidobay loꞌꞌo milatikkokka Yesuusi A zoriya siyibeenna. Nuuni hegaappe tamaariyobay deꞌees. Yesuusi Yihoowa sheniya polanawu waayettidi hayqqana koshshiyogaa eriis. He wode Pheexiroosi Xoossay qoppiyogaadan I qoppana koshshiyogaa tamaariis.
7. Pheexiroosi ba qofaa laammidi Yihoowagaadan qoppanawu koyidoogaa guyyeppe waati bessidee? (Misiliyakka xeella.)
7 Guyyeppe, Pheexiroosi Yihoowagaadan qoppanawu koyidoogaa bessiis. Hara biittaa asay Xoossaa asa gidiyo wodee gakkiis. Pheexiroosi Qornneliyosawu sabbakanaadan Xoossay azaziis; Qornneliyosi hara biittaa asatuppe Kiristtaane gidida koyro asa. Ayhudati darotoo hara biittaa asatuura gayttana koyenna gishshawu, Pheexiroosi hara biittaa asatuyyo sabbakanawu ba qofaa laammana koshshiis. Pheexiroosi Xoossay hara biittaa asaa xeelliyo ogiya akeekido wode ba qofaa laammiis. Yaatiyo gishshawu, Qornneliyosi Pheexiroosi baakko yaanaadan oychchin, “aynne sirennan” biis. (Oos. 10:28, 29) I Qornneliyosayyonne A soo asaayyo sabbakin eti haattan muukettidosona.—Oos. 10:21-23, 34, 35, 44-48.
Pheexiroosi Qornneliyosa soo gelees (Mentto 7 xeella)
8. Nuuni Yihoowagaadan qoppiyogaa waati bessana danddayiyoo? (1 PHeexiroosa 3:8)
8 Unddenna layttaappe simmin, Pheexiroosi ba mala Kiristtaaneti issi ‘qofan deꞌanaadan’ minttettiis. (1 PHeexiroosa 3:8 nabbaba.) Geeshsha Maxaafaappe tamaarido Yihoowa qofaadan nuuni qoppikko, nu ishanttuuranne michchonttuura issi qofan deꞌana danddayoos. Leemisuwawu, Yesuusi bana kaalliyageeti bantta deꞌuwan Xoossaa Kawotettaa kaseyanaadan zoriis. (Mat. 6:33) Hegaa gishshawu, ne galchchan deꞌiya issi uri aqinye gidanawu woy hara ubba wode haggaazuwan Yihoowawu oottanawu kuuyana danddayees. Nu haasayiyobay he uri ba halchchuwa agganaadan woy hidootaa qanxxanaadan oottiyaba gidennaadan naagettana koshshees. Nuuni A halchchuwabaa loꞌꞌobaa yootananne A maaddana koshshees.
NENA ZIQQI OOTTA
9-10. Yesuusi bana ziqqi oottiyogaa waati bessidee?
9 Yesuusi hayqqanaappe kasetiya qamman, bana ziqqi oottiyogaa xeelliyagan Pheexiroosanne kiitettida harata gitabaa tamaarissiis. Yesuusi hayqqanaappe kase etaara maana wurssetta qumaa giigissanaadan Pheexiroosanne Yohaannisa kasetidi kiittiis. Imattati qumaa maanaappe kase tohuwa meecettana mala eti keriyanne pooxaa giigissennan aggokkona. Shin bana ziqqi oottidi haratu tohuwa meeccanay oonee?
10 Yesuusi he oosuwa oottanawu mammottibeenna; I bana ziqqi oottidi he oosuwa oottiis. Ashkkarati oottiyobaa Yesuusi oottiyogaa kiitettidaageeti beꞌidi malaalettennan aggokkona. Yesuusi bollaara maayidobaa qaari wottidi, pooxaa ekkidi ba xeessan xaaxidi, keriyan haattaa tigidi eta tohuwa meecciyogaa doommiis. (Yoh. 13:4, 5) Yesuusi ba kiittido 12tu tohuwa meecciis. Hegee daro wodiya ekkennan aggenna. I bana kaddana Yihuda tohuwakka meecciis. Shin Yesuusi he ubbabaa bana ziqqi oottidi oottiis. Yaatidi Yesuusi etayyo hagaadan giis: “Taani oottidobaa akeekidetii? Intte tana ‘Asttamaariya,’ qassi ‘Godaa’ yaageeta. Taani Asttamaare, qassi Goda gidiyo gishshawu, intte hegaa giyogee bessiyaba. Hegaa gishshawu, taani Goday, qassi Asttamaaree intte tohuwa meeccido gishshawu, inttekka issoy issuwa tohuwa meeccana koshshees.”—Yoh. 13:12-14.
Nuna ziqqi oottiyogee nuuni nubaanne haratubaa qoppiyo ogiyara gayttidaba
11. Pheexiroosi bana ziqqi oottiyogaa waati bessidee? (1 PHeexiroosa 5:5) (Misiliyakka xeella.)
11 Yesuusi bana ziqqi oottidoogaappe Pheexiroosi tamaariis. Yesuusi saluwa bi simmin Pheexiroosi wobbe gididi yelettida issi bitaniya malaalissiya ogiyan pattiis. (Oos. 1:8, 9; 3:2, 6-8) Keehi cora asay he malaalissiyabaa beꞌidi Pheexiroosakko yiis. (Oos. 3:11) Shin Pheexiroosi asay hayttatanawu keehi koyiyo wogan diccikkokka, he asay A bonchchanaadan koyibeenna. Pheexiroosi, “Intte eriyonne ha beꞌiyo bitanee, nuuni Yesuusa sunttan ammaniyo gishshawu, qassi A sunttan minniis,” giido wode bana ziqqi oottidi eti Yihoowanne Yesuusa sabbanaadan yootiis. (Oos. 3:12-16) Pheexiroosi Kiristtaaneti banttana ziqqi oottana koshshiyogaa yootanawu dabddabbiyan goꞌettido qaalati Yesuusi pooxaa ba xeessan xaaxidi ba kiittidoogeetu tohuwa meeccido wodiya nuna hassayissees.—1 PHeexiroosa 5:5 nabbaba.
Pheexiroosi malaalissiyabaa ootti simmidi sabettana bessiyay A gidennan, Yihoowanne Yesuusa gidiyogaa yootiis. Nuunikka harati nuna sabbanaadan woy nuussi kushe zaaranaadan qoppennan loꞌꞌobaa oottiyogan nuna ziqqi oottiyogaa bessana danddayoos (Mentto 11-12 xeella)
12. Pheexiroosaagaadan, nuna ubbatoo ziqqi oottiyogaa waati bessana danddayiyoo?
12 Nuuni nuna ziqqi oottiyogan Pheexiroosa leemisuwa kaallana danddayoos. Nuna ziqqi oottanawu nuuni haasayiyobaappe aarobaa oottana koshshees. “Inttena ziqqi oottite” giyagawu Pheexiroosi goꞌettido qaalay nuuni nubaanne haratubaa qoppiyo ogiyara gayttidaba. Nuuni haratuyyo kehiyoy Yihoowanne asaa siiqiyo gishshataassappe attin, eti nuna sabbanaadan koyiyo gishshataassa gidenna. Harati nu oottiyobaa akeekana xayikkokka, nuuni Yihoowanne nu ishantta ufayssan haggaazikko nuna tumuppe ziqqi oottiyogaa bessoos.—Mat. 6:1-4.
‘SUURE QOFAY DEꞌIYOGAA’ GIDA
13. ‘Suure qofay deꞌiyogaa’ giyogee woygiyogaakko qonccissa.
13 ‘Suure qofay deꞌiyogaa’ giyogee woygiyogee? (1 PHe. 4:7) Suure qofay deꞌiyo issi Kiristtaanee Yihoowagaadan qoppiyogaa bessiya loꞌꞌobaa kuuyanawu bawu danddayettida ubbabaa oottees. Hegaa mala Kiristtaanee Yihoowara dabbotido dabbotay A deꞌuwan aybippekka aadhdhiyogaa erees. I babaa bessiyagaadan qoppees; qassi I ubbabaa erennaagaa akeekees. Hegaa bollikka, I bana ziqqi oottidi Yihoowa darotoo woossiyogan an ammanettiyogaa bessees.
14. Pheexiroosi issi wode Yihoowan ammanettennan aggidoy ayba ogiyanee?
14 Yesuusi hayqqanaappe kase qammi bana kaalliyageetuyyo, “Hachchi qammi ta bolli gakkanabaa gaasuwan intte ubbay xubettana” yaagiis. Pheexiroosi banan ammanettidi hagaadan giis: “Harati ubbay ne bolli gakkiyabaa gaasuwan xubettikkokka, taani mule xubettikke!” He qammi Yesuusi bana kaalliyageetuppe amaridaageeta hagaadan zoriis: “Naagi uttite, qassi mintti woossite.” (Mat. 26:31, 33, 41) Pheexiroosi he zoriya siyidaba gidiyakko, Yesuusa kaalliyagaa gidiyogaa guyyeppe xalatettan yootana danddayees. Shin Pheexiroosi ba Godaa kaddidi keehi zilꞌꞌettiis.—Mat. 26:69-75.
15. Yesuusi asa gididi deꞌido wurssetta qamman aggennan suurebaa qoppanawu waatidee?
15 Yesuusi ubbaban Yihoowan ammanettiis. Yesuusi wottiyobi baynnaagaa gidikkonne, zaari zaaridi Yihoowa woossiis. I yaatidoogee Yihooway koyiyobaa xalatettan oottanaadan maaddiis. (Mat. 26:39, 42, 44; Yoh. 18:4, 5) Yesuusi hayqqanaappe kase qammi darotoo woossidoogaa Pheexiroosi mule dogibeennaagee qoncce.
16. Pheexiroosi suure qofay deꞌiyo asa gididoogaa waati bessidee? (1 PHeexiroosa 4:7)
16 Guyyeppe Pheexiroosi Yihoowa woossiyogan an loytti ammanettiyagaa gidiis. Yesuusi hayquwappe denddi simmidi Pheexiroosinne I kiittido harati sabbakanaadan imettida oosuwa polanawu maaddiya geeshsha ayyaanaa eti ekkanaagaa yootiis. Gidikkokka, hegee hananaashin eti Yerusalaamen naaganaadan Yesuusi etawu yootiis. (Luq. 24:49; Oos. 1:4, 5) Pheexiroosi ay oottiiddi takkidee? Pheexiroosi ba mala Kiristtaanetuura ‘darotoo woossiis.’ (Oos. 1:13, 14) Guyyeppe Pheexiroosi ba koyro dabddaabbiyan ba mala Kiristtaaneti suure qofay deꞌiyogeeta gidanaadaaninne woosan Yihoowan ammanettanaadan minttettiis. (1 PHeexiroosa 4:7 nabbaba.) Pheexiroosi Yihoowan ammanettiyogaa tamaariisinne galchchawu tuussa mala gidiis.—Gal. 2:9.
17. Nuuni aggennan oottana koshshiyabay aybee? (Misiliyakka xeella.)
17 Nuussi suure qofay deꞌanaadan ubbatoo Yihoowa woossana koshshees. Nuuni issibaa metootennan oottana danddayiyabadan qoppiyo wodekka, maaduwawu Yihoowa woossana koshshiyogaa eroos. Hegaa gishshawu, gitabaa kuuyana koshshiyo wode ubban nuussi keehi loꞌꞌobay aybakko Yihooway eriyogaa ammanettiyo gishshawu kaaletuwa demmanawu A woossoos.
Pheexiroosi Yihoowa woossiyogan an ammanettiis. Nuunikka gitabaa kuuyana koshshiyo wodiyan maaduwawu Yihoowa woossiyogan suure qofay deꞌiyogeeta gidana danddayoos (Mentto 17 xeella)a
18. Nuuni Yihoowagaadan qoppiyageeta waani gidana danddayiyoo?
18 Yihooway nuussi aagaa mala eeshshay deꞌanaadan ootti medhdhido gishshawu A keehi galatoos. (Doo. 1:26) Wottiyobi baynna ogiyan nuuni Yihoowa milatana danddayennaagee tuma. (Isi. 55:9) Gidikkonne, nuuni Pheexiroosa leemisuwa kaalliyogan Yihoowagaadan qoppana danddayoos. Yaatiyogan ubbatoo Xoossaagaadan qoppiyageeta, nuna ziqqi oottiyageetanne suure qofay deꞌiyogeeta gidoos.
MAZAMURE 30 Ta Aawaa, Ta Xoossaanne Ta Miyyiyaa
a MISILIYA QONCCISSUWA: Issi michchiya oosuwa oysha zaaruwawu gelanaassi naagaydda ba wozanan woossawusu.