Yeemuwan Waata Sabbakanaakko Yesuusappe Tamaara

1. Banttana Kiristtaane giya haratuppe Yihoowa asay aybin dummatii?

BANTTANA Kiristtaane giyageetuppe Yihoowa ashkkarata dumma oottiya issibay yeemuwan sabbakiyogaa. (Tii. 2:14) Shin yeemuwan sabbakiyogee issi issitoo neessi metiyaba gidana danddayees. Galchchan cima gididi minni oottiya issi ishaagaadan neeyyokka siyettennan aggenna. I hagaadan giis, “Taani issi issitoo sabbakanawu koyikke.”

2. Ubbatoo yeemuwan sabbakiyogee metiyaba gidana danddayiyoy aybissee?

² Sabbakiyogaappe aaruwan Yihoowa haggaazuwan harabata oottiyogee nuna ufayssana danddayees. Ayssi giikko, Shiiquwa Addaraashata keexxiyogee woy bottokoniyogee, daafaban qohettida ishantta maaddiyogee woy hara wodetun eta minttettiyogee demissiyo loꞌꞌo ayfiya nuuni sohuwara beꞌiyo gishshawu, hegee ufayttanaadan oottees. Nuuni nu ishanttuura oottiyo wode sarotettan oottoos, qassi issoy issuwawu siiquwa bessoos. Hegaa bollikka, nuuni nu ishanttussi oottidobaa gishshawu, eti nashshiyogaa nuuni eroos. Hara baggaara qassi, amarida asa xalaalay siyanawu koyiyo issi moottan daro layttawu haggaazennan aggokko. Woy nu yootiyobaa ixxiya asay nunaara gayttana danddayees. Qassi wurssettay mati mati biyo wode nu yootiyobaa daro asay ixxanaagaa eroos. (Mat. 10:22) Sabbakiyo oosuwan yeemottiyogaa aggennaadan, ubba qassi hegaa yaa gujjanaadan nuna aybi maaddana danddayii?

3. Luqaasa 13:6-9n qonccida leemisuwappe Yesuusabaa ay tamaariyoo?

³ Sabbakiyo oosuwa waani yeemuwan oottanaakko Yesuusappe tamaarana danddayoos. Yesuusi saꞌan deꞌiyo wode asawu minnidi sabbakiyogaa aggibeenna. I saꞌan haggaazido wurssetta heeran keehi minni oottiis. (Luqaasa 13:6-9 nabbaba.) Balasiya mittaa dichchanawu heezzu layttaa baaxetikkonne ayba ayfenne demmibeenna woyne gadiyan oottiya bitaniyagaadan Yesuusikka Ayhudatussi heezzu layttaa gidiyagawu sabbakikkokka, etappe daroti A kaalliyageeta gidibookkona. Gidikkonne, woyne gadiyan oottiya bitanee balasiyan hidootaa qanxxibeennaagadan Yesuusikka asan hidootaa qanxxibeenna woy yeemottidi haggaaziyogaa aggibeenna. Ubba I Ayhudati mishiraachchuwan ammananaadan minnidi sabbakiis.

4. Nuuni xannaꞌana Yesuusi oottido oyddubati aybee?

⁴ Yesuusi saꞌan haggaazido wurssetta usuppun aginatun, kaseegaappe aaruwan yeemuwan waati sabbakidaakko ha huuphe yohuwan beꞌana. (Luq. 10:1) Nuuni Yesuusi tamaarissidobaappenne I oottidobaappe tamaariyaba gidikko, ubbatoo yeemuwan sabbakana danddayoos. Nuuni Yesuusappe tamaarana danddayiyo oyddubata ane beꞌoos: (1) I Yihoowa sheniyan xeelaa wottiis, (2) Geeshsha Maxaafaa hiraagaa akeekiis, (3) Yihoowa maaduwan ammanettiis, qassi (4) amaridaageeti I yootiyobaa siyanaagaa ubbatoo ammanettiis.

I YIHOOWA SHENIYAN XEELAA WOTTIIS

5. Yesuusi Xoossaa sheniya poliyogan xeelaa wottidoogaa waati bessidee?

⁵ “Kawotettaa mishiraachchuwa” Yesuusi yeemuwan sabbakiis; ayssi giikko, hegee I oottanaadan Xoossay koyiyoba gidiyogaa eriis. (Luq. 4:43) Yesuusi ba deꞌuwan aybippenne aaruwan haggaazuwa kaseyiis. Yesuusi saꞌan haggaazido wurssetta amarida aginatunkka “gita katamatunne guutta katamatu ubban” harata biidi tamaarissiis. (Luq. 13:22) Aagaadan mishiraachchuwa sabbakanaadan bana kaalliya haratakka I loohissiis.—Luq. 10:1.

6. Sabbakiyo oosoy nuuni oottana danddayiyo hara oosotuura waani gayttii? (Misiliyakka xeella.)

⁶ Ha wodiyankka, Yihoowaynne Yesuusi nuuni oottanaadan koyiyo waannabay mishiraachchuwa sabbakiyogaa. (Mat. 24:14; 28:19, 20) Nuuni Yihoowawu oottiyo ay oosoykka sabbakiyo oosuwara gayttees. Leemisuwawu, sabbakiyo oosuwa koshshiyaban maaddanawu nuuni Yihoowa dirijjitee goꞌettiyo keettata keexxoos woy Beeteelen haggaazoos. Daafabay gakkiyo wode nuuni nu ishanttanne michchontta koshshiyaban maaddoos; qassi hegee eti zaarettidi shiiqota shiiqanaadaaninne haggaazanaadan maaddees. Sabbakiyo oosoy nuuni oottanaadan Yihooway koyiyo keehi koshshiya ooso gidiyogaa nuuni hassayikko, nuussi danddayettida keenan ubbatoo sabbakanawu keehi koyoos. Hanggari biittan deꞌiya Yanosha giyo cimay hagaadan giis, “Sabbakiyo oosuwa nuuni Yihoowawu oottiyo hara ay oosuwankka laammana danddayokko; hegee nu waanna ooso.”

7. Nuuni aggennan sabbakanaadan Yihooway koyiyoy aybissee? (1 Ximootiyoosa 2:3, 4)

⁷ Asaa Yihoowagaadan xeelliyogan kaseegaappe aaruwan yeemuwan haggaazana danddayoos. Yihooway danddayettida keenan daro asay mishiraachchuwa siyidi ammananaadan koyees. (1 Ximootiyoosa 2:3, 4 nabbaba.) Hegaa gishshawu, ha shemppo ashshiya kiitaa yootiyogan nuuni kaseegaappe aaruwan qara gidanaadan I nuna loohissees. Leemisuwawu, Asaa Siiqite—Erissiyo Ashkkara Oottite giya brooshuree nuuni asay Yesuusa kaalliyageeta gidanaadan maaddanawu halchchidi haasayissiyogaa doommanawu maaddiya qofaa yootees. Asay haꞌꞌi Yihoowawu haggaaziyogaa doommana xayikkokka, gita waayiya wurssettappe kase eti Yihoowawu haggaaziyo injjiya demmana danddayoosona. Wodeppe eti nuuni yootidobaa hassayananne Yihoowawu haggaazanawu koyana danddayoosona. Shin hegee hanana danddayiyoy nuuni aggennan sabbakikko xalaala.

I GEESHSHA MAXAAFAA HIRAAGAA LOYTTI AKEEKIIS

8. Yesuusi ba wodiya maaraa goꞌettanaadan maaddida Geeshsha Maxaafaa hiraagati awugeetee?

⁸ Geeshsha Maxaafaa hiraagati waani polettanaakko Yesuusi akeekiis. I saꞌan heezzu layttanne bagga xalaala haggaazanaagaa erees. (Dane. 9:26, 27) I awude, qassi waani hayqqanaakkokka erees. (Luq. 18:31-34) Yesuusi kasetidi odettidabaa eriyo gishshawu, ba wodiya keehi loꞌꞌo ogiyan goꞌettiis. Hegaappe denddidaagan, Yesuusi bawu imettida oosuwa polanawu yeemuwan sabbakiis.

9. Geeshsha Maxaafaa hiraagata akeekiyogee nuuni ubbatoo yeemuwan sabbakanaadan nuna waati maaddii?

⁹ Geeshsha Maxaafaa hiraagata nuuni akeekiyogee yeemuwan sabbakanaadan nuna denttettees. Matan ha alamee xayanaagaa nuuni eroos. Ha wodiya hanotaynne asaa eeshshay Geeshsha Maxaafay kasetidi yootido ha wurssetta gallassaa malaata gidiyogaa nuuni eroos. ‘Wurssettaa wodiyan’ tohossa kawoynne huuphessa kawoy issoy issuwara olettanaageekka Geeshsha Maxaafan kasetidi odettiis. Inggilizenne Amarkkaa Waatta Kawotettay Raashiyaranne aara hashetiya kawotettatuura walaqettiyogee hegaa bessiyogaa nuuni akeekoos. (Dane. 11:40) Qassi Daaneela 2:43-45n odettida misiliya tohoy alamiyan wolqqaama gidida Inggilizenne Amarkkaa Waatta Kawotettaa qonccissiyogaa nuuni akeekoos. Geeshsha Maxaafan kasetidi odettidaagaadan, mata wode—keehi mata wode—Xoossaa Kawotettay asaa kawotettaa muleera xayssanaagaa nuuni ammanettoos. Ha hiraagati ubbay nuuni wurssettay keehi matido wodiyan deꞌiyogaa bessiyo gishshawu, mishiraachchuwa sabbakanawu nu wodiya loytti goꞌettana koshshees.

10. Geeshsha Maxaafaa hiraagati nuuni yeemuwan sabbakanaadan hara ay ogetun denttettiyonaa?

¹⁰ Geeshsha Maxaafaa hiraagati nuuni yeemuwan yootiyo kiitaakka qonccissoosona. Dominikan Ripubiliken haggaaziya Keero giyo michchiya hagaadan gaasu, “Yihooway sinttappe oottanawu qaalaa gelido keehi ufayssiyabata taani qoppiyo wode, hegaabaa haratussi yootana koshshiyogaa akeekays.” A gujjada hagaadan gaasu: “Ha wodiyan asaa gakkiya metuwa taani beꞌiyo wode, etawukka Yihooway qaalaa gelido ufayssiyabata eti erana koshshiyogaa taani akeekays.” Geeshsha Maxaafaa hiraagati A oosuwa oottanaadan Yihooway nuna maaddiiddi deꞌiyogaa bessoosona; qassi hegee nuuni aggennan mishiraachchuwa sabbakanaadan minttettees. Hanggari biittan deꞌiya Liyeela hagaadan gaasu: “Isiyaasa 11:6-9y mishiraachchuwa siyanawu koyennaba milatiya asatussikka taani mishiraachchuwa yootanaadan denttettiis. Yihooway maaddin ay asinne laamettana danddayiyogaa taani erays.” Qassi Zambbiyan deꞌiya Kiristtoofera giyo ishay hagaadan giis: “Marqqoosa 13:10n kasetidi odettidaagaadan mishiraachchoy kumettan saꞌan aakkiiddi deꞌees; qassi hegee polettanaadan maaddiyogee tawu gita bonchcho.” Neeni aggennan sabbakanaadan nena denttettiya Geeshsha Maxaafaa hiraagati awugeetee?

I YIHOOWA MAADUWAN AMMANETTIIS

11. Yesuusi ubbatoo yeemottidi mishiraachchuwa sabbakanawu Yihoowa maaduwan ammanettana koshshidoy aybissee? (Luqaasa 12:49, 53)

¹¹ Yesuusi yeemuwan sabbakanaadan Yihooway maaddanaagaa ammanettiis. Yesuusi haratuyyo bonchchuwan sabbakikkokka, Kawotettaa mishiraachchoy amarida asay hanqqettanaadan oottanaagaanne daroti keehi eqettanaagaa eriis. (Luqaasa 12:49, 53 nabbaba.) Haymaanootiya kaalettiyageeti Yesuusi tamaarissiyobaa dosibeenna gishshawu, A woranawu darotoo malidosona. (Yoh. 8:59; 10:31, 39) Gidikkokka, Yihooway aara deꞌiyogaa I eriyo gishshawu aggennan sabbakiis. I hagaadan giis: “Tana Kiittidaagee tanaara deꞌees; taani A ufayssiyabaa ubbatoo oottiyo gishshawu, I tana tarkka aggiigibeenna.”—Yoh. 8:29.

12. Yesuusi bana kaalliyageeti naaqoy eta gakkiyo wodiyankka aggennan sabbakanawu giigettanaadan eta waati maaddidee?

¹² Yesuusi bana kaalliyageeti Yihooway eta maaddana danddayiyogaa ammanettanaadan eta hassayissiis. Naaqoy gakkiyo wodiyankka Yihooway eta maaddanaagaa Yesuusi etawu zaari zaaridi yootiis. (Mat. 10:18-20; Luq. 12:11, 12) Daroti mishiraachchuwa eqettanaagaa Yesuusi eriyo gishshawu, bana kaalliyageeti cincca gidanaadan yootiis. (Mat. 10:16; Luq. 10:3) Eti yootiyobaa asay siyanawu koyennaba gidikko, wolqqanttana koshshennaagaakka Yesuusi etawu yootiis. (Luq. 10:10, 11) Qassi asay eta naaqqiyo wode eti baqatanaadan Yesuusi etawu yootiis. (Mat. 10:23) Yesuusi yeemottiyagaanne Yihoowan ammanettiyagaa gidikkokka, danddayettiyo wodiyan qohiyabatuppe naagettiis.—Yoh. 11:53, 54.

13. Yihooway nena maaddanaagaa neeni ammanettana danddayiyoy aybissee?

¹³ Ha wodiyan eqettiyageeti deꞌishinkka, ubbatoo yeemuwan sabbakanaadan nuussi Yihoowa maadoy koshshees. (Ajj. 12:17) Yihooway nena maaddanaagaa neeni ammanettana danddayiyoy aybissee? Yohaannisa shemppo 17n odettida Yesuusi woossido woosaa beꞌa. Kiitettidaageeta Yihooway naaganaadan Yesuusi woossiis; qassi Yihooway he woosaa zaariis. Naaqoy deꞌshinkka, yeemuwan sabbakanaadan kiitettidaageeta I waati maaddidaakko Oosuwa maxaafay yootees. Yesuusi kiitettidaageeti sabbakiyobaa siyidi ammanana asatakka Yihooway naaganaadan woossiis. I nebaakka woossiis. Yihooway Yesuusa woosaa zaariyogaa aggibeenna; I kiitettidaageeta maaddidoogaadan nenakka maaddana.—Yoh. 17:11, 15, 20.

14. Waayissiya wodetunkka nuuni yeemuwan sabbakanaagaa ammanettana danddayiyoy aybissee? (Misiliyakka xeella.)

¹⁴ Wurssettay mati mati biyo wode nuuni mishiraachchuwa sabbakiyogee keehi metiyaba gidana danddayees. Shin Yesuusi nuuni he oosuwa ubbatoo yeemottidi oottanawu koshshiya maaduwa demmanaagaa yootiis. (Luq. 21:12-15) Yesuusaagaadaaninne I kiittidoogeetugaadan, nu yootiyobaa siyanawu woy siyennan agganawu asay bawu kuuyanaadan oottoos; qassi etaara palamettokko. Nu oosoy teqettido biittatunkka nu ishantti bantta wolqqan gidennan, Yihoowan ammanettiyo gishshawu, mishiraachchuwa aggennan yootoosona. Koyro xeetu laytta Kiristtaanetussi Yihooway wolqqaa immidoogaadan, I oosoy gidana gaana gakkanaashin ‘ubba asawu’ sabbakanaadan nuussi wolqqaa immees. (2 Xim. 4:17) Neeni Yihoowan ammanettikko, ubbatoo yeemuwan sabbakanaagaa ammanettana danddayaasa.

I UBBATOO LOꞌꞌOBAA QOPPIIS

15. Mishiraachchuwa sabbakiyogee loꞌꞌo ayfiya demissanaagaa Yesuusi ammanettidoogaa bessiyabay aybee?

¹⁵ Mishiraachchuwa siyanawu koyiya asay deꞌanaagaa Yesuusi ammanettiis. Hegee I ubbatoo yeemuwan sabbakanaadan maaddiis. Leemisuwawu, Yesuusi 30 M.L., wurssetta heeran, daroti mishiraachchuwa siyana koyiyogaa akeekiis; qassi I eta cahawu gakkida kattan leemissiis. (Yoh. 4:35) I issi laytta gidiya wodiyappe simmin bana kaalliyageetussi hagaadan giis: “Cahawu gakkida kattay daro.” (Mat. 9:37, 38) I guyyeppe zaarettidikka hagaadan giis: “Cahawu gakkida kattay daro . . . Kattaa cakkanawu oosanchchata kiittana mala, cahaa oosuwa Godaa woossite.” (Luq. 10:2) Yesuusi mishiraachchuwa siyanawu koyiya asay deꞌiyogaa ammanettiis; qassi I asay siyido wode ufayttiis.—Luq. 10:21.

16. Yesuusi yootido leemisoti haggaazuwa xeelliyagan I loꞌꞌobaa qoppidoogaa waati qonccissiyonaa? (Luqaasa 13:18-21) (Misiliyakka xeella.)

¹⁶ Yesuusi bana kaalliyageeti sabbakiyobay loꞌꞌo ayfiya demissanaagaa etawu yootiyogan bantta oosuwan yeemottiyageeta gidanaadan maaddiis. I yootido ha naaꞌꞌu leemisota beꞌa. (Luqaasa 13:18-21 nabbaba.) Yesuusi Kawotettaa mishiraachchuwa diccidi woggaa gidiya qii mittaa ayfiyan leemisiis. I he leemisuwa goꞌettidoy Kawotettaa mishiraachchoy malaalissiya ogiyan aakkanaagaanne aggennan diccanaagaa tamaarissanaassa. Qassi Kawotettaa mishiraachchoy ubbasaa gakkanaagaanne harati sohuwara akeekana xayikkokka asay laamettanaadan oottiyogaa qonccissanawu Yesuusi irshshuwa leemisuwa goꞌettiis. Hegaa gishshawu, Yesuusi bana kaalliyageeti yootiyo mishiraachchoy daro asaa maaddanaagaa etawu yootiis.

17. Nuuni haggaazuwabaa ubbatoo loꞌꞌobaa qoppana koshshiyoy aybissee?

¹⁷ Sabbakiyo oosoy kumettan saꞌan daro asaa maaddiiddi deꞌiyogaa nuuni loytti qoppiyogee ubbatoo sabbakanaadan nuna denttettees. Mishiraachchuwa siyanawu koyiya daro miiloone asay layttan layttan nunaara Godaa Kahuwa baalaa bonchchees; qassi Geeshsha Maxaafaa xannaꞌees. Daro shaꞌu asati haattan muukettidi nunaara haggaazoosona. Ay keena asay mishiraachchuwa siyana danddayiyakko nuuni erokko; shin gita waayiyappe attana zawi baynna asaa Yihooway shiishshiiddi deꞌiyogaa eroos. (Ajj. 7:9, 14) Cahaa oosuwa Goday Yihooway daro asay mishiraachchuwa siyanaagaa ammanettiyo gishshawu nuuni aggennan sabbakoos.

18. Harati nubaa ay akeekanaadan koyiyoo?

¹⁸ Yesuusa kaalliyageeti ubbatoo yeemottidi sabbakiyogan erettoosona. Leemisuwawu, kiitettidaageeti xalatettaaninne yeemuwan sabbakido gishshawu, asay “eti kase Yesuusaara zuppettidoogaa [akeekiis.]” (Oos. 4:13) Haggaazuwan nuna beꞌiya asati nuunikka Yesuusaagaadan yeemottiyogaa akeekana danddayoosona.