Ammaniyogaadan Deꞌa

1. Phawuloosi ba deꞌuwan oottidoban keehi ufayttidoy aybissee?

KIITETTIDA Phawuloosi matan hayqqanaagaa erikkokka, ba oottidobaa qoppidi keehi ufayttiis. I hagaadan giis: “Ta wottaanne woxxada wurssaas; ammanuwaakka naagaas.” (2 Xim. 4:6-8) Phawuloosi ba deꞌuwan Yihoowawu haggaazanawu dooriyogan loꞌꞌobaa kuuyiis; qassi Yihooway an ufayttiyogaa ammanettiis. Nuunikka loꞌꞌobaa kuuyanawunne Yihoowa ufayssanawu koyoos. Nuuni waatidi hegaadan oottana danddayiyoo?

2. Ammaniyogaadan deꞌiyogaa giyogee woygiyogee?

² Phawuloosi babaanne ammanettida hara Kiristtaanetubaa odiiddi “nuuni ammaniyogaadan deꞌoosippe attin, beꞌiyogaadan [deꞌokko]” yaagiis. (2 Qor. 5:7) Phawuloosi woyganawu koyidee? Yihoowa ammanenna uri beꞌiyobaa, siyiyobaanne baayyo siyettiyabaa xalaalan kuuyees. Shin Yihoowa ammaniya asi issibaa kuuyiyo wode Yihoowa ufayssiyabaa qoppees. I Geeshsha Maxaafay yootiyo Yihoowa zoriya kaallikko, ha wodiyan A deꞌoy ufayssiyagaa gidanaagaanne sinttappe Yihooway A darissidi anjjanaagaa ammanettiyogaa ba oosuwan bessees.—Maz. 119:66; Ibr. 11:6.

3. Ammaniyogaadan deꞌiyogee ayba goꞌꞌaa demissii? (2 Qoronttoosa 4:18)

³ Nuuni ubbay issi issitoo nu beꞌiyoban, siyiyobaaninne nu qofan ammanettidi kuuyoos. Shin nuuni gitabaa kuuyiyo wode beꞌiyoban woy siyiyoban xalaala ammanettikko, balabaa oottana danddayoos. Aybissi? Nuuni beꞌiyobaynne siyiyobay nuna issi issitoo cimmana danddayiyo gishshataassa. Nuuni cimettenna wodiyankka beꞌiyogan xalaala deꞌikko, Xoossaa sheniya woy zoriya sheneho gaana danddayoos. (Era. 11:9; Mat. 24:37-39) Shin nuuni ammaniyogaadan deꞌikko, ‘Godaa ufayssiyabaa’ kuuyana danddayoos. (Efi. 5:10) Xoossaa zoriya kaalliyogee nuuni woppu gaanaadaaninne tumuppe ufayttanaadan oottees. (Maz. 16:8, 9; Isi. 48:17, 18) Qassi nuuni ubbatoo ammaniyogaadan deꞌikko merinaa deꞌuwa demmana.—2 Qoronttoosa 4:18 nabbaba.

4. Issi uri ammaniyogaadan deꞌiyakko woy beꞌiyogaadan deꞌiyakko waata shaakki erana danddayii?

⁴ Nuuni ubbay nuna hagaadan oychchana koshshees. Taani issibaa kuuyiyo wode aybin ammanettiyanaa? Taani beꞌiyoba xalaalan ammanettiyanaayye, Yihoowa zoriya kaalliyanaa? Nuuni ammaniyogaadan ubbatoo deꞌana danddayiyo heezzu hanotata ane beꞌoos: nuuni oosuwa dooriyo wode, aqo lagge dooriyo wodenne Yihoowa dirijjitiyappe nuuyyo kaaletoy imettiyo wode. He hanotatun nuuni loꞌꞌobaa kuuyanawu qoppana koshshiyabata beꞌana.

OOSUWA DOORIYO WODE

5. Oosuwa dooriyo wode nu ay qoppana koshshii?

⁵ Nuuni ubbay nuussinne nu soo asawu koshshiyabaa kunttanawu koyoos. (Era. 7:12; 1 Xim. 5:8) Issi issi oosoti daro miishshaa demissoosona. He oosoti oosanchchay galla galla koshshiyabaa demmanaadaaninne sinttappe goꞌettanawu amarida miishshaa qoraphphanaadan oottana danddayoosona. Hara oosoti qassi demissiyo miishshay guutta gidiyo gishshawu, oosanchchay ba soo asawu koshshiyaba xalaala kunttiyobaa demmees. Nuuni ay mala oosuwa oottanaakko dooriyo wode, hegee ay keena miishshaa demissiyakko qoppiyogee qoncce. Shin nu qoppiyobay hegaa xalaala gidikko beꞌiyogaadan deꞌiya asa gidoos.

6. Nuuni oosuwa dooriyo wode ammaniyogaadan waani deꞌana danddayiyoo? (Ibraawe 13:5)

⁶ Nuuni ammaniyogaadan deꞌiyageeta gidikko, he oosoy Yihoowara nu dabbotido dabbotaara waani gayttana danddayiyakkokka qoppoos. Nuna hagaadan oychchana danddayoos: ‘He oosoy Yihooway ixxiyobaara gayttidabee?’ (Lee. 6:16-19) ‘He oosoy ta goynuwawu xube gidii, qassi taani so asaappe adussa wodiyawu haakkanaadan oottii?’ (Pili. 1:10) He oyshatussi ee gaada zaarikko, ooso demmiyogee metiyaba gidikkokka he oosuwa oottennan aggiyogee loꞌꞌo. Nuuni ammaniyogaadan deꞌiyo gishshawu, nuussi koshshiyabaa Yihooway kunttanaagaa aynne sirennaagaa bessiyabaa kuuyoos.—Mat. 6:33; Ibraawe 13:5 nabbaba.

7-8. Tohossa Amarkkan deꞌiya issi ishay ammaniyogaadan waani deꞌidee? (Misiliyakka xeella.)

⁷ Tohossa Amarkkan deꞌiya Javiiraa giyo ishay ammaniyogaadan deꞌiyogee keehi koshshiyogaa akeekiis. I hagaadan giis: “Taani kase demmiyogaappe naaꞌꞌu kushe dariya miishshaa demissiyanne ufayssana danddayiya oosuwa oottanawu oychchaas.” Shin Javiiri aqinye gidanawukka wozanappe koyiis. I gujjidi hagaadan giis: “Taani oosuwa oysha zaaruwawu xeesettaas. Taayyo keehi loꞌꞌobay aybakko Yihooway eriyogaa ta ammanettido gishshawu oysha zaaruwappe kase maaduwawu Yihoowa woossaas. Taani loꞌꞌo oosuwa koyikkokka, hegee taani ayyaanaaban kessido halchchuwa polanaadan maaddana xayikko hegaa koyikke.”

⁸ Javiiri hagaadan giis: “Oysha zaaruwa wode, oosuwa alaafee taani ubbatoo gujo saatiya oottana koshshiyogaa yootiis. Ta goynuwappe denddidaagan taani hegaadan oottana danddayennaagaa awu kehatettan qonccissaas.” Javiiri he oosuwa oottennan agganawu kuuyiis. Naaꞌꞌu saaminttaappe simmin, I aqinye gididi haggaaziyogaa doommiis. Qassi he laytti guyyeppe, amarida saatiyawu oottiyo oosuwa demmiis. I hagaadan giis: “Yihooway ta woosaa siyidi aqinyetettawu haniya oosuwa taani demmanaadan maaddiis. Taani he oosuwa demmido gishshawu keehi ufayttays; he oosoy taani Yihoowawu haggaazanawunne ta ishantta maaddanawu daro wodiya demmanaadan oottees.”

9. Tiraazorappe neeni ay tamaaray?

⁹ Nuuyyo haꞌꞌi deꞌiya oosoy ammaniyogaadan deꞌennaadan nuna diggiyogaa nuuni akeekikko waatana koshshii? Konggon deꞌiya Tiraazora hanotaa ane beꞌoos. I hagaadan giis: “Ta ooratta oosoy taani ta deꞌuwan zaarettada mule demmana danddayennaagaa. Taani kase demmiyogaappe heezzu kushe dariya miishshaa demmays; qassi asay tana bonchchees.” Shin Tiraazori gujo saatiya oottiyo gishshawu ubbatoo shiiqota shiiqenna. Qassi aara oottiyageeti oosuwara gayttidaagan I worddotanaadan iisettoosona. Tiraazori oosuwa agganawu koyiis; shin oosoy baynna asa gidiyogee A hirggissiis. Yaatin A maaddidabay aybee? I hagaadan giis: “Taani ta oosuwanne demmiyo miishshaa xayikkokka, Yihooway tawu koshshiyabaa kunttanaagaa akeekanaadan Imbbaaqooma 3:17-19y tana maaddiis. Hegaa gishshawu ta oosuwa aggaas.” I gujjidikka hagaadan giis: “Daro miishshaa demissiya oosuwawu, issi asi aybaanne haray atto ba soo asaanne ba goynuwakka aggiigana koshshees giidi daro oosanchchati qoppoosona. Taani Yihoowara dabbotido dabbotay moorettennaadan naagido gishshawu keehi ufayttays. Issi layttaappe guyyiyan, taayyo koshshiyabaa kunttanawu gidiya miishshaa demmanaadaaninne Yihoowawu haggaaziyo daro wodee tawu deꞌanaadan oottiya loꞌꞌo oosuwa demmana mala I tana maaddiis. Nuuni nu deꞌuwan Yihoowa kaseyiyo wode issi issitoo miishshaa metootana danddayikkokka, Yihooway nuussi koshshiyabaa kunttees.” Ee, nuuni Yihoowa zoriyaninne I gelido qaalan ammanettikko, ubbatoo ammaniyogaadan deꞌana; qassi I nuna anjjana.

AQO LAGGE DOORIYO WODE

10. Aqo lagge dooriyo wode beꞌiyogaadan deꞌanaadan oottana danddayiyabay aybee?

¹⁰ Aqo deꞌoy Yihoowa imota; qassi aqo oyqqanawu koyiyogee wottin deꞌiyaba. Issi michchiya bawu haniya aqo laggiyabaa qoppiyo wode, issi ishaa eeshshaa, qottaa, awu deꞌiya sunttaa, miishshaa, so asaa aawatettaa, qassi O ufayssiyo hanotaa akeekana danddayawusu.b Ha ubbabati keehi koshshoosona. Shin A qoppiyobay hegeetu xalaala gidikko, beꞌiyogaadan deꞌana danddayawusu.

11. Aqo lagge dooriyo wode ammaniyogaadan deꞌiyogaa waati bessana danddayiyoo? (1 Qoronttoosa 7:39)

¹¹ Aqo lagge dooriyo wode A zoriya kaalliya michchonttuuninne ishanttun Yihooway keehi ufayttees! Leemisuwawu, eti aqo oyqqanawu qoppanaappe kase gamma gakkanaashin naagiyogan Geeshsha Maxaafaa zoriya oosuwan peeshshoosona. (1 Qor. 7:36) Yihooway issi loꞌꞌo azinawu woy loꞌꞌo machcheeyyo deꞌanaadan yootido eeshshati eti aqo oyqqanawu qoppiyo uraayyo deꞌiyakkonne yiggoosona. (Lee. 31:10-13, 26-28; Efi. 5:33; 1 Xim. 5:8) Yihoowa Markka gidenna uri eta siiqiyogaa bessikko, eti 1 Qoronttoosa 7:39n odettida ‘Godaa xalaalan’ aqo oyqqana bessiyogaa yootiya zoriya azazettoosona. (Nabbaba.) Eta qofissiyabaa Yihooway ooppenne aaruwan kunttanaagaa eti eriyo gishshawu hegaadan oottoosona.—Maz. 55:22.

12. Rosippe ay tamaaray?

¹² Kolombbiyan aqinye gidada haggaaziya Roso giyo michchee hanotaa beꞌa. Oosuwan darotoo iira gayttiya Yihoowa Markka gidenna issi izaawu O siiqiyogaa doommiis. Rosakka A siiqaasu. A hagaadan gaasu: “I keehi loꞌꞌo asa milatees. I ba heeraa asaa maaddeesinne suure deꞌuwa deꞌees. I tawu kehees. I Yihoowa Markka gidennappe attin, ta azina gidiya urawu deꞌanaadan koyiyo eeshshati awu deꞌoosona.” A gujjada hagaadan gaasu: “Taani A gelanawu koyennaagaa yootanawu keehi metootaas. He wode taani boorasaas; qassi aqo oyqqanawu koyikkokka, Yihoowa Markka gidida isha demmana danddayabeykke.” Shin Rosa beꞌana danddayiyobaa xalaalan xeelaa wottabeykku. A kuuyiyobay Yihoowara dabbotido dabbotaara waani gayttiyakko wotta dentta qoppaasu. Hegaa gishshawu he izaawura gayttiyogaa muleera aggada, Yihoowa haggaazuwan oosoy daridooro gidaasu. Hegaappe simmin darin takkennan A Kawotettaa Mishiraachchuwa Yootiyageetu Timirtte Keettan tamaaranaadan shoobettaasu, qassi haꞌꞌi dumma aqinye gidada haggaazawusu. Rosa hagaadan gaasu: “Yihooway tana daroban ufayssiis.” Nuna qofissiya allaalletun ammaniyogaadan deꞌiyogee issi issitoo metikkokka, yaatiyogee ubbatookka nuna maaddees.

YIHOOWA DIRIJJITIYAPPE KAALETOY IMETTIYO WODE

13. Yihoowa dirijjitiyappe nuuyyo kaaletoy imettiyo wode nuuni waanana danddayiyoo?

¹³ Nuuni Yihoowawu haggaazanaadan maaddiya kaaletuwa darotoo nuussi woradaa xomoosiya ishay, macara biiroynne Oosuwa Kaalettiya Citay immees; qassi cimatikka immoosona. Issi kaaletoy nuussi imettanaadan oottida gaasuwa nuuni issi issitoo akeekana xayikko shin? He kaaletoy loꞌꞌo gidiyogaa nuuni siriyogaa doommana danddayoos. Ubba nuuni kaaletuwa immida ishanttu balan xeelaa wottana danddayoos.

14. Yihoowa dirijjitiyappe nuussi kaaletoy imettiyo wode ammaniyogaadan deꞌanaadan nuna aybi maaddii? (Ibraawe 13:17)

¹⁴ Yihooway ba dirijjitiya kaalettiyogaanne nuussi keehi loꞌꞌobay aybakko Yihooway eriyogaa nuuni ammanoos. Hegaa gishshawu, nuuni ufayttiiddi sohuwara azazettoos. (Ibraawe 13:17 nabbaba.) Nu azazettiyogee galchchaa issippetettaa naagiyogaa eroos. (Efi. 4:2, 3) Aawatettay deꞌiyo ishantti nagaranchcha gidikkokka, nuuni etawu azazettikko Yihooway nuna anjjanaagaa ammanettoos. (1 Sam. 15:22) Giigana koshshiyabaa I ba keerido wodiyan giigissana.—Mik. 7:7.

15-16. Imettida kaaletuwa sirikkokka, ammaniyogaadan deꞌana mala issi ishaa maaddidabay aybee? (Misiliyakka xeella.)

¹⁵ Ammaniyogaadan deꞌiyogee demissiyo goꞌꞌaa qonccissiya issi hanotaa beꞌa. Peerun unddenna asay Isppeene doonaa haasayiyaba gidikkokka, daroti bantta biittaa doonata haasayoosona. Hegeetuppe issoy Kechuwa doonaa. Kechuwa doonaa haasayiya ishanttinne michchontti moottan he doonaa haasayiyageeta unddenna layttawu koyidosona. Gidikkonne, kawotettay kessido higgiyawu azazettanawu asaa koyiyo ogiyara gayttidaagan issi issibaa laammida. (Roo. 13:1) Hegaappe denddidaagan, amaridaageeti hegee he moottan oosettiya oosoy deexanaadan oottees giidi qoppidosona. Gidikkonne, ishantti imettida kaaletuwa kaallido wode, Kechuwa doonaa haasayiyageeta demmanawu eti oottido baaxiya Yihooway anjjiis.

¹⁶ Hegaabay qofissidoogeetuppe issoy Kechuwa doonaa goꞌettiya galchchaa cima gidida Keviina. I hagaadan giis: “‘Kechuwa doonaa haasayiya asaa haꞌꞌi waati demmanee?’ gaada qoppaas.” Keviini waatidee? I hagaadan giis: “Taani Leemiso 3:5 qoppaas. Qassi Muusebaakka qoppaas. Yihooway deexxiya kaaletuwa awu immiis. Muusee Gibxxeppe kiyida Israaꞌeelata Zoꞌo Abbaakko kaaletti efaanaadan Yihooway azaziis. Yan eta yedettiya Gibxxetuppe eti kessi ekkana danddayennaba milatiis. Gidikkokka I azazettiis; qassi Yihooway eta ashshanawu malaalissiyabaa oottiyogan A anjjiis.” (Kes. 14:1, 2, 9-11, 21, 22) Keviini laamettida ogiyan haggaazanawu eeno giis. Hegee ayba ayfe demissidee? I hagaadan giis: “Yihooway nuna anjjido ogee tana keehi malaalissiis. Kase nuuni haggaazuwan daro saatiya hemettidi Kechuwa doonaa haasayiya issi woy naaꞌꞌu asa xalaala issi issitoo demmoos. Shin haꞌꞌi Kechuwa doonaa haasayiya daro asay deꞌiyo heeraa boos. Hegaappe denddidaagan, darotuura tobboos, darota zaaretti oychchoosinne Geeshsha Maxaafaa xannaꞌissoos. Qassi daroti nunaara shiiqota shiiqoosona.” Ee, nuuni ammaniyogaadan deꞌikko, Yihooway nuna ubbatoo woytana.

17. Neeni ha huuphe yohuwappe ay tamaaradii?

¹⁷ Nuuni heezzu hanotatun ubbatoo ammaniyogaadan waani deꞌana danddayiyakko beꞌida. Shin nuuni nu deꞌo macara ubban, leemisuwawu allaxxiyobaa woy wodiya aattiyobaa dooriyo wode, qassi timirttiyabaa woy naata dichchiyogaabaa kuuyiyo wode ammaniyogaadan deꞌana koshshees. Nuuni kuuyiyobay ayba gidikkokka, nu beꞌana danddayiyoban xalaala gidennan, Yihoowara nu dabbotido dabbotan, A zoriyaninne I nuussi koshshiyabaa kunttanawu gelido qaalan ammanettana koshshees. Nuuni yaatiyo wode, “GODAA nu Xoossaa sunttan meri merinau hemettana.”—Mik. 4:5.