Geeshsha Maxaafaa Koyro Timirttetuppe Haꞌꞌikka Tamaarana Danddayay?

1. Neeni tumaa koyro erido wode Geeshsha Maxaafaa timirtteti ne waananaadan oottidonaa?

NUUNI Geeshsha Maxaafaappe tamaarido koyro timirtteti nu deꞌuwa laammidosona. Leemisuwawu, nuuni Xoossaa sunttay Yihoowa gidiyogaa tamaarido wode, aara dabbotiyogaa doommida. (Roo. 10:13) Hayqqida uri waaniyakko nuuni erido wode, nu siiqiyo hayqqidaageeti waayettiyonaashsha giidi hirggiyogaa aggida. (Era. 9:10) Qassi nuuni Xoossay saꞌaa Gannate oottanawu qaalaa gelidoogaa tamaarido wode, sinttanaabaa hirggiyogaa aggida. Nuuni deꞌana danddayiyoy guutta wodiyawu, hegeekka 70 woy 80 layttawu gidennan, merinawu gidiyogaa ammanettida.—Maz. 37:29; 90:10.

2. Geeshsha Maxaafaa koyro timirtteti kayma Kiristtaanetakka maaddiyogaa 2 Pheexiroosa 1:12, 13y waati bessii?

² Geeshsha Maxaafaa koyro timirtteta nuuni mule xaasayi xeellana koshshenna. Kiitettida Pheexiroosi ba naaꞌꞌantto dabddaabbiya ‘tuman minni eqqida’ Kiristtaanetuyyo xaafiis. (2 Pheexiroosa 1:12, 13 nabbaba.) Shin he wode ishantta tumaappe wora zaaranawu koyiya iita asati galchchan deꞌoosona. (2 Phe. 2:1-3) He asati tamaarissiyo worddobaappe ishanttinne michchontti banttana naagana mala Pheexiroosi minttettanawu koyiis. Hegaa gishshawu, I eti kase tamaarido timirttetuppe amaridaageeta eta hassayissiis. He timirtteti eti wurssettaa gakkanaashin ammanettidi deꞌanaadan maaddana.

3. Ubba Kiristtaanetikka Geeshsha Maxaafaa koyro timirtteta ubbatoo loytti qoppana koshshiyoy aybissee? Leemisuwa yoota.

³ Nuuni tuman adussa layttaa deꞌikkokka, Geeshsha Maxaafaa koyro timirttetuppe haꞌꞌikka goꞌettana danddayoos. Leemisuwawu: Qumaa kattiyogan keehi gooba gidida issi aayyiyanne I naꞌiya qumaa kattanawu issi malabata goꞌettana danddayoosona. Shin kattiyogan meezee deꞌiyo he aayyiya he qumaa kattanawu koshshiyabata goꞌettada oorattanne malꞌꞌiya qumaa dumma dumma ogiyan waata giigissanaakko loddan loddan eraasu. Hegaadankka, Yihoowawu adussa wodiyawu haggaazidaageetinne Geeshsha Maxaafaa xannaꞌiyogaa mati doommidaageeti Geeshsha Maxaafaa tumaa dumma dumma ginan xeellana danddayoosona. Nuuni haattan muukettoosappe haa simmin nu hanotay woy nu haggaazo maatay laamettidoogee qoncce. Nuuni kase tamaarido Geeshsha Maxaafaa timirtteta loytti qoppiyo wode hegeeti nuna maaddana danddayiyo ooratta ogeta akeekoos. Geeshsha Maxaafaa koyro timirtte gidida heezzatuppe kayma Kiristtaaneti tamaarana danddayiyobata ane beꞌoos.

YIHOOWI MEDHDHIDAAGAA

4. Yihoowi Medhdhidaagaa gidiyogaa eriyogee nuna waati maaddidee?

⁴ Hayyottiyanne wolqqama gidida Medhdhidaagee saꞌaanne saꞌan deꞌiya ubbabaa giigissidoogaa nuuni eroos. Geeshsha Maxaafay hagaadan gees: “Ubbabaa medhdhidaagee Xoossaa.” (Ibr. 3:4) Shin nuuni ha tumaappe tamaarana danddayiyo hara darobay deꞌees. Yihoowi nuna medhdhido gishshawu nubaa ubbabaa erees. Qassi I nuussi qoppeesinne nuussi keehi loꞌꞌobay aybakko erees. Hegaa gishshawu, Yihoowi Medhdhidaagaa gidiyogaa nuuni eriyogee nu deꞌoy malaalissiya daro ogetun laamettanaadaaninne ufayssiyagaa gidanaadan oottiis.

5. Nuuni nuna ziqqi oottiyageeta gidanaadan maaddana danddayiya tumay awugee? (Isiyaasa 45:9-12)

⁵ Yihoowi Medhdhidaagaa gidiyogaa qonccissiya tumaappe nuuni nuna ziqqi oottana koshshiyogaakka tamaarana danddayoos. Iyyoobi babaanne hara asaabaa xalaalaa qoppido wode Yihoowi ubbaa danddayiya Medhdhidaagaa gidiyogaa A hassayissiis. (Iyy. 38:1-4) Ha hassayissoy Xoossaa ogee asaa ogiyappe keehi aadhdhiyogaa Iyyoobi akeekanaadan maaddiis. Hegaara gayttidaagan, Xoossay erissidobaa yootiya Isiyasi guyyeppe, “Urqqai medhdhiyaagaa, ‘Ai oottai?’ yaagiiyye?” giidi xaafiis.—Isiyaasa 45:9-12 nabbaba.

6. Nuna Medhdhidaagee keehi hayyottiyagaanne wolqqaama gidiyogaa qoppiyogee keehi koshshiyoy awudee? (Misiliyakka xeella.)

⁶ Yihoowawu daro layttawu haggaazida issi uri kaaletuwa demmanawu Yihoowaninne A Qaalan ammanettiyogaa aggidi, ba qofan bessiyagaappe aaruwan ammanettiyogaa doommana danddayees. (Iyy. 37:23, 24) Hayyuwaninne gitatettan likketiyabi baynna bana Medhdhidaagaabaa issi uri qoppikko shin? (Isi. 40:22; 55:8, 9) Ha keehi koshshiya tumay he uri Yihoowa qofay A qofaappe keehi aadhdhiyogaa akeekanaadan, qassi bana ziqqi oottanaadan maaddees.

7. Raaheela Yihoowa dirijjitee laammidoban maayettanawu waatadee?

⁷ Siloveeniyan deꞌiya Raaheela bana Medhdhidaagaabaa qoppidoogee A Yihoowa dirijjitee laammidoban maayettanaadan maaddidoogaa akeekaasu. A hagaadan gaasu: “Sintta xeera gididi oottiyageeti kuuyidoban maayettanawu issi issitoo metootaas. Leemisuwawu, 2023 Oosuwa Kaalettiya Citaa Irpporttiya Paydo 8 taani beꞌa simmadakka, buuchchaa dichchida issi ishay haasayaa haasayiyogaa koyro beꞌido wode dagammaas. Hegaa gishshawu laamettidabaa meezetanawu tana maaddana mala Yihoowa woossaas.” Yihoowi Medhdhidaagaa gidiyo gishshawu, ba dirijjitiya kaalettiyo keehi loꞌꞌo ogiya I ubbatoo eriyogaa Raaheela akeekaasu. Dirijjitee mati akeekidoban woy ooratta kaaletuwan neeni maayettanawu metootikko, nena Medhdhidaagee keehi hayyottiyagaanne wolqqaama gidiyogaa loytta qoppanawu wodiya bazza.—Roo. 11:33-36.

XOOSSAY WAAYEE DEꞌANAADAN PAQQADIYOY AYBISSEE?

8. Waayee deꞌanaadan Xoossay paqqadiyo gaasuwa eridoogee nuna waati goꞌꞌidee?

⁸ Xoossay waayee deꞌanaadan paqqadiyoy aybissee? Hegaa zaaruwa erenna amaridaageeti Xoossaa bolli hanqqettoosona woy Xoossi mulekka baawa giidi qoppoosona! (Lee. 19:3) Shin waayiyawu gaasoy Yihoowa gidennan, laattido nagaraanne nuuni baliyo balaa gidiyogaa neeni tamaaradasa. Qassi Yihoowi danddayanchcha gidiyo gishshawunne I hanno gakkanawu waayiya xayssibeenna gishshawu, daro miiloone asay abaanne I waayiya xayssiyo ogiya erana danddayiyogaa tamaaradasa. (2 Phe. 3:9, 15) Ha tumay neeni minettanaadaaninne kaseegaappe aaruwan akko shiiqanaadan oottiis.

9. Yihoowi waayee deꞌanaadan paqqadiyo gaasuwa nuuni hassayana koshshiyo hanotati awugeeta gidana danddayiyonaa?

⁹ Yihoowi waayiya xayssanaashin nuuni naagiyo wodiyan danddayanchcha gidana koshshiyogaa akeekoos. Shin nu siiqiyo uri hayqqiyo wode, woy nuna woykko nu soo asaa metoy woy naaqoy gakkiyo wode waayiya xayssanawu Yihoowi keehi gamꞌꞌidabadan qoppidi yiillotana danddayoos. (Imb. 1:2, 3) Hegaa mala wodetun, Yihoowi xilloti waayettanaadan paqqadiyoy aybissakko loytti qoppiyogee loꞌꞌo.a (Maz. 34:19) I waayiya muleera xayssanawu halchchidoogaakka qoppana danddayoos.

10. Aana ba aayyiya hayqqa simmin minettanaadan maaddidabay aybee?

¹⁰ Waayee gakkanaadan Xoossay paqqadiyoy aybissakko nuuni eriyogee metuwa genccanaadan nuna maaddana danddayees. Hindde Ano Abban, Maayote haruuruwan deꞌiya Aana hagaadan gaasu: “Amarida layttaappe kase ta aayyiya hayqqin keehi kayyottaas. Shin metuwawu gaasoy Yihoowa gidennaagaa taani ubbatoo qoppays. I meto ubbaa xayssanawunne nu siiqiyo hayqqidaageeta denttanawu yeemottees. Hageeta qoppiyogee taani woppu gaanaadaaninne minettanaadan oottiis.”

11. Yihoowi waayee deꞌanaadan paqqadiyo gaasuwa nuuni eriyogee aggennan markkattanaadan waati maaddii?

¹¹ Xoossay waayee deꞌanaadan paqqadiyo gaasuwa xeelliyagan nuuni tumaa eriyogee aggennan markkattanaadan nuna denttettana danddayees. Yihoowi danddayiyoy asay zilꞌꞌetti laamettanaadaaninne attanaadan koyiyo gishshawu gidiyogaa Pheexiroosi yooti simmidi hagaadan giis: “Intte ay mala asa gidana koshshiyakko qoppite; intte geeshshabaa haniyanne Xoossaayyo ammanettiyogaa bessiyabaa oottiya asa gidana koshshees.” (2 Phe. 3:11) ‘Xoossaayyo ammanettiyogaa bessiya’ oosotuppe issoy nu haggaazuwa. Nu Aawaagaadan nuunikka asaa siiqoos. Xoossay ehiyo xillotettay kumido ooratta alamiyan eti deꞌanaadan koyoos. Yihoowi ne heeran deꞌiya asati baayyo goynniyo injjiya demmanaadan hanotaa danddayan giigissees. Xoossaara oottiyonne wurssettay yaanaappe kase danddayettida keenan daro asay abaa eranaadan maaddiyo aawatettay neessi deꞌees!—1 Qor. 3:9.

NUUNI “WURSSETTA GALLASSATUN” DEꞌOOS

12. Nuuni “wurssetta gallassatun” deꞌiyogaa eriyogee nuna waati goꞌꞌidee?

¹² Geeshsha Maxaafay “wurssetta gallassatun” deꞌiya asaa eeshshay ay mala gidanaakko geeshshidi yootees. (2 Xim. 3:1-5) Nu yuushuwan deꞌiya asaa eeshshaa nuuni beꞌiyo wode Geeshsha Maxaafay yootiyobay tuma gidiyogaa loytti akeekana danddayoos. Asaa eeshshay yaa iiti iiti biyogaa nuuni beꞌiyogee Xoossaa Qaalay tuma gidiyogaa awudeegaappenne aaruwan nuuni loytti ammanettanaadan oottiis.—2 Xim. 3:13-15.

13. Yesuusi Luqaasa 12:15-21n yootido leemisuwara maayettiya hanotan nuuni nuna woygi oychchana danddayiyoo?

¹³ Nuuni wurssetta gallassatun deꞌiyogaa eriyogee keehi koshshiyaban xeelaa wottanaadankka nuna maaddees. Yaatiyogee keehi koshshiyo gaasuwa Yesuusi Luqaasa 12:15-21n yootido leemisuwappe tamaarana danddayoos. (Nabbaba.) Dure bitanee ‘akeeki baynnaagaa’ geetettidoy aybissee? Bitanee dure gidiyo gishshawu gidennan, I kaseyiyobay bala gidiyo gishshataassa. I ‘Xoossaa xeelan dure gidennan, baayyo aquwa shiishshiis.’ Bitanee ba wodiya akeekan goꞌettibeennaagee gita bala; ayssi giikko, I paxa takkanay guutta wode xalaalaassa. He bitaniyawu Xoossay hagaadan giis: “Neeni hachchi qammi hayqqana.” Wurssettay matido ha wodiyan nuuni nuna hagaadan oychchana danddayoos: ‘Taani ta wodiya akeekan goꞌettiyogaa bessiya halchchoti taayyo deꞌiyonaa? Taani ta naati ay mala halchchota kessanaadan maaddiyanaa? Ta wolqqaa, ta wodiyanne ta miishshaa goꞌettada taayyo buquraa shiishshiyogaa kaseyiyanaayye, saluwan buquraa dagayiyogaa kaseyiyanaa?’

14. Nuuni wurssetta gallassatun deꞌiyogaa hassayiyogee keehi koshshiyaba gidiyogaa akeekanaadan Miiki hanotay nuna waati maaddii?

¹⁴ Nuuni tumuppe wurssetta wodiyan deꞌiyogaa qoppiyogee nu deꞌuwa goꞌettiyo keehi loꞌꞌo ogiya eranaadan nuna maaddana danddayees. Miiko giyo michchee deꞌuwan hanidabaykka hegaa. A hagaadan gaasu: “Taani naaꞌꞌantto xekkaa timirttiya wurssa simmada, mehiya doꞌaabaa xannaꞌanaadan maaddiya oosoy tawu deꞌanaadan koyaas. Taani ubba wode aqinye gidanawunne aassiyageeti keehi koshshiyo sohuwan haggaazanawukka halchchaas. Ta galchchan deꞌiya amarida ishanttinne michchontti taani koyiyo oosuwa oottaydda aqinye gidana woy aassiyageeti keehi koshshiyo sohuwan haggaazana danddayiyakkonne loytta qoppanaadan taassi yootidosona. Matan ha alamee xayanaagaanne taani ooratta alamiyan ta koyiyogaa keena daro mehiya doꞌaabaa merinawu xannaꞌana danddayiyogaa eti tana hassayissidosona. Yaatiyo gishshawu maaddiya hiillaa qantta wodiyan tamaaranawu kuuyaas. Hegee taani ubba wode aqinye gidada haggaazaydda tawu koshshiyabaa kunttanawu maaddiya oosuwa demmanaadaaninne guyyeppe aassiyageeti keehi koshshiyo Ekuwadore baanaadan maaddiis.” Miikanne I azinay he biittan haꞌꞌi woradaa oosuwa oottoosona.

15. Hanno gakkanawu mishiraachchuwa siyanawu koyibeennaageetun hidootaa qanxxana koshshennay aybissee? Leemisuwa yoota. (Misiliyakka xeella.)

¹⁵ Asay mishiraachchuwa siyennan ixxiyo wode nuuni hidootaa qanxxana koshshenna. Asay laamettana danddayees. Yesuusa ishaa Yaaqooba hanotaa ane beꞌa. Yesuusi diccidi Mase gidiyo wodenne hara ay asappekka aaruwan tamaarissiyo wode I beꞌiis. Shin Yaaqoobi daro layttawu Yesuusa kaallibeenna. Yesuusi hayquwappe denddi simmin Yaaqoobi A kaalliyagaanne minni haggaaziyagaa gidiis!b (Yoh. 7:5; Gal. 2:9) Hanno gakkanawu mishiraachchuwa siyanawu koyenna ne dabbotun hidootaa qanxxennan aggiyogeenne kase neeni yootin siyanawu koyibeennaageetussi zaarettada markkattiyogee keehi koshshiyaba. Nuuni wurssetta gallassatun deꞌiyo gishshawu sabbakuwa oosoy keehi eesoyiyaba gidiyogaa hassaya. Guyyeppe asay neeni yootidobaa hassayidi, geella gita waaye doommi simminkka hegaa oosuwan peeshshana danddayees.c

GEESHSHA MAXAAFAA KOYRO TIMIRTTETA UBBATOO NASHSHA

16. Geeshsha Maxaafaa koyro timirttetuppe neeni waana goꞌettadii? (“Harata Maaddanawu Hegeeta Goꞌetta” giya saaxiniyakka xeella.)

¹⁶ Nu dirijjitee giigissiyo ayyaanaabaa qumaappe amaridaageeti Geeshsha Maxaafaa tumaa mule siyi erennaageetussi giigoosona. Leemisuwawu, saaminttan saaminttan shiiqiya dere haasayati, jw.org saytiyan kiyiya amarida huuphe yohotinne biidoti, qassi asawu immiyo maxeeteti waannatettan Yihoowa Markka gidenna asatussi giigoosona. Hageetun qoncciyabati Geeshsha Maxaafaa koyro timirtteta gidikkokka, nuna goꞌꞌoosona. Nuuni Yihoowa loytti siiqanaadan, A Qaalaa mintti ammananaadaaninne nuuni Geeshsha Maxaafaa tumaa harata tamaarissiyo wode qara gidanaadan hegeeti nuna maaddoosona.—Maz. 19:7.

17. Geeshsha Maxaafaa koyro timirtteta neeni wotta dentta qoppana danddayiyo hanotati awugeetee?

¹⁷ Nuuni Yihoowa Markka gidiyogaadan, issi Geeshsha Maxaafaa tumaa nuuni kase akeekiyo ogee laamettiyo wode keehi ufayttoos. Gidikkokka, nuuni koyro tamaaridonne Yihoowara dabbotiyogaa doommanaadan maaddida keehi koshshiya Geeshsha Maxaafaa tumaakka loytti nashshoos. Yihoowa dirijjitee immiyo kaaletuwawu azazettiyogaa aggidi, nu qofan ammanettanawu nuuni paacettikko, ha dirijjitiya kaalettiyagee hayyottiyanne wolqqaama gidida, nuna Medhdhida Yihoowa gidiyogaa nuna ziqqi oottidi hassayana danddayoos. Nuuni woy nu siiqiyo uri paaciya gencciiddi deꞌikko, Yihoowi waayee gakkanaadan paqqadidoy aybissakko wotti dentti qoppiyogan danddayanchcha gidana danddayoos. Qassi nu wodiyanne nu aquwa waati goꞌettanaakko kuuyiyo wode nuuni wurssetta gallassatun deꞌiyogaanne ha alamee xayanawu keehi matidoogaa hassayoos. Geeshsha Maxaafaa koyro timirtteti ubbatoo nuna minttanaadan, denttettanaadaaninne hayyottiya asa oottanaadan amottoos.