Bawu Deꞌiyaban Ufayttiyo “Daroti Erennabaa” Neeni Eradii?

1. Deꞌiyaban ufayttiyogaa giyogee woygiyogee, qassi woygiyogaa gidennee?

NEENI neeyyo deꞌiyaban ufayttay? Bawu deꞌiyabay gidana giya uri haꞌꞌi demmido anjjotun xeelaa wottiyogan, ufaytteesinne woppu gees. I issi issibati baayyo baynna gishshawu yiillotenna woy hanqqettenna. Gidoppe attin, nuussi deꞌiyaban ufayttoos giyogee nu deꞌuwan halchchiyobi baawa giyogaa gidenna. Leemisuwawu, issi uri Yihoowawu loytti haggaazanawu koyiyogee bala gidenna. (Roo. 12:1; 1 Xim. 3:1) Shin I qoppidoogaadan sohuwara haggaazo maataa demmana xayikkokka, ufayttiyogaa aggenna.

2. Bawu deꞌiyaban ufayttennan aggiyogee keehi iita gidiyoy aybissee?

² Bawu deꞌiyaban ufayttennan aggiyogee iitabaa kaalettana danddayees. Leemisuwawu, banttawu deꞌiyaban ufayttenna issoti issoti banttawu darin koshshennabaa shammanawu keehi daro saatiyawu oottoosona. Issi issi Kiristtaanetikka miishshaanne amottido harabata wuuqqidoogee azzanttiyaba. Eti hagaadan qoppana danddayoosona, ‘Hagee tabaa gidana bessees,’ ‘Taani hagaa haꞌꞌi koyays,’ woy ‘Taani miishshaa haꞌꞌi ekkada guyyeppe zaarana danddayays.’ Shin, wuussa ubbay Yihoowa azzantteesinne cayissees. (Lee. 30:9) Harati qassi issi haggaazo maataa demmibeennaagan keehi azzanidi Yihoowawu haggaaziyogaa muleera aggidosona. (Gal. 6:9) Issi Yihoowa ashkkaray hegaadan oottanawu qoppana danddayiyoy aybissee? Hegawu gaasoy he uri bawu deꞌiyaban ufayttiyogaa leddan leddan aggidoogaa gidana danddayees.

3. Nuuni Piliphphisiyusa 4:11, 12​ppe minttettiyabaa ay tamaarana danddayiyoo?

³ Nuuni ubbaykka nuussi deꞌiyaban ufayttiyageeta gidana danddayoos. Kiitettida Phawuloosi ‘ba hanotay ayba gidinkka koshshiyaban bana danddayidi deꞌiyogaa tamaaridoogaa’ yootiis. (Piliphphisiyusa 4:11, 12 nabbaba.) I qashuwan deꞌiiddi hegaa xaafiis. Gidikkonne, I ufayttiyogaa aggibeenna. I bawu deꞌiyaban ufayttiyo ‘daroti erennabaa tamaariis.’ Nuuni nuussi deꞌiyaban ufayttanawu metootikko, Phawuloosi yootidobaynne A deꞌuwan hanidabay nu hanotay ayba gidikkonne, nuunikka nuussi deꞌiyaban ufayttana danddayiyogaa bessees. Nuuni nu hanotaara gayttidaagan nuussi deꞌiyaban ufayttiyogee metennaba giidi qoppana koshshenna. Shin, nuuni nuussi deꞌiyaban ufayttiyogaa tamaarana koshshees. Waatidi? Nuuni nuussi deꞌiyaban ufayttanaadan nuna aybi maaddana danddayiyakko ha huuphe yohuwan beꞌana.

GALATIYAGAA GIDA

4. Galatiyageeta gidiyogee nuuni nuussi deꞌiyaban ufayttanaadan waati maaddii? (1 Tasalonqqe 5:18)

⁴ Galatiya uri bawu deꞌiyaban ufayttiyogee qoncce. (1 Tasalonqqe 5:18 nabbaba.) Leemisuwawu, nuuni nuussi koshshiyabay deꞌiyo gishshawu galatiyo wode nuuni koyikkokka demmibeennabatussi darin hirggennan aggana danddayoos. Nuuni haꞌꞌi nuuyyo deꞌiya haggaazo maataa nashshiyageetanne wotti dentti qoppiyageeta gidikko, ooratta haggaazo maataa demmiyogaa ubbatoo qoppiyogaappe, nuussi deꞌiya aawatettaa polanawu minni oottoos. Nuuni galatiyageeta gidiyogee nuussi loꞌꞌo gidiyogaa Yihoowi erees; qassi nuuni woossiyo wode A galatanaadan Geeshsha Maxaafaa baggaara I yootiyoy hegaassa gidana danddayees. Nuuni galatiyo wode, ‘asi akeekana danddayenna Xoossaa sarotettaa’ demmoos.—Pili. 4:6, 7.

5. Israaꞌeelati galatana koshshiyo gaasoti awugeetee? (Misiliyakka xeella.)

⁵ Israaꞌeelatu hanotaa beꞌa. Eti kase Gibxxen miyogaa mala qumaa demmana danddayibeenna gishshawu, Yihoowa bolli darotoo zuuzummidosona. (Qoo. 11:4-6) Bazzuwan duussay metiyogee tuma. Yaatin eti banttawu deꞌiyaban ufayttanaadan aybi maaddanee? Yihoowi banttayyo oottidobaa eti nashshananne wotti dentti qoppana koshshees. Eti Gibxxen aylle gididi keehi naaqettido wode, Yihoowi Gibxxetu bolli tammu boshaa yeddidi eta ashshidoogaa eti hassayana koshshees. Israaꞌeelati laꞌa kiyido wode, Gibxxetu biraa, worqqaanne maayuwa “bonqqi ekkidi biidosona.” (Kes. 12:35, 36) Gibxxeti Israaꞌeelata Zoꞌo Abbaa gakkanawu yedettido wode, Yihoowi malaalissiya hanotan haattaa naaꞌꞌawu shaakkiis. Qassi eti bazzuwara biyo wode, I ubba galla eta mannaa miziis. Yaatin, Israaꞌeelati qumaa xeelliyagan zuuzummidoy aybissee? Israaꞌeelati banttawu deꞌiyaban ufayttibeennay etawu koshshiya qumay xayido gishshawu gidennan, eti banttawu deꞌiyabawu galatennaageeta gidiyo gishshataassa.

6. Nuuni galatiyageeta gidanaadan nuna maaddana danddayiyabati awugeetee?

⁶ Galatiyagaa gidanaadan nena aybi maaddana danddayii? Koyruwan, neeni demmido loꞌꞌobata qoppanawu ubba galla wodiya bazza. Neeni galatanaadan oottiya naaꞌꞌubaa woy heezzubaa xaafana danddayaasa. (Zil. 3:22, 23) Naaꞌꞌanttuwan, galatiyogaa yoota. Harati neessi oottidobawu galatanaassi sintta xeera gida. Ubbaappe aaruwan, Yihoowa ubbatoo galata. (Maz. 75:1) Heezzanttuwan, galatiyageetuura mata lagge gida. Nu laggeti galatennaageeta woy darotoo boriyageeta gidikko, nuunikka eta mala gidana danddayoos. Shin nu laggeti galatiyageeta gidikko, nuuni eta loꞌꞌo leemisuwa kaallidi galatiyageeta gidana danddayoos. (Zaa. 1:26-28; 2 Xim. 3:1, 2, 5) Nuuni galatiyogaa yootiyo injjiya koyiyageeta gidikko, nu metuwaninne nuussi deꞌanaadan koyiyo nu demmibeennabatun darin azzanokko.

7. Aacha galatiyaro gidanawu waatadee, qassi hegee ay demissidee?

⁷ Indonezhiyan deꞌiya Aachi hanotaa beꞌa. A hagaadan gaasu: “Koronaa harggiya wodiyan, taani ta hanotaa ta mala Kiristtaanetu hanotaara geeddarssiyogaa doommaas. Hegaappe denddidaagan, tawu deꞌiyaban ufayttiyogaa aggaas.” (Gal. 6:4) A ba qofaa laammanaadan maaddidabay aybee? Aacha hagaadan gaasu: “Taani galla galla demmido anjjota qoodiyogaanne Xoossaa dirijjitiya yara gididoogan demmido daro loꞌꞌobata wotta dentta qoppiyogaa doommaas. Yaatada, ha ubbabaa gishshawu Yihoowa galataas. Hegee taani tawu deꞌiyaban ufayttanaadan maaddiis.” Neeni neeyyo deꞌiyaban ufayttennaagaa gidikko, galatiyagaa gidanawu iigaara issi malabaa oottana danddayay?

NENA ZIQQI OOTTIYAGAA GIDA

8. Baaruki waanidee?

⁸ Xoossay erissidobaa yootiya Ermmaasa xaafee Baaruki issi wode ba deꞌuwa hanotan ufayttiyogaa aggiis. Baarukawu deexo aawatettay imettiis. Galatenna Israaꞌeelati Yihoowawu azazettibeenna gishshawu, eta bolli gakkanabaa Ermmaasi yootiyo wode I A maaddana koshshiis. Shin Baaruki oottanaadan Yihoowi koyidoban xeelaa wottiyogaa aggidi, ba oottana koyidobaa bessiyagaappe aaruwan qoppiyogaa doommiis. Yihoowi Ermmaasa baggaara Baarukawu hagaadan giis: “Neeni neeyyo gitabaa koyaiyye? Hegaa koyoppa.” (Erm. 45:3-5) Hegee Yihoowi Baarukawu, “Neessi haꞌꞌi deꞌiyaban ufaytta” giidoogaa mala. Baaruki Yihoowi yootidobaa siyidi ubbatoo A mata dabbo gididi deꞌiis.

9. Koyro Qoronttoosa 4:6, 7y yootiyogaadan, nuna ziqqi oottiyogee nuuni ay akeekanaadan maaddii? (Misiliyakka xeella.)

⁹ Issi Kiristtaanee issi haggaazo maatay baayyo bessiyabadan issi issitoo qoppana danddayees. I daro hiillay deꞌiyogaa, minni oottiyagaa woy Yihoowawu daro layttawu haggaazidaagaa gidiyo gishshawu, hegaadan qoppana danddayees. Shin, I keehi koyiyo maataa harati demmana danddayoosona. He allaalliyara gayttidaagan I ay qoppana danddayii? I kiitettida Phawuloosi 1 Qoronttoosa 4:6, 7n yootidobaa qoppana danddayees. (Nabbaba.) Nuussi deꞌiya maata ubbaanne hiilla ubbaa Yihoowappe demmida. Ha imotati nuuyyo bessiyabata gidokkona. Ha ubbabati laggetiyabi baynna Yihoowa kehatettaa qonccissiyabata.—Roo. 12:3, 6; Efi. 2:8, 9.

10. Nuuni nuna ziqqi oottiyageeta waani gidana danddayiyoo?

¹⁰ Yesuusi oottidobaa wotti dentti qoppiyogan nuunikka nuna ziqqi oottiyageeta gidana danddayoos. Yesuusi ba kiittidoogeetu tohuwa meeccido qammi hanidabaa beꞌa. Kiitettida Yohaannisi hagaadan giis: ‘Yesuusi [1] Aaway ubbabaa A kushiyan wottidoogaa, [2] I Xoossaa matappe yiidoogaanne [3] Xoossaakko biyogaa erido gishshawu, bana kaalliyageetu tohuwa meecciyogaa doommiis.’ (Yoh. 13:3-5) Yesuusi ba tohuwa ba kiittidoogeeti meeccana bessiyabadan qoppana danddayees. Shin I saꞌan deꞌiyo wode, ishalonne injje deꞌuwa deꞌana bessiyabadan mule qoppibeenna. (Luq. 9:58) Yesuusi bana ziqqi oottiis; qassi baayyo deꞌiyaban ufayttiis. I nuuyyo wottiyobi baynna leemiso gidiis.—Yoh. 13:15.

11. Deenisi baayyo deꞌiyaban ufayttanaadan maaddidabay aybee?

¹¹ Nezerlandden deꞌiya Deenisa giyo issi ishay Yesuusaagaadan bana ziqqi oottanawu baaxetikkokka yaatanawu metootidoogaa yootiis. I hagaadan giis: “Taani koyiyo maataa issi uri demmiyo wode he maatay tawu bessiyabadan taani qoppiyo gishshawu issi issitoo yiillotays. Hegaa mala wodetun bana ziqqi oottiyogaabaa xannaꞌays. Bana ziqqi oottiyogaabaa yootiya amarida xiqiseta sohuwara demmanawunne zaarettada nabbabanawu JW Laybireeriyan issippe wottays. Qassi bana ziqqi oottiyogaabaa yootiya amarida haasayata ta silkkiyan dawunlode oottada hegeeta darotoo siyays.a Nuuni oottiyo ubbaban nuna gidennan, Yihoowa bonchchissana koshshiyogaa tamaaraas. Nuuni ubbay guuttabaa oottanaadan Yihoowi kehatettan paqqadidaba gidikkokka, oosuwa poliyagee A.” Neeni koyido maataa demmabeenna gishshawu azzaniyaba gidikko, kaseegaappe aaruwan nena ziqqi oottanawu baaxeta. Hegee neeni Yihoowara dabbotido dabbotaa minttananne neessi deꞌiyaban neeni ufayttanaadan maaddana.—Yaaq. 4:6, 8

NE HIDOOTAA WOTTA DENTTA QOPPA

12. Nuuni nuussi deꞌiyaban ufayttanaadan maaddiya sinttanaa hidootay aybee? (Isiyaasa 65:21-25)

¹² Nuuni sinttappe demmana ufayssiya hidootaa wotti dentti qoppiyo wode nuussi deꞌiyaban loytti ufayttoos. Yihoowi nuna metiyabata akeekiyogaa Isiyasa maxaafaa baggaara yootiis. Shin I he meto ubbaa xayssanaagaakka yootiis. (Isiyaasa 65:21-25 nabbaba.) Nuuni injje keettan hirggi baynnan deꞌana. Nuuyyo ufayssiya oosoy deꞌana; qassi payyatettawu maaddiyanne malꞌꞌiya qumaa nuuni maana. Nuuni nu bolli woy nu naatu bolli iitabay gakkana giidi mule hirggokko. (Isi. 32:17, 18; Hiz. 34:25) Nu sinttanaa deꞌoy ufayssiyagaanne ammanttiyagaa.

13. Nuuni nu hidootaa loytti qoppana koshshiyo hanotati awugeetee?

¹³ Ha wodiyan nuuni nu hidootaa qoppiyogee awudeegaappenne aaruwan keehi koshshiyaba. Aybissi? Nuuni “wurssetta gallassatun” deꞌiyonne nuna ubbaa ‘waayissiya’ metoti gakkiyo gishshataassa. (2 Xim. 3:1) Yihoowi nuussi koshshiya kaaletuwanne wolqqaa immiyogan, qassi kaafiyogan genccanaadan nuna ubba galla maaddees. (Maz. 145:14) Nu hidootay waayissiya wodiyan nuna keehi maaddees. Neeni ne soo asawu koshshiyabaa kunttanawu baaxetaydda deꞌennan aggakka. Hegaa giyogee deꞌuwassi koshshiyabaa demmanawu neeni ubbatoo baaxetana deꞌaasa giyogee? Mule gidenna! Yihoowi Gannatiyan neessi koshshiyabaappe aarobaa immanawu qaalaa geliis. (Maz. 9:18; 72:12-14) Neeni caddi oyqqiya harggiyan, guuggiya harggiyan, woy cimatettaa gaasuwan waayettaydda deꞌennan aggakka. Shin hegaa giyogee neeni mule paxennan waayettaydda deꞌana giyogee? Mulekka. Harggeenne hayqoy Xoossay ehiyo ooratta alamiyan xayana. (Ajj. 21:3, 4) Ha hidootay ha wodiyan nuna gakkiiddi deꞌiyaban yiillotennaadan woy hanqqettennaadan maaddees. Nuna naaqoy gakkikkokka, woy nu siiqiyo uri hayqqikkokka, nuuni sahettikkokka, woy hara metoy nuna gakkikkokka, nuuni ufayttananne woppu gaana danddayoos. Aybissi? Ha wodiyan nuna gakkiya metoy ayba gidikkokka, nuuni ‘waayettiyo waayee guutta wodiyassa’ gidiyogaanne ooratta alamiyan nuuni zaarettidi waayettennaagaa eriyo gishshataassa.—2 Qor. 4:17, 18

14. Nuuni nu hidootaa waati minttana danddayiyoo?

¹⁴ Nu sinttanaa hidootay nuussi deꞌiyaban ufayttanaadan nuna maaddees. Yaatin Yihoowi qaalaa gelidobati polettanaagaa nuuni ammanettanaadan nuna aybi maaddana danddayii? Issi uri haahuwan deꞌiyabaa loytti beꞌanawu manaaxxiriya wottiyogee koshshana danddayiyogaadan, nuuni sinttappe demmana Gannatee nuussi qoncci beettanaadan nu hidootaa minttanawu issi issibaa oottiyogee koshshana danddayees. Miishshaara gayttidaagan nuuni keehi unꞌꞌettiyo wode miishshay, acoynne hiyyeesatettay xayiyo wode deꞌoy ay mala gidanaakko qoppana danddayoos. Nuuni hanno gakkanawu demmibeenna haggaazo maataa xeelliyagan unꞌꞌettiyaba gidikko, nuuni wottiyobi baynnaageeta gididi Yihoowawu daro shaꞌu layttawu haggaaziyo wode, hegaa malabawu hirggiyogee koshshennaagaa qoppana danddayoos. (1 Xim. 6:19) Nuuni ha wodiyabawu hirggiyogaa aggidi, sinttanaabaa wotti dentti qoppanawu koyro heeran metootana danddayoos. Shin sinttanaa xeelliyagan Yihoowi qaalaa gelidobaa nuuni loddan loddan yeemuwan naagiyageeta gidana danddayoos.

15. Kiristta yootidobaappe neeni ay tamaaray?

¹⁵ Qommoora abay odettido Deenisa keettaayyiyo Kiristto hidootay waati maaddidaakko beꞌa. A hagaadan gaasu: “Ta dibbay shugganaadan oottiya harggee tana oyqqiis. Taani hemettana danddayenna gishshawu goomman biya wombbaraa goꞌettana koshshiis; qassi daro wodiya hiittan takkays. Tana ubbatoo sakkees. Ta hanotay iiti iiti baanaagaa ta dottoree mati yootiis. Shin taani sohuwara hagaadan qoppaas: ‘I sinttanaabaa qoppiyo ogee taagaappe dummatees.’ Taani woppu gaanaadan maaddiya ta hidootan xeelaa wottaas. Ha wodiyan taani daro metuwa genccana koshshikkokka, ooratta alamiyan ufayssiya deꞌuwa demmana!”

‘AYYO YAYYIYAGEETUYYO AYBINNE PACCENNA’

16. Kawuwa Daawiti Yihoowayyo yayyiyageetussi “aybinne paccenna” gaana danddayidoy aybissee?

¹⁶ Nuuni nuussi deꞌiyaban ufayttikkokka metiyabati nuna gakkoosona. Kawuwa Daawitabaa qoppa. A naatuppe baa giishin heezzati hayqqidosona. Issoti issoti A wordduwan mootidosona, laggeti A kaddidosona, qassi issi kawoy A woranawu koyidi daro layttawu yedettiis. Ha ubba metuwa giddonkka Daawiti bawu deꞌiyaban ufayttiis. I Yihoowabaa hagaadan giis: ‘Ayyo yayyiyageetuyyo aybinne paccenna.’ (Maz. 34:9, 10) I hagaadan gaana danddayidoy aybissee? Deꞌuwan metoy gakkennaadan Yihoowi teqqana xayikkokka, awu koshshiyabaa ubbatoo kunttanaagaa Daawiti erido gishshataassa. (Maz. 145:16) Daawitaagaadan nuunikka, nu meto ubbaa genccanaadan Yihoowi nuna maaddanaagaa ammanettana danddayoos. Nu hanotay ayba gidinkka nuuni woppu gaananne ufayttana danddayoos.

17. Neeni neeyyo deꞌiyaban ufayttana koyiyoy aybissee?

¹⁷ Yihoowi nuuni nuussi deꞌiyaban ufayttanaadan koyees. (Maz. 131:1, 2) Yaaniyo gishshawu, neessi deꞌiyaban ufayttanawu neeyyo danddayettida ubbabaa ootta. Neeni galatiyagaa gidanawu, nena ziqqi oottanawunne ne hidootaa minttanawu baaxetikko, “deꞌiyaban ufayttada deꞌiyogaa tamaaraas” gaana danddayaasa.—Pili. 4:11, tohossa qofaa.